Nga Pɔlu klɛli Efɛzifuɛ mun’n

6 Ba mun, maan amun ɲin yi amun si mun nin amun nin mun+ kɛ e Min’n fa kunndɛ’n sa. Afin i sɔ yolɛ’n ti su. 2 “Bu ɔ si nin ɔ nin be sran.”+ Mmla klikli’n yɛ ɔ o lɛ-ɔ, yɛ be tali su nda seli kɛ: 3 “Sɛ a yo sɔ’n, ɔ liɛ yó ye, kpɛkun á cɛ́ asiɛ’n su.” 4 Siɛ mun, amun kusu nán amun fɔkɔ amun mma’m be awlɛn.+ Sanngɛ an nian Zoova* i mmla’n+ nin i afɔtuɛ’m be su ta be.+

5 Kanga mun, maan amun ɲin yi amun min mun.+ I sɔ yolɛ nun’n, maan amun sro be yɛ amun bu be sran.* Amun tu amun klun be yo sɔ, kɛ Klisi yɛ amun su yo mɛn i sa. 6 Nán blɛ mɔ sran’m be ɲin ta amun’n, i nun ngunmin yɛ ɔ fata kɛ amun yo sɔ naan be klun jɔ amun wun-ɔn.+ Sanngɛ an yo i sɔ afin amun ti Klisi i kanga mɔ be tu be klun be yo Ɲanmiɛn i klun sa’n.+ 7 Asa ekun’n, maan junman mɔ an di man amun min mun’n, i dilɛ’n yo amun fɛ kpa kɛ Zoova* yɛ amun su di mɛn i sa.+ Nán amun bu i kɛ klɔ sran yɛ amun su yo mɛn i-ɔ. 8 Afin kannzɛ sran kun ti kanga annzɛ ɔ ti diewa’n, amun si kɛ like kpa ng’ɔ yo’n, i su yɛ Zoova* nían ɔ́ fɛ́ i nuan like mɛ́n i-ɔ.+ 9 Amun nga amun le kanga’n, maan amun nin be tran sɔ wie titi. Nán an wlawla be ɲin nglonglo. Afin amun si kɛ be Min’n m’ɔ ti amun Min wie’n ɔ o ɲanmiɛn su lɔ,+ yɛ ɔ kpaman sran nun.

10 Min ndɛ’n i atabo’n yɛ: Maan e Min’n fɛ i kwlalɛ’n+ m’ɔ leman wunsu’n tin amun. 11 An wla Ɲanmiɛn i alɛ ninnge’m be kwlaa.+ I liɛ’n, ninnge nga Suɛn Tɔnfuɛ’n yo be gblɛ nun fa laka sran mun’n, amún jrán be ɲrun kekle. 12 Afin nán klɔ sran yɛ e nin i e kun-ɔn.*+ Sanngɛ e nin awa mun nin be nga be le kwlalɛ’n, ɔ nin mɛn siefuɛ mɔ be o aosin nga nun’n nin aolia nun sran tɛtɛ+ mɔ be o ɲanmiɛn su lɔ’n yɛ e kun-ɔn. 13 I sɔ’n ti’n, an wla Ɲanmiɛn i alɛ ninnge’m be kwlaa.+ I liɛ’n, amún trá amun awlɛn ɲrɛnnɛn blɛ’n nun. Yɛ kɛ amun ko wie i kwlaa yo’n, amún jrán kekle.

14 I sɔ’n ti’n, an jran kekle, an fa ndɛ nanwlɛ’n ci amun bo kɛ be fa kplo be ci be bo’n sa,+ yɛ an fa sa nuan su sɛsɛ yolɛ’n wla amun wun kɛ like kokloko nga be wla be fa sasa be wue’n sa.+ 15 Asa ekun’n, maan amun wun mɔ an buabua bo jasin fɛ’n ɔ yo kɛ amun ja ngbabua sa.+ 16 Asa kusu’n, maan Ɲanmiɛn su mɔ amun lafi’n, ɔ yo kɛ ɲrɛn dan wie sa amun sa nun.+ I liɛ’n, klunwifuɛ’n i ta mma m’ɔ sɔ be nuan to’n, amún fá núan be.+ 17 Asa ekun’n, an fa delɛ mɔ Ɲanmiɛn de amun’n yo kɛ amun kpongbo kle sa.+ Yɛ an fa Ɲanmiɛn wawɛ’n i tokofi’n mɔ yɛle Ɲanmiɛn i ndɛ’n.+ 18 Kɛ ɔ́ yó sɔ’n, maan Ɲanmiɛn srɛlɛ’n i wafawafa’n kwlaa+ yo amun cinnjin, an srɛ i, yɛ an kpɛtɛ i blɛ kwlaa nun i wawɛ’n i dunman nun.+ I sɔ’n ti’n, maan amun ɲin tran su, an srɛ Ɲanmiɛn tankaan kpa mɛn i sran’m be kwlaa titi. 19 Asa ekun’n, an srɛ Ɲanmiɛn man min wie naan sɛ n uke min nuan’n, n wun ndɛ’n i kanwlɛ. I liɛ’n, kɛ ń kán Ɲanmiɛn i ndɛ m’ɔ ti fiawa’n i su jasin fɛ’n ń klé sran mun’n, ń kɛ́n i yakpa su.+ 20 Ndɛ sɔ’n yɛ be sunmannin min+ kɛ n kan-ɔn. I ti yɛ b’a ci min nin jrɔkɔ yɛ. An srɛ Ɲanmiɛn man min naan m’an kwla kan jasin fɛ sɔ’n i ndɛ yakpa su kɛ ng’ɔ nin i fata’n sa.

21 Kɛ ɔ ko yo naan amun kusu amun a si min su ndɛ’n ɔ nin sa ng’ɔ o min su’n, Tisiki+ m’ɔ ti e niaan kpa mɔ kusu ɔ ti e Min’n i junman difuɛ kpa’n, ɔ́ wá kán min su ndɛ’n kwlaa ɔ́ klé amun.+ 22 I sɔ’n ti yɛ n su sunmɛn i amun wun lɔ’n niɔn. I liɛ’n, ɔ́ kán e su ndɛ klé amun, yɛ ɔ́ fɔ́nvɔ amun.

23 Maan e Min Zezi Klisi nin e Si Ɲanmiɛn be yo maan aniaan’m be di fɔundi naan be klo be wun yɛ be lafi Ɲanmiɛn su. 24 Maan be kwlaa nga be klo e Min Zezi Klisi kpa’n, be ɲan ye titi.