Ɲanndra Mun

3 Min wa, nán maan ɔ wla fi like nga n kle’n* su,

tu ɔ klun nanti min mmla’m be su,

 2 afin bé yó maan cɛn

nin afuɛ nga á dí’n, bé sɔ́n kpanngban kpa, yɛ ɔ wun jɔ́ wɔ fɔuun.+

 3 Nán yaci klun ufue yolɛ* nin klanman nantilɛ.*+

Fa be cici ɔ kɔmin,

klɛ be ɔ awlɛn’n su kɛ be fa klɛ like yɔbuɛ su’n sa.+

 4 I liɛ’n, Ɲanmiɛn nin klɔ sran mun+

be klun jɔ́ ɔ wun, yɛ bé bú wɔ akunndanfuɛ.

 5 Fa ɔ wla’n kwlaa guɛ i Zoova su,+

nán lafi* ɔ bɔbɔ ɔ akunndan liɛ’n su.+

 6 Like kwlaa nga á yó’n, bu i akunndan,+

yɛ i kusu bó ɔ ɲrun atin.+

 7 Nán bu ɔ wun ngwlɛlɛfuɛ.+

Sro Zoova yɛ kaci ɔ sin si sa tɛ’n.

 8 I liɛ’n, ɔ wunnɛn’n* sánndi wɔ,

yɛ á* wún ɔ wun fɛ.

 9 Fa ɔ fie’n su ninnge klikli nga a ɲan be’n+ be kwlaa,*

nin ɔ ninnge kpakpa mun+ blɛ Zoova naan kle kɛ a bu i sran.

10 I liɛ’n, ɔ tanngannin’m

bé yí piɛ,+

yɛ duvɛn uflɛuflɛ’n yí ɔ nzan guawlɛ’m* be lele ɔ́ bú gúa.

11 Min wa, kɛ Zoova tu ɔ fɔ’n nán kpalo i,+

kɛ ɔ ijɔ wɔ’n, nán maan ɔ yo ɔ ya.+

12 Afin Zoova tu be ng’ɔ klo be’n be fɔ,+

kɛ siɛ kpa kun m’ɔ klo i wa’n ɔ fa yo’n sa.+

13 Sran ng’ɔ si ngwlɛlɛ’n, i liɛ su ti ye,+

yɛ sran ng’ɔ wun sa wlɛ’n, i liɛ su ti ye.

14 Afin ngwlɛlɛ’n i silɛ ti kpa tra sika ɲanlɛ,

yɛ like nga be ɲɛn i nun’n, ɔ ti kpa tra sika ɔkwlɛ.+

15 Ɔ le ɲrun dan tra korai* mun.

Like kwlaa nga a klo i’n i wie fi tomɛn i.

16 Nguan ɲanman tɛnndɛn’n o i sa fama’n nun.

Aɲanbeun’n nin aɲrunɲan’n be o i sa bɛ’n nun.

17 I atin’m be yo ɲɛnmɛn,

yɛ i atin mma’m be kwlaa be su ti fɔuun.+

18 Ɔ ti be nga be trɛ i’n be nguan waka,

yɛ bé bó i jɔ kɛ be nga be trɛ i kekle kpa’n be liɛ su ti ye.+

19 Ngwlɛlɛ yɛ Zoova fa yili asiɛ’n niɔn.+

Ɔ fali akunndan yili ɲanmiɛn m’ɔ la nglo lɔ plaii’n i kekleke kpa.+

20 I sa silɛ’n ti’n, nzue nga be bo ti kploun’n be kpukekpukeli

yɛ bɔlɛ’n fin ɲanmiɛn ble’n nun sonjili.+

21 Min wa, nán ɔ ɲin kpa be* su.

Yia ngwlɛlɛ ng’ɔ yo sa ye’n nin akunndan bulɛ’n be

su kpa.

22 Bé mán ɔ nguan

yɛ bé yó ɔ kɔmin njuaba.

23 Ɔ maan kɛ á nánti ɔ atin’n su’n, sa fi su ɲanman wɔ,

yɛ ɔ ja su kplaman le.+

24 Kɛ á lá’n, srɛ su

kunman wɔ.+

Á lá, yɛ á láfi kpa.+

25 A su sroman sa kekleekle nga be fu sran’m be nun’n,+

a su sroman nzue mɔ kɛ ɔ́ tɔ́ klunwifuɛ’m be su’n, aunmuan fita dan’n.+

26 Afin Zoova yó maan

á láfi i su.+

Ɔ́ sásá ɔ ja’n naan w’a tɔman aya nun.+

27 Be nga be sa mian ukalɛ wun’n,* nán yo be awɛn,+

sɛ a kwla uka be’n,*

uka be.+

28 Sɛ a kwla man ɔ wiengu like ikisa’n,

nán se i kɛ: “Kɔ, sɛ ɔ yo’n nn w’a ba. Ainman nn m’an fa man wɔ.”

29 Kɛ ɔ wiengu tran ɔ wun lɛ m’ɔ o i olɛ lɛ diin’n,

nán sunnzun kɛ á yó i tɛ.+

30 Sɛ sran kun w’a yoman ɔ tɛ’n,+

nán a nin i be kacikaci be nuan sa ngbɛn.+

31 Nán ɔ ɲin blo sa kekleekle yofuɛ’n i wun,+

yɛ nán fɛ i atin’m be nun wie fi su.

32 Afin Zoova i ɲin ci sran ng’ɔ fa gblɛ nanti’n,+

sanngɛ ɔ tra sran ng’ɔ nanti ndɛnman su’n i janvuɛ.+

33 Sannzan nga Zoova bo’n, ɔ o klunwifuɛ’n i awlo’n su,+

sanngɛ ɔ yra sran kpa’n i tranwlɛ’n su.+

34 Afin ɔ sri be nga be to sran mma’n,+

sanngɛ ɔ si wɛtɛɛfuɛ’m be aunnvɔɛ.+

35 Ngwlɛlɛfuɛ’m bé ɲán ɲrun,

sanngɛ sinnglinfuɛ’m be bu like ng’ɔ kpɛ ɲannzuɛn ba’n i like dan.+