Fluwa klikli nga Piɛli klɛli’n

1 Min Piɛli mɔ n ti Zezi Klisi i akoto’n,+ ń klɛ́ fluwa nga ń blɛ́ amun mɔ amun ti wlanwlanfuɛ mɔ Ɲanmiɛn fali amun’n, mɔ amun a bo b’a sanndi Pɔn nin Galasi nin Kapadɔsu+ nin Azi nin Bitinin asa’n su’n. 2 Like nga e Si Ɲanmiɛn m’ɔ o nglo lɔ’n ɔ dun mmua siesieli’n+ i ti yɛ ɔ fali amun-ɔn. Ɔ fɛli i wawɛ’n mannin amun naan amun yo i liɛ klonglo.+ Ɔ yoli sɔ naan amun ɲin yi i, naan kusu Zezi Klisi i mmoja’n ti’n, amun yo sanwun.+

Maan Ɲanmiɛn yi i aklunye dan’n i nglo amun lika, yɛ maan ɔ yo naan amun wun jɔ amun fɔuun.

3 Maan manmanlɛ’n yo e Min Zezi Klisi i Si Ɲanmiɛn liɛ. Afin aunnvɔɛ dan m’ɔ sili e’n ti’n, ɔ wuli e uflɛ+ naan Zezi Klisi m’ɔ cɛnnin i’n ti’n,+ e fa e wla e gua like m’ɔ su saciman le’n+ su. 4 Ɔ yoli maan be wuli e uflɛ naan e ɲan nguan. Nguan sɔ’n ti’n, é ɲán like kpa nga i waan ɔ́ fá mán e’n. Like sɔ’n saciman le, fiɛn kaan sa nunmɛn i wun, ɔ ti ɲanɲanɲan titi.+ Ɔ fali like sɔ’n sieli amun ɲanmiɛn su lɔ.+ 5 Ɔ ti amun m’ɔ fɛ i tinmin’n nian amun su mɔ amun a ɲan amun ti’n amun liɛ. Blɛ kasiɛn’n nun yɛ amun ti mɔ amun a ɲɛn i’n, i ɲin wá fíte weiin kpa-ɔ. 6 I sɔ’n ti’n, kannzɛ bɔbɔ sa fanunfanun tɔ amun su naan ɔ fata kɛ amun wun ɲrɛnnɛn blɛ kaan sa’n,+ amun di aklunjɔɛ kpa. 7 I liɛ’n, kɛ mɔ be sali amun niannin mɔ be wunnin kɛ amun lafi Ɲanmiɛn su’n+ ti’n, cɛn nga Zezi Klisi wá yí i wun nglo’n,+ bé mánmán amun, bé yí amun ayɛ, yɛ bé yó amun mo. Afin amun Ɲanmiɛn sulafilɛ sɔ’n, i kpa tra sika ɔkwlɛ mɔ kannzɛ be tɔnnin’n* ɔ saci’n. 8 Kannzɛ amun nin-a wunmɛn i le’n, sanngɛ amun klo i. Kannzɛ amun wunmɛn i dɔ nga su’n, sanngɛ amun lafi i su, yɛ amun klun jɔ dan. 9 Yɛ amún ɲán like nga ti yɛ amun lafi i su’n. Like sɔ’n yɛle amun ti ɲanlɛ’n.+

10 Ɲanmiɛn nuan ijɔfuɛ nga be kannin ye dan mɔ Ɲanmiɛn yoli amun’n i ndɛ’n, be kunndɛli amun ti ɲanlɛ sɔ’n i su ndɛ kpa, yɛ be usausali nun kpa.+ 11 Ɲanmiɛn wawɛ’n dun mmua kannin kɛ Klisi wá wún ɲrɛnnɛn,+ naan i sin’n, ɔ́ ɲán ɲrun. Ɲanmiɛn nuan ijɔfuɛ’m b’a yaciman sa ng’ɔ́ wá jú Klisi’n su’n, ɔ nin blɛ nga sa sɔ’n jú’n be su ndɛ nga Ɲanmiɛn wawɛ’n* kannin’n be kunndɛlɛ.+ 12 Ɲanmiɛn maan be wa wunnin i wlɛ kɛ ndɛ nga be bɔbɔ mɔ be ti i sufuɛ’n be kannin’n, ɔ timan be bɔbɔ be liɛ, sanngɛ ɔ ti amun liɛ. Yɛ ndɛ nga be kannin’n i kunngba’n yɛ be nga be boli jasin fɛ’n be kleli amun’n, be kannin-ɔn. Ɲanmiɛn wawɛ’n m’ɔ fin ɲanmiɛn su’n i fanngan nun yɛ be yoli sɔ-ɔ.+ Anzi’m be bɔbɔ be kunndɛ kpa kɛ bé sí ndɛ sɔ’m be nun.

13 I sɔ’n ti’n, maan amun siesie amun wun naan amun akunndan’n kwlaa tran junman mɔ amún wá dí’n su kpa.+ An yo ngwlɛlɛfuɛ,+ yɛ maan amun wla tran ye dan mɔ kɛ Zezi Klisi wá yí i wun nglo’n bé wá yó amun’n, i su. 14 Kɛ ba kanngan aɲinyiɛfuɛ mun sa’n, maan amun yaci ninnge nga amun konvi sɔ be laa’n be yolɛ. I nun nga amun nin-a siman Ɲanmiɛn’n, ninnge sɔ mun yɛ amun yo be-ɔ. 15 Sanngɛ sa’n kwlaa nun’n, maan amun yo sanwun kɛ nga Sran ng’ɔ flɛli amun’n ti sanwun’n sa.+ 16 Afin be klɛli i kɛ: “Ɔ fata kɛ amun yo sanwun, afin n ti sanwun.”+

17 Kɛ amún kpán flɛ́ e Si m’ɔ nianman sran ɲrun naan w’a di i jɔlɛ’n,+ m’ɔ nian like nga sran kun yo’n su sɛsɛsɛ ɔ fɛ i nuan like mɛn i’n, maan amun nzuɛn’n kle kɛ amun sro i+ blɛ mɔ amun te yo aofuɛ mɛn nga nun’n. 18 Afin amun si kɛ nán sika annzɛ sika ɔkwlɛ mɔ be saci’n yɛ be fa deli* amun+ ninnge ngbɛnngbɛn mɔ amun nannan’m be kleli amun’n be nun-ɔn. 19 Sanngɛ Klisi+ m’ɔ ti kɛ bua ba mɔ lɛ nin fɔ kaan sa nunmɛn i wun sa’n,+ i mmoja m’ɔ ti kpa dan’n+ yɛ be fa deli amun-ɔn. 20 Kwlaa naan mɛn’n w’a bo i bo’n,*+ Ɲanmiɛn kpali Klisi sieli. Sanngɛ amun ti’n, be wa yili i nglo blɛ kasiɛn’n nun.+ 21 I dunman nun ti’n, amun lafi Ɲanmiɛn+ m’ɔ cɛnnin i’n,+ m’ɔ mɛnnin i aɲrunɲan’n+ i su. Ɔ maan amun kwla lafi Ɲanmiɛn su yɛ amun kwla fa amun wla guɛ i su.

22 Ndɛ nanwlɛ mɔ amun fa su’n ti’n, amun a yo sanwun siɛn’n, kpɛkun amun kloman amun niaan mun gblɛ nun.+ I sɔ’n ti’n, nán an klo amun wiengu amun nuan bui su.+ 23 Afin b’a wu amun uflɛ.+ Like mma m’ɔ saciman’n* i ti yɛ be wuli amun uflɛ-ɔ, nán like mma m’ɔ saci’n ti-ɔ.+ Ɲanmiɛn m’ɔ o lɛ m’ɔ́ ká lɛ titi’n i ndɛ’n i fanngan nun ti yɛ ɔ kwla yoli ye-ɔ.+ 24 Afin “klɔ sran’m be kwlaa be ti kɛ ijre sa. Yɛ ɲrun nga be le i’n, ɔ ti kɛ blo lɔ ijre nɲrɛ sa. Ijre’n wu kee, yɛ i nɲrɛ’n gua, 25 sanngɛ ndɛ nga Zoova* kan’n wo lɛ tititi.”+ “Ndɛ” sɔ’n yɛle jasin fɛ nga be bo kleli amun’n.+