Fluwa klikli nga Piɛli klɛli’n

2 I sɔ’n ti’n, maan amun wla klunwi’n kwlaa,+ nin sran lakalɛ’n, nin gblɛ’n, nin amun ɲin m’ɔ blo sran like su’n, ɔ nin amun wiengu’m be ndɛ tɛtɛ kanlɛ’n kwlaa, be ase. 2 Kɛ nga ba nɔnman’m+ be konvi sɔ wunflɛn sa’n, maan amun konvi sɔ Ɲanmiɛn ndɛ m’ɔ ti kɛ nɔnnɔn mɔ b’a guaman nun like fi’n sa’n, naan ndɛ sɔ’n ti’n, amun yo sran naan amun ɲan amun ti.+ 3 Kɛ ɔ ko yo naan i sɔ liɛ’n w’a yo ye’n, ɔ fata kɛ amun wun i wlɛ kɛ e Min’n ti kpa.

4 Ɔ ti kɛ yɔbuɛ m’ɔ man nguan mɔ sran’m be yili i blo’n+ sa. Sanngɛ Ɲanmiɛn fɛli i, yɛ ɔ ti i sa nun like cinnjin kpa.+ Kɛ amun fa amun wun mɛntɛn i’n, 5 amun mɔ amun ti kɛ yɔbuɛ mɔ be man nguan sa’n, Ɲanmiɛn wawɛ’n su fa amun kplan sua kun+ naan amun yo Ɲanmiɛn ɲrun jranfuɛ mɔ be ti be liɛ ngunmin’n. I liɛ’n, Zezi Klisi i dunman nun’n, amún yí tɛ mɔ Ɲanmiɛn klun jɔ su’n+ kɛ nga Ɲanmiɛn wawɛ’n kle’n sa.+ 6 Afin be klɛli i Ɲanmiɛn Ndɛ’n nun kɛ: “An nian! M’an wla yɔbuɛ kun mɔ n kpali n sieli i ngunmin’n i ase Siɔn lɔ. I yɛ ɔ ti sua bo ase wlalɛ yɔbuɛ cinnjin kpafuɛ m’ɔ tra sua’n i cɔnjɔ’n i ase’n niɔn. Sran ng’ɔ lafi i su’n, i ɲin su guaman ase le.”*+

7 Amun mɔ amun lafi i su’n, ɔ ti amun sran cinnjin. Sanngɛ be nga be lafimɛn i su’n be liɛ’n, ɔ timan be sran cinnjin. Ɲanmiɛn ndɛ’n se kɛ: “Yɔbuɛ nga sua kplanfuɛ’m be yili i blo’n,+ w’a kaci sua’n i cɔnjɔ su yɔbuɛ cinnjin kpafuɛ’n,”+ 8 yɛ w’a kaci “yɔbuɛ kun m’ɔ fin sran ase m’ɔ lo sran’m be ngasi’n.”+ Like nga ti yɛ ɔ yi be ase titi’n, yɛle kɛ be nianman ndɛ’n su nantiman. Like bɔbɔ nga be sie mannin be’n yɛ ɔ o lɛ-ɔ. 9 Sanngɛ amun ti “nvle kun m’ɔ kpali amun-ɔn. Amun ti famiɛn nin Ɲanmiɛn ɲrun jranfuɛ, amun ti Ɲanmiɛn i nvle,+ amun ti i liɛ klonglo.+ Ɔ yoli sɔ naan amun kɛn i kpa dan m’ɔ ti’n i ndɛ kle sran mun lika kwlaa.”+ I yɛ ɔ fali amun aosin’n nun bali i kpajalɛ m’ɔ yo ɲɛnmɛn’n nun’n niɔn.+ 10 Laa’n, amun timan nvle kun, sanngɛ siɛn’n, amun ti Ɲanmiɛn i nvle.+ Laa’n, b’a siman amun aunnvɔɛ, sanngɛ siɛn’n, b’a si amun aunnvɔɛ.+

11 Min sran kpa mun, amun ti aofuɛ nin wlanwlanfuɛ asiɛ nga su.+ I sɔ’n ti’n, ń srɛ́ amun kɛ nán amun konvi sɔ ninnge nga klɔ sran konvi sɔ be’n+ mɔ be kle amun yalɛ’n.+ 12 Maan amun nzuɛn’n yo kpa titi mɛn’n nunfuɛ’m be afiɛn.+ I liɛ’n, sɛ be tɔn amun suɛn kɛ an ti sa tɛ yofuɛ’n, bé wún sa kpa nga amun yo’n,+ kpɛkun cɛn nga Ɲanmiɛn wá nían amun’n bé mɛ́nmɛ́n i.

13 E Min’n ti’n, maan amun ɲin yi be kwlaa nga klɔ sran’m be sieli be kpɛn’n.+ Sɛ famiɛn-o,+ maan amun ɲin yi i, afin ɔ ti amun su kpɛn. 14 Sɛ famiɛn’n i janunfuɛ mun-o, maan amun ɲin yi be, afin ɔ sunmannin be kɛ be tu sa tɛ yofuɛ’m be fɔ naan be yo be nga be yo sa kpa’n be mo.+ 15 Afin like nga Ɲanmiɛn kunndɛ’n yɛle kɛ an yo sa kpa naan sinnglinfuɛ mɔ be wunman sa wlɛ’n b’a ɲanman ndɛ b’a kanman.+ 16 Maan amun yo kɛ sran mɔ b’a ɲan be ti’n sa.+ Nán an fa amun ti ɲanlɛ sɔ’n fa kata amun ɲin be yo sa tɛ.+ Sanngɛ an yo amun wun kɛ Ɲanmiɛn i kanga sa.+ 17 An bu sran wafa kwlaa be sran,+ an klo aniaan’m be kwlaa,+ an sro Ɲanmiɛn,+ yɛ an bu famiɛn’n i sran.+

18 Maan be nga be di junman sran sa nun’n be ɲin yi be min mun kɛ ɔ nin i fata’n sa.+ Nán maan be ɲin yi be nga be ti kpa mɔ be like yolɛ yoman ya’n be ngunmin. Sanngɛ maan be ɲin yi be nga be like yolɛ yo ya’n wie. 19 Afin sɛ sran kun wun i ɲrun naan ɔ trɛ i awlɛn’n, yɛ sɛ Ɲanmiɛn mɔ i ɲin yi i’n ti’n be kle i yalɛ, kusu nn w’a yoman sa’n, i sɔ’n ti kpa.+ 20 ?Sɛ amun yo sa tɛ naan be bo amun naan amun tra amun awlɛn’n, nn amun nin ayɛ yilɛ fata?+ Sanngɛ sɛ amun yo sa kpa naan be kle amun yalɛ naan amun tra amun awlɛn’n, i sɔ’n yo Ɲanmiɛn i fɛ.+

21 Like nga ti yɛ be flɛli amun’n yɛ ɔ o lɛ-ɔ. Afin amun ti’n, Klisi bɔbɔ wunnin ɲrɛnnɛn.+ Ɔ kleli amun ajalɛ naan amun nian like ng’ɔ yoli’n su seiin be nanti.*+ 22 W’a yoman sa tɛ fi,+ yɛ b’a timan gblɛ ndɛ i nuan nun.+ 23 Kɛ be kpɛli i nzowa’n,+ w’a kpɛman be wie.+ Kɛ bé klé i ɲrɛnnɛn’n,+ w’a seman kɛ ɔ́ wá klé be wie. Sanngɛ ɔ fɛli i wun wlali Sran ng’ɔ di jɔlɛ+ nanwlɛ su’n i sa nun. 24 E sa tɛ m’ɔ suali be’n+ ti’n, be boboli i waka’n su,+ kɛ ɔ ko yo naan y’a ɲan e ti sa tɛ’n i sa nun naan y’a yo sa kpa’n ti. Yɛ “i wun kannin’m be ti’n amun yoli juejue.”+ 25 Afin laa’n, an ti kɛ bua mɔ b’a bo b’a sanndi’n sa.+ Sanngɛ siɛn’n, amun a sa amun sin amun tafuɛ+ m’ɔ ti amun sunianfuɛ’n i sin.