Ɲanndra Mun

22 Sɛ be bo ɔ dunman kpa’n,* ɔ ti kpa tra aɲanbeun ninnge kpanngban.+

Sɛ be ɲin yi wɔ’n, ɔ ti kpa tra sika nin sika ɔkwlɛ.

 2 Aɲanbeunfuɛ’n nin yalɛfuɛ’n be sɛ.*

Yɛle kɛ Zoova yɛ ɔ yili be nɲɔn’n niɔn.+

 3 Sran ng’ɔ sɛsɛ i wun’n, kɛ ɔ wun kɛ sa wie su ba’n, kpɛkun w’a fia,

sanngɛ be nga be siman sa’n, be kuku be wun ko yi nun, kpɛkun be wun be ɲrun.*

 4 Be wun ase kanlɛ’n nin Zoova i srolɛ’n, i su mmlusuɛ nga be ɲɛn i’n,

yɛle aɲanbeun’n, nin aɲrunɲan’n nin nguan’n.+

 5 Owieowie nin aya’m be o gblɛfuɛ’n i atin’n su,

sanngɛ sran nga i nguan’n ti i cinnjin’n, ɔ mantanman be lɔ kaan sa.+

 6 Kle gbanflɛn kan’n* i atin ng’ɔ fata kɛ ɔ fa su’n,+

i liɛ’n, kɛ ɔ́ wá yó oke bɔbɔ’n ɔ su jasoman su.+

 7 Aɲanbeunfuɛ’n sie yalɛfuɛ mun,

yɛ sran ng’ɔ usa bosia’n, ɔ ti sran ng’ɔ man bosia’n i kanga.+

 8 Sran ng’ɔ lua sa ng’ɔ timan su’n, ɲrɛnnɛn’n yɛ ɔ́ tí-ɔ,+

yɛ i kpɔnman ng’ɔ fa yi i ya’n i nglo’n ɔ́ búbú.+

 9 Sran nga i klun ti ufue’n* bé yrɛ́ i su,

afin kɛ ɔ́ dí like’n, ɔ man yalɛfuɛ’n wie.+

10 Fuan sran ng’ɔ yo i wiengu finfin’n,

i liɛ’n ndɛnngan’n kpɛ́ kpe,

ngondin’n* nin nzowa’n

bé wíe.

11 Sran nga i awlɛn’n nun lɔ ti sanwun m’ɔ si ijɔ’n,

famiɛn’n yɛ ɔ́ yó i janvuɛ-ɔ.+

12 Zoova fɛ i ɲinma’n sasa ndɛ ng’ɔ ti nanwlɛ’n,

sanngɛ ɔ kpalo gblɛfuɛ’n i ndɛ mun.+

13 Fuɛnfuɛ’n se kɛ: “Asɔmɔli kun o gua su lɔ!

Ɔ́ kún min gua’n i afiɛn lɛ!”+

14 Bla ng’ɔ ti bian kunndɛfuɛ’n* i nuan’n ti kɛ kunman dan kun sa.+

Sran nga Zoova i klun jɔmɛn i wun’n, ɔ́ kó tɔ́ nun.

15 Sinnzin’n o gbanflɛn kan’n* i awlɛn’n nun,+

sanngɛ ɲantiaan nga be fa tu sran fɔ’n, yɛ ɔ́ tú yí i mmua-ɔ.+

16 Sran ng’ɔ di yalɛfuɛ’n i ndrunmun fa ɲɛn i wun’n,+

nin sran ng’ɔ cɛ aɲanbeunfuɛ’n i like’n,

yalɛ’n yɛ ɔ́ dí be-ɔ.

17 Sie ɔ su naan tie ndɛ nga ngwlɛlɛfuɛ’m be kan’n,+

naan ɔ awlɛn’n tran like nga n kle’n su,+

18 i liɛ’n, á kló kɛ á fá ndɛ sɔ mun síe ɔ klun kpa,+

naan be fin ɔ nuan fite tititi.+

19 Kɛ ɔ ko yo naan w’a fa ɔ wla w’a guɛ i Zoova su’n,

i ti yɛ n su kle wɔ like andɛ-ɔ.

20 N klɛli ɔ fluwa laa,

n mannin ɔ afɔtuɛ, yɛ n kleli ɔ like,

21 naan ń klé wɔ ndɛ ng’ɔ ti nanwlɛ’n mɔ a kwla lafi su’n,

i liɛ’n, kɛ á kó tó sran ng’ɔ sunmannin wɔ’n i lɔ’n, á kán ndɛ ng’ɔ ti nanwlɛ’n á klé i. ?Nɛ́n i-ɔ?

22 Nán nian kɛ sran kun ti yalɛfuɛ’n ti’n, á sé kɛ á dé i bo ninnge mun,+

nán mianmian sran ng’ɔ leman wie’n klɔ’n i anuan’n nun lɛ,+

23 afin Zoova bɔbɔ kán be

ti ndɛ,+

yɛ ɔ́ kpɛ́ be nga be di be lufle’n be nguan’n i sin.

24 Nán a nin sran nga i awlɛn’n ti fufu’n be san nun,

yɛ nán fa ɔ wun mantan sran ng’ɔ fa ya ndɛndɛ’n,

25 i liɛ’n, a su nianman be nzuɛn tɛ’n su,

yɛ a su suaman ɔ bɔbɔ ɔ wun aya.+

26 Be nga kɛ be wiengu úsa bosia’n be jran nun’n,

mɔ be sunman sran nun’n, nán fa ɔ wun wla be nun wie.+

27 Sɛ a leman like naan w’a tannin be sika’n,

bé yí ɔ bo bɛ nga a la su’n bé kɔ́.

28 Yɔbuɛ nga ɔ nannan’m be tɛkɛli i

lalafuɛ nun m’ɔ ti awɛ’n, nán tu tɛkɛ i lika uflɛ.+

29 ?W’a wun sran ng’ɔ si i junman’n i di’n le?

Famiɛn’m be ɲrun yɛ ɔ́ jrán-ɔn,+

ɔ su jranman sran ngbɛnngbɛn’m be ɲrun.