Fluwa klikli nga Pɔlu klɛli Korɛntifuɛ mun’n

3 Ɔ maan aniaan mun, m’an kwlá kanman ndɛ m’an kleman amun kɛ sran mɔ Ɲanmiɛn wawɛ’n sie be’n sa.+ Sanngɛ n kannin ndɛ n kleli amun kɛ sran mɔ klɔ sran nzuɛn sie be, mɔ be ti ba kanngan+ Klisi i atin’n i su falɛ’n nun’n sa. 2 N mannin amun nɔnnɔn, m’an manman amun aliɛ, afin blɛ sɔ nun’n, nn amun nin-a tinman kpa. Kɛ é sé yɛ bɔbɔ’n, amun nin-a tinman kpa.+ 3 Afin klɔ sran nzuɛn’n te sie amun.+ ?Kɛ amun ɲin ci amun wiengu mɔ amun di utre’n, nán klɔ sran nzuɛn’n yɛ ɔ sie amun lɛ-ɔ?+ ?Kɛ nga klɔ sran’m be fa nanti’n, nɛ́n i sɔ yɛ amun fa nanti-ɔ? 4 Afin nga waan: “N ti Pɔlu liɛ.” Nga kusu waan: “N ti Apolɔsu liɛ.”+ ?Nán klɔ sran nzuɛn yɛle ngalɛ’n?

5 ?Wan yɛle Apolɔsu? ?Yɛ wan yɛle Pɔlu? E ti Ɲanmiɛn junman difuɛ,+ yɛ kɛ nga e Min’n mannin e tinuntinun e atin kɛ e yo’n sa’n, e ti yɛ amun kacili Ɲanmiɛn i sufuɛ-ɔ. 6 N luali,+ Apolɔsu kusu guali su nzue,+ sanngɛ Ɲanmiɛn yɛ maan ɔ yo kpa-ɔ. 7 Ɔ maan i sran ng’ɔ luali-o, i sran ng’ɔ guali su nzue-o, be timan like fi. Sanngɛ Ɲanmiɛn mɔ maan like’n yoli kpa’n, yɛ ɔ dili junman’n niɔn.+ 8 Sran ng’ɔ luali like’n nin sran ng’ɔ guali su nzue’n be ti kun.* Sanngɛ junman nga be tinuntinun be di’n i su yɛ bé nían bé túa be kalɛ-ɔ.+ 9 Afin e nin Ɲanmiɛn yɛ e di junman’n niɔn. Amun ti Ɲanmiɛn i fie m’ɔ su di nun junman’n, yɛ amun ti i sua m’ɔ su kplan’n.+

10 Ɲanmiɛn i aklunye dan m’ɔ yili i nglo min lika’n ti’n, n wlali sua kun i bo ase+ kpa kɛ sua kplanfuɛ kpa kun* fa yo’n sa. Yɛ sran uflɛ su kplan su kɔ. Sanngɛ maan sran kun nian wafa ng’ɔ kplan su’n i su kpa. 11 Afin sua nga b’a dun mmua b’a wlɛ i bo ase mɔ yɛle Zezi Klisi’n,+ sran fi kwlá yacimɛn i lɛ ko wlaman sua uflɛ bo ase kun. 12 Sɛ sran kun fa sika ɔkwlɛ, annzɛ sika, annzɛ yɔbuɛ kpakpa, annzɛ kusu waka, annzɛ ijre kee fa tɛkɛ i sua sɔ’n i bo’n su’n, 13 sɛ junman ng’ɔ dili’n ti kpa annzɛ kusu ɔ ti tɛ’n, bé wún i wlɛ.* Afin blɛ wie wá jú’n, sin’n wá yó maan bé wún i sɔ’n i wlɛ weiin.+ Yɛ sin sɔ’n wá yí junman ng’ɔ dili’n i nglo. 14 Sran nga i sua ng’ɔ kplannin’n ka lɛ’n, ɔ́ ɲán akatua. 15 Sran nga i sua liɛ’n yra’n, i like’n fí i sa. Sanngɛ i bɔbɔ ba’n ɔ́ fíte nun. Kannzɛ ɔ yo sɔ bɔbɔ’n, sanngɛ ɔ́ yó kɛ w’a fin sin nun w’a fite sa.

16 ?Amun siman kɛ amun ti Ɲanmiɛn sua+ naan Ɲanmiɛn wawɛ’n tran amun nun?+ 17 Sɛ sran kun saci Ɲanmiɛn sua’n, Ɲanmiɛn núnnún i. Afin Ɲanmiɛn sua’n ti i liɛ klonglo, yɛ i sua sɔ’n yɛle amun.+

18 Nán sran fi lɛkɛ i wun: Sɛ amun nun wie bu i wun ngwlɛlɛfuɛ mɛn* nga nun’n, maan ɔ kaci sinnglinfuɛ, kɛ ɔ ko yo naan w’a yo ngwlɛlɛfuɛ’n ti. 19 Afin mɛn’n nun ngwlɛlɛ’n ti sinnzin Ɲanmiɛn ɲrun. Afin be klɛli i kɛ: “Ɔ fa ngwlɛlɛfuɛ’m be bɔbɔ be gblɛ’n fa tra be.”+ 20 Be klɛli i ekun kɛ: “Zoova* si kɛ akunndan nga ngwlɛlɛfuɛ’m be bu’n, ɔ ti ngbɛn.”+ 21 Ɔ maan nán sran fi fa klɔ sran di i nuan. Afin like kwlaa ti amun liɛ. 22 I Pɔlu-o, i Apolɔsu-o, i Sefasi-o,*+ i mɛn nga-o, i nguan-o, i wie-o, i blɛ nga nun ninnge mun-o, i ninnge nga bé bá lɔ’n mun-o, be kwlaa be ti amun liɛ. 23 Sanngɛ amun ti Klisi liɛ,+ yɛ Klisi kusu ti Ɲanmiɛn liɛ.