Maan e di jasin fɛ’n i bolɛ junman’n i kpa liɛ su

“An di e Min’n i junman’n kpa wɔ amun nyrun tititi.”—1 KOR. 15:58.

 1. ?Ngue yɛ Zezi seli i sɔnnzɔnfuɛ’m be kɛ be yo ɔ?

I NUN mɔ Zezi sín Samali akpasua’n su lɔ afuɛ nga be flɛ i 30 nun’n, ɔ trannin ase nzue gbo kun m’ɔ o klɔ nga be flɛ i Sikar i wun lɛ’n, i su. I waan ɔ́ ló wunmiɛn kan. Lika sɔ’n nun lɛ’n, ɔ seli i sɔnnzɔnfuɛ’m be kɛ: “An nian kɛ awie’n w’a blo bɔ w’a ju i kpɛlɛ-ɔ.” (Zan 4:35) Nán awie kpɛlɛ jrɛiin sa ndɛ yɛ Zezi su kan ɔn. Sanngɛ ɔ su kan sran kpa’m be yialɛ naan b’a kaci i sɔnnzɔnfuɛ’n i ndɛ. I ndɛ sɔ’n nun’n, ɔ su se i sɔnnzɔnfuɛ’m be kɛ be fa ajalɛ. Junman ng’ɔ fata kɛ be di’n ɔ sɔnnin, sanngɛ blɛ nga be le i’n w’a sɔnman!

2, 3. (a) ?Ngue yɛ ɔ kle kɛ e o awie’n i kpɛlɛ blɛ’n nun ɔn? (b) ?Ngue yɛ é wá wún i like suanlɛ nga nun ɔn?

² Awie kpɛlɛ ndɛ nga Zezi kannin’n, ɔ ti cinnjin kpa e blɛ liɛ nga nun. Blɛ nga e o nun yɛ’n, sɛ ɔ ti kɛ sran’m be ti kɛ awie sa’n, nn é sé kɛ mɛn wunmuan’n nun’n, ‘awie’n w’a blo [naan] w’a ju i kpɛlɛ.’ Afuɛ nuan kwlaa nun’n, be yia sran akpinngbin kpanngban kɛ be suan ndɛ nanwlɛ m’ɔ man nguan’n. Yɛ be yo be nun akpiakpi be batɛmu. Ɔ maan, be kaci Zezi i sɔnnzɔnfuɛ. Ɔ ti e cenjele like kɛ awie kpɛlɛ junman sɔ mɔ Ɲanmiɛn Zoova m’ɔ ti fie’n i fuɛ’n ɔ nian su’n, e di wie. ?Ɔ maan awie kpɛlɛ junman sɔ’n, amun di i ‘kpa kɔ amun ɲrun tititi’?—1 Kor. 15:58.

³ Afuɛ nsan nin sin nga Zezi dili i junman asiɛ’n su wa’n i nun’n, ɔ kleli i sɔnnzɔnfuɛ’m be like naan b’a di jasin fɛ’n i bolɛ junman’n. Like suanlɛ nga nun’n, é wá wún ninnge cinnjin nga Zezi kleli i sɔnnzɔnfuɛ mun’n, be nun nsan. Ninnge sɔ’m be yi nzuɛn kpa wie mɔ be ti cinnjin man e’n, be nglo. Kɛ é mían e ɲin naan y’a yia sran mun naan b’a kaci Zezi i sɔnnzɔnfuɛ’n, be kwla uka e. Maan e nian nzuɛn kpa sɔ mun kunngunngun.

E wun ase kanlɛ’n ti cinnjin

 4. ?Wafa sɛ yɛ Zezi kleli kɛ be wun ase kanlɛ’n ti cinnjin ɔn?

⁴ Maan e fa e ɲin e sie i sa nga su: Zezi i sɔnnzɔnfuɛ’m b’a si sran ng’ɔ ti be nun dan’n, i su akplowa dan kpa. Kɛ a nian be ɲrun’n sa’n, a wun kɛ ya o be klun. I ti’n, Zezi flɛli ba kaan kun. Ɔ fɛli i jrannin be afiɛn lɛ naan w’a se be kɛ: “Sran kwlaa ng’ɔ yo wɛtɛɛ [annzɛ “sran kwlaa ng’ɔ kɛn i wun ase,” Byington] kɛ ba kaan nga sa’n, ɔ́ wá yó be kwlaa nga Nyanmiɛn sie be’n be nun dan.” (An kanngan Matie 18:1-4 nun.) Mɛn’n nunfuɛ’m be liɛ’n, kɛ be se kɛ sran kun ti sran’n, nn ɔ le kwlalɛ, ɔ le sika yɛ ɔ le ɲrun. Sanngɛ Zezi i sɔnnzɔnfuɛ’m be liɛ’n, ɔ fata kɛ be wun i wlɛ kɛ sɛ ‘be kan be wun ase’ sran’m be ɲrun’n, yɛ be kle kɛ be ti sran ɔn. Sɛ be kan be wun ase’n, yɛ Zoova rá be su yɛ ɔ́ fá be dí i junman’n niɔn.

5, 6. ?Ngue ti yɛ ɔ fata kɛ e kan e wun ase naan y’a kwla di jasin fɛ’n i bolɛ junman’n kpa tititi ɔ? An fa sa kun yiyi nun.

⁵ Lele nin andɛ’n, mɛn nun sran kpanngban be fa be wun be wlɛ i kwlalɛ nin sika yɛ aɲrunɲan kunndɛlɛ’n nun. Kɛ ɔ ko yo sɔ’n, be ɲanman be ti naan b’a suan Ɲanmiɛn i su like naan b’a su i. (Mat. 13:22) Sanngɛ Zoova i nvlefuɛ’m be liɛ’n, ɔ yo be fɛ ‘kɛ be kan be wun ase’ naan fie’n i fuɛ’n i klun w’a jɔ be wun naan w’a ra be su.—Mat. 6:24; 2 Kor. 11:7; Fil. 3:8-9.

⁶ Maan e fa Fransisko m’ɔ ti asɔnun kpɛnngbɛn Amlɛnkɛn’m be mɛn’n i ja ngua lɔ’n, i su ndɛ’n e nian. I nun m’ɔ te yo gbanflɛn’n, ɔ yacili inivɛsite kɔlɛ yɛ ɔ kacili atin bofuɛ. I waan: “Kɛ n jali bla’n, sɛ min waan n kunndɛ junman kun m’ɔ kwla yo naan min nin min yi e sa nun w’a yo fɛ’n, nn n kunndɛli. Sanngɛ e fali ajalɛ kɛ e su kunndɛman like kpanngban naan e sran nɲɔn’n y’a kwla di Ɲanmiɛn junman’n blɛ kwlaa nun. I sin kɛ e wa wuli ba’n, lika’n wa yoli kekle. Sanngɛ Zoova ukali e naan y’a yo ajalɛ nga e fali’n i nuan su sa titi.” Fransisko guɛ i ndɛ’n i bo kɛ: “I afuɛ 30 tra su yɛ n ti asɔnun kpɛnngbɛn. Kpɛkun n kwla dili Ɲanmiɛn junman cinnjin wie mun ekun. Ninnge kpanngban mɔ m’an kunndɛman’n w’a yoman min nsisɔ cɛn ba kun sa le.”

 7. ?Wafa sɛ yɛ amun tinuntinun amun miannin amun ɲin naan amun a nanti afɔtuɛ ng’ɔ o Rɔmfuɛ Mun 12:16 nun’n, i su ɔ?

⁷ Sɛ amun kpalo “akunndan dandan” bulɛ’n naan ‘sɛ be se amun kɛ an di junman b’ɔ sran nyin yi-mɛn i’n, an di’n,’ an kwla lafi su kɛ amún ɲán suralɛ nin cenjele ninnge uflɛ mun ekun jasin fɛ’n i bolɛ’n nun.—Rɔm. 12:16; Mat. 4:19, 20; Lik 18:28-30.

Junman nga be tu be klun be di’n be ɲan su mmlusuɛ

8, 9. (a) Talan’n i su ɲanndra nga Zezi buli’n, an bo i kpɔlɛ. (b) ?Wan mun yɛ talan’n i su ɲanndra’n kwla wla be fanngan kpa ɔ?

⁸ Nzuɛn kpa uflɛ m’ɔ fata kɛ e yi i nglo naan y’a kwla di jasin fɛ’n bolɛ junman’n i kpa’n, yɛle kɛ e tu e klun e di junman. Zezi yili i sɔ liɛ’n i nglo talan i su ɲanndra ng’ɔ buli’n nun.a Ɲanndra sɔ nun’n, Zezi kannin bian kun mɔ kɛ ɔ́ wá kɔ́ lika’n, ɔ fɛli i ninnge’n kwlaa wlɛli i junman difuɛ nsan’m be sa nun’n i ndɛ. Ɔ mɛnnin i junman difuɛ klikli’n i talan nnun. Kpɛkun ɔ mannin nɲɔn su’n, i talan nɲɔn. Yɛ ɔ mannin junman difuɛ nsan su’n, i talan kunngba. Kɛ bian sɔ’n wɔli cɛ’n, junman difuɛ klikli’n ɔ nin nɲɔn su’n, be tuli be klun be dili junman. Yɛle kɛ be fali be talan’m be “dili aata.” Sanngɛ junman difuɛ nsan su’n ti “fuɛnfuɛ.” Ɔ ko fuli kunman naan w’a wlɛ i talan liɛ’n i ase. Kɛ be min’n bali’n, ɔ yoli junman difuɛ klikli nin nɲɔn su’n be mo. Yɛle kɛ ɔ fali be sieli “like dan su.” Ɔ deli talan ng’ɔ fa mannin junman difuɛ nsan su’n, kpɛkun ɔ kɛnnin i bo i awlo’n nun.—Mat. 25:14-30.

⁹ Atrɛkpa’n, amun klo kpa kɛ amún nían junman difuɛ kpa nga Zezi kannin be ndɛ’n be liɛ’n su, naan amún dí Zezi i sɔnnzɔnfuɛ kunndɛlɛ junman’n i kpa. ?Yɛ sɛ sa nga be o amun su’n ti’n, dɔ nga su amun kwlá yoman sɔ kpa’n nin? Atrɛkpa’n, sika ndɛ’n ti’n ɔ fata kɛ amun di junman nglɛmun lele nnɔsua naan amun a kwla nian amun awlofuɛ’m be lika. Wie liɛ kusu gbanflɛn annzɛ talua nzue’n nunman amun nun kun kɛ laa’n sa. Sɛ ɔ ti sɔ’n, talan’n i su ɲanndra nun’n, ndɛ kun o nun m’ɔ kwla cici amun wla ɔ.

10. ?Wafa sɛ yɛ bian nga be kɛnnin i ndɛ talan’m be su ɲanndra’n nun’n, ɔ kleli kɛ ɔ yo ninnge ngwlɛlɛ su ɔ? ?Yɛ ngue ti yɛ i sɔ’n cici e tinuntinun e wla ɔ?

¹⁰ Maan e sie i nzɔliɛ kɛ miɛn nga be kɛnnin i ndɛ ɲanndra’n nun’n, ɔ si kɛ ɔ le sran kun nin i wunmiɛn. Kɛ ɔ́ mɛ́n i junman difuɛ’m be talan’n, ɔ yili i sɔ liɛ’n i nglo. Yɛle kɛ, “kɛ sran kun i wunmiɛn’n fa ti ju’n i su yɛ ɔ niannin fa mɛnnin i-ɔ.” (Mat. 25:15) Kɛ ng’ɔ fa sunnzunnin’n sa’n, junman difuɛ klikli’n i liɛ ng’ɔ ɲɛnnin i’n, ɔ trali nɲɔn su’n i liɛ’n. Sanngɛ bian’n kleli kɛ be nɲɔn’m be miannin be ɲin be dili junman kpa. Yɛle kɛ ɔ seli be kɛ ‘be ti sran kpa, be ti nanwlɛfuɛ.’ Kpɛkun ɔ fali like kunngba’n cɛli be. (Mat. 25:21, 23) I kunngba’n, Ɲanmiɛn Zoova m’ɔ ti fie’n i fuɛ’n, ɔ wun wafa nga sa ng’ɔ o amun su’n ti’n, amun di i junman’n. Ɔ maan i sulɛ mɔ amun tu amun klun be su i’n, saan ɔ́ nían su yó amun mo.—Mar. 14:3-9; an kanngan Lik 21:1-4 nun.

11. Like ng’ɔ kle kɛ kekle blɛ nun’n, sɛ e tu e klun e di Ɲanmiɛn junman’n ɔ ra e su’n, an fa sa kun yiyi nun.

¹¹ Aniaan bla kun m’ɔ suan Sɛlmira’n, ɔ o Brezili. I su ndɛ’n kle kɛ nán kɛ lika’n ti kpa e sa nun’n, yɛ e kwla e tu e klun e di Ɲanmiɛn junman’n niɔn. I afuɛ ablaɔn yɛ, awiefuɛ wie’m be kunnin Sɛlmira i wun’n tui nun. Ɔ maan be mma nsan’m be kɛli i sa nun. Ɔ fa blɛ kpanngban di junman sran’m be awlo’m be nun. Kpɛkun ɔ tu ajalɛ loto mɔ sran’m b’a mian nun fii nun. I kwlaa sɔ’n kle i yalɛ kpa. Ɔ nin i sɔ ngba’n, ɔ siesieli i wun naan w’a kwla yo titi atin bofuɛ. I mma’m be nun nɲɔn be wa kacili atin bofuɛ kɛ i sa wie. Sɛlmira waan: “Kɛ afuɛ’m bé sín’n, e nin sran 20 tra su e suannin Biblu’n nun like. Ɔ maan sɛ ń kwlá sé’n, be kacili min ‘awlobofuɛ.’ Lele nin andɛ’n, e nin be e te tran janvuɛ tranlɛ klolɛ su. Aɲanbeun like kɛ ngalɛ sa’n, sika kwlá toman.” Ɔ ti weiin kɛ Sɛlmira i ɲin m’ɔ miannin’n ti’n, fie’n i fuɛ’n yoli i mo!

12. ?Wafa sɛ yɛ e kwla tu e klun e bo jasin fɛ’n niɔn?

¹² Kannzɛ sa nga be o e su dɔ nga su’n be ti’n, e kwlá boman jasin fɛ’n kɛ nga e klo’n sa’n, sanngɛ e kwla e tu e klun e yo naan jasin fɛ’n nga e bo’n w’a ba nvlɛ. Ajalɛ nga be kle e Junman dilɛ aɲia’m be bo le mɔcuɛ kwlaa’n, sɛ e mian e ɲin e nian su kpa’n, é sí jasin fɛ’n i bo kpa. Kpɛkun é sɔ́nnzɔn i bolɛ wafa uflɛ wie mun ekun. (2 Tim. 2:15) Asa ekun’n, sɛ e ɲɛn i wun atin’n, e kwla yaci ninnge nga be timan cinnjin mɔ be fa e blɛ’n be yolɛ. Annzɛ kusu e kwla sie be blɛ uflɛ nun. I liɛ’n é kwlá súan jasin fɛ’n i bolɛ’n i siesielɛ nga asɔnun’n siesieli’n be bo.—Kol. 4:5.

13. ?Sɛ e waan é tú e klun é dí Ɲanmiɛn junman’n titi’n, like cinnjinfuɛ ng’ɔ fata kɛ e yo’n yɛle benin?

¹³ Nán maan e wla fi su kɛ sɛ e tu e klun e di Ɲanmiɛn junman’n, ɔ fin klolɛ mɔ e klo i’n, ɔ nin i ye mɔ e si i’n. (Jue. 40:9) Junman difuɛ nsan su nga Zezi kɛnnin i ndɛ i ɲanndra’n nun’n, ɔ sro i min’n. I waan i min’n i like yolɛ yo ya. Ɔ maan kɛ ɔ yo naan ɔ fa talan nga be mɛnnin i’n di junman naan i min’n ɲan su’n, w’a yoman sɔ. Ɔ ko fuli buɛ wlɛli i ase. Sɛ e kunndɛman kɛ é yó ɲrun kounfuɛ kɛ junman difuɛ sɔ’n sa’n, ɔ fata kɛ e nin Zoova m’ɔ ti fie’n i fuɛ’n e afiɛn’n mantan kpa yɛ e nin i e tran klanman. Maan e fa blɛ naan i nzuɛn kɛ sran klolɛ, nin awlɛn tralɛ nin aunnvuɛ silɛ sa mɔ be yo ɲɛnmɛn’n, e suan be su like. Kpɛkun e bu be su akunndan. Sɛ e yo sɔ’n, e awlɛn’n sú e bo maan é tú e klun é dí i junman’n kpa.—Lik 6:45; Fil. 1:9-11.

‘Maan e nzuɛn’n fa [Ɲanmiɛn] liɛ’n’

14. ?Be nga be waan bé dí awie kpɛlɛ junman’n wie’n, like cinnjin benin yɛ ɔ fata kɛ be yiɛ i nuan ɔn?

¹⁴ Akoto Piɛli boli Biblu’n i bue nga be klɛli i Ebre’n nun’n su. Ɔ kannin like nga Ɲanmiɛn waan ɔ́ yó mɛ́n i sufuɛ nga be o asiɛ’n su’n i ndɛ. I waan: “Nyanmiɛn b’ɔ flɛli amun’n, i nzuɛn’n nin klɔ sran liɛ’n ti-man kun, maan amun nzuɛn liɛ’n kusu fɛ i liɛ’n sa’n kwlaa nun. Afin be klɛli i kɛ: ‘Min nzuɛn’n nin klɔ sran liɛ’n ti-man kun, i sɔ’n ti maan amun nzuɛn liɛ’n fa min liɛ’n.’” (1 Piɛ. 1:15, 16; Sau. 19:2; Mml. 18:13) I sɔ ndɛ’n kle kɛ ɔ fata kɛ be nga be di awie kpɛlɛ junman’n be yo sanwun be aeliɛ’n nun nin Ɲanmiɛn ninnge’m be nun. Sɛ e fa ajalɛ naan sɛ é kwla sé’n b’a wunnzin e’n yɛ é kwlá yía i sɔ like cinnjin liɛ’n i nuan ɔn. ?Wafa sɛ yɛ e kwla yo i sɔ liɛ’n niɔn? Ɲanmiɛn nuan ndɛ m’ɔ ti nanwlɛ’n yɛ ɔ kwla uka e ɔ.

15. ?Ngue yɛ Ɲanmiɛn i ndɛ’n kwla yo man e ɔ?

¹⁵ Ɲanmiɛn i ndɛ’n ti kɛ nzue mɔ be fa yo like sanwun’n sa. I wie yɛle Klistfuɛ nga be kpali be sieli be ngunmin’n be liɛ’n. Akoto Pɔlu klɛli i kɛ Ɲanmiɛn ɲrun’n, be ti sanwun. Be ti kɛ Klist i atɔnvlɛ m’ɔ ‘wunnzinnin i’ m’ɔ yoli yɛiin mɔ ‘lɛ fi nun-mɛn i wun, [...] yɛ ɔ ti Nyanmiɛn liɛ mlɔnmlɔn’n’ sa. (Efɛ. 5:25-27) Wafa nga Ɲanmiɛn i ndɛ’n mɔ Zezi boli i jɔ’n ɔ kwla yo sran sanwun’n, Zezi dun mmua kɛnnin i ndɛ. Ɔ seli i sɔnnzɔnfuɛ’m be kɛ: “Ndɛ nga n kan kleli amun’n ti amu’an yo kpa [amun a yo sanwun].” (Zan 15:3) Ɔ maan nanwlɛ ng’ɔ o Ɲanmiɛn i ndɛ’n nun’n, ɔ kwla yo sran sanwun i aeliɛ’n nun nin Ɲanmiɛn ninnge’m be nun. Sɛ e yaci nanwlɛ ng’ɔ o Ɲanmiɛn i ndɛ’n nun naan ɔ yo e sanwun’n, yɛ i klun jɔ́ sulɛ nga e su i’n i su ɔ.

16. ?Wafa sɛ yɛ e kwla ka sanwun Ɲanmiɛn ɲrun ɔn?

¹⁶ Ɔ maan sɛ e kunndɛ kɛ é dí awie kpɛlɛ junman’n, ɔ fata kɛ e dun mmua e yaci ninnge nga be ti fiɛn i ɲrun’n, be yolɛ. Sɛ e waan é dí i sɔ junman liɛ’n tititi’n, ɔ fata kɛ Zoova mmla’m be su falɛ nun’n, e kle ajalɛ kpa. (An kanngan 1 Piɛr 1:14-16 nun.) Titi’n e nian e wun su kpa naan e wunnɛn’n w’a yo sanwun. I kunngba’n, ɔ fata kɛ e yo naan Ɲanmiɛn i ndɛ nanwlɛ’n yo e sanwun wie titi. I sɔ’n ti’n, maan e kanngan Biblu’n nun yɛ e wɔ Klistfuɛ aɲia’m be bo. Kpɛkun e mian e ɲin kpa e nanti Ɲanmiɛn i mmla’m be su. Sɛ e yo sɔ’n, é kwlá jrán e nzuɛn tɛtɛ nin mɛn nun aeliɛ tɛtɛ’m be ɲrun. (Jue. 119:9; Zak 1:21-25) Sɛ e yoli sa tɛ dan kpa bɔbɔ’n, Ɲanmiɛn i ndɛ’n kwla “wunnzin” e. Nanwlɛ kɛ e si sɔ’n, ɔ cici e wla dan!—1 Kor. 6:9-11.

17. ?Sɛ e waan é ká sanwun’n, Biblu’n nun afɔtuɛ benin yɛ ɔ fata kɛ e fa su ɔ?

¹⁷ ?E ninnge’m be yolɛ nun’n, e sɔ Ɲanmiɛn i ndɛ nanwlɛ m’ɔ yo sran sanwun i nun klanman? ?Sɛ be se e kɛ e nian e wun be ɲin su yiyilɛ ninnge tɛtɛ nga be o mɛn’n nun’n be lika’n, ngue yɛ e yo ɔ? (Jue. 101:3) ?E wiengu suklu ba annzɛ e wiengu junman difuɛ nga be timan Zoova Lalofuɛ’n, e nin be e mantan ngboko? (1 Kor. 15:33) ?E mian e ɲin sakpa naan e nzuɛn nga be kwla yo naan y’a yo fiɛn Zoova ɲrun’n y’a yaci be? (Kol. 3:5) ?Politiki akplowa nin be wun kpinngbinlɛ ninnge nga be nvle’n i manmanlɛ o nun’n, e yi e sa be nun?—Zak 4:4.

18. ?Kɛ e yo sanwun Ɲanmiɛn ɲrun’n, wafa sɛ yɛ i sɔ’n uka e naan e jasin fɛ’n i bolɛ’n w’a ba nvlɛ ɔ?

¹⁸ Ninnge sɔ’m be nun’n, sɛ e nanti Ɲanmiɛn i mmla’n su’n, i bo’n gúa kpa mán e. Zezi fɛli i sɔnnzɔnfuɛ mun sunnzunnin viɲi waka’n i sama’n. Kpɛkun ɔ kan guali su kɛ: ‘N sama kwlaa ng’ɔ su-man’n, [min Si] ɔ kpɛ, yɛ ng’ɔ su’n, ɔ kpɛkpɛ su naan ɔ yo kpa yɛ ɔ su tra laa liɛ’n.’ (Zan 15:2) Sɛ e fa Biblu’n nun ndɛ nanwlɛ’n su’n, sɛ é kwlá sé’n, é sú mma kpa trá laa liɛ’n.

E ɲan suralɛ andɛ yɛ é ɲán wie ainman

19. ?Kɛ Zezi i sɔnnzɔnfuɛ’m be miannin be ɲin be boli jasin fɛ’n, ye benin yɛ be ɲɛnnin i ɔ?

¹⁹ Afuɛ nga be flɛ i 33 i Pantekɔtu nun’n, Zezi i sɔnnzɔnfuɛ kpa nga be niannin like ng’ɔ kleli be’n su be nantili’n, Ɲanmiɛn wawɛ’n wa tinnin be. Ɔ yoli sɔ naan be kɛn i ndɛ “lele fa ju asiɛ’n i awieliɛ.” (Yol. 1:8) I sɔ’n ti’n, wie’m be yoli e Ɲrun dinfuɛ’m be anuannzɛ’n i nunfuɛ. Wie’m be kusu be yoli ngaliɛ difuɛ nin nvle annzɛ akpasua sunianfuɛ. Be kwlaa sɔ’m be dili junman cinnjin kpa jasin fɛ’n m’ɔ fata kɛ be kan kle ‘asiɛ’n sufuɛ’m be kwlaa’n’ i nun. (Kol. 1:23) I sɔ mɔ be yoli ti’n, nanwlɛ be ɲannin ye dan, kpɛkun be yoli maan sran’m be dili aklunjuɛ dan!

20. (a) ?Jasin fɛ’n mɔ amun tu amun klun be bo’n ti’n, suralɛ benin yɛ amun ɲɛnnin i ɔ? (b) ?Ngue yɛ amun a ta nda kɛ amún yó ɔ?

²⁰ Maan e kan e wun ase naan e bo jasin fɛ’n i juejue su. Kpɛkun e fa Ɲanmiɛn i mmla nga be o i Ndɛ’n nun’n be su. Sɛ e yo sɔ’n, jasin fɛ’n mɔ be su bo i kpa andɛ’n, é kwlá bó wie kpa yɛ ɔ́ bá nvlɛ. Aɲanbeun ninnge’m be kunndɛlɛ nin fɛ dilɛ’n ti’n, sran sunman be wun ɲrɛnnɛn mɛn’n nun. Kɛ ɔ́ yó sɔ’n, e liɛ’n e di aklunjuɛ yɛ like nga e le i’n, ɔ ju e. (Jue. 126:6) I ng’ɔ ti cinnjin trɛ i ngba’n, yɛle kɛ “like nga e yo man e Min’n, ɔ su ka-man ngbɛn.” (1 Kor. 15:58) ‘Junman nga e dili nin klolɛ nga e fa klo’ Ɲanmiɛn Zoova m’ɔ ti fie’n i fuɛ’n ti’n, ɔ́ yó e ye tititi.—Ebr. 6:10-12.

[Ja ngua lɛ ndɛ’n]

?Amun wla kwla kpɛn su?

?Kɛ é mían e ɲin naan y’a di jasin fɛ’n i bolɛ junman’n i kpa’n, [...]

• ngue ti yɛ ɔ ti cinnjin kɛ e kan e wun ase ɔ?

• wafa sɛ yɛ e kwla yo juejuefuɛ ɔ?

• ngue ti yɛ ɔ ti cinnjin kɛ e ka sanwun Ɲanmiɛn ɲrun ɔn?

[Foto, bue 25]

E wun ase kanlɛ’n kwla uka e naan Ɲanmiɛn Sielɛ’n w’a yo e like cinnjin kpafuɛ’n.