Maan e yo naan asɔnun aɲia’m be wla e fanngan

“Kɛ amun yia’n [...] an yo i kwlaa sɔ’n maan asɔnun’n yo kpa.”—1 KOR. 14:26.

 1. ?Kɛ nga 1 Korɛntfuɛ Mun ndɛ tre 14 fa kannin’n sa’n, like cinnjin benin ti yɛ e yo Klistfuɛ aɲia mun ɔn?

‘NANWLƐ, aɲia nga wlali min fanngan dan o!’ ?Kɛ e wieli aɲia kun yo Ɲanmiɛn Sielɛ Sua’n nun’n, e nin a kanman sɔ le? Ɔ ti weiin kɛ y’a kan sɔ le! Asɔnun aɲia’m be wla e fanngan sakpa. Sanngɛ i sɔ liɛ’n boman e nuan. Afin kɛ Klistfuɛ klikli’m be blɛ su sa’n, like cinnjin kun mɔ i ti yɛ e yo aɲia mun andɛ’n, yɛle kɛ Ɲanmiɛn ninnge’m be nun’n, be wla be kwlaa nga be kɔ be bo’n be fanngan. Like sɔ mɔ i ti yɛ e yo Klistfuɛ aɲia mun’n, akoto Pɔlu yili i nglo Korɛntfuɛ Mun fluwa klikli’n nun. Maan e fa e ɲin e sie su. Fluwa sɔ’n i ndɛ tre 14 nun’n, ɔ kan flan nun kɛ junman kwlaa nga bé dí i aɲia’n bo lɔ’n, maan ɔ yia like kunngba’n i nuan. Yɛle kɛ maan ɔ yo ‘maan asɔnun’n yo kpa.’—An kanngan 1 Korɛntfuɛ Mun 14:3, 12, 26 nun.a

 2. (a) ?Sɛ aɲia’m be wla e fanngan’n, ɔ fin ngue? (b) ?Kosan benin yɛ é wá fá e ɲin síe su ɔ?

² E wun i wlɛ kɛ sɛ aɲia’m be wla e fanngan’n, Ɲanmiɛn wawɛ’n yɛ maan ɔ kwla yo sɔ ɔ. Ɔ maan aɲia kwlaa nga é bó i bo’n, e dun mmua tu e klun srɛ Zoova ka. Srɛlɛ sɔ’n nun’n, e se e Si m’ɔ o ɲanmiɛn su lɔ’n i kɛ ɔ fɛ i wawɛ’n ra e aɲia’n su. Kusu e si kɛ asɔnun’n nunfuɛ’m be ngba be kwla yo naan aɲia’m b’a wla e fanngan. ?I sɔ’n ti’n, ajalɛ benin yɛ e tinuntinun e kwla fa naan le mɔcuɛ kwlaa nun aɲia nga e yo be Ɲanmiɛn Sielɛ Sua’n nun’n, b’a fɔnvɔ e Ɲanmiɛn ninnge’m be nun naan b’a wla e fanngan ɔn?

 3. ?Ngue ti yɛ e asɔnun aɲia’m be ti cinnjin ɔn?

³ Kɛ ɔ ko yo naan y’a tɛ kosan sɔ’n su’n, e aɲia’m be nun ninnge wie m’ɔ nin i fata kɛ be nga be tinngɛ aɲia mun’n be bu be akunndan’n, é wá fá e ɲin é síe su. Asa ekun’n, é wá wún wafa nga asɔnun’n nunfuɛ’m be ngba be kwla yo naan aɲia’m b’a wla be kwlaa nga be ba be bo’n be fanngan’n. I sɔ ndɛ liɛ’n ti cinnjin kpa man e. Afin e aɲia’m be ti Ɲanmiɛn liɛ klonglo. Nanwlɛ, aɲia’m be bo kɔlɛ’n nin be bo lɔ kosan’m be su tɛlɛ’n, be ti cinnjin e Zoova sulɛ’n nun.—Jue. 26:12; 111:1; Eza. 66:22, 23.

Biblu’n nun like suanlɛ aɲia ɔ

4, 5. ?Ngue ti yɛ be siesieli Sasafuɛ Tranwlɛ’n i nun like suanlɛ’n niɔn?

⁴ E ngba e klo kɛ é ɲán Sasafuɛ Tranwlɛ’n i nun ninnge suanlɛ le mɔcuɛ kwlaa nun’n i su ye. Ɔ maan kɛ ɔ ko yo naan y’a wun like cinnjin kun nga ti yɛ be yo aɲia sɔ’n i wlɛ’n, maan e nian like nga ti yɛ be siesieli Sasafuɛ Tranwlɛ’n i nun like suanlɛ’n. Yɛ maan e nian like suanlɛ sɔ’n i nun ninnge wie mɔ be kacikacili be’n.

⁵ Like nga ti yɛ e suan Sasafuɛ Tranwlɛ’n nun like’n, yɛle kɛ é fá úka e wun e Biblu’n nun like suanlɛ’n nun. Le mɔcuɛ kwlaa nun’n, Sasafuɛ Tranwlɛ’n i nun like suanlɛ nun’n, be “kanngan” Ɲanmiɛn Ndɛ’n nun “weinwein.” Kpɛkun kɛ nga be fa yoli i laa Neemi i blɛ su sa’n, be ‘tu i bo.’—Nee. 8:8; Zan 6:45.

 6. (a) ?Sasafuɛ Tranwlɛ’n i nun like suanlɛ’n i wun ajalɛ uflɛ benin yɛ be fali ɔ? (b) ?Like suanlɛ’n nun’n, kɛ e wun ndɛ ɲanman ‘an kanngan nun’n,’ ngue yɛ ɔ fata kɛ e wla kpɛn su ɔ?

⁶ Kɛ mɔ Biblu’n yɛ ɔ ti e fluwa’m be nun cinnjinfuɛ’n ti’n, be fali ajalɛ uflɛ wie mun Sasafuɛ Tranwlɛ’n i nun like suanlɛ’n nun. Yɛle kɛ be klɛli Biblu’n nun ndɛ mma kpanngban be wun lɛ kɛ “an kanngan nun.” Aɲia’n i bo lɔ’n, kɛ bé kánngan Biblu’n nun ndɛ mma’m be nun’n, ɔ fata kɛ e nian e bɔbɔ e Biblu’n liɛ’n nun. (Yol. 17:11) ?Ngue ti ɔ? Yɛle kɛ, kɛ e wun Ɲanmiɛn i afɔtuɛ’n e bɔbɔ e Biblu’n nun’n, ɔ wluwlu e wun kpa. (Ebr. 4:12) Ɔ maan ka naan b’a kɛnngɛn i sɔ ndɛ mma’n nun’n, maan sran ng’ɔ tinngɛ like suanlɛ’n, ɔ man ndɛ tiefuɛ’m be blɛ naan be kunndɛ ndɛ mma sɔ’n be Biblu’n nun. I liɛ’n, kɛ bé kánngan nun’n be kwla nian su.

E le blɛ kpanngban e yi e Ɲanmiɛn sulafilɛ’n i nglo

 7. ?Sasafuɛ Tranwlɛ’n i nun like suanlɛ nun’n, ngue yɛ e kwla yo ɔ?

⁷ Like kun ekun mɔ be kacili i Sasafuɛ Tranwlɛ’n i nun’n, yɛle kɛ le nɲɔn nga nun like suanlɛ liɛ’n w’a waman kɛ laa’n sa kun. Ɔ maan Sasafuɛ Tranwlɛ’n i nun like suanlɛ’n nun’n, fluwa’n i nun kannganlɛ’n faman blɛ kpanngban. Sanngɛ blɛ nga be fa tɛ kosan’m be su’n yɛ ɔ sɔnnin ɔn. Siɛn’n, asɔnun’n nun’n, aniaan’m be sunman lika be kwla tɛ kosan nga be klɛli be’n be su be fa yi be Ɲanmiɛn sulafilɛ’n i nglo. Kosan’n i su tɛlɛ’n nun’n, be kle wafa nga e kwla nian Biblu’n nun ndɛ mma’m be su e nanti’n. Annzɛ sa wie mɔ be wunnin i m’ɔ kle kɛ Biblu’n nun mmla’m be su falɛ’n ti ngwlɛlɛ aeliɛ’n, be kɛn i ndɛ kpe kan. Annzɛ kusu be tɛ kosan’n su wafa uflɛ. Asa ekun’n, ɔ nin i fata kɛ be fa blɛ kan be koko desɛn annzɛ foto’m be su yalɛ.—An kanngan Jue Mun 22:23; 35:18; 40:10 nun.

8, 9. ?Junman benin yɛ ɔ fata kɛ Sasafuɛ Tranwlɛ’n i nun like suanlɛ’n i tinngɛfuɛ’n ɔ di ɔ?

⁸ Sanngɛ sɛ be nga be tɛ kosan’m be su’n be kanman ndɛ kpanngban naan sran ng’ɔ tinngɛ like suanlɛ’n ɔ ijɔman kaka’n, yɛ Sasafuɛ Tranwlɛ’n i nun ninnge suanlɛ nun’n, sran sunman bé kwlá tɛ́ kosan’m be su wie ɔ. ?Ɔ maan ngue yɛ ɔ kwla uka sran ng’ɔ tinngɛ like suanlɛ’n, naan i ndɛ ng’ɔ kan’n ɔ nin nga ndɛ tiefuɛ’m be kan’n, b’a yo naan aɲia’n w’a wla be kwlaa be fanngan ɔn?

⁹ Maan e fa sunnzun ase kun e tɛ kosan sɔ’n su. Sasafuɛ Tranwlɛ’n i nun like suanlɛ nga be tinngɛ i kpa’n, ɔ ti kɛ tannin nga be flɛ i nzasa mɔ i nianlɛ’n yo ɲɛnmɛn’n sa. Tannin losin kanngan nga be fa kpa nzasa’n, be ti fanunfanun. I wafa kunngba’n, Sasafuɛ Tranwlɛ’n i nun like suanlɛ nun’n, wafa nga be tɛ kosan’m be su’n, ɔ ti fanunfanun wie. Ɔ ti kɛ tannin losin kanngan mɔ be o nzasa’n nun’n sa. Wie ti dan tra wie. Be wafa’n ti ngunminngunmin yɛle kɛ wie ti ble, wie ti tata nun. Kɛ aɲia’m be bo lɔ kosan’m be su tɛlɛ’n ti sɔ ɔ. Wie ti tika, wie ti tɛnndɛn. Yɛ ɔ le wafa nga sran kun fa tɛ i kosan liɛ’n su ɔ. ?Yɛ sran ng’ɔ tinngɛ like suanlɛ’n nin? I ndɛ kunngunngun ng’ɔ fa wlawla nun’n, be ti kɛ tannin losin kanngan wie mɔ be fa wlɛ i nzasa’n nun’n sa. Tannin losin sɔ’m b’a sɔnman nzasa’n nun dan. Sanngɛ be yo maan tannin wunmuan’n yo klanman. I wafa kunngba’n, nán maan sran ng’ɔ tinngɛ like suanlɛ’n i wla fi su kɛ ɔ nin i fataman kɛ ɔ ijɔ tra nzrafuɛ mun. Sanngɛ be Ɲanmiɛn manmanlɛ mɔ be yi i nglo’n, maan ɔ kan ndɛ kpe kan fa suɛn i bo. Nanwlɛ, nzrafuɛ’m be kosan su tɛlɛ’n ɔ nin aɲia tinngɛfuɛ’n i ndɛ kanngan ng’ɔ kan’n, kɛ be kan be nɲɔn’n be bo nun’n, ɔ ti kɛ nzasa tannin klanman kun mɔ i nianlɛ’n yo sran kwlaa be ɲɛnmɛn’n sa.

“Maan manmanlɛ nga e manman Nyanmiɛn titi’n ɔ yo kɛ asenna like” sa

10. ?Klistfuɛ klikli’m be bu asɔnun aɲia’m be sɛ?

¹⁰ Asɔnun aɲia’m be ndɛ nga Pɔlu kɛnnin i 1 Korɛntfuɛ Mun 14:26-33 nun’n, ɔ yo maan e wun wafa nga Klistfuɛ klikli’m be blɛ su’n, be yo aɲia sɔ mun’n, i wlɛ. Biblu’n su like suanfuɛ kun kannin ndɛ mma sɔ’m be ndɛ. I waan: “Kɛ Klistfuɛ klikli’m bé yó aɲia’n, like kpa kun mɔ e kwla fa e ɲin e sie su’n yɛ. Yɛle kɛ be bɔbɔ be wun kɛ ɔ nin i fata kɛ be tinuntinun be yo naan aɲia’n yo kpa. Be bu i be cenjele like. Asa ekun’n, ɔ ti like m’ɔ fata kɛ be yo ɔ. Sran kun sa baman kɛ ɔ́ wá tíe ndɛ’n sa ngbɛn. Sanngɛ ɔ ba kɛ like ng’ɔ kwla yo naan aɲia’n w’a yo kpa’n yɛ ɔ́ yó ɔ.” Klistfuɛ klikli’m be bu i kɛ aɲia’m be ti blɛ kun mɔ be kwla fa yi be Ɲanmiɛn sulafilɛ’n i nglo sakpa ɔ.—Rɔm. 10:10.

11. (a) ?Ngue yɛ maan aɲia’m be wla e fanngan ɔn? ?Yɛ ngue ti ɔ? (b) ?Afɔtuɛ benin yɛ be su falɛ’n kwla uka e naan y’a si kosan’m be su tɛ kpa aɲia’m be bo ɔ? (An nian ja ngua lɔ nzɔliɛ’n.)

¹¹ Kɛ e yi e Ɲanmiɛn sulafilɛ’n i nglo aɲia’m be bo’n, ɔ yo maan “asɔnun’n yo kpa.” Ɔ ti weiin kɛ kannzɛ e sɔli aɲia’m be bo kɔlɛ i osu w’a cɛ kpa bɔbɔ’n, sanngɛ kɛ e ti ndɛ nga e niaan’m be kɛn i lɔ’n, nanwlɛ ɔ yo e fɛ kpa. Kɛ aniaan kpɛnngbɛn kun tu i klun tɛ kosan kun su’n, ɔ wluwlu e wun. Yɛ kɛ asɔnun kpɛnngbɛn kun mɔ sran ndɛ lo i’n, ɔ kan ngwlɛlɛ ndɛ kun’n, i sɔ’n wla e fanngan. Kusu kɛ ba kaan kun ka lɛ mɛn i sa’n su, m’ɔ tɛ kosan kun su fa yi i Zoova klolɛ’n i nglo’n, e kwlá muanman e nuan. Saan é srí puɛɛ. I sɔ’n kle weiin kɛ, kɛ e tɛ kosan’m be su’n, e kwlaa e yo maan asɔnun aɲia’m be wla e fanngan.b

12. (a) ?Ngue yɛ Moizi nin Zeremi be su ndɛ’n kle e ɔ? (b) ?Kosan’m be su tɛlɛ’n nun’n, wafa sɛ yɛ Ɲanmiɛn srɛlɛ’n uka e ɔ?

¹² Kusu kosan’m be su tɛlɛ’n kwla yo kekle kpa man be nga be sa ɲan’n. Sɛ i sɔ sa’n wie o amun su’n, nán amun bu i kɛ amun ngunmin ɔn. Ɲanmiɛn i sufuɛ kpa kɛ Moizi nin Zeremi sa bɔbɔ’n, be kannin kɛ nzra nun ijɔlɛ’n ti kekle man be wie. (Tul. 4:10; Zer. 1:6) Sanngɛ Zoova ukali i sufuɛ laa sɔ mun naan b’a mɛnmɛn i sran’m be ɲrun. I kunngba’n, Ɲanmiɛn úka amun sɔ wie. (An kanngan Ebre Mun 13:15 nun.) ?Wafa sɛ yɛ Zoova kwla uka amun naan amun a kwla jran kosan’m be su tɛlɛ i wun srɛ m’ɔ kun amun’n i ɲrun kekle ɔ? I klikli’n, amun siesie amun wun kpa naan amun a wɔ aɲia’n bo. I sin’n, ka naan amun a wɔ Ɲanmiɛn Sielɛ Sua’n nun lɔ’n, amun srɛ Zoova. Amun srɛ i trele kɛ ɔ wla amun yakpa naan amun a kwla tɛ kosan kun su. (Fil. 4:6) I sɔ srɛlɛ liɛ’n, ‘ɔ ti i klun su.’ Ɔ maan amun kwla lafi su kɛ Zoova tɛ́ su mán amun.—1 Zan 5:14; Nya. 15:29.

Aɲia mɔ be ‘yo sran [kpa], be mɛn i afɔtuɛ, yɛ be guɛ i awlɛn su nzue’n’

13. (a) ?Wafa sɛ yɛ ɔ fata kɛ e aɲia’m be yo be nga be tran be bo’n niɔn? (b) ?Kosan benin yɛ ɔ ti cinnjin kpa man asɔnun kpɛnngbɛn mun ɔn?

¹³ Pɔlu waan ninnge nga ti yɛ e yo aɲia mun’n, be nun cinnjin kun yɛle kɛ be yo maan be nga be kɔ be bo’n “be yo sran, ɔ man be afɔtuɛ, yɛ ɔ gua be awlɛn su nzue.”c (1 Kor. 14:3) ?Andɛ’n, wafa sɛ yɛ asɔnun kpɛnngbɛn’m be kwla si kɛ junman nga be di i aɲia’m be bo’n, ɔ wla aniaan’m be fanngan naan ɔ fɔnvɔ be ɔ? Kɛ be cɛnnin Zezi’n, wafa ng’ɔ tinngɛli aɲia kun’n, maan e fa e ɲin e sie su naan y’a kwla tɛ kosan sɔ’n su.

14. (a) ?Ngue sa yɛ ɔ dun mmua juli ka naan Zezi w’a se i akoto’m be kɛ be ko yo aɲia ɔ? (b) ?Kɛ “Jésus wunngeli [i akoto’m] be wun lɛ” m’ɔ kannin ndɛ kleli be’n, ngue ti yɛ i sɔ’n kwla yoli naan be wun w’a fa be feke ɔ?

¹⁴ Maan e dun mmua e nian sa nga be juli ka naan b’a yo aɲia sɔ’n. I nun mɔ bé wá kún Zezi’n, i akoto’m be “yaci i lɛ be wanndili.” Kɛ nga Zezi dun mmua fa kannin’n sa’n, be ‘sanndi wɔli be awlo.’ (Mar. 14:50; Zan 16:32) Kɛ be cɛnnin Zezi’n, ɔ seli i akoto sɔ mɔ be sa sin bubuli be kpa’n be kɛ be ko yo aɲia. Aɲia sɔ’n ti i liɛ ngunmin kun.d Kɛ ɔ yoli sɔ’n, Zezi “i sɔnnzɔnfuɛ blu-nin-kun’n be ɔli Galile oka’n b’ɔ kleli be’n su.” Kɛ be juli lɔ’n, “Jésus wunngeli be wun lɛ” yɛ ɔ kannin ndɛ kleli be. (Mat. 28:10, 16, 18) Kɛ Zezi fɛli i sɔ ajalɛ’n, wafa nga i akoto’m be wun fali be feke’n, an bu i akunndan kan be nian! ?Ngue ndɛ yɛ Zezi kannin ɔn?

15. (a) ?Ngue yɛ Zezi kɛnnin i ndɛ ɔ? ?Yɛ ngue yɛ w’a kɛnmɛn i ndɛ ɔ? (b) ?Aɲia sɔ’n yoli i akoto’m be sɛ?

¹⁵ Kɛ Zezi boli i ndɛ’n i kanlɛ bo’n, ɔ seli kɛ: “Nyanmiɛn mannin min atin kɛ n sie nyanmiɛn su lɔ nin asiɛ’n su ninnge’n kwlaa.” I sin’n, ɔ mannin be junman. I waan: “I sɔ’n ti, an wɔ ko kle nvle-nvle’n kwlaa be like maan be kaci n sɔnnzɔnfuɛ.” I agualiɛ su’n, ɔ cicili be wla kɛ: “Min nin amun e o cɛn kwlaa.” (Mat. 28:18-20) ?Sanngɛ amun sieli like nga Zezi w’a yoman’n i nzɔliɛ? W’a tutumɛn i akoto mun. Aɲia’n bo lɔ’n, w’a kanman like nga ti yɛ be wanndili’n i ndɛ. Yɛ kusu be sa sin kan m’ɔ bubuli be Ɲanmiɛn i su lafilɛ’n nun’n, w’a fa seman be nun naan ɔ yo be ya. Sanngɛ Zezi guali be awlɛn su nzue. Ɔ mannin be junman dan kun fa kleli be kɛ ɔ nin i Si be te klo be. ?Ajalɛ sɔ mɔ Zezi fɛli i akoto’m be lika’n, ɔ yoli be sɛ? I ajalɛ sɔ’n wlali be fanngan yɛ ɔ fɔnvɔli be dan. I ti’n, kɛ be wieli aɲia’n i yo m’ɔ dili le nɲɔn kun’n, ‘jasin fɛ’n i bolɛ nin i klelɛ Nyanmiɛn i sua’n nun nin awlo’m be nun’n,’ be fali be wun wlali nun ekun.—Yol. 5:42.

16. ?Wafa nga Zezi tinngɛli aɲia m’ɔ wlali sran fanngan’n, ajalɛ benin yɛ ɔ kle asɔnun kpɛnngbɛn mun andɛ ɔ?

¹⁶ Kɛ Zezi sa’n, andɛ’n asɔnun kpɛnngbɛn’m be fa aɲia mun be gua be wiengu Klistfuɛ’m be awlɛn su nzue. Be se be kɛ Zoova klo be titi. (Rɔm. 8:38, 39) I sɔ’n ti’n, kɛ asɔnun kpɛnngbɛn’m bé dí junman aɲia’m be bo’n, aniaan’m be nzuɛn kpa’n su yɛ be fa be ɲin be sie ɔ. Be faman be ɲin be siemɛn i fɔ ng’ɔ o be nun’n su. Yɛ be siman be Ɲanmiɛn sulafilɛ’n i akplowa. Sanngɛ ndɛ nga be kan’n, ɔ kle kɛ be bu i kɛ be wiengu Klistfuɛ’m be klo Zoova. Yɛ be kunndɛ kɛ bé yó like ng’ɔ ti kpa’n. (1 Tɛs. 4:1, 9-12) Ɔ ti su kɛ ɔ ju blɛ wie’n, asɔnun kpɛnngbɛn’m be kwla man asɔnun wunmuan’n i afɔtuɛ. Sanngɛ sɛ aniaan nɲɔn kun yɛ ɔ fata kɛ be man be afɔtuɛ naan be kaci be sa’n, ɔ flunman kɛ be flɛ be aamiɛn naan b’a man be afɔtuɛ sɔ’n. (Gal. 6:1; 2 Tim. 2:24-26) Kɛ asɔnun kpɛnngbɛn’m bé kán ndɛ bé klé asɔnun wunmuan’n, be fa like kun sie be ɲrun. Yɛle kɛ sɛ aniaan’m be nin mo yolɛ fata’n, be yo be mo. (Eza. 32:2) Wafa nga be mian be ɲin be kan ndɛ’n, ɔ yo maan kɛ aɲia’n wie’n, ɔ wla be kwlaa nga be ɔli i bo’n be fanngan.—Mat. 11:28; Yol. 15:32.

E aɲia’m be fɔnvɔ e

17. (a) ?Ngue ti yɛ andɛ ɔ ti cinnjin kpa kɛ e aɲia’m be fɔnvɔ e ɔ? (b) ?Ngue yɛ amun bɔbɔ amun kwla yo naan aɲia’m b’a wla sran fanngan ɔn? (An nian kuku nga be flɛ i “Ajalɛ blu nga e kwla fa naan aɲia’m b’a wla e bɔbɔ nin e wiengu mun e fanngan’n” i nun.)

¹⁷ Kɛ lika’n kɔ́ i ɲrun’n nn Satan i mɛn’n i mianmianlɛ ng’ɔ mianmian e’n, ɔ́ yó dan kɔ́ i ɲrun wie. I ti’n, ɔ fata kɛ e yo naan e aɲia’m be fɔnvɔ be kwlaa nga be tran be bo’n. (1 Tɛs. 5:11) Ɲrɛnnɛn dan kun tɔli aniaan bla kun nin i wun be su i afuɛ nɲɔn kun yɛ. Ɔ seli kɛ: “Kɛ e kɔ Ɲanmiɛn Sielɛ Sua’n nun lɔ’n, ɔ ti kɛ e o Zoova i sa nun sa. Kɛ e nin aniaan mun e o aɲia’n bo lɔ’n, ɔ ti kɛ sa ng’ɔ o e su’n e fɛ i kwlaa e wlɛ i Zoova i sa nun sa. Ɔ maan e wla guali ase.” (Jue. 55:23) É rá e nuan kɛ be kwlaa nga be tran aɲia’m be bo’n, ɔ yo be sɔ wie. Sɛ e klo kɛ ɔ yo sɔ sakpa’n, maan titi e yo like kwlaa nga e kwla yo’n naan asɔnun aɲia’m be wla sran fanngan.

[Ja ngua lɛ ndɛ mun]

?Amún tɛ́ su sɛ?

• ?Ngue ti yɛ e asɔnun aɲia’m be ti cinnjin ɔn?

• ?Ngue ti yɛ aɲia’m be bo lɔ kosan’m be su tɛlɛ’n, ɔ yo “maan asɔnun’n yo kpa” ɔ?

• ?Ngue yɛ aɲia nga Zezi nin i sɔnnzɔnfuɛ’m be yoli’n ɔ kle e ɔ?

[Kuku/Foto mun, bue 26, 27]

AJALƐ BLU NGA E KWLA FA NAAN AƝIA’M B’A WLA E BƆBƆ NIN E WIENGU MUN E FANNGAN’N

Maan e dun mmua e siesie e wun. Sɛ e dun mmua e siesie like nga é kó yó i aɲia’n bo lɔ’n, ɔ́ yó maan e akunndan’n kwlaa trán aɲia’n su. Kpɛkun aɲia’n wlúwlú e wun kpa.

Maan e wɔ aɲia’m be bo titi. Kɛ be nga be kɔ aɲia’m be bo’n be sɔnnin’n, ɔ wla e fanngan. Ɔ maan aɲia’m be bo nga e kɔ’n yɛ maan aɲia’n kwla yo fɛ ɔ.

Maan e ju lɔ dɔ su. Kɛ e dun mmua e tran ase ka naan aɲia’n w’a bo i bo’n, e kwla to jue nga be fa fiti aɲia’n su’n wie. Kpɛkun kɛ bé srɛ́ Ɲanmiɛn’n, é tíe wie. I sɔ’n kusu o e Zoova sulɛ’n nun wie.

Maan e fa fluwa ng’ɔ nin i fata’n, i ngba e wɔ. Maan e fa e Biblu’n ɔ nin fluwa nga é dí be nun junman aɲia’n bo lɔ’n e wɔ. I liɛ’n kɛ bé dí nun junman’n, e kwla fa e ɲin e sie su. Kpɛkun i sɔ’n úka e naan y’a wun ndɛ’n i wlɛ kpa.

Nán e siesie e ɲin nɲɔnnɲɔn. Sɛ blɛ mɔ be su yo aɲia’n, be klɛ ndɛ wie be blɛ e selilɛli’n su’n, nán maan e ka lɛ e kanngan nun. Maan e minndɛ kɛ aɲia’n wie ka. Sɛ e yo sɔ’n, e su faman e bɔbɔ e ninnge mun e sannganman aɲia’n nun.

Maan e tɛ kosan’m be su. Kɛ sran kpanngban be tɛ kosan’m be su be fa yi be Ɲanmiɛn sulafilɛ’n i nglo’n, i sɔ’n wla sran sunman be fanngan.

Maan e ijɔlɛ’n yo kpe kan. I sɔ’n yo maan sran kpanngban be kwla tɛ kosan’m be su.

Maan e di junman nga be man e’n. Sɛ be man e junman Ɲanmiɛn junman dilɛ suklu’n nun annzɛ Junman dilɛ aɲia’n nun’n, maan e siesie e wun kpa. Yɛ e flan e junman’n nun. Kusu maan e mian e ɲin naan kasiɛn su’n y’a seman kɛ e diman junman sɔ’n kun.

Maan e yo e wiengu’m be mo. Be nga be dili junman aɲia’n i bo annzɛ be tɛli kosan’m be su’n, wafa nga be ɲin nga be miannin’n ɔ yoli e fɛ’n, maan e kan e kle be.

Maan e fa e wun e mantan e niaan mun. Ka naan aɲia’n w’a bo i bo’n, yɛ kɛ aɲia’n ko wie’n, sɛ e tu e klun e yo aniaan’m be like naan e nin be e koko yalɛ klanman’n, i sɔ’n yó maan aɲia’m be bo tranlɛ’n yó fɛ. Kpɛkun ye nga é ɲɛ́n i lɔ’n, ɔ́ yó dan.