Maan e ɲan fanngan e jran lakalɛ nin e sa sin bubulɛ’n be ɲrun kekle
“Kɛ Nyanmiɛn Wawɛ’n ko ba amun wun’n, ɔ́ tín amun.” —YOL. 1:8.
1, 2. ?Ukalɛ benin yɛ Zezi waan i sɔnnzɔnfuɛ’m bé ɲɛ́n i ɔ? ?Yɛ ngue ti yɛ ɔ fata kɛ be ɲɛn i sɔ ukalɛ liɛ’n niɔn?
ZEZI si kɛ i sɔnnzɔnfuɛ’m be ngunmin be wunmiɛn’n, ɔ juman mmla ng’ɔ fa mannin be’n be kwlaa be su falɛ’n nun. Jasin fɛ’n i bolɛ junman ng’ɔ fa mannin be’n ti dan. Kusu be kpɔfuɛ’m be le kwlalɛ, yɛ klɔ sran’n, ɔ sɔman. Kɛ ɔ bu i kwlaa sɔ’n i akunndan sa’n, ɔ wunnin i wlɛ kɛ ɔ fata kɛ i sɔnnzɔnfuɛ’m be ɲan wunmiɛn ng’ɔ tra klɔ sran liɛ’n. I sɔ’n ti’n, kɛ Zezi wá fú ɲanmiɛn su lɔ’n, ɔ wlɛli i sɔnnzɔnfuɛ’m be fanngan kɛ: “Kɛ Nyanmiɛn Wawɛ’n ko ba amun wun’n, ɔ́ tín amun, án wá kán min ndɛ Zerizalɛm wa, nin Zide mɛn wunmuan’n nun, ɔ nin Samari lɔ lele fá jú asiɛ’n i awieliɛ.”—Yol. 1:8.
2 Afuɛ nga be flɛ i 33 i Pantekɔtu nun’n yɛ kasiɛ sɔ m’ɔ boli’n kpɛnnin su ɔ. Blɛ sɔ’n nun’n, Ɲanmiɛn wawɛ’n wlali Zezi Klist i sɔnnzɔnfuɛ’m be fanngan maan be fali jasin fɛ’n be truli Zerizalɛmu klɔ’n nun. Sran fi w’a kwlá jranman be. (Yol. 4:20) Wunmiɛn kunngba sɔ m’ɔ fin Ɲanmiɛn’n, ɔ fata kɛ Zezi i sɔnnzɔnfuɛ kpa’m be ɲɛn i “cɛn kwlaa lele mɛn’n fá wíe.” E bɔbɔ e o be nun wie.—Mat. 28:20.
3. ?Ngue yɛ fanngan ng’ɔ fin Zoova kwla uka e naan y’a yo ɔ?
3 Zezi seli i sɔnnzɔnfuɛ’m be kɛ ‘kɛ Nyanmiɛn Wawɛ’n ko ba be wun’n, ɔ́ tín be.’ I sɔ’n kle weiin kɛ Ɲanmiɛn wawɛ’n le ta e su. Yɛle kɛ ɔ kwla wla e fanngan. Fanngan nga Zoova fɛ i wawɛ’n wla i sufuɛ mun’n, ɔ yo maan e tinuntinun, Klistfuɛ mɔ e kacili’n, e kwla yo i nuan su sa. Kpɛkun e kwla jran ninnge tɛtɛ nga be tin e su’n be ɲrun.—An kanngan Mise 3:8 nin Kolɔsfuɛ Mun 1:29 nun.
4. ?Ngue yɛ é wá wún i like suanlɛ nga nun ɔn? ?Yɛ ngue ti ɔ?
4 ?Wafa sɛ yɛ e wun kɛ Ɲanmiɛn wawɛ’n wla e fanngan ɔn? ?Kɛ sa fanunfanun’m be tɔ e su’n, ngue yɛ Ɲanmiɛn wawɛ’n maan e kwla yo ɔ? Kɛ é mían e ɲin naan y’a su Ɲanmiɛn tititi’n, ninnge kpanngban be tanndan e ɲrun. Ɔ kwla yo sa nga Satan nin i mɛn’n be fa tanndan e ɲrun’n. Annzɛ fɔ m’ɔ o e nun’n, i sin sa mun. Sɛ e waan é ká Klistfuɛ naan é bó jasin fɛ’n titi’n, naan e nin Zoova e afiɛn’n sɛ kpa titi’n, ɔ ti cinnjin kɛ e jran ninnge sɔ’m be ɲrun kekle. Maan e nian wafa nga Ɲanmiɛn wawɛ’n uka e naan y’a jran lakalɛ’n nin afɛ’n m’ɔ o e su’n, ɔ nin e sa sin m’ɔ kwla bubu e’n be ɲrun kekle’n.
E jran lakalɛ’n i ɲrun kekle
5. ?Wafa sɛ yɛ Ɲanmiɛn srɛlɛ’n kwla wla e fanngan ɔn?
5 Zezi kleli i sɔnnzɔnfuɛ’m be Ɲanmiɛn srɛlɛ. I waan be se kɛ: “Nán yaci e lɛ maan Lakafuɛ’n laka e, sanngɛ de ye i sa nun.” (Mat. 6:13) Sɛ Zoova i sufuɛ kpa’m be srɛ i sɔ like liɛ’n, ɔ su yiman be ase le. Cɛn kun’n, Zezi seli kɛ “e Si b’ɔ o Nyanmiɛn su lɔ’n kusu, ɔ́ fɛ́ i Wawɛ’n mán be nga be srɛ i’n kpɛ blu.” (Lik 11:13) Kɛ e si kɛ Zoova waan ɔ́ fɛ́ i wunmiɛn’n m’ɔ kwla uka e kpa naan y’a yo sa kpa’n, ɔ́ mán e’n, nanwlɛ ɔ gua e awlɛn su nzue dan! Kusu i sɔ’n kleman kɛ Zoova yó naan sa fi w’a tɔman e su le. (1 Kor. 10:13) Sanngɛ kɛ sa wie tɔ e su’n, i sɔ blɛ nun yɛ ɔ fata kɛ e srɛ Ɲanmiɛn tankaan kpa ɔ.—Mat. 26:42.
6. ?Kɛ Satan waan ɔ́ láka Zezi’n, ngue su yɛ Zezi jrannin tɛli i su ɔ?
6 Kɛ mmusu’m be si Satan waan ɔ́ láka Zezi’n, Zezi fali Ɲanmiɛn Ndɛ’n kpaloli i nuan. Kɛ Zezi kán ndɛ yɛ’n klé Satan’n, nn Ɲanmiɛn Ndɛ’n ti weiin i akunndan’n nun. Ɔ tɛli Satan su kɛ: “Be klɛli i kɛ [...]. Be klɛli i kusu kɛ [...]. Satan, jaso lɛ! Afin be klɛli i kɛ: ‘Koto ɔ Min Nyanmiɛn’n i bo, yɛ su i kunngba cɛ.’” Kɛ mɔ Zezi klo Zoova ɔ nin i nuan Ndɛ’n ti’n, ɔ kpaloli ninnge nga Lakafuɛ’n fa sieli i ɲrun’n. (Mat. 4:1-10) Zezi jrannin lakalɛ’n i ɲrun kekle titi. I ti’n, Satan yacili i lɛ ɔli.
7. ?Wafa sɛ yɛ Biblu’n uka e naan y’a jran lakalɛ’n i ɲrun kekle ɔ?
7 ?Sɛ Zezi lafi Ɲanmiɛn Ndɛ’n su naan w’a kwla jran mmusu’m be si’n i ɲrun kekle’n, yɛ e li? Ɔ ti weiin kɛ sɛ e waan é jrán Satan i ɲrun kekle’n, ɔ fata kɛ e dun mmua e si Ɲanmiɛn i mmla mun kpa naan e nanti be su kpa. Kɛ sran sunman be suannin Biblu’n nun like mɔ be wunnin Ɲanmiɛn i ngwlɛlɛ’n nin i sa nuan su yolɛ’n be wlɛ’n, be nantili Biblu’n nun mmla’m be su. ‘Nyanmiɛn i ndɛ’n’ le ta sakpa. Ɔ kwla si sran’m “be klun akunndan’n, ɔ nin be klun sa’n.” (Ebr. 4:12) Sɛ sran kun kanngan Biblu’n nun naan ɔ bu su akunndan kpa’n, ɔ kwla wun ‘gugulɛ nga [Zoova] guguli’n’ i wlɛ kpa wie. (Dan. 9:13) I sɔ’n ti’n, Biblu’n nun ndɛ mma nga be kan ayeliɛ tɛ nga be ase wlalɛ’n ti kekle man e’n be ndɛ’n, ɔ fata kɛ e bu be su akunndan.
8. ?Ngue yɛ e kwla yo naan y’a ɲan Ɲanmiɛn wawɛ’n niɔn?
8 Like nga ti yɛ Zezi kwla jrannin lakalɛ’n i ɲrun kekle’n, yɛle Ɲanmiɛn Ndɛ’n m’ɔ si i’n. Sanngɛ nɛ́n i ngba ɔ. ‘Nyanmiɛn Wawɛ’n sieli i’ wie. (Lik 4:1) Sɛ e waan é ɲɛ́n i sɔ wunmiɛn’n naan é kwlɛ́ i sɔ ninnge’m be yo wie’n, ɔ fata kɛ e fa e wun e mantan Zoova. Yɛle kɛ ninnge ng’ɔ sin be lika fɛ i wawɛ’n man e’n, maan e nian nun e yo be. (Zak 4:7, 8) Ninnge sɔ’m be wie yɛle Biblu’n nun like suanlɛ’n nin Ɲanmiɛn srɛlɛ’n, ɔ nin e asɔnun aɲia’m be bo tranlɛ’n. Sran sunman be wunnin i wlɛ kɛ sɛ be siesie be wun naan be fa be wun be wlɛ i ninnge nga Klistfuɛ’m be yo’n nun’n, be di ye. Afin i sɔ’n uka be naan be akunndan’n w’a tran Ɲanmiɛn ninnge’m be su titi.
9, 10. (a) ?Sa benin mun yɛ be ju Klistfuɛ’m be su titi ɔ? (b) ?Wafa sɛ yɛ akunndan bulɛ’n nin Ɲanmiɛn srɛlɛ’n be kwla uka e naan kannzɛ bɔbɔ afɛ’n o e su’n, y’a kwla jran lakalɛ’n i ɲrun kekle ɔ?
9 ?Sa tɛ benin yɛ ɔ fata kɛ e jran be ɲrun kekle ɔ? ?Ndalie nga be nin sran ng’ɔ timan be yi’n annzɛ be wun’n be tra’n, e konvi w’a sɔ i sɔ yolɛ le? ?Sɛ e nin a jaman bla annzɛ bian’n, w’a yo e le kɛ e nin sran kun m’ɔ timan Klistfuɛ’n e bo soman? Kɛ Klistfuɛ kun nían televiziɔn annzɛ ɔ́ dí junman ɛntɛnɛti su’n, wie liɛ’n foto wie annzɛ sa sukusuku wie kwla fite i ɲrun kpɛ kunngba. Ɔ kwla yo i kɛ ɔ niɛn i sɔ like’n. ?W’a yo e sɔ wie le? ?Sɛ w’a yo e sɔ le’n, ajalɛ benin yɛ e fali ɔ? Wafa nga sa tɛ kun i yolɛ’n kwla bo sa tɛ uflɛ kun i ɲrun atin’n, mɔ i agualiɛ su e kwla yo sa tɛ dan kpa’n, maan e bu i akunndan. I sɔ’n kwla uka e. (Zak 1:14, 15) Sɛ e yo sa tɛ’n, wafa nga ɔ kwla yo Zoova nin asɔnun’n nunfuɛ mun ɔ nin e awlobofuɛ’m be ya’n, maan e bu su akunndan kpa. Sanngɛ sɛ e nanti Ɲanmiɛn i mmla’m be su titi’n, e klun akunndan’n su buman e fɔ. (An kanngan Jue Mun 119:37 nin Nyanndra Mun 22:3 nun.) Blɛ kwlaa nga i sɔ sa’m be tɔ e su’n, nán e sisi e bo. Maan e srɛ Ɲanmiɛn naan ɔ man e wunmiɛn naan y’a kwla jran be ɲrun kekle.
10 Lakalɛ nga Satan waan ɔ́ láka Zezi’n, i su like kun ekun o lɛ m’ɔ fata kɛ e wla kpɛn su ɔ. Kɛ Zezi kpɛli srɛ nun cɛn ba lele 40 aawlɛ flɛnnɛn’n nun lɔ’n, yɛ Satan wunngeli i wun lɛ ɔ. Ɔ ti weiin kɛ mmusu’m be si Satan buli i kɛ i sɔ blɛ liɛ’n ti “blɛ [kpa]” m’ɔ kwla fa sa Zezi nian naan sɛ ɔ́ kpɔ́ci Ɲanmiɛn o. (Lik 4:13) I kunngba’n Satan kunndɛ blɛ kpa ng’ɔ kwla fa sa e nian naan sɛ é kpɔ́ci Ɲanmiɛn o. I sɔ’n ti’n, ɔ ti cinnjin kpa kɛ Ɲanmiɛn ninnge’m be nun’n, e ɲan wunmiɛn kpa. Kpɛ sunman’n, kɛ Satan nían mɔ sran kun w’a kpɔnzɔ’n, kpɛkun ɔ su lɛkɛ i. Ɔ maan blɛ kwlaa nga afɛ’n o e su’n, annzɛ e sa sin bubu e’n, ɔ fata kɛ e srɛ Zoova tankaan kpa naan ɔ sasa e yɛ ɔ fɛ i wawɛ’n man e.—2 Kor. 12:8-10.
Afɛ’n nin e sa sin m’ɔ bubu e’n
11, 12. (a) ?Ngue ti yɛ sran sunman be sa sin bubu be andɛ ɔ? (b) ?Ngue yɛ ɔ kwla wla e fanngan naan sɛ e sa sin bubu e’n y’a jran kekle ɔ?
11 E mɔ e ti klɔ sran mɔ fɔ o e nun’n, ɔ ju wie’n e sa sin bubu e. Ɔ ti sɔ le nɲɔn’n nun kpa. Afin blɛ nga e o nun’n, nanwlɛ, ɔ ti kekle. Atrɛkpa’n blɛ nga e o nun’n i kekle liɛ’n, be nin a wunmɛn i wunsu le. (2 Tim. 3:1-5) Kɛ Armagedɔn mántan’n nn sika ndɛ nin e akunndan sannganlɛ’n ɔ nin sa uflɛ wie mɔ be tin e su’n bé yó dan bé kɔ́. Ɔ maan sɛ ɔ yo sran wie’m be kɛ lika’n su kete be su, naan be awlobofuɛ’m be lika nianlɛ’n su yo kekle kpa man be’n, ɔ fataman kɛ i sɔ’n bo e nuan. I sɔ’n ti’n, ɔ yo be kɛ b’a fɛ naan be kwlá kpɔciman be wun naan b’a kpangba mlɔnmlɔn sa. ?Sɛ ɔ yo amun sɔ wie’n, wafa sɛ yɛ amun kwla jrɛn i sɔ’n i ɲrun kekle ɔ?
12 Nán maan e wla fi su kɛ Zezi cicili i sɔnnzɔnfuɛ’m be wla kɛ ɔ́ fá Ɲanmiɛn wawɛ’n blɛ́ be naan ɔ yo be ukafuɛ. (An kanngan Zan 14:16, 17 nun.) I ta liɛ’n tra like’n kwlaa. Zoova kwla fa wawɛ’n sɔ’n man e wunmiɛn “dan tra” su naan y’a kwla jran sa kwlaa ɲrun kekle. (Efɛ. 3:20) Akoto Pɔlu waan sɛ e lafi i su’n, kannzɛ é wún “nyrɛnnɛn wafa-wafa’n kwlaa” sanngɛ é wún i wlɛ kɛ “e kwlá yo-man like fi, sanngɛ Nyanmiɛn b’ɔ kwla like kwlaa yo’n yɛ ɔ yo sa-a.” (2 Kor. 4:7, 8) Zoova w’a seman kɛ ɔ́ yó naan nán e akunndan’n sanngan kun le. Sanngɛ ɔ seli e kɛ ɔ́ fɛ́ i wawɛ’n wlá e fanngan naan sɛ e akunndan’n sanngan’n y’a kwla jrɛn i ɲrun kekle.—Fil. 4:13.
13. (a) ?Wafa sɛ yɛ talua kun kwla ɲannin fanngan naan w’a kwla jran sa kekle kun ɲrun ɔn? (b) ?Amun si i sɔ sa uflɛ wie?
13 Maan e fa e ɲin sie i Stefani m’ɔ le afuɛ 19 i su ndɛ’n su e nian. Ɔ ti titi atin bofuɛ. Kɛ ɔ ɲannin afuɛ 12, tukpacɛ wie tɔli i su. Be waan i ti nun miɛn’n nun lɔ yɛ tukpacɛ’n wo ɔ. Kɛ ɔ fɛ i lɛ’n, be kpacili i nun kpɛ nsan. Yɛ be yoli i are uflɛ ekun. Kpɛkun tukpacɛ’n wa tɔli i su kekle kpa kpɛ nɲɔn ekun. Kɛ ɔ yoli sɔ’n, i sa bɛ nin i ja bɛ’n be wuli i wun. Kpɛkun ɔ wunman ase kpa kun. Ɔ fata kɛ Stefani fa wunmiɛn kan ng’ɔ le i’n, ɔ yo ninnge nga be ti i cinnjin kpafuɛ mun. I wie yɛle asɔnun aɲia’m be bo kɔlɛ’n ɔ nin jasin fɛ’n i bolɛ’n. Sanngɛ ɔ wunnin i kɛ Zoova i wawɛ’n fa ninnge fanunfanun suɛn i bo naan w’a kwla jran kekle. Kɛ i sa sin ko bubu i’n, i wiengu Klistfuɛ’m be su ndɛ nga be o Biblu’n i akua’m be nun’n, be wlɛ i fanngan. Aniaan’m be suɛnnin i bo wie. Yɛle kɛ be klɛli i lɛtri annzɛ ka naan b’a aɲia’m be bo’n, be kan ndɛ wie be fa wlɛ i fanngan. Kpɛkun kɛ aɲia’m be ko wie’n, be yo i sɔ ekun. Be nga Ɲanmiɛn Ndɛ’n lo be’n kusu’n, be kɔ Stefani i awlo lɔ naan ɔ kle be Biblu’n nun like. Kɛ be yo sɔ’n, be kle kɛ like ng’ɔ kle be’n, ɔ yo be fɛ. I kwlaa sɔ’n ti’n, Stefani si Zoova i ye dan kpa. I liɛ’n Biblu’n nun ndɛ mma ng’ɔ klo i kpa’n w’a kpɛn su i lika. Ndɛ mma sɔ’n yɛle Jue Mun 41:4.
14. ?Sɛ afɛ’n o e su’n, ngue yɛ ɔ fataman kɛ e yo ɔ? ?Yɛ ngue ti ɔ?
14 Kɛ afɛ’n o e su’n, annzɛ sɛ e mian fii’n, nán e bu i mlɔnmlɔn kɛ sɛ e go nun kan Ɲanmiɛn ninnge’m be nun’n, afɛ ng’ɔ o e su’n, ɔ́ kán ase. Like tɛ kpa m’ɔ fataman kɛ e yo’n, yɛ ɔ o lɛ ɔ. ?Ngue ti ɔ? Afin ninnge kɛ e bɔbɔ e Biblu’n nun like suanlɛ ɔ nin e awlo nunfuɛ’m be Biblu’n nun like suanlɛ’n, ɔ nin jasin fɛ’n i bolɛ’n, ɔ nin asɔnun aɲia’m be bo kɔlɛ’n mun sa’n, yɛ maan e kwla ɲan Ɲanmiɛn wawɛ’n m’ɔ wla sran fanngan’n niɔn. Ninnge sɔ mɔ Klistfuɛ’m be yo’n, be kwlaa be wla sran fanngan. (An kanngan Matie 11:28, 29 nun.) Wie liɛ’n, aniaan nga bé jú aɲia’m be bo lɔ b’a fɛ kpa sa’n, be diman be yalɛ. Sanngɛ kɛ awlo kɔlɛ dɔ’n ko ju’n, ɔ ti kɛ b’a ɲan fanngan kpa sa!
15. (a) ?Zoova seli kɛ Klistfuɛ’m be su fɛman? An fa Biblu’n nun ndɛ mma’m be yiyi nun. (b) ?Ngue yɛ Ɲanmiɛn waan é ɲɛ́n i ɔ? ?Ɔ maan kosan benin yɛ e kwla fa usa e wun ɔn?
15 Y’a seman kɛ Klistfuɛ yolɛ’n ti pɔpɔ. Ɔ fata kɛ e mian e ɲin naan y’a yo Klistfuɛ kpa. (Mat. 16:24-26; Lik 13:24) Sanngɛ, Zoova kwla fɛ i wawɛ’n wla sran nga afɛ’n o i su’n i fanngan. Ɲanmiɛn nuan ijɔfuɛ Ezai klɛli i kɛ: “Be nga be fa be wla gua Anannganman su’n, be liɛ be nyan wunmiɛn uflɛ tititi. Sɛ bé jáso’n, be jaso kpɛ kunngba waka kɛ anunman nyin’n ɔ fa tu’n sa. Be wanndi, sanngɛ be fɛ-man, be nanti tititi, sanngɛ be wunmiɛn’n wie-man.” (Eza. 40:29-31) Kɛ m’ɔ ti sɔ’n ti’n, ɔ fata kɛ e usa e wun kɛ: ?Ngue li ti yɛ ɔ yo e kɛ Klistfuɛ’m be ninnge’m be yolɛ’n be tin e su sa’n niɔn?
16. ?Ngue yɛ e kwla yo naan ninnge wie’m be ti’n y’a fɛman annzɛ e sa sin w’a bubuman e ɔ?
16 Zoova i Ndɛ’n wla e fanngan kɛ maan ‘e wun like nga be ti kpa’m be wlɛ.’ (Fil. 1:10) Akoto Pɔlu fali Klistfuɛ’m be mɛn dilɛ’n sunnzunnin wanndilɛ nga be wanndi kɔ mmua’n. Ɲanmiɛn maan ɔ seli kɛ: “Maan e kusu e gua like kwlaa ng’ɔ tanndan e wun’n be ase [...]. Maan e mian e nyin sin lika nga be kle ye’n nun.” (Ebr. 12:1) I ndɛ’n i bo’n yɛle kɛ ɔ fata kɛ e kpalo ninnge nga be timan cinnjin’n mɔ be kwla kle e yalɛ’n. Atrɛkpa’n e nun wie’m be kunndɛ kɛ bé yó ninnge kpanngban ngboko, i ti yɛ be fɛ ɔ. I sɔ’n ti’n, sɛ ɔ yo e kpɛ sunman kɛ y’a fɛ naan y’a mian fii’n, wunmiɛn nga e fa wlɛ i e sa ti junman’n nun’n, i akunndan bulɛ’n kwla uka e. Ajalɛ nga e tu’n annzɛ wafa nga e wla e wun ase e kpinngbin e wun’n, annzɛ e yiyi e ɲin su’n, be akunndan bulɛ’n kwla uka e wie. Ɔ fata kɛ e kwlaa e fa ngwlɛlɛ naan e wun i wlɛ kɛ nán ninnge ngba yɛ e kwla yo ɔ, naan e yaci ninnge wie mɔ be timan cinnjin’n be yolɛ.
17. ?Ngue ti yɛ sran wie’m be sa sin kwla bubu be ɔ? ?Yɛ ndɛ benin yɛ Zoova kannin fa cici e wla ɔ?
17 E nun wie’m be sa sin w’a bubu be. Afin mɛn nga i awieliɛ mɔ be sunnzunnin kɛ ɔ́ wá jú’n, w’a yoman su. (Nya. 13:12) Sanngɛ sran kwlaa nga i wun yo i sɔ’n, ndɛ ng’ɔ o Abakik 2:3 nun’n, ɔ kwla wlɛ i fanngan. I waan: “Ndɛ nga ń kán be ń klé wɔ yɛ’n, be yolɛ blɛ nian ju-man. Kannzɛ ɔ cɛ lele-ɔ ɔ́ cɛ́ ngbɛn, saan i blɛ sɔ’n jú le. Maan i li cɛ bɔ lele, sanngɛ fa wɔ wla gua su. I kwlaa b’ɔ yoli o, saan i sɔ sa liɛ’n ɔ́ tɔ́, ɔ su sɛn-mɛn i wun.” Zoova seli kɛ mɛn’n i nunnunlɛ blɛ’n su sɛnmɛn i wun kaan sa!
18. (a) ?Ndɛ benin yɛ ɔ wla e fanngan ɔn? (b) ?Ye benin yɛ é wá ɲɛ́n i like suanlɛ ng’ɔ́ bá lɛ’n nun ɔn?
18 Zoova i sufuɛ kpa’m be kwlaa be su minndɛ blɛ nga afɛ’n su tranman lɛ kun’n, mɔ be sa sin su bubuman be kun’n. Be su minndɛ blɛ nga sran’m be kwlaa bé ‘yó kpinndin-kpinndin kɛ be gbanflɛn nun’n sa’n.’ (Zɔb 33:25) Dɔ nga su bɔbɔ’n, sɛ e di Ɲanmiɛn junman’n, Ɲanmiɛn wawɛ’n maan e kwla ɲan fanngan. (2 Kor. 4:16; Efɛ. 3:16) Nán maan afɛ’n yo naan suralɛ nga é ɲɛ́n i tititi’n, ɔ fi e sa. Maan ɔ yo lakalɛ’n nin afɛ’n m’ɔ o e su’n annzɛ e sa sin m’ɔ bubu e’n nin o, kekle kwlaa nga be tɔ e su’n bé wíe. Kannzɛ b’a wieman icra’n sanngɛ bé wíe Ɲanmiɛn i mɛn uflɛ’n nun lɔ. Like suanlɛ ng’ɔ́ bá lɛ’n nun’n, é wá wún wafa nga Ɲanmiɛn wawɛ’n wla Klistfuɛ’m be fanngan naan b’a kwla jran ɲrɛnnɛn klelɛ’n, ɔ nin mianmianlɛ nga be wiengu’m be mianmian be’n, ɔ nin sa uflɛ wie’m be ɲrun kekle’n.
?Amún tɛ́ su sɛ?
• ?Wafa sɛ yɛ Biblu’n nun kannganlɛ’n wla e fanngan ɔn?
• ?Wafa sɛ yɛ Ɲanmiɛn srɛlɛ’n nin akunndan bulɛ’n be wla e fanngan ɔn?
• ?Wafa sɛ yɛ e kwla kpalo ninnge nga be kwla bubu e sa sin’n niɔn?
[Foto, bue 26]
Klistfuɛ aɲia’m be kwla wla e fanngan.