?Wan yɛ ɔ ti cinnjin amun mɛn dilɛ’n nun ɔn?

“Ɔ kunngba cɛ yɛ like fi nun-man ɔ sin asiɛ wunmuan’n su-ɔ.”—JUE. 83:19.

1, 2. ?Sɛ e waan é ɲán nguan’n, ngue ti yɛ ɔ fataman kɛ e si Zoova i dunman’n ngunmin ɔn?

SRAN wie’m be liɛ’n, i kpɛ klikli nga bé wún Zoova i dunman’n, yɛle blɛ mɔ be fa kleli be Jue Mun 83:18 nun’n. Atrɛkpa’n kɛ be kanngannin ndɛ yɛ’n ɔ boli be nuan. Ndɛ sɔ’n waan: “Maan be si kɛ wɔ mɔ ɔ dunman’n yɛle Zoova’n, ɔ kunngba cɛ yɛ like fi nunman ɔ sin asiɛ wunmuan’n su ɔ.” (Jue. 83:18, NW) Kɛ ɔ fɛ i lɛ’n, be fali ndɛ mma kunngba sɔ’n be ukali sran uflɛ mun naan b’a si e Ɲanmiɛn Zoova m’ɔ klo e’n.—Rɔm. 10:12, 13.

² Kannzɛ bɔbɔ ɔ ti cinnjin kɛ sran’m be si Zoova i dunman’n sanngɛ nɛ́n i ngba ɔ. Jue tofuɛ’n fa e ɲin sie i ndɛ nanwlɛ kun ekun mɔ i silɛ’n ti cinnjin kpa naan y’a ɲan nguan’n i su. Maan e nian wafa ng’ɔ yoli i sɔ liɛ’n. I waan: “Ɔ kunngba cɛ yɛ like fi nun-man ɔ sin asiɛ wunmuan’n su-ɔ.” Nanwlɛ, ɲanmiɛn su lɔ nin asiɛ’n su wa’n, Zoova yɛ ɔ ti sran m’ɔ le ɲrun tra like kwlaa ɔ. Kɛ mɔ i yɛ ɔ yili like kwlaa’n ti’n, ɔ le atin se e kɛ e lo e wun e mɛn i mlɔnmlɔn, naan ɔ sie e. (Ngl. 4:11) I sɔ’n ti’n, ɔ nin i fata kɛ e usa e wun kɛ: ‘?Wan yɛ ɔ ti cinnjin min mɛn dilɛ’n nun ɔn?’ Ɔ fata kɛ e bo e ɲin ase e bu wafa e tɛ kosan sɔ’n su’n i akunndan. Afin ɔ ti wie nin nguan ndɛ!

Sa ng’ɔ juli Edɛni fie’n nun lɔ’n

3, 4. ?Ngue yɛ Satan yoli naan w’a kwla laka Ɛvu ɔ? ?Yɛ i bo’n guali sɛ?

³ Sa ng’ɔ juli Edɛni fie’n nun lɔ’n, ɔ kle weiin kɛ kosan nga e usɛli i ndɛ kpɔlɛ ng’ɔ sinnin lɛ’n nun’n, ɔ ti cinnjin kpa. Zoova seli yasua nin bla klikli’m be kɛ nán be di fie’n nun waka kun i mma’n. Sanngɛ anzi ɲin keklefuɛ kun mɔ i sin be wa flɛli i mmusu’m be si Satan’n, ɔ lakali Ɛvu m’ɔ ti bla klikli’n. Ɔ yoli sɔ naan Ɛvu kpalo Ɲanmiɛn i mmla’n naan ɔ dun mmua bu i bɔbɔ ninnge’m be akunndan. (Bob. 2:17; 2 Kor. 11:3) Ɔ yoli like nga Satan waan ɔ yo’n. Ɔ maan ɔ kleli kɛ ɔ buman Zoova i sran sielɛ’n i like fi. Ɛvu w’a kplinman su kɛ Zoova le ɲrun kpa trɛ i. ?Sanngɛ ngue yɛ Satan yoli naan w’a kwla laka Ɛvu ɔ?

⁴ Kɛ Satan nin Ɛvu bé íjɔ’n, ɔ fali ajalɛ wie mun. (An kanngan Bo Bolɛ 3:1-5 nun.) Like klikli nga Satan yoli’n, yɛle kɛ w’a boman Zoova i dunman. Ɔ seli ngbɛn kɛ “Nyanmiɛn.” Sanngɛ Bo Bolɛ fluwa’n i klɛfuɛ’n boli Zoova i dunman’n ndɛ tre kunngba sɔ’n i ndɛ mma klikli’n nun.a I nɲɔn su’n yɛle kɛ, kɛ Satan úsa Ɛvu i sa’n w’a seman kɛ Ɲanmiɛn ‘wlali amun su nun.’ I waan Ɲanmiɛn “seli kɛ.” (Bob. 2:16) Ɔ yoli sɔ naan bla’n bu i kɛ Ɲanmiɛn i ndɛ’n timan cinnjin sɔ liɛ. Like’n i nsan su nga Satan yoli’n, yɛle kɛ kannzɛ bla’n i ngunmin yɛ ɔ su kan ndɛ kle i’n, sanngɛ ɔ seli kɛ “amun.” Atrɛkpa’n, ɔ yoli sɔ naan bla’n bu i wun sran dan naan ɔ di tutre naan ɔ yo kɛ i yɛ ɔ ti i bɔbɔ nin i wun be nuan ijɔfuɛ sa. ?I bo’n guali sɛ? Ɛvu dili tutre sakpa. Ɔ maan ɔ ijɔli ɔ nin i wun be nɲɔn’m be nuan seli kɛ: ‘E di fie’n su waka’m be mma mun o!’

 5. (a) ?Ninnge benin mun yɛ Satan yoli naan Ɛvu fɛ i ɲin sie be su ɔ? (b) ?Kɛ Ɛvu dili waka mma’n, i sɔ’n kle sɛ?

⁵ Satan kpɛli ndɛ nga Ɲanmiɛn kannin’n i wun wie. I waan Ɲanmiɛn seli Adam nin Ɛvu be kɛ ‘nán be di fie’n su waka’m be mma’n wie fi.’ Naan i sɔ mɔ Ɲanmiɛn kannin’n ɔ timan kpa. I sin’n, Satan yoli naan Ɛvu bu i ngunmin ɔ nin wafa ng’ɔ kwla yo naan i mɛn dilɛ’n w’a yo kpa w’a tra laa’n, i wun akunndan naan ɔ yo kɛ Ɲanmiɛn “bɔbɔ sa.” I agualiɛ su’n, ɔ yoli naan Ɛvu yaci Zoova m’ɔ mɛnnin i like ngba’n i akunndan bulɛ naan ɔ bu waka nin i mma’m be ngunmin be akunndan. (An kanngan Bo Bolɛ 3:6 nun.) Ng’ɔ yo ɲrɛnnɛn’n yɛle kɛ, kɛ Ɛvu dili waka mma’n, ɔ kleli kɛ i mɛn dilɛ’n nun’n Zoova timan cinnjin.

Sa ng’ɔ juli Zɔbu blɛ su’n

 6. ?Wafa sɛ yɛ Satan sili Zɔbu i seiin nantilɛ’n i su akplowa ɔ? ?Yɛ ngue Zɔbu yɛ ɲɛnnin i wun atin ɔn?

⁶ Kɛ ɔ cɛli kpa’n, Zɔbu m’ɔ ti sran kpa’n, ɔ ɲannin atin naan w’a kle kɛ i mɛn dilɛ’n nun’n Zoova yɛ ɔ ti cinnjin ɔn. Kɛ Zoova fali Zɔbu i seiin m’ɔ nanti’n tali Satan ɲrun’n, Satan tɛli i su kɛ: “?Kɛlɛ a bu i kɛ Zɔb i nyin yi wɔ ngbɛn?” (An kanngan Zɔb 1:7-10 nun.) Satan w’a seman kɛ Zɔbu i ɲin yiman Ɲanmiɛn. Sanngɛ like nga ti yɛ Zɔbu yo ninnge mun’n i ndɛ yɛ ɔ kannin ɔn. Ɔ seli kɛ nán kɛ Zɔbu klo Zoova ti yɛ ɔ su i ɔ. Sanngɛ ninnge nga ɔ kwla ɲɛn i Zoova sa nun’n ti ɔ. Zɔbu kunngba cɛ yɛ ɔ kwla kpɛ ndɛ sɔ’n nun ɔn. Kusu ɔ ɲɛnnin i sɔ yolɛ’n i wun atin.

7, 8. ?Ɲrɛnnɛn benin mun yɛ be tɔli Zɔbu su ɔ? ?Yɛ kɛ ɔ trɛli i awlɛn mɔ w’a kpɔciman Ɲanmiɛn’n, ngue yɛ ɔ yili i nglo ɔ?

⁷ Zoova mannin Satan i atin kɛ ɔ fa ɲrɛnnɛn fanunfanun mun yi i Zɔbu su. (Zɔb 1:12-19) ?Kɛ i sɔ’n sa’m be juli Zɔbu su’n, ngue yɛ ɔ yoli ɔ? Ɲanmiɛn Ndɛ’n se e kɛ “w’a yo-man sa tɛ fi, yɛ i nuan w’a to-man Nyanmiɛn.” (Zɔb 1:22) Sanngɛ i sɔ’n w’a juman Satan. Ɔ seli ekun kɛ: “Sran i wunnɛn’n yɛ ɔ ti cinnjin i sa nun-ɔn. Kannzɛ sran kun i anyanbeun’n ɔ ti sɛ, sɛ sa’n tɔ cinnjin’n kpa’n, ɔ fɛ i anyanbeun’n fa to i ti-ɔ ɔ yo ye.”b (Zɔb 2:4) Satan waan sɛ Zɔbu wun i kplo’n nun ɲrɛnnɛn’n, ɔ́ sé kɛ nán Zoova yɛ ɔ ti cinnjin i mɛn dilɛ’n nun ɔn.

⁸ Tukpacɛ’n kain kun sacili Zɔbu i wunnɛn’n mlɔnmlɔn. Kpɛkun i yi’n miɛnnin i kɛ ɔ kpɛ Ɲanmiɛn nzowa naan ɔ wu. I sin’n, sran nsan mɔ be se be wun kɛ be ti i fɔnvɔfuɛ’n, be tɔnnin i suɛn kɛ w’a yo sa tɛ wie. (Zɔb 2:11-13; 8:2-6; 22:2, 3) Sanngɛ ɲrɛnnɛn kwlaa nga Zɔbu wunnin i’n nun’n, w’a kpɔciman Zoova le. (An kanngan Zɔb 2:9, 10 nun.) I awlɛn’n m’ɔ trali ti’n, ɔ kleli kɛ i mɛn dilɛ’n nun’n, Zoova yɛ ɔ ti i cinnjin ɔn. Asa ekun’n, Zɔbu yili i nglo kɛ klɔ sran mɔ fɔ o i nun’n ɔ kwla miɛn i ɲin kle kɛ suɛn ngbɛn yɛ Satan tɔn sran mun ɔn.—An nian Nyanndra Mun 27:11.

Zezi kpɛli ndɛ’n nun mlɔnmlɔn

 9. (a) ?Kɛ awe’n kunnin Zezi’n, wafa sɛ yɛ Satan sɛli i niannin ɔn? (b) ?Ngue yɛ Zezi yoli ɔ?

⁹ Kɛ be yoli Zezi i batɛmu’n, w’a cɛman yɛ Satan kunndɛli i lakalɛ ɔ. I waan ɔ́ yó naan nán Zezi bu i kɛ Zoova yɛ ɔ ti cinnjin ɔn, naan ɔ bu i ngunmin i wun akunndan. Satan sɛli i kpɛ nsan niannin. I klikli’n, i waan ɔ́ yó naan awe m’ɔ kunnin Zezi’n ti’n, ɔ fa yɛbuɛ kaci kpaun. (Mat. 4:2, 3) I blɛ sɔ’n nun’n nn Zezi w’a kpɛ srɛ nun lele cɛn ba 40. Ɔ maan awe w’a kun i kpa. Satan seli Zezi kɛ ɔ fa abonuan sa m’ɔ kwla yo be’n, ɔ yo like ng’ɔ nin i fataman’n. Yɛle kɛ ɔ fa kunndɛ aliɛ di. ?Ngue yɛ Zezi yoli ɔ? Zezi w’a yoman kɛ Ɛvu mɔ w’a faman Ɲanmiɛn i ndɛ’n su sa. I liɛ’n ɔ fɛli i ɲin sieli i Zoova i Ndɛ’n su, kpɛkun ɔ ka lɛ kpaloli Satan nuan.—An kanngan Matie 4:4 nun.

10. ?Ngue ti yɛ Satan seli Zezi kɛ ɔ fin Ɲanmiɛn sua’n i ti su lɔ, ɔ tu kpɛn asiɛ wun lɔ ɔ?

¹⁰ Asa ekun’n, Satan waan ɔ́ wláwlá Zezi naan ɔ bu i ngunmin i wun akunndan. I waan maan Zezi fin Ɲanmiɛn sua’n i ti su lɔ, ɔ tu kpɛn asiɛ wun lɔ. (Mat. 4:5, 6) ?Ngue yɛ Satan waan ɔ́ yó ɔ? Satan seli kɛ sɛ Zezi tu kpɛn naan like fi w’a yomɛn i’n, nn ɔ ti “Nyanmiɛn Wa” sakpa. Ɔ ti weiin kɛ Satan waan ɔ́ yó naan Zezi bu i dunman m’ɔ kwla saci’n, i akunndan tratra su, naan ɔ tu i wun. Satan si kɛ sɛ be nin sran kun be kpɛkpɛ kɛ ɔ yo sa kekleke wie’n, tutre’n ɔ nin sran sɔ’n i ɲin m’ɔ kunndɛman kɛ ɔ gua ase’n ti’n, ɔ kwla yo like sɔ’n. Satan kpɛli ndɛ mma kun i wun. Sanngɛ Zezi kleli kɛ ɔ wun Zoova i Ndɛ’n i wlɛ weiin. (An kanngan Matie 4:7 nun.) Like sɔ mɔ Zezi w’a yoman’n, ɔ kle kɛ i mɛn dilɛ’n nun’n Zoova yɛ ɔ ti i cinnjin ɔn.

11. ?Kɛ Satan waan ɔ́ fá mɛn’n i famiɛn diwlɛ’n kwlaa mán Zezi’n, ngue ti yɛ Zezi w’a sɔman nun ɔn?

¹¹ I kasiɛn su’n Satan miɛnnin i ɲin kpa, yɛ ɔ sali Zezi niannin ɔn. I waan ɔ́ fá mɛn’n i famiɛn diwlɛ’n kwlaa mɛ́n i. (Mat. 4:8, 9) Zezi ka lɛ kpaloli i nuan. Ɔ wunnin i wlɛ kɛ sɛ ɔ sɔ like nga Satan waan ɔ́ mɛ́n i’n nun’n, nn w’a kpalo atin nga Zoova mɔ like fi nunmɛn i sin’n, ɔ le i sie sran mun’n. (An kanngan Matie 4:10 nun.) Kɛ Zezi tɛ́ ndɛ kwlaa nga Satan kannin’n su’n, ndɛ mma nga Zoova i dunman’n o nun’n yɛ ɔ fa tɛli i su ɔ.

12. ?I nun mɔ Zezi i wie cɛn’n mantannin koko’n, ajalɛ kekle benin yɛ ɔ fatali kɛ ɔ fa ɔ? ?Ajalɛ sɔ’n i nuan like ng’ɔ yoli’n, ngue yɛ ɔ kle e ɔ?

¹² I nun mɔ Zezi i wie cɛn’n mantannin koko’n, ɔ fatali kɛ ɔ fa ajalɛ kekle kpa kun. Kɛ ɔ́ dí i junman’n asiɛ’n su wa’n, ɔ kannin kɛ i klunklo su ɔ́ fɛ́ i wun yí tɛ. (Mat. 20:17-19, 28; Lik 12:50; Zan 16:28) Sanngɛ kusu Zezi sili kɛ bé tɔ́n i suɛn kɛ ɔ saci Ɲanmiɛn dunman, yɛ bé jrán Zuifu’m be mmla’n su bé bú i fɔ, kpɛkun bé kún i. Wafa nga bé fá yó i sɔ liɛ’n, ɔ sɛnngɛnnin i akunndan. Ɔ srɛli Ɲanmiɛn kɛ: “N Si, sɛ nyrɛnnɛn wie nga kwla to fuan min’n, maan ɔ to fuan min.” Kpɛkun ɔ kan guali su kɛ: “Nán yo nga n klo kɛ ɔ yo su’n, sanngɛ yo nga a klo kɛ ɔ yo su’n.” (Mat. 26:39) Nanwlɛ, kɛ mɔ Zezi w’a kpɔciman Ɲanmiɛn lele ɔ fa wuli’n ti’n, ɔ kleli sran ng’ɔ ti i cinnjin i mɛn dilɛ’n nun’n weiin!

Wafa nga é kpɛ́ ndɛ’n nun’n

13. ?Lele mɔ é fá jú yɛ’n, ngue yɛ Ɛvu nin Zɔbu ɔ nin Zezi Klist be ajalɛ’m be kleli e ɔ?

¹³ ?Lele mɔ é fá jú yɛ’n, ngue yɛ e suannin ɔn? Ɛvu i su ndɛ’n nun’n, e wunnin i kɛ be nga be yo be klunklo ninnge mun’n, ɔ nin be nga be bu be wun sran dan’n, be kle kɛ nán Zoova yɛ ɔ ti be cinnjin ɔn. Sanngɛ wafa nga Zɔbu nantili seiin’n, ɔ kle e kɛ klɔ sran mɔ fɔ o be nun’n, be kwla kle kɛ Zoova yɛ ɔ ti be cinnjin ɔn. Yɛle kɛ kannzɛ kekle tɔ be su naan be wunmɛn i bo bɔbɔ’n, be kwla tra be awlɛn naan be nin Zoova be nanti klanman titi. (Zak 5:11) Kasiɛn su’n, Zezi i ajalɛ’n kle e kɛ sɛ sa wie yo e ɲannzuɛn’n maan e tra e awlɛn, kpɛkun nán e bu e dunman mɔ be kwla saci i’n, i akunndan ngboko. (Ebr. 12:2) ?Sanngɛ wafa sɛ yɛ e kwla nian afɔtuɛ sɔ’m be su e nanti ɔ?

14, 15. ?Ngbaciɛ benin yɛ ɔ o ajalɛ nga Zezi fali’n ɔ nin Ɛvu liɛ’n be afiɛn ɔn? (An yiyi desɛn ng’ɔ o ja ngua lɛ’n nun.)

¹⁴ Nán maan ninnge nga be sa e nian’n ti’n e wla fi Zoova. Like ng’ɔ o Ɛvu i ɲin bo lɛ’n i su yɛ ɔ fɛ i ɲin sieli ɔ. Ɔ wunnin kɛ waka mma’m bé “wá yó fɛ naan be man sran ngwlɛlɛ-ɔ ɔ yo ye.” (Bob. 3:6) Nanwlɛ, i ajalɛ liɛ’n ɔ nin ajalɛ nga Zezi fɛli i lakalɛ nsan nga Satan waan ɔ́ lɛ́kɛ i’n nun’n, be timan kun mlɔnmlɔn! Lakalɛ sɔ’m be kwlaa nun’n, ɔ wunnin ajalɛ ng’ɔ́ fá’n i sin sa mun. W’a fɛmɛn i ɲin w’a siemɛn i like nga be fa sɛ i nian’n su. Ɔ lafili Ɲanmiɛn Ndɛ’n su, kpɛkun ɔ boli Zoova i dunman.

¹⁵ ?Sɛ ɔ yo e kɛ e yo like nga Zoova klomɛn i’n, ngue su yɛ ɔ fata kɛ e fa e ɲin sie ɔ? Sɛ like sɔ’n i su yɛ e fa e ɲin sie’n, e konvi’n sɔ́ i yolɛ’n kpa ekun. (Zak 1:14, 15) Ɔ fata kɛ e fa ajalɛ ndɛndɛ naan y’a buman like tɛ sɔ’n i akunndan kun. Kannzɛ bɔbɔ ajalɛ sɔ’n i falɛ’n ti kɛ e su kpɛ e wunnɛn’n i bue sa’n, maan e fa. (Mat. 5:29, 30) Kɛ Zezi sa’n, like nga é yó’n, ɔ fata kɛ e bu i sin sa’m be akunndan. Yɛle kɛ maan e bu wafa nga ɔ kwla saci e nin Zoova e afiɛn’n, i akunndan. Ndɛ ng’ɔ o Biblu’n m’ɔ ti i nuan Ndɛ’n nun’n, ɔ fata kɛ e wla kpɛn su. Sɛ e yo sɔ’n, yɛ é kwlá klé kɛ e mɛn dilɛ’n nun’n, Zoova yɛ ɔ ti e cinnjin ɔn.

16-18. (a) ?Sa benin mun yɛ be kwla bubu e sa sin ɔn? (b) ?Ngue yɛ ɔ́ úka e naan y’a jran kekle ɲrɛnnɛn sa’m be ɲrun ɔn?

¹⁶ Ɲrɛnnɛn sa nga be tɔ e su’n be ti’n, nán maan e fa e ya’n e guɛ i Zoova su. (Nya. 19:3) Kɛ mɛn tɛ nga i awieliɛ’n mántan kɔ́’n, nn ɲrɛnnɛn sa fanunfanun kpanngban bé tɔ́ Zoova i sufuɛ’m be su bé kɔ́. I sɔ blɛ’n nun’n, e seman e wun kɛ Zoova yó abonuan sa fá sásá e. Kannzɛ ɔ ti sɔ’n, sanngɛ kɛ Zɔbu sa’n, kɛ e awlɛn su sran wie wu annzɛ sa wie tɔ e su’n, e sa sin kwla bubu e.

¹⁷ Like nga ti yɛ Zoova yacili sa wie’m be nun mɔ be juli’n, Zɔbu w’a wunmɛn i wlɛ. E kusu’n ɔ ju wie’n, e su wunman like nga ti yɛ sa tɛ wie’m be ju’n. Atrɛkpa’n e tili e niaan Klistfuɛ kpa nga asiɛ kejeli mɔ be wuli’n kɛ Haiti lɔ’n sa’n, be su ndɛ. Wie liɛ’n nzue ng’ɔ di lika’n annzɛ aunmuan dan wie yɛ ɔ kunnin be ɔ. Atrɛkpa kusu Ɲanmiɛn sufuɛ kpa wie mɔ be yoli i sa kekleke wie annzɛ ɔ wuli asidan wie nun i nganniɛn’n kwla gua e su. Annzɛ kusu e bɔbɔ ba’n yɛ ɲrɛnnɛn sa wie tɔli e su annzɛ be dili e ndrunmun tɛ kpa ɔ. Kɛ ɔ ko yo sɔ’n, e awlɛn m’ɔ kpɛ e klun’n ti’n e kwla se kɛ: ‘Ee Zoova. ?Ngue ti yɛ sa nga ju min su ɔ? ?Sa tɛ benin yɛ n yoli ɔ?’ (Aba. 1:2, 3) ?Sɛ i sɔ sa’m be ju’n, ngue yɛ ɔ́ úka e naan y’a jran be ɲrun kekle ɔ?

¹⁸ Ɔ fata kɛ e nian e wun naan y’a seman kɛ Zoova i klun jɔman e wun ti yɛ sa sɔ’m be tɔ e su ɔ. Kɛ Zezi kan sa nɲɔn mɔ be juli i blɛ su’n be ndɛ’n, ɔ boli i sɔ liɛ’n su. (An kanngan Lik 13:1-5 nun.) Ɲrɛnnɛn sa nga be ju’n, ‘kɛ blɛ’n fa ti bɔ sa’m be fa ju’n, i su like yɛ e wun i-ɔ.’ (Aku. 9:11) Sanngɛ kannzɛ sa ng’ɔ tɔ e su’n ti sɛ ti sɛ’n, ‘Nyanmiɛn kun b’ɔ jran e sin sa’n kwlaa nun’n,’ sɛ e se i kɛ ɔ uka e’n, é kwlá jrán kekle. Ɔ́ wlá e fanngan naan y’a kpɔcimɛn i le.—2 Kor. 1:3-6.

19, 20. ?Kɛ be guali Zezi i ɲin ase’n, ngue yɛ ɔ ukɛli i naan sa sɔ’n w’a sɔn i nun ɔn? ?Yɛ ngue yɛ ɔ kwla uka e naan y’a yo sɔ wie ɔ?

¹⁹ Nán maan e wun tulɛ’n ɔ nin e dunman mɔ be kwla saci’n be yo e cinnjin. Zezi i wun ase m’ɔ kannin’n ti’n, ‘w’a bu-mɛn i wun like fi, ɔ yoli i wun kanga.’ (Fil. 2:5-8) Zoova i su m’ɔ fɛ i wla’n guali’n ti’n, kɛ be guɛli i ɲin ase’n, ɔ sɔnnin i nun. (1 Piɛ. 2:23, 24) I sɔ mɔ Zezi yoli’n, ɔ kle kɛ Zoova i klun sa’n yɛ ɔ yoli i cinnjin ɔn. Yɛ Zoova kusu fɛli i sieli i like kwlaa su ɔ. (Fil. 2:9) Zezi seli i sɔnnzɔnfuɛ’m be kɛ be nian ajalɛ kunngba sɔ’n su.—Mat. 23:11, 12; Lik 9:26.

²⁰ Ɔ ju blɛ wie’n, sa nga be sa e Ɲanmiɛn sulafilɛ’n nian’n be kwla yo ɲannzuɛn. Sanngɛ ɔ fata kɛ e lafi Ɲanmiɛn su kɛ akoto Pɔlu sa. Ɔ seli kɛ: “I sɔ’n ti yɛ n wun nyrɛnnɛn nga-a, sanngɛ ɔ nin i sɔ’n ngba’n, nyannzuɛn kun-man min, afin n si sran nga n fa n wla’n guɛli i su’n. N si weiin kɛ like kwlaa nga ɔ fa wlali min sa nun’n, i bɔbɔ kwla nian su lele fa ju cɛn sɔ’n nun.”—2 Tim. 1:12.

21. ?Kannzɛ mɛn’n nunfuɛ’m be bu be wun akunndan’n, sanngɛ amun liɛ’n nda benin yɛ amun a ta ɔ?

²¹ Biblu’n dun mmua kannin kɛ e blɛ liɛ’n nun’n, sran’m “bé bú be bɔbɔ be wun akunndan.” (2 Tim. 3:2) I sɔ’n ti’n, sɛ andɛ sran’m be ngba be dun mmua be bu be wun akunndan’n, ɔ boman e nuan. Nán maan i sɔ akunndan liɛ’n sa e wie le! Sanngɛ sɛ like wie sa e Ɲanmiɛn sulafilɛ’n nian o, annzɛ sɛ ɲrɛnnɛn wie tɔ e su o, annzɛ kusu sran wie’m be waan bé yó naan e wun ɲannzuɛn o, maan e tinuntinun e ta nda kɛ e mɛn dilɛ’n nun’n, é klé kɛ Zoova yɛ ɔ ti e cinnjin sakpa ɔ!

[Ja ngua lɛ ndɛ mun]

?Amún tɛ́ su sɛ?

• ?Ngue yɛ wafa nga Satan lakali Ɛvu’n, ɔ kle e ɔ?

• ?Kɛ ɲrɛnnɛn tɔli Zɔbu su’n, ngue yɛ ajalɛ ng’ɔ fali’n kle e ɔ?

• ?Ngue yɛ like ng’ɔ yoli Zezi i cinnjin kpa i mɛn dilɛ’n nun’n, ɔ kle e ɔ?

[Foto, bue 21]

Kɛ Satan sali Zezi niannin’n, Zezi kpaloli i nuan, kpɛkun Zoova i klun sa’n i yolɛ’n yɛ ɔ yoli i cinnjin ɔn.

[Foto mun, bue 22]

Kɛ asiɛ’n kejeli Haiti lɔ’n, be boli jasin fɛ’n tannin sua’m be nun.

Ɲrɛnnɛn blɛ’n nun’n, e kwla srɛ ‘Nyanmiɛn kun b’ɔ jran e sin sa’n kwlaa nun’n’ kɛ ɔ uka e.