Bian annzɛ bla jalɛ’n i su afɔtuɛ kpa

“N kɛn i sɔ amun kpa yolɛ’n ti naan kɛ amun nin e Min’n trán’n, like fi a sanngan-man amun akunndan.”​—1 KOR. 7:35.

1, 2. ?Ngue ti yɛ ɔ fata kɛ e si afɔtuɛ nga Biblu’n man be nga be o aja’n nun’n, ɔ nin be nga be nunman nun’n niɔn?

WAFA nga yasua kun nin bla kun annzɛ bla kun nin yasua kun be fa tran’n, kpɛ sunman’n ɔ kwla yo maan be di aklunjuɛ annzɛ be akunndan sanngan, annzɛ kusu be lo be wiengu ngasi. I sɔ’n ti’n, ɔ fata kɛ be kunndɛ afɔtuɛ Ɲanmiɛn sa nun. Sanngɛ nɛ́n i sɔ ngunmin ti ɔ. Yɛle kɛ ɔ kwla yo Klistfuɛ kun mɔ i akunndan nunman bian annzɛ bla jalɛ’n su’n i kɛ i osufuɛ nin i janvuɛ’m be miɛnmiɛn i kɛ ɔ kunndɛ sran jɛ i sa. Klistfuɛ uflɛ liɛ’n atrɛkpa’n, ɔ kunndɛ kɛ ɔ́ já bian annzɛ bla. Sanngɛ ɔ nin a ɲɛnmɛn i klun su sran. Wie’m be liɛ kusu’n, be mian afɔtuɛ ng’ɔ kwla uka be naan b’a yo bian annzɛ bla kpa’n i wun. Asa ekun’n, i be nga be o aja’n nun’n nin o, i be nga be nunman nun’n nin o, ɔ fata kɛ be sasa be wun naan b’a tɔman bian annzɛ bla kunndɛlɛ ng’ɔ nin i fataman’n i aya’n nun.

² I sɔ sa’m be kwla yo maan e di aklunjuɛ annzɛ e wla bo. Asa ekun’n, be kwla yo maan e nin Ɲanmiɛn Zoova e afiɛn saci. Pɔlu i fluwa klikli ng’ɔ klɛli ko mannin Korɛntifuɛ mun’n i ndɛ tre 7 nun’n, ɔ mannin be nga be o aja’n nun’n ɔ nin be nga be nunman nun’n be afɔtuɛ. Ɔ kunndɛli kɛ ɔ́ wlá be fanngan ‘naan kɛ be nin e Min’n trán’n, like fi a sanngan-man be akunndan.’ (1 Kor. 7:35) Ndɛ cinnjin sɔ’m be su afɔtuɛ nga Pɔlu mannin’n kwla uka e wie. Afin Pɔlu kunndɛli kɛ sɛ sran kun o aja’n nun o, annzɛ ɔ nunman nun o, maan ɔ fɛ i blɛ’n su Zoova kpa.

Ajalɛ cinnjin kun mɔ sran kun bɔbɔ yɛ ɔ fa’n

3, 4. (a) ?Sɛ be mian sran kun kɛ ɔ ja bla annzɛ bian’n, sa benin yɛ ɔ kwla ju ɔ? (b) ?Wafa sɛ yɛ ndɛ nga Pɔlu kɛnnin i aja’n su’n, ɔ kwla uka e naan y’a bu aja’n kɛ nga ɔ nin i fata’n sa ɔ?

³ Klistfuɛ klikli’m be blɛ su’n, bian annzɛ bla jalɛ’n ti cinnjin kpa Zuifu’m be ɲrun. Sran sunman be bu i sɔ wie andɛ. Ɔ maan sɛ blɛ wie jú naan sran kun nin a jaman bla annzɛ bian’n, i osufuɛ nin i janvuɛ’m be kwla koko. Yɛ be kwla bu i kɛ ɔ fata kɛ be mɛn i afɔtuɛ. Be yalɛ kokolɛ’n nun’n, be kwla wlɛ i fanngan kɛ ɔ wlɛ i wun ase kpa kunndɛ sran ng’ɔ́ jɛ́ i’n. Wie liɛ kusu’n, be kwla fɛ i ɲin sie i sran kun su. Annzɛ kusu’n, kɛ mɔ be bu i kɛ sɛ ɔ ja bla wie annzɛ bian wie ɔ ti kpa’n ti’n, be kwla fa gblɛ be yo naan be sran nɲɔn sɔ’n, be yia lika kun. Aeliɛ sɔ’n kwla yo naan sran w’a wunmɛn i wun fɛ. Yɛ ɔ kwla saci sran afiɛn.

⁴ Pɔlu w’a mianman sran kun le kɛ ɔ ja bian annzɛ bla annzɛ kusu ɔ ka cɛgbaka. (1 Kor. 7:7) Pɔlu leman bla, sanngɛ ɔ dili aklunjuɛ Zoova i sulɛ’n nun. Kannzɛ ɔ ti sɔ’n, sanngɛ w’a kanman be nga be kunndɛ kɛ bé já bian annzɛ bla’n be wun ndɛ tɛ. Andɛ’n, sɛ Klistfuɛ kun waan ɔ́ já bla annzɛ bian annzɛ kusu ɔ yoman sɔ’n, ɔ ti kɛ i bɔbɔ sa. Ɔ fataman kɛ be nga’m be kle i ajalɛ ng’ɔ fata kɛ ɔ fa’n.

Wafa nga be nga be nunman aja nun’n be kwla di ye’n

5, 6. ?Ngue ti yɛ Pɔlu wlali Klistfuɛ’m be fanngan kɛ be ka cɛgbaka ɔ?

⁵ Ndɛ nga Pɔlu kan kleli Korɛntifuɛ mun i nun’n, e kwla wun i kɛ ɔ kannin cɛgbaka nun tranlɛ’n, i wun ndɛ kpa. (An kanngan 1 Korɛntfuɛ Mun 7:8 nun.) Kannzɛ Pɔlu leman bla’n, sanngɛ w’a yoman kɛ be nga be tɔn be wun suɛn kɛ be ti Klistfuɛ’n, be su kpɛnngbɛn mɔ be waan be jaman bla’n be sa. Yɛle kɛ w’a bumɛn i wun kɛ i kpa tra be nga be o aja nun’n. Ɔ kleli kɛ be nga be nunman aja nun’n, Zoova i sulɛ nun’n be kwla yo ninnge wie mɔ be nga be o nun’n, be kwlá ɲɛnmɛn i yolɛ wun atin ɔn. ?Ninnge benin mun ɔn?

⁶ Yɛle kɛ be kwla di Zoova i junman wie mɔ atrɛkpa’n be nga be o aja nun’n, be su kwlá diman ɔn. Ɲanmiɛn mannin Pɔlu i cenjele junman kun. Ɔ ‘sunmɛnnin i be bɔ be ti-man Zuif’n be sin.’ (Rɔm. 11:13) Kɛ e kanngan Sa Nga Be Yoli’n i ndɛ tre 13 lele 20 nun’n, e wun ninnge nga Pɔlu yoli’n. Pɔlu nin i wiengu ngaliɛ difuɛ’m be ɔli jasin fɛ’n i bolɛ lika nga sran fi nin a timan jasin fɛ’n lɔ’n nun. Yɛ be takali asɔnun lika sɔ’m be nun. Afɛ nga be tɔli Pɔlu su’n, e nun sunman e su wunmɛn i sɔ le. (2 Kor. 11:23-27, 32, 33) Sanngɛ aklunjuɛ nga Pɔlu dili i sran’m be ukalɛ naan be kaci Zezi i sɔnnzɔnfuɛ’n i nun’n ti’n, ɔ trɛli i awlɛn afɛ sɔ’m be nun. (1 Tɛs. 1:2-7, 9; 2:19) Sɛ ɔ ti kɛ Pɔlu le bla annzɛ ba’n nn atrɛkpa’n, w’a kwlá yomɛn i kwlaa sɔ’n.

 7. ?Wafa sɛ yɛ aniaan nɲɔn mɔ be ti cɛgbaka’n be fali be blɛ’n be dili Ɲanmiɛn Sielɛ’n i junman’n i kpa ɔ?

⁷ Klistfuɛ nga be nin a jaman bian annzɛ bla’n be nun kpanngban be fa be blɛ’n be di jasin fɛ’n i bolɛ junman’n i kpa. I wie yɛle Sara nin Limbania mɔ be ti atin bofuɛ nvle nga be flɛ i Bolivi’n i nun lɔ’n. Be ɔli jasin fɛ’n bolɛ klɔ kun mɔ i su sran’m be tili jasin fɛ’n w’a cɛ’n i su lɔ. Kolan nunman lɔ. Sanngɛ i sɔ’n w’a tanndanman be junman’n i ɲrun. Be seli kɛ: “Kɛ mɔ sran’m be tieman aladio mɔ be nianman televiziɔn’n ti’n, like nga be tɛ i yo’n yɛle fluwa nun kannganlɛ.” Klɔ’n i sufuɛ wie’m be fali Zoova i Lalofuɛ’m be fluwa wie mɔ dɔ nga su be yiman be kun’n mɔ sanngɛ be liɛ be te kanngan nun’n, be kleli aniaan bla mun. Be flɛ i kɛ awlo kwlaa nun’n, sran’m be sie be su aniaan’m be nuan bo. I sɔ’n ti’n, ɔ cɛli kpa naan b’a bo jasin fɛ’n b’a sin b’a yia klɔ’n. Bla oke kun seli aniaan’m be kɛ: “Mɛn’n i awieliɛ’n w’a mantan koko, afin Zoova i Lalofuɛ’m b’a to e wa siɛn’n.” W’a cɛman, klɔ sɔ’n sufuɛ wie’m be boli aɲia’m be bo kɔlɛ bo.

8, 9. (a) ?Ndɛ benin ti yɛ Pɔlu seli kɛ sɛ sran kun ka cɛgbaka naan w’a kwla su Zoova’n, ɔ ti kpa ɔ? (b) ?Zoova i sulɛ’n nun’n, ngue yɛ cɛgbaka’m be le i wun atin ɔn?

⁸ Ɔ ti su kɛ, kɛ Klistfuɛ nga be o aja’n nun’n be kɔ lika nga jasin fɛ’n i bolɛ ti kekle’n lɔ’n, be ko bo jasin’n i bo’n gua kpa wie. Sanngɛ Ɲanmiɛn junman wie mɔ cɛgbaka’m be kwla di’n, i dilɛ’n kwla yo kekle man be nga be o aja’n nun annzɛ be le ba’n. Kɛ Pɔlu klɛ́ fluwa kó mán asɔnun mun’n, ɔ si kɛ junman ng’ɔ fata kɛ be di naan jasin fɛ’n i bolɛ junman’n w’a ɔ i ɲrun’n, ɔ te sɔn. Kusu’n, ɔ kunndɛli kɛ aniaan’m be kwlaa be di aklunjuɛ kɛ i sa. I sɔ’n ti yɛ ɔ seli kɛ sɛ sran kun ka cɛgbaka naan w’a kwla su Zoova’n, ɔ ti kpa’n niɔn.

⁹ Aniaan bla kun m’ɔ fin Amlɛnkɛn’m be mɛn’n nun lɔ’n, ɔ ti atin bofuɛ yɛ ɔ ti cɛgbaka. Ɔ kan blɛ sɔ’n m’ɔ nin a jaman bian i ndɛ se kɛ: “Sran wie’m be bu i kɛ cɛgbaka’m be kwlá diman aklunjuɛ. Sanngɛ n wunnin i kɛ janvuɛ nga sran kun nin Zoova be tra’n yɛ maan ɔ kwla di aklunjuɛ kpafuɛ’n niɔn. Kannzɛ bɔbɔ cɛgbaka kalɛ’n timan pɔpɔ’n, sanngɛ sɛ e fɛ i sɔ blɛ’n e yo like kpa’n, ɔ kwla yo kɛ like kpa wie yɛ be fa cɛli e sa.” Ɔ kannin aklunjuɛ dilɛ’n i ndɛ seli kɛ: “Cɛgbaka kalɛ’n tanndanman e aklunjuɛ dilɛ’n i ɲrun. I kpa’n, ɔ man aklunjuɛ dilɛ’n i wun atin. N si kɛ i cɛgbaka mun o i be nga be o aja’n nun’n mun o, Zoova klo be ngba.” Dɔ nga su’n, aniaan bla sɔ’n di Zoova i junman’n nvle kun mɔ be le jasin bofuɛ’m be awuliɛ lɔ’n i nun. ?Sɛ amun nin a jaman bian annzɛ bla’n, amun kwla uka blɛ nga amun fa kle sran’m be ndɛ nanwlɛ’n su? Sɛ amun kwla yo sɔ’n, amun cɛgbaka blɛ’n yó kɛ like cinnjin kpa wie mɔ Zoova fa cɛli amun’n sa.

Be nga be sunnzun kɛ bé já bian annzɛ bla’n

10, 11. ?Be nga be su kunndɛ bian annzɛ bla kpa bé já’n, wafa sɛ Zoova uka be ɔ?

¹⁰ Kɛ ɔ́ kɔ́ i ɲrun’n, Zoova i sufuɛ kpa kun kwla se kɛ ɔ́ já bla annzɛ bian. Kɛ m’ɔ wun i wlɛ kɛ ɔ fata kɛ be kle i atin i sɔ’n nun’n ti’n, ɔ srɛ Zoova kɛ ɔ ukɛ i naan w’a ɲan bla annzɛ bian kpa w’a jɛ i. Biblu’n se kɛ: “Sanngɛ sran ng’ɔ siman bian annzɛ bla’n, sɛ ɔ bu i kɛ sɛ ɔ ka sɔ’n ɔ timan kpa’n, naan w’a ju bian annzɛ bla jalɛ kpa’n, sɛ ɔ́ nían naan i sɔ’n yolɛ’n nin i fata’n, maan ɔ yo like ng’ɔ klo’n. Sɛ ɔ yo i sɔ’n, w’a yoman sa tɛ. Maan be ja bian annzɛ bla.”—1 Korɛntfuɛ Mun 7:36, NW.

¹¹ Sɛ amun kunndɛ kɛ amún já sran kun m’ɔ tu i klun su Zoova kɛ amun sa’n, amun fɛ i sɔ’n wla Zoova i sa nun. Amun srɛ i titi. (Fil. 4:6, 7) Kannzɛ bɔbɔ ɔ yo amun kɛ ɔ su cɛ ngboko’n, sanngɛ nán amun wla bo. Ɲanmiɛn si like ng’ɔ mian amun sa’n. Sɛ amun lafi i su’n, ɔ́ úka amun naan amun a kwla jran sa ng’ɔ o amun su’n i ɲrun kekle.​—Ebr. 13:6.

12. ?Sɛ sran kun waan ɔ́ já amun’n, ngue ti yɛ ɔ fata kɛ amun bu akunndan kpa ɔ?

¹² Wie liɛ’n, sran kun m’ɔ suman Zoova ndɛnman su’n, annzɛ ɔ suman Zoova bɔbɔ’n, ɔ kwla se aniaan Klistfuɛ kun kɛ ɔ́ jɛ́ i. Sɛ be se amun sɔ’n, nán amun wla fi su kɛ sɛ amun ja sran ng’ɔ timan kpa’n, i sin aklunfian’n, ɔ́ yó dan trá kɛ amun ngunmin amun o’n. Asa kusu nán amun wla fi su kɛ, kɛ amun nin sran kun ko ja’n nn amun a ja. (1 Kor. 7:27) Nán amun se kɛ amun su ɲanman sran uflɛ be jɛmɛn i ti’n amún kplí tú amun je. Sɛ amun yo i sɔ’n, ɔ́ yó amun nsisɔ.​—An kanngan 1 Korɛntfuɛ Mun 7:39 nun.

Wafa nga be nga be waan bé já’n be kwla siesie be wun’n

13-15. ?Aja’n nun’n, ndɛ benin mun yɛ be kwla kpɛ ndɛnngan ba m’ɔ fata kɛ be nga be waan bé já be wun’n be koko be su yalɛ ɔ?

¹³ Kannzɛ bɔbɔ Pɔlu seli kɛ sɛ sran kun ka cɛgbaka naan w’a kwla su Zoova’n ɔ ti kpa’n, sanngɛ w’a bumɛn i wun kpa w’a traman be nga be waan bé já’n. I kpa’n, ndɛ nga Ɲanmiɛn maan ɔ klɛli’n, ɔ uka be nga be o aja’n nun’n naan b’a kwla jran sa nga be tɔ be aja’n nun’n be ɲrun kekle. Naan b’a kwla ka aja’n nun.

¹⁴ Wie liɛ’n, ɔ fata kɛ be nga be waan bé já’n, be kaci akunndan nga be bu i aja’n su’n. Afin kɛ sran nɲɔn bé kɔ́ be wiengu wun’n, be kwla bu i kɛ wafa nga be fa klo be wun’n, ɔ leman wunsu. Naan i sɔ’n kle kɛ aklunjuɛ nga bé wá dí i be aja’n nun’n, ɔ su yoman blɛblɛ. Kɛ bé já be wun’n, i sɔ akunndan’n yɛ ɔ o be ti nun ɔn. Yɛ be bu i kɛ saan aklunjuɛ bɔɔ cɛ yɛ bé dí i sa trilili ɔ. Sanngɛ i sɔ akunndan’n timan su. Ɔ ti su kɛ, kɛ sran nɲɔn mɔ be o aja’n nun’n be klo be wun mɔ be wun yo be wiengu fɛ’n, be di aklunjuɛ. Sanngɛ i sɔ’n ngunmin kwlá ukaman be naan b’a siesie be aja’n nun ndɛ mun.​—An kanngan 1 Korɛntfuɛ Mun 7:28 nun.a

¹⁵ Be nga b’a ja uflɛuflɛ’n be nun sunman kɛ be ko wun kɛ be nuan sɛman ndɛ cinnjin wie’m be su’n, be nuan bo be wun. Annzɛ be akunndan sanngan bɔbɔ. I wie yɛle kɛ like ng’ɔ fata kɛ be fa be sika’n be yo’n, ɔ nin be ɲin su yiyilɛ wafa’n i su akunndan nga be bu’n, ɔ kwla yo ngunminngunmin. Annzɛ kusu be nuan sɛman lika nga bé trán’n ɔ nin blɛ nga bé fá kó nían be sia’m be osu’n i su. Yɛ kusu be tinuntinun be le nzuɛn wie m’ɔ kwla lo be wiengu ngasi ɔ. Kɛ sran nɲɔn bé súan be wun silɛ’n, be kwla bu i kɛ ndɛ sɔ’m be su yalɛ kokolɛ timan cinnjin. Sanngɛ kɛ be ko ja’n, ndɛ sɔ’m be ti’n ndɛnngan kwla tɔ be afiɛn. I sɔ’n ti’n, ɔ ti kpa kɛ sran nɲɔn mɔ be waan bé já be wun’n be dun mmua koko ndɛ kɛ ngalɛ sa’m be su yalɛ.

16. ?Ngue ti yɛ be nga be waan bé já’n, ɔ ti mɔ be nuan sɛ wafa nga bé síesíe sa nga bé tɔ́ be aja’n nun’n i su ɔ?

¹⁶ Sɛ sran nɲɔn be waan be aja’n yo ye naan bé dí aklunjuɛ’n, ɔ fata kɛ sa nga be tɔ be su’n, be kunndɛ be trawlɛ likawlɛ. Ɔ fata kɛ be nuan sɛ wafa nga bé tú be mma’m be fɔ’n i su. Yɛ sɛ be si nin be nin’m be su yo oke’n, ɔ fata kɛ be nuan sɛ wafa nga bé nían be lika’n i su wie. Kekle’n tɔ aja’n kwlaa nun. Sanngɛ ɔ fataman kɛ i sɔ’n yo naan be nga be o aja’n nun’n be afiɛn saci. Sɛ be fa Biblu’n nun afɔtuɛ’m be su’n, bé kwlá síesíe kekle nga bé tɔ́ be su’n be nun kpanngban. Yɛ nga b’a kwlá siesieman’n, ɔ́ sɔ́n be nun, ɔ maan bé dí aklunjuɛ likawlɛ titi.—1 Kor. 7:10, 11.

17. ?Ngue ti yɛ sran ng’ɔ ja bian annzɛ bla’n, “mɛn’n nun ninnge’m be akunndan yɛ ɔ bu-ɔ”?

¹⁷ Pɔlu kannin aja’n i su ndɛ uflɛ ekun 1 Korɛntfuɛ Mun 7:32, 33 nun. (An kanngan nun.) Sran ng’ɔ ja bian annzɛ bla’n, “mɛn’n nun ninnge’m be akunndan yɛ ɔ bu-ɔ.” Ninnge sɔ’m be wie yɛle aliɛ nga bé dí’n, tralɛ nga bé wlá’n, lika nga bé lá’n, ɔ nin ninnge uflɛ wie mun. ?Ngue ti yɛ ɔ ti sɔ ɔ? Yɛle kɛ blɛ mɔ aniaan bian kun nin a jaman bla’n, atrɛkpa’n, ɔ fɛ i wun wlɛ i jasin fɛ’n i bolɛ’n nun kpa. Sanngɛ kɛ ɔ ko ja bla’n, ɔ fata kɛ ɔ fɛ i blɛ’n nin i wunmiɛn’n wie niɛn i yi’n i lika. I kunngba’n yɛ bla’n kusu yo ɔ. Zoova mɔ ngwlɛlɛ’n fin i’n, ɔ wun i wlɛ kɛ i yasua nin o, i bla nin o, be kunndɛ kɛ be wiengu kun’n i klun jɔ. Ɔ si kɛ, kɛ ɔ ko yo naan sran nɲɔn be aja’n w’a yo ye’n, ɔ fata kɛ blɛ nin wunmiɛn nga i nun mɔ be te yo cɛgbaka’n be fa di i junman’n, be fa wie be nian be wiengu lika.

18. ?Be ɲin su yiyilɛ’n i wun ajalɛ uflɛ benin yɛ atrɛkpa’n ɔ fata kɛ be nga b’a ja’n, be nun wie’m be fa ɔ?

¹⁸ Ɔ fata kɛ be nga be o aja’n nun’n be fa blɛ nin wunmiɛn nga i nun mɔ be te yo cɛgbaka’n be fa di Ɲanmiɛn i junman’n i wie be nian be wiengu kun’n i lika. ?Sɛ ɔ ti sɔ’n niɔn, nn ɔ fataman kɛ be fa blɛ nin wunmiɛn nga be fa yiyi be ɲin su laa’n i wie be nian be wiengu lika? Atrɛkpa’n, i nun mɔ yasua kun nin a jaman bla’n, ɔ nin i janvuɛ’m be fa blɛ kpanngban be yiyi be ɲin su. ?Kɛ ɔ ko ja bla’n sɛ ɔ yo i sɔ kunngba’n, ɔ́ yó i yi sɛ? ?Yɛ sɛ bla’n yɛ ɔ nin i janvuɛ’m be yo sɔ’n, ɔ́ yó i wun’n i sɛ? Be wiengu kun’n, i ɲrun kwla yo i koun, yɛ i wla kwla bo i wun, kpɛkun ɔ kwla bu i kɛ be klomɛn i kun. Kɛ ɔ ko yo naan yasua kun nin i yi’n be wun w’a yoman be sɔ’n, ɔ fata kɛ be yo like kwlaa nga be ko yo naan be afiɛn w’a mantan kpa’n.—Efɛ. 5:31.

Zoova kloman kɛ be kunndɛ bla be yi bo annzɛ bian be wun bo

19, 20. (a) ?Ngue ti yɛ bian annzɛ bla jalɛ’n ɔ sasaman sran kun naan w’a tɔman sa sukusuku yolɛ’n nun ɔn? (b) ?Sɛ be nga be o aja’n nun’n be yaci be yi annzɛ be wun be kɔ lika wie naan be cɛ lɔ’n, i bo’n kwla gua sɛ?

¹⁹ Zoova i sufuɛ’m be yo like kwlaa nga be kwla yo’n naan b’a yoman sa sukusuku’n. Be nun wie’m be ja bla annzɛ bian naan b’a yomɛn i sɔ sa mun. Sanngɛ i sɔ’n sasaman sran kun sa sukusuku yolɛ’n i lika. Laa kpa Izraɛlifuɛ’m be blɛ su’n, be sisi klɔ’m be wun nin talɛ kekleke kpa. Sran ng’ɔ o klɔ’n i klun lɔ’n, sa ɲɛnmɛn i. Sanngɛ sran ng’ɔ fin lɔ fite’n, awiefuɛ nin sa tɛtɛ yofuɛ’m be kwla yo i like wie. Annzɛ be kun i bɔbɔ. Mmla nga Zoova kpɛ mannin be nga be o aja’n nun’n, be ti kɛ talɛ kekleke wie mɔ be fa sisili klɔ kun wun’n sa. Sɛ be nga be o aja’n nun’n be fa mmla sɔ mɔ sran ng’ɔ kpɛli aja’n i ba’n ɔ mannin’n su’n, yɛ be kwla sasa be wun sa sukusuku yolɛ’n i lika ɔ.

²⁰ Pɔlu yiyili mmla sɔ’m be nun 1 Korɛntfuɛ Mun 7:2-5 nun. Bla kun nin i wun kunngba cɛ yɛ ɔ fata kɛ be si sua ɔ. I kunngba’n, yasua kun nin i yi kunngba cɛ yɛ ɔ fata kɛ be si sua ɔ. Ɲanmiɛn waan “like nga yasua yo mɛn i yi-ɔ ɔ ti su’n, maan ɔ yo mɛn i, maan bla’n kusu yo i sɔ mɛn i wun’n.” Nán maan be la be wiengu awe i sɔ’n nun. Sanngɛ yasua annzɛ bla wie’m be yaci be yi annzɛ be wun mun be kɔ wunmiɛn lolɛ annzɛ junman dilɛ lika wie be cɛ lɔ kpa. Ɔ maan “like nga yasua yo mɛn i yi-ɔ ɔ ti su’n,” yasua sɔ’m be yoman. Yɛ bla sɔ’m be kusu be yoman like nga be yo be man be wun mun’n ɔ ti su’n. Sɛ sran kun i ‘anwlɛn bɔ ɔ kwlá tra-man’n ti’n’ ɔ tɔ Satan i aya’n nun naan ɔ kunndɛ bian i wun bo annzɛ bla i yi bo’n, amun bu ɲrɛnnɛn nga i sɔ’n fá yí i be aja’n su’n, i akunndan kan be nian! Awlobo kpɛn nga be nian be awlobofuɛ’m be lika, mɔ kɛ bé yó i sɔ’n be yoman like ng’ɔ kwla saci be aja’n, Zoova ra be su.​—Jue. 37:25.

Maan e fa Biblu’n nun afɔtuɛ’m be su

21. (a) ?Ngue ti yɛ cɛgbaka kalɛ’n nin aja’n be wun ajalɛ’m be falɛ’n timan blɛblɛ ɔ? (b) ?Ngue ti yɛ afɔtuɛ ng’ɔ o 1 Korɛntfuɛ Mun 7 nun’n kwla yo e ye ɔ?

²¹ Cɛgbaka kalɛ’n nin aja’n be wun ajalɛ’m be falɛ’n timan blɛblɛ. Fɔ mɔ yɛ maan ndɛ sunman tɔ sran’m be afiɛn’n ɔ o e ngba e nun. I ti’n, be nga Zoova i klun jɔ be wun m’ɔ ra be su’n bɔbɔ’n, kannzɛ be o aja’n nun annzɛ be nunman nun o, sa nga be ju be su’n be kwla sanngan be akunndan. Sɛ amun fa afɔtuɛ kpa ng’ɔ o 1 Korɛntfuɛ Mun ndɛ tre 7 nun’n i su’n, sa sɔ’m be nun sunman bé tó fúan amun. Ɔ maan Zoova i ɲrun’n kannzɛ amun ti cɛgbaka annzɛ amun o aja’n nun’n, like nga amún yó’n ‘ɔ́ yó kpa.’ (An kanngan 1 Korɛntfuɛ Mun 7:37, 38 nun.b) Like cinnjin kpafuɛ nga e kwla yo i asiɛ nga su’n yɛle kɛ maan e yo naan Ɲanmiɛn i klun jɔ e wun. Sɛ i klun jɔ e wun’n, é kwlá yó kpa é kɔ́ e ɲrun naan y’a kwla trɛn i mɛn klanman’n nun wie. Mɛn sɔ’n nun’n, yasua’m be nin bla mun be nantilɛ’n nun’n, ninnge nga be sanngan be afiɛn andɛ’n, wie fi su tranman lɔ.

[Ja ngua lɛ ndɛ mun]

?Amun kwla tɛ su?

• ?Ngue ti yɛ ɔ fataman kɛ sran kun miɛn i wiengu kun kɛ ɔ ja bla annzɛ bian ɔn?

• ?Wafa sɛ yɛ Zoova i sufuɛ kun m’ɔ nunman aja nun’n, ɔ kwla fɛ i blɛ’n yo like kpa ɔ?

• ?Wafa sɛ yɛ yasua kun nin bla kun mɔ be su suan be wun silɛ’n, be kwla siesie be wun naan b’a jran sa nga be o aja’n nun’n be ɲrun kekle ɔ?

• ?Ngue ti yɛ bian annzɛ bla jalɛ’n ɔ sasaman sran kun naan w’a tɔman sa sukusuku yolɛ’n nun ɔn?

[Foto, bue 16]

Cɛgbaka nga be fa be blɛ’n be di Ɲanmiɛn i junman’n kpa’n be di aklunjuɛ.

[Foto, bue 18]

?Ajalɛ uflɛ benin yɛ kɛ sran wie’m be ko ja’n, atrɛkpa’n ɔ fata kɛ be fa ɔ?