Maan e lafi Ɲanmiɛn su kɛ Moizi sa

“Nyanmiɛn su bɔ Moiz lafi’n ti, kɛ ɔ nyinnin’n w’a kplin-man su kɛ be se kɛ ɔ ti Ezipt famiɛn’n i wa bla’n i wa.”​—EBR. 11:24.

LIKE NGA MOIZI I SU NDƐ’N KLE E’N

?Ngbaciɛ benin yɛ ɔ o aɲanbeun ninnge mun nin ninnge nga be saciman’n be afiɛn ɔn?

?Ngue yɛ Zoova yo naan y’a kwla di junman ng’ɔ man e’n niɔn?

?Ngue ti yɛ like nga é ɲɛ́n i’n, ɔ fata kɛ e ɲin tɛ i mmua lɔ ɔ?

1, 2. (a) ?Kɛ Moizi ɲannin afuɛ 40, ajalɛ benin yɛ ɔ fali ɔ? (An nian desɛn ng’ɔ o kan like suanlɛ’n bo i bo lɛ’n.) (b) ?Ngue ti yɛ Moizi kunndɛli kɛ ɔ́ dí kanga kɛ Izraɛlifuɛ mun sa ɔ?

MOIZI i bakan nun’n, Ezipti famiɛn’n i awlo lɔ yɛ be tɛli i ɔ. Ɔ maan, sua dandan nglanman nga be ti aɲanbeunfuɛ’m be sua’n, ɔ wunnin wie yɛ ɔ trannin wie nun. Eziptifuɛ’m be kleli “Moiz be ngwlɛlɛ’n kwlaa.” Atrɛkpa’n, be kleli i be ajuin dilɛ wafawafa mun nin nglo lɔ ninnge’m be silɛ’n, ɔ nin ninnge’m be kalɛ’n, ɔ nin ninnge wie mun ekun. (Yol. 7:22) Ɔ maan, sɛ sika nin kwlalɛ nin aɲrunɲan yɛ Moizi waan ɔ́ ɲɛ́n i’n, nn ɔ ɲɛnnin i.

² Kɛ Moizi ɲannin afuɛ 40, ɔ fali ajalɛ kun. Ajalɛ sɔ m’ɔ fali’n, ɔ boli Ezipti famiɛn’n nin i awlofuɛ’m be nuan. Yɛle kɛ, ɔ yacili Famiɛn i awlo nun lɔ pɔɔ nun tranlɛ’n. Nán kɛ i waan ɔ́ yó kɛ Eziptifuɛ onga’m be sa ti ɔ. Sanngɛ, ɔ kunndɛli kɛ ɔ́ dí kanga kɛ Izraɛlifuɛ mun sa. ?Ngue ti ɔ? Ɲanmiɛn su m’ɔ lafi’n ti ɔ. (An kanngan Ebre Mun 11:24-26 nun.) Nanwlɛ, Moizi lafili Ɲanmiɛn Zoova “bɔ be wun-mɛn i’n” su. Yɛ ɔ lafili su kɛ ninnge nga Ɲanmiɛn seli kɛ ɔ́ yó be’n, bé kpɛ́n su.​—Ebr. 11:27.

 3. ?Kosan nsan benin yɛ like suanlɛ nga wá tɛ́ be su ɔ?

³ Kɛ Moizi sa’n, ɔ fataman kɛ e ɲin tran mɛn’n nun ninnge’m be su. Ɔ fata kɛ e yo sran m’ɔ “lafi Nyanmiɛn su” ɔ. (Ebr. 10:38, 39) Kɛ ɔ ko yo naan y’a lafi Ɲanmiɛn su kpa’n, maan e nian Moizi i su ndɛ nga Ebre Mun 11:24-26 kan’n. Kɛ é yó sɔ’n, maan e kunndɛ kosan nga’m be su tɛlɛ’n: ?Ngue ti yɛ Moizi i ɲin w’a bloman ninnge’m be su ɔ? ?Kannzɛ be yoli Moizi i finfin’n, ngue ti yɛ ɔ buli junman nga Ɲanmiɛn mɛnnin i’n i junman nanndoliɛ ɔ? ?Ngue ti yɛ ‘like ng’ɔ́ wá nyɛ́n i cɛn wie’n, i nyin tɛli i mmua lɔ’ ɔ?

I ƝIN W’A BLOMAN NINNGE’M BE SU

 4. ?Ngue yɛ Moizi wunnin i wlɛ ɔ?

⁴ Ɲanmiɛn su mɔ Moizi lafi’n ti’n, ɔ wunnin i wlɛ kɛ Ezipti lɔ ‘mɛn dilɛ’n’ ti le nɲɔn kun like. Sanngɛ sran wie’m b’a bumɛn i sɔ. Atrɛkpa’n, be seli be klun lɔ kɛ kannzɛ Eziptifuɛ’m be ti amuɛn sɔfuɛ naan be di bae’n, sanngɛ be yɛ be kwla ɔ. Kpɛkun, Ɲanmiɛn i nvle nunfuɛ’m be ti be kanga. Moizi liɛ’n, ɔ si kɛ ɔ su kaman sɔ trilili. Be nga be yi Ɲanmiɛn blo’n, be ninnge’m be yo ye be sa nun. Sanngɛ Moizi lafi su kɛ cɛn wie lele’n, Ɲanmiɛn wá núnnún klunwifuɛ mun. I sɔ’n ti’n, w’a kunndɛman kɛ ɔ́ ‘dí mɛn’n m’ɔ ti le nnyɔn kun like’n.’

 5. ?Kɛ ɔ ko yo naan y’a kloman ‘mɛn dilɛ m’ɔ ti le nɲɔn kun like’n,’ ngue yɛ ɔ fata kɛ e yo ɔ?

⁵ ?Kɛ ɔ ko yo naan y’a kloman ‘mɛn dilɛ m’ɔ ti le nɲɔn kun like’n,’ ngue yɛ ɔ fata kɛ e yo ɔ? Sɛ e lafi Ɲanmiɛn su’n, é wún i wlɛ kɛ “mɛn’n nin i nun ninnge kwlaa bɔ sran nyin blo su’n, bé wíe.” (1 Zan 2:15-17) Be nga be klo mɛn dilɛ mɔ be kaciman’n, maan e bu be agualiɛ’n i akunndan e nian. Nanwlɛ, be o “atin b’ɔ yo ndrɔn’n nun, [...] kpɛkuun be liɛ’n w’a wie.” (Jue. 73:18, 19) I sɔ’n ti’n, sɛ ɔ yo e kɛ e yo sa tɛ wie’n, maan e fa kosan yɛ’n e usa e wun. Yɛle kɛ: ‘?Sɛ n yo sa tɛ nga’n, wafa sɛ yɛ i bo gúa mán min ɔn?’

 6. (a) ?Ngue ti yɛ Moizi w’a kplinman su kɛ “be se kɛ ɔ ti Ezipt famiɛn’n i wa bla’n i wa” ɔ? (b) ?Ngue ti yɛ ajalɛ kpa yɛ Moizi fali ɔ?

⁶ Ɲanmiɛn su mɔ Moizi lafi’n ti’n, ɔ fali junman nga cɛn wie lele ɔ́ dí’n i wun ajalɛ. Ɲanmiɛn Ndɛ’n waan: “Nyanmiɛn su bɔ Moiz lafi’n ti, kɛ ɔ nyinnin’n w’a kplin-man su kɛ be se kɛ ɔ ti Ezipt famiɛn’n i wa bla’n i wa.” (Ebr. 11:24) Wienun ɔn, Moizi kwla se kɛ ɔ́ ká Ezipti famiɛn’n i awlo lɔ. I liɛ’n, ɔ́ fá sika nin ɲrun ng’ɔ le i’n, ɔ́ úkɛ i niaan Izraɛlifuɛ mun. Sanngɛ w’a yoman sɔ. Ɔ kloli Zoova kpa. Ɔ fɛli i wla’n kwlaa guɛli i su, yɛ ɔ fɛli i wunmiɛn’n kwlaa yoli like ng’ɔ kle kɛ ɔ klo i’n. (Mml. 6:5) Ajalɛ kpa yɛ Moizi fali ɔ. Afin kɛ ɔ́ kɔ́ i ɲrun’n, Izraɛlifuɛ’m be deli Eziptfuɛ’m be bo ninnge kpakpa kpanngban. (Tul. 12:35, 36) Ezipti famiɛn’n kusu’n, i ɲin guali ase. Kpɛkun, Ɲanmiɛn maan ɔ wuli. (Jue. 136:15) Sanngɛ Moizi liɛ’n, ɔ fiteli nun. Kpɛkun Ɲanmiɛn fɛli i kɛ ɔ fa Izraɛlifuɛ mun Ezipti lɔ fite. Nanwlɛ, Moizi liɛ yoli ye.

 7. (a) ?Kɛ nga Matie 6:19-21 fa kan’n sa’n, ngue su yɛ ɔ fata kɛ e akunndan’n tran ɔn? (b) Kɛ ninnge nga be saciman’n be su yɛ sran kun nian fa ajalɛ’n, ɔ ti kpa. An fa sa kun yiyi nun.

⁷ ?Gbanflɛn nin talua mun, junman benin yɛ cɛn wie lele amún dí ɔ? An tran be bu i akunndan kpa. ?Kɛ amún yó sɔ’n, wafa sɛ yɛ amun kwla kle kɛ amun lafi Ɲanmiɛn su kɛ Moizi sa ɔ? Nán maan amun akunndan’n tran le nɲɔn kun ninnge’m be su. Sanngɛ, ninnge nga be saciman’n be su yɛ amun akunndan’n tran ɔn. (An kanngan Matie 6:19-21 nun.) I sɔ yɛ aniaan bla kun m’ɔ be flɛ i Sofi’n, ɔ yoli ɔ. I talua nun’n, ɔ si able si kpa. Ɔ maan, Amlɛnkɛn’m be lɔ able sifuɛ dandan’m be fali be ɲin sieli i su. Be seli i kɛ bé fɛ́ i naan ɔ nin be wlan sin Amlɛnkɛn mɛn’n nun be si able. I waan: “Kɛ n wun kɛ be fali be ɲin sieli min su’n, ɔ yoli min fɛ kpa. N seli min klun lɔ kɛ, yoo kannzu n si able si tra min wiengu mun. Sanngɛ n diman aklunjuɛ.” Cɛn kun’n, Sofi niannin gbanflɛn nin talua’m be su video nga anuannzɛ’n yili’n, be nun kun. (Les jeunes s’interrogent... Que vais-je faire de ma vie ?) Ɔ seli kɛ: “M ma wunnin i wlɛ kɛ, sran’m bé yí min ayɛ. Kpɛkun bé yó maan min dunman’n fú. Sanngɛ, n su kwlá tuman min klun suman Zoova. Ɔ maan, n srɛli Zoova n jrannin su kpa. Kpɛkun, n yacili able silɛ junman’n.” ?Ajalɛ sɔ mɔ aniaan bla’n fali’n, ɔ yoli i nsisɔ? I waan: “N wla loman min laa nun kaan sa. Kɛ é sé yɛ’n, aklunjuɛ’n kun min kpo. Min nin min wun’n, e ti atin bofuɛ. E leman ɲrun, yɛ e timan aɲanbeunfuɛ. Sanngɛ, Zoova o e sin. E kle sran’m be Biblu’n nun like. Ɲanmiɛn i sulɛ’n nun’n, e fa e ɲin sie ninnge wie’m be su kɛ é yó be. Ajalɛ nga n fali’n, ɔ yoman min nsisɔ kaan sa.”

 8. ?Biblu’n nun afɔtuɛ benin yɛ gbanflɛn nin talua’m be kwla nian su naan b’a fa junman nga cɛn wie lele bé dí’n, i wun ajalɛ ɔ?

⁸ Gbanflɛn nin talua mun, Zoova si like ng’ɔ ti kpa man amun’n. Moizi seli kɛ: “?Like nga Anannganman amun Nyanmiɛn’n waan amun yo’n yɛle onin? ?W’a se-man kɛ amun nyin yi i? W’a se-man kɛ amun fɛ i atin su? ?W’a se-man kɛ amun klo i? ?W’a se-man kɛ amun su i naan amun fa amun wla kwlaa’n guɛ i su naan amun akunndan’n kwlaa trɛn i su? ?Nán i ndɛ nin i mmla nga ń fá mán amun ndɛkɛn yɛ’n i su falɛ yɛ i waan amun fa naan amun wun jɔ amun fɔuun ɔn?” (Mml. 10:12, 13) I sɔ’n ti’n, junman nga sɛ amun di ɔ, amún kló Zoova titi’n, kpɛkun ‘amún fá amun wla kwlaa’n gúɛ i su yɛ amun akunndan’n kwlaa trɛ́n i su’n,’ yɛ ɔ fata kɛ amun kunndɛ ɔ. Sɛ amun yo sɔ’n, ‘amun wun jɔ́ amun fɔuun.’

Ɔ KLOLI JUNMAN NGA ƝANMIƐN MƐNNIN I’N

 9. ?Ngue ti yɛ srɛ kunnin Moizi ɔ?

⁹ Moizi “wunnin i kɛ finfin nga Krist ti be yo i’n ɔ ti kpa tra Ezipt lɔ like kpakpa’n kwlaa.” (Ebr. 11:26) Zoova bɔbɔ yɛ ɔ kpali Moizi ɔ. Ɔ maan ɔ ti “Krist” yɛle kɛ Zoova kpɛli i kɛ ɔ di junman cinnjin kpa kun. Ɔ seli i kɛ ɔ fa Izraɛlifuɛ mun Ezipti lɔ fite. Moizi si kɛ junman sɔ’n i dilɛ’n yó kekle naan bé yó i “finfin.” I nun ng’ɔ te o Ezipti lɔ’n, Izraɛlifuɛ kun seli i kɛ: “?Wan li yɛ ɔ fali wɔ sieli i e su kpɛn nin e jɔlɛ difuɛ ɔ?” (Tul. 2:13, 14) Moizi bɔbɔ kusu, kɛ i blɛ juli mɔ Zoova sunmɛnnin i Ezipti Famiɛn’n i wun lɔ’n, ɔ usali Zoova kɛ: “?Famiɛn’n i li yɛ ɔ́ wá tíe min bɔ n si-man ijɔ’n min ndɛ nin-ɔn?” (Tul. 6:12) Srɛ kunnin Moizi. Yɛ ɔ kan kleli Zoova. ?Kɛ ɔ yoli sɔ’n, ngue yɛ Zoova yoli naan Moizi w’a kwla di i junman’n niɔn?

10. ?Ngue yɛ Zoova yoli naan Moizi w’a kwla di i junman’n niɔn?

¹⁰ Like klikli nga Zoova yoli’n, yɛle kɛ ɔ guali Moizi i awlɛn su nzue. Ɔ seli i kɛ: “N jin ɔ sin.” (Tul. 3:12) I nɲɔn su’n, Zoova tuli i dunman’n i bo kleli i naan ɔ lafi i su. Ɔ seli i kɛ: “Nyanmiɛn b’ɔ wo lɛ titi’n sunmannin min amun sin [annzɛ “Nga n kunndɛ kɛ ń káci’n yɛ n kaci’n ɔ sunmannin min amun sin.” NW]”a (Tul. 3:14) I nsan su’n, ɔ tinnin Moizi naan ɔ yo abonuan sa mun. I liɛ’n, sran’m bé wún i wlɛ kɛ i bɔbɔ Ɲanmiɛn yɛ ɔ sunmɛnnin i ɔ. (Tul. 4:2-5) I nnan su’n, Zoova fali Aarɔn kɛ ɔ ijɔ Moizi nuan naan ɔ ukɛ i. (Tul. 4:14-16) I kwlaa sɔ mɔ Zoova yoli’n ti’n, Moizi lafili su kpa kɛ junman kwlaa nga Zoova man sran kun’n, ɔ ukɛ i sɔfuɛ’n naan w’a kwla di. Ɔ maan, kɛ ɔ yoli oke m’ɔ si kɛ i wie cɛn w’a mantan koko’n, ɔ seli Zozie kɛ: “Anannganman bɔbɔ ɔ́ dún ɔ nyrun mmua. Ɔ́ jrán ɔ sin. Ɔ su kpɔci-man wɔ, ɔ su yi-man wɔ ase. Ɔ maan, nán srɛ kun wɔ, nán usu.”​—Mml. 31:8.

11. ?Ngue ti yɛ Moizi kloli i junman’n kpa ɔ?

¹¹ Zoova fali Moizi kɛ ɔ yo Izraɛlifuɛ’m be ɲrun dinfuɛ. Nán junman kaan ɔn. Sanngɛ, Zoova jrɛnnin i sin. Ɔ maan, Moizi wunnin kɛ Zoova i junman’n i dilɛ’n “ti kpa tra Ezipt lɔ like kpakpa’n kwlaa.” Nanwlɛ, Ɲanmiɛn mɔ like fi nunmɛn i sin’n i junman’n i dilɛ ti kpa dan. Ɔ ti kpa lele tra Ezipti famiɛn’n i awlo lɔ sran dan yolɛ’n. Moizi kloli i junman’n kpa. I sɔ’n ti’n, Zoova yrɛli i su. Yɛle kɛ, Zoova nin i be afiɛn mantannin kpa. Kpɛkun, Zoova mɛnnin i “tinmin” naan ɔ fa Izraɛlifuɛ mun ju mɛn ng’ɔ seli kɛ ɔ́ fá mán be’n i nun lɔ.​—Mml. 34:10-12.

12. ?Junman benin mun yɛ Zoova mannin e ɔ?

¹² E kusu’n, Zoova maan i Wa’n mannin e junman. Ɔ seli kɛ e bo jasin fɛ’n. Junman kunngba sɔ’n yɛ ɔ fali akoto Pɔlu nin sran wie mun ekun wlali nun ɔn. (An kanngan 1 Timote 1:12-14 nun.) E kwlakwla e di junman cinnjin sɔ’n. (Mat. 24:14; 28:19, 20) Kɛ é dí’n, e nun wie’m be ti blɛ kwlaa nun Ɲanmiɛn junman difuɛ. Aniaan nga be ɲin w’a ti Ɲanmiɛn sulɛ’n nun’n, be nun wie’m be ti asɔnunfuɛ’m be lika nianfuɛ. Yɛ wie’m be ti asɔnun kpɛnngbɛn. Sanngɛ wie liɛ’n, e osufuɛ nin sran wie mun ekun mɔ be timan Zoova sufuɛ’n, be buman junman sɔ mɔ e tu e klun e di’n i like. Ɔ maan, be kan e wun ndɛ tɛtɛ. (Mat. 10:34-37) Be yo sɔ naan e bu i kɛ e su kle e wun yalɛ ngbɛn, naan e sa sin bubu e. ?Ngue yɛ é yó naan y’a jran kekle ɔ?

13. ?Ngue yɛ Zoova yo naan y’a kwla di junman ng’ɔ man e’n niɔn?

¹³ Like nga e kwla yo’n, yɛle kɛ maan e lafi Zoova su yɛ e srɛ i kɛ ɔ uka e. Sa ng’ɔ o e su’n, maan e kan kle i. Afin i junman yɛ e di ɔ. Yɛ i fanngan nun yɛ e kwla di ɔ. Wafa ng’ɔ suannin Moizi bo’n, ɔ́ súan e bo sɔ wie. Yɛle kɛ, ɔ́ gúa e awlɛn su nzue. Ɔ se e kɛ: “Ń mán amun fanngan, ń úka amun. Ń fá n sa fama bɔ wunmiɛn o nun’n ń fá súan amun bo.” (Eza. 41:10) I nɲɔn su’n, ɔ kpɛn e wla kɛ nda ng’ɔ tali be’n, bé kpɛ́n su. I waan: “Sa nga n kan’n, n yo i su sa’n. Sa nga m bu i akunndan’n, n yiɛ i nuan.” (Eza. 46:11) I nsan su’n, ɔ man e wunmiɛn. Ɔ maan i “m’ɔ kwla sa kwlaa yo’n yɛ maan e yo sa-a.” (2 Kor. 4:7) I nnan su’n, e niaan Klistfuɛ’m be o lɛ. Zoova maan e nin be e ‘cici e wiengu wla.’ Ɔ maan, e kwla jran kekle e di e junman’n. (1 Tɛs. 5:11) Kɛ Zoova suan e bo mɔ e kwla di i junman’n, e lafi i su kpa ekun. Kpɛkun, e wun kɛ i junman’n i dilɛ’n ti kpa tra mɛn’n nun like kpakpa’n kwlaa.

“LIKE NG’Ɔ́ WÁ NYƐ́N I CƐN WIE’N, I NYIN TƐ I MMUA LƆ”

14. ?Ngue ti yɛ like nga Moizi wá ɲɛ́n i’n, i ɲin tɛ i mmua lɔ ɔ?

¹⁴ Ɲanmiɛn Ndɛ’n kan Moizi ndɛ se kɛ: “Like ng’ɔ́ wá nyɛ́n i cɛn wie’n, i nyin tɛ i mmua lɔ.” (Ebr. 11:26) Moizi w’a siman ninnge nga cɛn wie lele ɔ́ ɲɛ́n i’n i ngba. I kan ng’ɔ si i’n, ɔ jrannin su fali ajalɛ. I wie yɛle kɛ, kɛ i nannan Abraamu sa’n, ɔ lafi su kɛ Zoova kwla cɛn be nga be wuli’n. (Lik 20:37, 38; Ebr. 11:17-19) Moizi tɔli blo, ɔ dili afuɛ 40. I sin’n, ɔ nin Izraɛlifuɛ’m be wlannin aawlɛ flɛnnɛn nun afuɛ 40 ekun. Sanngɛ Ɲanmiɛn su m’ɔ lafi’n ti’n, w’a bumɛn i kwlaa sɔ’n kɛ ɔ ti afɛ ngbɛn. I ɲin tali like ng’ɔ́ wá ɲɛ́n i’n mmua lɔ’n.

15, 16. (a) ?Ngue ti yɛ like nga é ɲɛ́n i’n, ɔ fata kɛ e ɲin tɛ i mmua lɔ ɔ? (b) ?Mɛn klanman’n nun lɔ sa benin yɛ amun ɲin o i sin kpa ɔ?

¹⁵ ?Like nga é ‘ɲɛ́n i’n, e ɲin tɛ i mmua lɔ’ wie? Kɛ Moizi sa’n, e siman ninnge nga Zoova seli kɛ ɔ́ yó be’n, be ngba nun. I wie yɛle kɛ, e “si-man cɛn nga” ɲrɛnnɛn dan’n jú’n. (Mar. 13:32, 33) Ɔ nin i sɔ ngba’n, mɛn klanman’n i su ndɛ nga e si i’n, Moizi w’a simɛn i. Ninnge nga Ɲanmiɛn Sielɛ’n wá yó be’n, e si be nun sunman. Ɔ maan, ‘e ɲin kwla ta be mmua lɔ.’ Yɛle kɛ, e wun be wlɛ weiin kpa. I sɔ’n ti, e kunndɛ kɛ é dún mmua é dí Ɲanmiɛn i junman liɛ mun. Maan e fa sunnzun ase kun e nian. ?Sɛ e waan é tó sua naan be kan sua wie ndɛ naan e wunman wafa nga sua sɔ’n ti’n i wlɛ weiin, é tó? Cɛcɛ. I sɔ kunngba’n, like nga e wunmɛn i ɲrun nin i sin kpa’n e su faman e wun e wlaman nun. Sanngɛ Ɲanmiɛn su mɔ e lafi’n ti’n, e wun wafa nga cɛn wie lele mɛn’n wá yó’n i wlɛ weiin.

¹⁶ Maan ‘e ɲin ta’ mɛn klanman’n i mmua lɔ. Yɛle kɛ maan ɔ yo e kɛ e o nun lɔ sa. Kɛ é súan laa Ɲanmiɛn i sufuɛ nga Biblu’n kan be ndɛ’n be su like’n, maan e bu kosan nga kɛ Ɲanmiɛn wá cɛ́n be’n é fá úsa be’n, ɔ nin nga be kusu be kwla usa e’n, be akunndan. E nannan nga be wuli mɔ bé wá cɛ́n’n, é sɔ́ be nun. Kpɛkun, é kán Ɲanmiɛn ndɛ’n é klé be. Blɛ sɔ’n nun’n, é wá sí blo nnɛn sunman. Yɛ e nin be é trán fɔuun. Asa ekun’n, Zoova wá yó maan fɔ’n wíe e nun blɛblɛblɛ. Ɔ maan, e nin i e afiɛn mántan kpa. Aklunjuɛ nga é wá dí i blɛ sɔ’n nun’n, maan e bu i akunndan.

17. ?Kɛ e bu ninnge nga cɛn wie lele é wá ɲán be’n, be akunndan mɔ e wun be wlɛ weiin, ngue yɛ e yo ɔ?

¹⁷ Kɛ e bu ninnge nga cɛn wie lele é wá ɲán be’n, be akunndan mɔ e wun be wlɛ weiin, e tra e awlɛn e su Ɲanmiɛn, e klun jɔ. Kpɛkun kɛ é fá ajalɛ’n, ninnge nga be saciman’n be akunndan yɛ e bu ɔ. Pɔlu seli Klistfuɛ nga Ɲanmiɛn kpali be sieli be ngunmin’n be kɛ: “Sɛ e nyin o like bɔ be waan bé fá mán ye bɔ e nian wun-mɛn i’n i sin’n, e tra e anwlɛn e tran minndɛ.” (Rɔm. 8:25) Ndɛ sɔ’n ti Klistfuɛ kwlaa nga be lafi su kɛ bé ɲán anannganman nguan’n, be liɛ wie. Ɲanmiɛn su mɔ e lafi’n ti’n, e tra e anwlɛn e minndɛ ‘like nga é wá nyɛ́n i cɛn wie’n.’ Kɛ Moizi sa’n, e bumɛn i kɛ afuɛ kpanngban nga y’a fa su Zoova’n, ɔ ti afɛ ngbɛn. Sanngɛ, e wun i wlɛ kɛ “ninnge nga be wun-man be’n, be cɛ be saci-man le.”​—An kanngan 2 Korɛntfuɛ Mun 4:16-18 nun.

18, 19. (a) ?Ngue ti yɛ ɔ fata kɛ e mian e ɲin kpa naan y’a lafi Ɲanmiɛn su titi ɔ? (b) ?Ngue yɛ é wá wún i like suanlɛ ng’ɔ́ bá lɛ’n nun ɔn?

¹⁸ Ɲanmiɛn su mɔ e lafi’n ti, “e si weiin kpa kɛ y’a nyan like nga e wla o su’n, ɔ maan e si kpa kɛ like nga e wun-mɛn i’n wo lɛ.” (Ebr. 11:1) Be nga be lafiman Ɲanmiɛn su’n, be buman Zoova i junman mɔ e di’n i like. Ɔ ti “sinnzin like” be ɲrun. (1 Kor. 2:14) E lafi su kɛ é ɲán anannganman nguan naan é wún be nga Ɲanmiɛn wá cɛ́n be’n. Sanngɛ, be nga be suman Ɲanmiɛn’n be bumɛn i kwlaa sɔ’n i ndɛ. Be yo kɛ Pɔlu i blɛ su fluwa sifuɛ dandan wie mun sa. Kɛ Pɔlu bó jasin klé be’n, be seli kɛ ɔ ti “fiaifuɛ.” Andɛ kusu kɛ é bó jasin fɛ’n, sran kpanngban be se kɛ e kan ndɛ finfin.​—Yol. 17:18.

¹⁹ Be nga be lafiman Ɲanmiɛn su’n, be bo sin yia e. I sɔ’n ti’n, ɔ fata kɛ e mian e ɲin kpa naan y’a lafi Ɲanmiɛn su titi. Maan e srɛ Zoova e jran su kpa naan ‘y’a kpɔnzɔman.’ (Lik 22:32) Kɛ Moizi sa’n, maan e wun i wlɛ titi kɛ mɛn dilɛ’n i bo guaman kpa. Maan e wun i wlɛ kɛ Zoova i sulɛ’n, ɔ ti kpa dan. Yɛ maan e lafi su kɛ é ɲán anannganman nguan’n. ?Sanngɛ Moizi i su like nga e kwla suan’n, i ngba yɛ ɔ o lɛ ɔ? Like suanlɛ ng’ɔ́ bá lɛ’n, ɔ́ wá kán Moizi i ndɛ ekun. É wún kɛ Ɲanmiɛn su mɔ Moizi lafi’n ti’n, “ɔ ti kɛ w’a wun Nyanmiɛn bɔ be wun-mɛn i’n sa.”​—Ebr. 11:27.

[Ja ngua lɛ ndɛ’n]