Maan e suan Zezi m’ɔ ti e sunianfuɛ’n i bo

 1. ?Ngue yɛ Zoova kunndɛ kɛ be yo i andɛ-ɔ?

ANDƐ’N, Ɲanmiɛn kunndɛ kɛ be bo i Sielɛ’n i jasin fɛ’n asiɛ wunmuan’n su. (Mar. 13:10; 1 Tim. 2: 3,4) Junman sɔ’n ti Zoova liɛ. Yɛ i cinnjin m’ɔ ti’n ti’n, ɔ fa wlɛli i Wa m’ɔ klo i kpa’n i sa nun kɛ ɔ nian su. E si kɛ kɛ mɔ Zezi yɛ ɔ kle e atin’n ti’n, ka naan mɛn’n w’a wie’n, bé wíe jasin fɛ bolɛ junman’n i di kɛ nga Zoova fa klo’n sa.—Mat. 24:14.

 2. ?Ngue yɛ é wá kɛ́n i ndɛ like suanlɛ nga nun-ɔn?

² Like suanlɛ nga nun’n, é wá wún wafa nga Zezi sin junman difuɛ nanwlɛfuɛ m’ɔ si ngwlɛlɛ’n i lika naan w’a mɛn i sɔnnzɔnfuɛ’m be aliɛ’n. Yɛ é wún wafa ng’ɔ siesie be naan b’a kwla di jasin fɛ bolɛ junman’n m’ɔ ti i liɛ ngunmin kun’n. (Mat. 24:45) Asa ekun’n, é wún like nga e kwla yo naan y’a suan Zezi nin junman difuɛ nanwlɛfuɛ’n be bo’n.

 3. ?Junman benin yɛ be fa mannin Zezi kɛ ɔ di-ɔ?

³ Zezi yɛ ɔ nian jasin fɛ bolɛ junman’n su-ɔ. ?Ngue ti yɛ e lafi su sɔ-ɔ? Afin ka naan w’a wɔ ɲanmiɛn su’n, kɛ ɔ nin i sɔnnzɔnfuɛ nanwlɛfuɛ’m be yiali Galile oka’n su lɔ’n, ɔ seli be kɛ: “Ɲanmiɛn fali kwlalɛ’n kwlaa mannin min naan n sie ninnge nga be o ɲanmiɛn su lɔ nin asiɛ’n su wa’n be kwlaa.” Kpɛkun ɔ kan guali su kɛ: “I sɔ’n ti’n, amun wɔ, amun yo maan nvlenvle’m be kwlaa be nunfuɛ’m be kaci min sɔnnzɔnfuɛ.” (Mat. 28:18, 19) I sɔ’n kle kɛ junman kpanngban nga Zezi di’n, be nun kun yɛle jasin fɛ bolɛ’n i su nianlɛ’n.

 4. ?Ngue yɛ ɔ kle kɛ Zezi te nian jasin fɛ bolɛ junman’n su-ɔ?

⁴ Zezi seli kɛ maan be bo jasin fɛ’n “nvlenvle’m be kwlaa” be nun, yɛ be uka sran mun naan be kaci i sɔnnzɔnfuɛ. Ɔ seli ekun kɛ ɔ nin i sɔnnzɔnfuɛ’m be o nun “cɛn kwlaa lele mɛn’n fá wíe.” (Mat. 28:20) Ndɛ sɔ’m be kle weiin kɛ Zezi nían jasin fɛ bolɛ junman’n su, yɛ bé dí junman sɔ’n lele fá jú e blɛ liɛ nga nun.

 5. ?Ngue yɛ e yo naan ndɛ ng’ɔ o Jue Mun 110:3 nun’n w’a kpɛn su-ɔ?

⁵ Zezi lafili su kpa kɛ mɛn’n i awieliɛ blɛ’n nun bɔbɔ’n, bé ɲán jasin fɛ bofuɛ titi. Ɔ si kɛ ndɛ kun mɔ jue tofuɛ kun kannin’n ɔ́ kpɛ́n su. Jue tofuɛ sɔ’n seli kɛ: “Blɛ nga á yíayía wɔ alɛ kunfuɛ’m be nuan’n, sonja yakpafuɛ’m be nin wɔ ɔ.” (Jue. 110:3) Sɛ a bo jasin fɛ’n wie’n, i sɔ’n kle kɛ a suan Zezi nin junman difuɛ nanwlɛfuɛ’n be bo, yɛ a yo maan Ɲanmiɛn nuan ndɛ sɔ’n kpɛn su. Junman’n kɔ i ɲrun, sanngɛ ninnge wie’m be kle e yalɛ.

 6. ?Andɛ’n ninnge nga be kle Ɲanmiɛn Sielɛ’n i jasin bofuɛ’m be yalɛ’n i kun yɛle benin?

⁶ Ninnge nga be kle Ɲanmiɛn Sielɛ’n i jasin bofuɛ’m be yalɛ’n i kun yɛle kɛ sran’m be tanndan be ɲrun. Be nga be nin Ɲanmiɛn b’a bu’n, nin Ɲanmiɛn sulɛ wafa nga be timan su’n be su kpɛnngbɛn mun, nin politikifuɛ’m be kan e junman’n i wun ndɛ tɛtɛ kle sran kpanngban. Sɛ e osufuɛ mun nin e janvuɛ mun nin e wiengu junman difuɛ’m be ti ndɛ tɛtɛ sɔ mun’n, be kwla mian e kɛ e yaci Zoova sulɛ, yɛ e yaci jasin fɛ’n i bolɛ. Nvle wie’m be nun’n, be nga be tanndan e ɲrun’n be wlanwlan e niaan mun, be yo be tɛtɛ, be tra be, yɛ be wla be bisua bɔbɔ. I sɔ’n boman e nuan. Afin Zezi seli kɛ: “Min dunman’n ti’n nvlenvle’m be kwlaa bé kpɔ́ amun.” (Mat. 24:9) I kpa bɔbɔ’n, kɛ sran’m be kpɔ e’n, i sɔ’n kle kɛ Zoova i klun jɔ e wun. (Mat. 5:11, 12) Suɛn Tɔnfuɛ’n yɛ ɔ su sran’m be bo naan be tanndan e ɲrun-ɔn. Sanngɛ Zezi le kwlalɛ tra Suɛn Tɔnfuɛ’n lele. Ɔ maan kɛ mɔ Zezi suan e bo’n ti’n, e bo jasin fɛ’n e kle nvlenvle kwlaa be nunfuɛ mun. Maan e nian like ng’ɔ kle sɔ’n.

 7. ?Ngue yɛ ɔ kle kɛ ndɛ ng’ɔ o Sa Nglo Yilɛ 14: 6, 7 nun’n ɔ su kpɛn su-ɔ?

⁷ E mɔ e ti Ɲanmiɛn Sielɛ’n i jasin bofuɛ’n, like kun ekun m’ɔ kle e yalɛ’n yɛle kɛ sran’m be aniɛn’n timan kun. Ndɛ nga Zezi kan kleli akoto Zan aolia nun’n ɔ kle kɛ e blɛ liɛ nga nun’n i sɔ’n su tanndanman jasin fɛ bolɛ junman’n i ɲrun. (An kanngan Sa Nglo Yilɛ 14: 6, 7 nun.) ?Ngue ti-ɔ? Afin e yo maan sran kpanngban be kwla sɔ Ɲanmiɛn Sielɛ’n i jasin fɛ’n nun. Andɛ’n, sran’m be kwla kanngan e fluwa mɔ be taka Biblu’n su’n be nun e ɛntɛnɛti adrɛsi jw.org su. Afin be kacili ndɛ nga be o lɔ’n aniɛn 1.000 tra su nun! Asa’n, e Anuannzɛ’n i Ɲrun Dinfuɛ’m be mannin atin naan be kaci fluwa A kwla di aklunjɔɛ tititi! aniɛn 700 tra su nun. Fluwa sɔ’n yɛ e fa kle sran’m be like naan be kaci Zezi i sɔnnzɔnfuɛ-ɔ. Asa ekun’n be yili video wie mɔ be ti be nga be timan sa’n be liɛ’n, ɔ nin fluwa wie mɔ be ti aɲinsifuɛ’m be liɛ’n. Nanwlɛ, e wun kɛ Biblu’n nun ndɛ’m be su kpɛn su. Yɛle kɛ nvlenvle’m be nunfuɛ mɔ “be aniɛn’n ti ngunminngunmin’n” be suan aniɛn sanwun mɔ yɛle Biblu’n nun ndɛ nanwlɛ’n. (Zkr. 8: 23; Sof. 3:9, NWT.) Zezi Klisi m’ɔ nian junman’n su kpa’n i ti yɛ e kwla yo ninnge kwlaa sɔ mun-ɔn.

 8. ?Jasin fɛ bolɛ junman nga e di’n i bo’n gua sɛ?

⁸ Andɛ’n, sran miliɔn mɔcuɛ tra su mɔ be o nvlenvle 240 nun’n be ti Zoova i anuannzɛ’n i nunfuɛ. Yɛ afuɛ kwlaa nun’n, be yo sran akpi kpanngban be batɛmun. Ng’ɔ ti cinnjin trɛ i ngba’n, yɛle kɛ Zezi i sɔnnzɔnfuɛ uflɛuflɛ sɔ’m be yi nzuɛn mɔ be nin Klisifuɛ fata’n be nglo, yɛle kɛ be fa “nzuɛn uflɛ’n.” (Kol. 3: 8-10) Sran kpanngban be yaci bla nin bian kunndɛlɛ sukusuku’n, be yoman nzaje sa mun kun, be kpɔman sran mun kun, yɛ be kloman be nvle’n tratraman su kun. I sɔ’n kle kɛ ndɛ ng’ɔ o Ezai 2:4 nun m’ɔ se kɛ ‘be su suanman alɛ dilɛ’n kun’n,’ ɔ su kpɛn su. E mian e ɲin kpa e yi nzuɛn uflɛ’n i nglo, yɛ e uka sran mun naan be wlu Ɲanmiɛn i anuannzɛ’n nun. Kɛ e yo sɔ’n, e kle kɛ e su Klisi Zezi m’ɔ ti e sunianfuɛ’n i su. (Zan 13:35; 1 Piɛ. 2:12) Like nga ti yɛ i sɔ’n kwla yo ye’n yɛle kɛ Zezi fa like nga e sa miɛn i wun’n ɔ fa uka e.

 9. ?Kɛ nga Matie 24:45-47 fa kan’n sa’n, ngue yɛ Zezi waan ɔ́ yó i mɛn’n i awieliɛ blɛ’n nun-ɔn?

⁹ An kanngan Matie 24:45-47 nun. Zezi seli kɛ mɛn i awieliɛ blɛ’n nun’n, ɔ́ fá junman difuɛ nanwlɛfuɛ m’ɔ si ngwlɛlɛ’n ɔ́ síe i i sran’m be su naan ɔ man be aliɛ. Ɔ maan e si kɛ junman difuɛ sɔ’n ɔ́ wá dí junman kekle e blɛ liɛ nga nun. I sɔ kusu yɛ ɔ yo-ɔ. Zezi kpali sran akpasua kaan kun naan ɔ man Ɲanmiɛn i sufuɛ mun nin be nga be klo Ɲanmiɛn i ndɛ’n be “aliɛ blɛ ng’ɔ nin i fata’n nun.” Sran sɔ’m be tinman be niaan Klisifuɛ’m be su. (2 Kor. 1:24) Sanngɛ be wun i wlɛ kɛ Zezi yɛ ɔ ti i sran mun ‘be ɲrun dunfuɛ-ɔ,’ naan i ‘yɛ ɔ sie be-ɔ.’—Eza. 55:4.

10. ?Fluwa nga be o foto’m be su lɛ’n be nun onin yɛ be fa kleli ɔ like naan w’a bo Zoova i sulɛ bo-ɔ?

¹⁰ Kɛ ɔ fɛ i afuɛ 1919 nun’n, junman difuɛ nanwlɛfuɛ’n yili fluwa fanunfanun ɔ fa ukali be nga Ɲanmiɛn Ndɛ’n lo be’n naan be bo Biblu’n nun like suanlɛ bo. Afuɛ 1921 nun’n, junman difuɛ nanwlɛfuɛ’n yili fluwa La Harpe de Dieu naan ɔ́ fá úka be nga Ɲanmiɛn Ndɛ’n lo be’n naan be si Biblu’n nun ndɛ cinnjin wie mun. Kɛ ɔ́ kɔ́ i ɲrun’n, be wa yili fluwa wie mun ekun. Fluwa sɔ’m be nun wie mun yɛ: «Que Dieu soit reconnu pour vrai !» La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, ?Ngue like yɛ Biblu’n kle i sakpasakpa ɔ?, Que nous enseigne la Bible?, nin e fluwa uflɛuflɛ A kwla di aklunjɔɛ tititi! ?Fluwa sɔ’m be nun onin yɛ ɔ ukali wɔ naan w’a si e Si m’ɔ o ɲanmiɛn su lɔ’n naan w’a klo i-ɔ? Be yili fluwa kwlaa sɔ mun naan e fa uka sran mun naan be kaci Zezi i sɔnnzɔnfuɛ. Yɛ blɛ nga e sa miannin be wun’n i nun yɛ be yili be-ɔ.

11. ?Ngue ti yɛ ɔ ti cinnjin kɛ e kwlaa e suan Ɲanmiɛn Ndɛ’n nun like kpa-ɔ?

¹¹ Nán be nga blɛ liɛ yɛ b’a si ndɛ nanwlɛ’n be ngunmin yɛ ɔ fata kɛ be si Ɲanmiɛn Ndɛ’n i kpa-ɔ. Ɔ ti e kwlaa e liɛ. Akoto Pɔlu seli kɛ: “Aliɛ’n ɔ ti be nga b’a tin’n be liɛ.” Pɔlu kan guali su kɛ sɛ e nanti like nga e suɛnnin i Biblu’n nun’n su’n, i sɔ’n úka e naan y’a “wun sa kpa nin sa tɛ’n be ngbaciɛ’n i wlɛ.” (Ebr. 5:14) Andɛ’n kɛ ɔ ko yo naan y’a kwla nanti Zoova i mmla’m be su’n, ɔ timan pɔpɔ, afin sran’m be klun akunndan’n timan kpa mlɔnmlɔn. Sanngɛ Zezi yo maan e suan like ng’ɔ kwla uka e naan y’a lafi Ɲanmiɛn su kpa’n. Like kwlaa sɔ mɔ e suan’n taka Ɲanmiɛn nuan ndɛ m’ɔ yɛle Biblu’n su. Zezi yɛ maan junman difuɛ nanwlɛfuɛ’n ɔ tɔn aliɛ sɔ’n yɛ ɔ fa cɛcɛ e-ɔ.

12. ?Kɛ Zezi sa’n, wafa sɛ yɛ e kleli kɛ e bu Ɲanmiɛn i dunman’n i like dan-ɔn?

¹² Kɛ Zezi sa’n, e kleli kɛ e bu Ɲanmiɛn i dunman’n i like dan. (Zan 17:6, 26) I wie yɛle kɛ afuɛ 1931 nun’n, e fali dunman Zoova i Lalofuɛ mun e sieli e su. I sɔ mɔ e yoli’n kle kɛ e bu Ɲanmiɛn i dunman’n i like dan naan e kunndɛ kɛ e Si m’ɔ o ɲanmiɛn su lɔ’n i dunman’n tran e su. (Eza. 43:10-12) Yɛ kɛ ɔ fɛ i afuɛ sɔ’n nun’n, Ɔktɔblu anglo’n nun’n, Sasafuɛ Tranwlɛ’n kwlaa ng’ɔ́ fíte’n, Ɲanmiɛn i dunman’n klɛ i wun bui’n su. Asa ekun’n, Biblu Traduction du monde nouveau nun’n be klɛli Ɲanmiɛn i dunman’n lika ng’ɔ fata kɛ be klɛ i lɛ’n. I lɛ nun’n, y’a yoman kɛ be nga be tɔn be wun suɛn kɛ be ti Klisifuɛ’n be sa. Afin be liɛ’n, be yili Zoova i dunman’n be Biblu sunman nun.

13. ?Ngue yɛ ɔ kle ɔ weiin kɛ andɛ’n, Zezi fa “junman difuɛ nanwlɛfuɛ m’ɔ si ngwlɛlɛ’n” ɔ di junman-ɔn? (Zan 6:68)

¹³ Zezi sinnin “junman difuɛ nanwlɛfuɛ m’ɔ si ngwlɛlɛ’n” i lika ɔ takali anuannzɛ kun m’ɔ leman wunsu’n asiɛ’n su wa, naan Ɲanmiɛn i sulɛ kpafuɛ’n tru. ?A bu anuannzɛ sɔ’n i sɛ? Atrɛkpa’n, ɔ wla kpɛn ndɛ nga akoto Piɛli kan kleli Zezi’n su. Ɔ seli i kɛ: “?Wan sin yɛ é kɔ́-ɔ? Ɔ ndɛ’m be man nguan m’ɔ leman awieliɛ’n.” (Zan 6:68) Maan e usa e wun kosan yɛ’n: ?Sɛ ɔ ti kɛ y’a siman Zoova i anuannzɛ’n, nn e liɛ yó sɛ andɛ? Klisi sin anuannzɛ’n sɔ’n i lika ɔ man like kwlaa nga e sa miɛn i wun’n, naan e nin Ɲanmiɛn y’a nanti klanman titi. Asa’n, ɔ kle e like naan e bo jasin fɛ’n i kpa. Yɛ ɔ uka e naan e yi ‘nzuɛn uflɛ’n’ i nglo, naan Zoova i klun jɔ e wun.—Efɛ. 4:24.

14. ?Koronavirisi blɛ’n nun’n, wafa sɛ yɛ a wunnin i wlɛ kɛ Zoova i anuannzɛ mɔ a o nun’n, ɔ ti ɔ cenjele like-ɔ?

¹⁴ Blɛ kekle’n nun’n Zezi kle anuannzɛ’n i atin ngwlɛlɛ su. Kɛ koronavirisi’n boli i bo’n e wunnin kɛ atin sɔ’n i su falɛ’n yoli e ye. Mɛn’n nunfuɛ kpanngban b’a wunman ajalɛ nga bé fá-ɔ. Sanngɛ Zezi liɛ’n, ɔ yoli maan be kleli e ajalɛ trele nga e ko fa naan y’a sasa e wun’n. I wie yɛle kɛ be wlali e fanngan kɛ, kɛ e o nzra nun’n maan e kata e bue nin e nuan’n be su, yɛ maan e nin e wiengu mun e afiɛn’n ɔ ti nun kan. Asa’n, be wlali asɔnun kpɛnngbɛn’m be fanngan kɛ be usa be asɔnun’n nunfuɛ’m be osu tikatika. I liɛ’n, sɛ be nun wie’m be sa mian like wie wun’n, annzɛ sɛ be te su Zoova kpa’n, be kwla sie i nzɔliɛ. (Eza. 32:1, 2) Asa ekun’n, e Anuannzɛ’n i Ɲrun Dinfuɛ’m be klɛli e fluwa tikatika, yɛ be boli jasin wie mun be fa wlali e fanngan.

15. (1) ?E aɲia’m be yolɛ’n nin jasin fɛ bolɛ’n be su ajalɛ benin yɛ be kleli e koronavirisi blɛ’n nun-ɔn? (2) ?Yɛ i bo’n guali sɛ?

¹⁵ Koronavirisi blɛ’n nun’n be kleli e aɲia’m be yolɛ’n nin jasin fɛ bolɛ’n be su ajalɛ trele wie mun. Kɛ ɔ yoli sɔ’n, y’a sisiman e bo, e boli e asɔnun aɲia mun, nin akpasua kun aɲia mun, nin nvle kun aɲia’m be yolɛ bo ɛntɛnɛti su. Asa’n, e boli jasin fɛ telefɔnun nun, yɛ e klɛli sran’m be lɛtri. Zoova yrali e ɲin mɔ e miannin’n su. Betɛli kpanngban be seli kɛ jasin bofuɛ’m be nuan ukali su. Nanwlɛ, e kwlakwla e le blɛ sɔ’n i su ndɛ fɛfɛ wie mɔ e kwla kan-ɔn.—An nian kuku nga be flɛ i kɛ “Zoova yra jasin fɛ nga e bo’n su” nun.

16. ?Ngue yɛ e kwla lafi su-ɔ?

¹⁶ Kɛ koronavirisi’n boli i bo’n, sran wie’m be buli i kɛ anuannzɛ’n kannin e wun sasalɛ’n i ndɛ dan tratrali su. Sanngɛ kɛ ɔ́ kɔ́ i ɲrun’n, e wunnin i weiin kpɛ sunman kɛ ajalɛ nga be kleli e’n ɔ ti su. (Mat. 11:19) Yɛ kɛ e bu wafa nga Zezi kle i sran’m be atin klolɛ su’n i su akunndan’n, e wun i wlɛ kɛ kannzɛ lika’n yó sɛ yó sɛ’n, Zoova nin i Wa m’ɔ klo i kpa’n be su yiman e ase.—An kanngan Ebre Mun 13:5, 6 nun.

17. ?Kɛ Zezi yɛ ɔ nian junman nga e di’n su’n, i sɔ’n yo ɔ sɛ?

¹⁷ Nanwlɛ, kɛ Zezi ti e sunianfuɛ’n i sɔ’n yo e fɛ dan! Kannzɛ e finwlɛ’n nin e nvle’n nin e aniɛn’n timan kun bɔbɔ’n, e kwlaa e o anuannzɛ kunngba’n nun. Be kle e Ɲanmiɛn Ndɛ’n i kpa, kpɛkun be kle e wafa nga e kwla di jasin bolɛ junman’n. Asa’n be uka e tinuntinun naan y’a yi nzuɛn uflɛ’n i nglo, naan y’a suan e wiengu klolɛ. Nanwlɛ, like nga ti yɛ kɛ Zezi ti e sunianfuɛ’n i sɔ’n yo e fɛ dan’n, ɔ sɔnnin!