E wun are yolɛ nun’n, maan e nanti Ɲanmiɛn mmla’n su

‘Amun klo amun Ɲanmiɛn’n kpa, maan amun akunndan’n kwlaa trɛn i su, yɛ amun fa amun wunmiɛn’n kwlaa yo like ng’ɔ kle kɛ amun klo i’n.’​—MARK 12:30.

 1. ?Kɛ Ɲanmiɛn yí sran mun’n, wafa sɛ yɛ ɔ kunndɛ kɛ be tran ɔn?

ƝANMIƐN ZOOVA w’a yiman sran’m be kɛ be tɔ tukpacɛ naan be wu. Ɔ fali Adam nin Ɛvu sieli be fie klanman kpa mɔ i nun tranlɛ yo fɛ’n mɔ be flɛ i Edɛni fie’n nun. Yɛ ɔ seli be ‘kɛ be di nun junman naan be nian su.’ Ɲanmiɛn w’a seman kɛ be tran nun afuɛ 70 annzɛ afuɛ 80 cɛ, sanngɛ i waan be tran nun tititi. (Bo Bolɛ 2:8, 15; Jue Mun 90:10) Sɛ ɔ ti kɛ Adam nin Ɛvu be ɲin yili Zoova yɛ be kplinnin su kɛ ɔ sie be’n, nn b’a tɔman tukpacɛ naan be wunmiɛn’n w’a wie be nun blɛblɛblɛ naan b’a wu.

2, 3. (a) ?Wafa sɛ yɛ Akunndanfuɛ’n i fluwa’n yiyi kpɛnngbɛn yolɛ’n i nun ɔn? (b) ?Wie mɔ Adam maan ɔ sali e’n, ɔ fin wan? ?Yɛ ɔ́ yó sɛ naan w’a nunnun?

² Klɔ sran mɔ fɔ o i nun’n, i oke yolɛ blɛ’n ti i ‘ɲrɛnnɛn blɛ.’ Akunndanfuɛ’n ndɛ tre 12 yiyi i sɔ nun weiin. (An kanngan Akunndanfuɛ’n 12:1-7 nun.) Ɔ fa be ti m’ɔ fɛn fuaii’n fa sunnzun ‘amandie nɲrɛ’n.’ Ɔ fa be ja’n fa sunnzun “yasua wakawaka” mɔ b’a glɔglɔ siɛn’n. Kusu’n, be ɲinma m’ɔ wunman ase kpa kun’n, ɔ fa sunnzun be nga be nian fenɛtri nun mɔ be wunman kɛ lika’n kpaja kpa’n. Be je’n kusu’n, be ti kɛ ‘bla nga be si like’n sa.’ Kɛ i wie w’a tutu’n ti’n, ɔ ti kɛ bla sɔ’m ‘b’a jran’ sa.

³ Be ja m’ɔ glɔglɔ be bo’n, ɔ nin be ɲinma m’ɔ wunman ase kpa kun’n, annzɛ be je m’ɔ tutu be nuan nun’n, nanwlɛ, i klikli nun’n, nɛ́n i sɔ yɛ Ɲanmiɛn sunnzunnin ɔn. Asa kusu’n, wie mɔ Adam maan ɔ sali e’n, ɔ ti ‘sa tɛ nga mmusu’m be si Satan yo’n’ i nuan su like kun. Yɛ, kɛ Ɲanmiɛn i Wa’n wá síe asiɛ’n, ɔ́ núnnún i. Ɔ maan, akoto Zan klɛli kɛ: ‘Ɲanmiɛn Wa’n bali sa nga mmusu’m be si Satan yo’n i nuan nɲa bulɛ.’—1 Zan 3:8.

Sɛ e kunndɛ e wun are yolɛ kɛ ɔ nin i fata’n sa’n, i su ɔ

 4. ?Ngue ti yɛ be wun are yolɛ kɛ ɔ nin fata sa’n, ɔ ti Zoova i sufuɛ’m be cinnjin ɔn? ?Sanngɛ kɛ bé yó sɔ’n, ngue yɛ be wla fiman ɔn?

⁴ Fɔ’n o sran kwlakwla be nun. Ɔ maan, tukpacɛ’n nin kpɛnngbɛn yolɛ’n mɔ be kle be yalɛ’n, kɛ é sé yɛ’n, be kle Zoova i sufuɛ’m be yalɛ wie. Ɔ maan sɛ e kunndɛ e wun are yolɛ kɛ ɔ nin i fata sa’n, i su ɔ. ?Afin, Zoova mɔ e su i’n, nán e “wunmiɛn’n kwlaa” yɛ e waan é fá sú i ɔ? (Mark 12:30) Sanngɛ kɛ é kúnndɛ e wun are yolɛ ng’ɔ nin i fata sɔ’n, maan e si kɛ kannzɛ é yó sɛ é yó sɛ’n, e su yaciman kpɛnngbɛn yolɛ annzɛ tukpacɛ tɔlɛ le.

 5. ?Kɛ tukpacɛ’n kleli Ɲanmiɛn i sufuɛ nanwlɛfuɛ’m be yalɛ’n, wafa nga be yoli’n, ngue afɔtuɛ yɛ ɔ man e ɔ?

⁵ Zoova i sufuɛ nanwlɛfuɛ nga tukpacɛ’n kleli be yalɛ’n be sɔnnin. Be nun kun yɛle Epafroditi. (Filipfuɛ Mun 2:25-27) Timote m’ɔ nin akoto Pɔlu dili junman’n, i kusu’n, aklunya’n kleli i yalɛ tikatika. I ti’n, Pɔlu seli i kɛ ɔ “nɔn nzan kan.” (1 Timote 5:23) Pɔlu bɔbɔ’n, ‘tukpacɛ wie m’ɔ tɔli i su m’ɔ kɛli i kplo nun’n,’ ɔ kleli i yalɛ. Ɔ kwla yo ɲinma ya, annzɛ tukpacɛ uflɛ mɔ i blɛ sɔ nun’n, be nin a simɛn i are’n. (2 Korɛntfuɛ Mun 12:7; Galasifuɛ Mun 4:15; 6:11) ‘Tukpacɛ sɔ m’ɔ tɔli i su m’ɔ kɛli i kplo nun’n’ ti’n, Pɔlu srɛli Zoova tankaan kpa. (An kanngan 2 Korɛntfuɛ Mun 12:8-10 nun.) Ɲanmiɛn w’a yoman abonuan sa naan Pɔlu w’a yo juejue. Sanngɛ, ɔ mɛnnin i wunmiɛn maan ɔ trɛli i awlɛn. Ɔ maan, kɛ Pɔlu leman wunmiɛn’n, i sɔ’n nun yɛ Zoova bɔbɔ yili i wun nglo kɛ ɔ kwla like kwlaa yo ɔ. Nanwlɛ Pɔlu i ndɛ sɔ’n kwla man e afɔtuɛ kpa.

Nán e fa aunkpinndiɛ kunndɛlɛ’n fa cici e ti

6, 7. ?Ngue ti yɛ ɔ fataman kɛ e fa e ɲin sie i aunkpinndiɛ kunndɛlɛ’n su tratra su ɔ?

⁶ Amun si kɛ e Zoova Lalofuɛ mun e yo e wun are. Yɛle kɛ e kwla yo dɔɔtrɔ are annzɛ are wafa uflɛ. E fluwa Réveillez-vous ! nun’n, kpɛ sunman be kan tukpacɛ wie mun ɔ nin be wun are yolɛ’n i ndɛ. Yɛ kannzɛ fluwa’n seman e kɛ e yo are kun sa trele’n, sanngɛ dɔɔtrɔfuɛ’m be ukalɛ nga be uka e’n, e si su ye. Kɛ é sé yɛ’n, tukpacɛ’n kwlá wieman e su treketreke. Ɔ maan, ɔ fataman kɛ e fa aunkpinndiɛ kunndɛlɛ’n e cici e ti. Ɔ fataman kɛ e mɔ e ti Klistfuɛ’n e aeliɛ’n, ɔ yo kɛ be nga be ‘leman like mɔ be fa be wla gua su’n’ sa. Be sɔfuɛ’m be waan kɛ be ko wu’n nn be liɛ w’a wie. Ɔ maan, are kwlaa nga be sa tɔ su’n be yo, be kpaman nun. (Efɛzfuɛ Mun 2:2, 12) E kunndɛman mlɔnmlɔn kɛ é yó e wun are naan y’a ka nguan nun le nɲɔn kun, naan e nin Zoova e afiɛn’n saci. Afin e si kɛ sɛ e mian e ɲin e lafi Ɲanmiɛn su kpa’n, ‘é ɲán nguan sakpa.’ Yɛle kɛ é ɲán anannganman nguan mɔ Ɲanmiɛn seli kɛ ɔ́ mán e mɛn uflɛ’n nun’n.—1 Timote 6:12, 19; 2 Piɛr 3:13.

⁷ Ɔ le sa kun ekun mɔ i ti yɛ e buman aunkpinndiɛ’n i akunndan ngboko’n. Sɛ e yo sɔ’n, é káci sran m’ɔ bu i ngunmin i wun akunndan ɔn. I sɔ’n ti’n, Pɔlu wlali Filipfuɛ’m be su nun kpa kɛ: ‘Nán amun nun sran fi bu i bɔbɔ i ninnge’m be ngunmin be akunndan, sanngɛ maan amun wiengu’m be liɛ’n lo amun wie.’ (Filipfuɛ Mun 2:4) I yo, sɛ e nian e wun lika kɛ ɔ nin i fata’n sa’n, i su ɔ. Sanngɛ e niaan’m be ndɛ lo e. Kpɛkun sran uflɛ’m be ndɛ lo e wie, ɔ maan e bo ‘Ɲanmiɛn Sielɛ’n i jasin fɛ’n’ e kle be. I kwlaa ngalɛ’n ti’n, e su faman e ɲin siemɛn i aunkpinndiɛ kunndɛlɛ’n su tratraman su.—Matie 24:14.

 8. ?Sɛ e fa aunkpinndiɛ kunndɛlɛ’n fa cici e ti’n, i bo’n kwla gua sɛ?

⁸ Sɛ Klistfuɛ kun w’a niɛnmɛn i wun kpa’n, ɔ kwla fa Ɲanmiɛn Sielɛ junman’n sie i siɛn, aunkpinndiɛ kunndɛlɛ dan’n ti. Annzɛ ɔ kwla bu i kɛ sɛ be yo are wie annzɛ be di aliɛ wie titi’n, ɔ ti kpa. Ɔ maan, ɔ kwla se kɛ saan fii be nga’m be bu i sɔ wie. Afɔtuɛ nga Pɔlu mɛnnin i sɔ yolɛ’n su’n, nán e wla fi su. I waan: ‘Amun wun like nga be ti kpa [tra su’m] be wlɛ, yɛ Klist balɛ cɛn nun’n be su wunman sa tɛ kaan sa amun wun, ɔ maan be su kputuman amun.’—Filipfuɛ Mun 1:10.

?Ninnge benin mun yɛ be ti kpa tra su ɔ?

 9. ?Ninnge nga be ti kpa tra su m’ɔ fataman kɛ e ɲin kpa be su’n be nun kun yɛle benin? ?Yɛ ngue ti ɔ?

⁹ Sɛ e wun like nga be ti kpa tra su’m be wlɛ’n, é úka sran mun naan be nin Ɲanmiɛn be afiɛn’n w’a sɛ. Yɛle kɛ é bó jasin fɛ’n, yɛ é klé be Ɲanmiɛn Ndɛ’n. Sɛ e di junman fɛfɛ sɔ’n, e bɔbɔ é ɲán su mmlusuɛ, yɛ be nga e kle be like’n, bé ɲán su mmlusuɛ’n wie. (Nyanndra Mun 17:22; 1 Timote 4:15, 16) Cɛn wie’n e Sasafuɛ Tranwlɛ’n nin Réveillez-vous ! be kan e niaan wie mɔ tukpacɛ’n kle be yalɛ kpa’n be ndɛ. Wie liɛ’n be yiyi wafa nga be tra be awlɛn’n nun. Asa’n, be yiyi wafa nga be yo naan be ɲin w’a traman be afɛ’n su nun. Yɛle kɛ be uka sran uflɛ naan b’a si Zoova nin ninnge kpakpa nga ɔ́ wá yó be’n.a

10. ?Ngue ti yɛ wafa nga e yo e wun are’n ti cinnjin ɔn?

¹⁰ E wun are yolɛ nun’n, are i wafa nga sran kun fá yó i wun’n, ɔ ti ‘i bɔbɔ i trɔ.’ (Galasifuɛ Mun 6:5) Sanngɛ ɔ fataman kɛ e wla fi su kɛ e wun are yolɛ’n i wafa kwlaa lo Zoova. Biblu’n nun mmla’m be su falɛ’n ti’n, ‘e sa kanman mmoja.’ I sɔ kunngba’n, are yolɛ ng’ɔ nin Ɲanmiɛn Ndɛ’n be kɔman likawlɛ’n, annzɛ mɔ i ti’n, e nin Zoova e afiɛn’n kwla saci’n, e yoman wie. (Sa Nga Be Yoli’n 15:20, NW) Sran wie’m be wun tukpacɛ’n i silɛ’n, annzɛ be wun are yolɛ’n, i su ajalɛ wie mɔ be fa’n, ɔ nin amuin sɔlɛ’n be ti kun. Izraɛlifuɛ nga be jasoli Zoova wun mɔ ‘be sɔli amuin’n,’ Zoova buli be fɔ. Ɔ seli be kɛ: ‘Amun yaci sraka ninnge ngbɛn’m be fa balɛ. Ansans mɔ amun ra be man min’n, ɔ yo min tɛ. Anglo le kun cɛn mun, nin wunmiɛn delɛ cɛn mun, ɔ nin cɛn dilɛ uflɛ nga sran’m be kwlaa be yia be di’n, n kwlá suanman be bo kun sa tɛtɛ mɔ amun ɲinfu amun yo be [“amuin mɔ amun sɔ be’n,” NW] cɛn sɔ’m be nun’n ti.’ (Ezai 1:13) Kɛ e kpinndinman mɔ i li yɛ e srɛ Zoova kɛ ɔ uka e’n, ɔ fataman kɛ e yo like wie naan i ti’n, Ɲanmiɛn w’a tɛman e srɛlɛ’n su kun.—Ngwlɛ Yilɛ 3:44.

Ɔ ti cinnjin kɛ “e yo sa ng’ɔ ti i nuan su’n”

11, 12. ?E wun are yolɛ nun’n, wafa sɛ yɛ e kwla yo “sa ng’ɔ ti i nuan su’n” niɔn?

¹¹ Kɛ e kpinndinman’n, e kwlá seman kɛ Zoova yo abonuan sa naan ɔ ka lɛ yo e juejue. Sanngɛ e kwla srɛ i naan ɔ kle e ngwlɛlɛ naan y’a wun are ng’ɔ nin i fata kɛ e fa yo e wun’n. Kpɛkun ɔ fata kɛ ngwlɛlɛ su e kunndɛ Biblu’n nun mmla nga be kwla uka e’n. Kɛ nga Nyanndra Mun 15:22 fa kan sa’n, sɛ tukpacɛ’n ti kekle’n, ɔ fata kɛ e wun dɔɔtrɔfuɛ kaka be wun. I waan: ‘Like nga bé yó ɔ be usaman ngwlɛlɛ afɛ’n, ɔ kpɛnman su. Sanngɛ nga bé yó ɔ, afɔtuɛ manfuɛ’m be ti yiɛ i wun kpanngban’n, ɔ yo ye.’ Akoto Pɔlu mannin Klistfuɛ’m be afɔtuɛ kun. Ɔ seli kɛ ‘blɛ nga e o nun yɛ’n e yo sa ng’ɔ ti i nuan su’n, nin sa ng’ɔ ti kpa’n, yɛ e sro Ɲanmiɛn.’—Tit 2:12.

¹² Zezi i blɛ su’n, sa kunngba ng’ɔ tɔli bla tukpacifuɛ kun i su’n, ɔ tɔ andɛ sran sunman be su wie. Mark 5:25, 26 se kɛ ‘bla kun o lɛ, mannza tɛnndɛn tɔli i wun w’a di afuɛ blu nin nɲɔn. W’a fɛ dan kpa arefuɛ sunman be sa nun, ɔ sacili i ninnge m’ɔ o i sa nun’n kwlaa, sanngɛ w’a yoman ye, i tukpacɛ’n ɔli i ɲrun tititi.’ Zezi yoli bla’n i juejue kpɛkun ɔ sili i aunnvuɛ. (Mark 5:27-34) Kɛ sran wie be ko wlan arefuɛ’m be sin lele mɔ be wunmɛn i trawlɛ kun’n, kpɛkun siɛn’n, ajalɛ nga bé fá’n, kannzɛ ɔ kwla fɔn Ɲanmiɛn mmla’n, ɔ yo be kɛ be fa sa.

13, 14. (a) ?Wafa sɛ yɛ Satan kwla yo naan e wun are yolɛ nun’n, y’a nantiman ndɛnman su kun ɔn? (b) ?Ngue ti yɛ ɔ fataman kɛ e sa kan ninnge nga be ti kɛ amuin sɔlɛ sa’n niɔn?

¹³ Like kwlaa nga Satan ko yo naan y’a faman e ɲin y’a siemɛn i Ɲanmiɛn sulɛ kpafuɛ’n su’n, yɛ ɔ́ yó ɔ. Satan fa bian nin bla kunndɛlɛ sukusuku’n, ɔ nin aɲanbeun ninnge’m be klolɛ fa laka sran wie mun. I kunngba’n, ɔ kunndɛ kɛ ɔ́ fá are yolɛ nga be wunmɛn i ɲrun be wunmɛn i sin’n, m’ɔ nin amuin sɔlɛ’n ti kun’n, ɔ́ sáci wie mun ekun naan b’a nantiman ndɛnman su kun. Kɛ é srɛ́ Zoova’n, e se kɛ ‘nán ɔ yaci e lɛ maan Lakafuɛ’n laka e,’ naan ɔ de e “sa tɛtɛ’n kwlaa nun.” I sɔ’n ti’n, ɔ fataman kɛ e fa Satan e kankan ngowa. Yɛle kɛ nán maan e fa e wun e wlɛ i like wie fi m’ɔ ti kɛ amuin sɔlɛ sa’n i nun.—Matie 6:13; Tit 2:14.

¹⁴ Zoova tanninnin Izraɛlifuɛ’m be amuin sɔlɛ nin wunnzue yilɛ. (Mmla’n 18:10-12) Pɔlu seli kɛ “klɔ sran i nzuɛn’n” i wie yɛle ‘amuin sɔlɛ’n.’ (Galasifuɛ Mun 5:19, 20) I kusu’n, ‘amuin sɔfuɛ’m’ be su tranman Zoova i mɛn klanman’n nun wie. (Sa Nglo Yilɛ 21:8) Ɔ maan, e wun i wlɛ weiin kɛ like kwlaa nga i yolɛ’n ti kɛ amuin sɔlɛ sa’n, ɔ ti tɛ kpa Zoova ɲrun.

“Maan sran’m be kwlaa be wun kɛ an fa akunndan be nanti”

15, 16. ?Ngue ti yɛ kɛ é kúnndɛ é yó e wun are’n, ɔ fata kɛ e yo i ngwlɛlɛ su ɔ? ?Yɛ afɔtuɛ kpa benin yɛ Klistfuɛ klikli’m be ɲrun dinfuɛ’m be anuannzɛ’n mannin ɔn?

¹⁵ Ɔ maan i ti’n, sɛ wafa nga sran kun yó e are’n, annzɛ wafa ng’ɔ́ fá sí tukpacɛ ng’ɔ o e su’n, e wunmɛn i wlɛ kpa’n, nán maan e kplin su. Sanngɛ nán kɛ e bɔbɔ e wunman are yolɛ wafa kun i wlɛ’n, i ti yɛ é sé kɛ ɔ ti amuin sɔlɛ ɔ. E wun are yolɛ nun’n, ɔ fata kɛ e nanti Ɲanmiɛn mmla’n su. Kɛ ɔ ko yo naan y’a yo sɔ’n, ɔ fata kɛ ngwlɛlɛ m’ɔ fin Ɲanmiɛn’n sie e, yɛ e yo akunndanfuɛ. Nyanndra Mun ndɛ tre 3 nun’n, be man e afɔtuɛ yɛ’n: ‘Nán lafi ɔ bɔbɔ wɔ akunndan liɛ’n su. Anannganman i su yɛ lafi ɔ. Sɛ á fín ase o á jáo o, Anannganman i dunman, yɛ bo ɔ. Sɛ a bo i dunman’n, ɔ́ bó ɔ ɲrun atin’n. Maan akunndan nin ngwlɛlɛ ndɛ nga’m be ka ɔ klun. Be yɛ be ti ɔ nguan ɲanman’n niɔn.’—Nyanndra Mun 3:5, 6, 21, 22.

¹⁶ E kunndɛ kɛ é yó juejue titi. Sanngɛ sɛ tukpacɛ annzɛ kpɛnngbɛn yolɛ’n kle e yalɛ’n, maan e nian e wun su are kunndɛlɛ nun. Maan e yo sɔ naan e nin Ɲanmiɛn e afiɛn’n w’a saciman. E wun are yolɛ nun’n, annzɛ like uflɛ kwlaa yolɛ nun’n, ‘maan sran’m be kwlaa be wun kɛ e fa akunndan e nanti.’ Yɛle kɛ, e nanti Ɲanmiɛn mmla’n su. (Filipfuɛ Mun 4:5, NW) Klistfuɛ klikli’m be ɲrun dinfuɛ’m be anuannzɛ’n klɛli be fluwa cinnjin kpa kun. Ɔ klɛli be kɛ nán be sɔ amuin, yɛ nán be sa kan mmoja. Asa ekun’n nán be kunndɛ bian annzɛ bla sukusuku. Ɔ kɛnnin i fluwa sɔ nun ekun kɛ: “Sɛ an nian amun wun sa sɔ’m be lika’n, ɔ ti kpa.” (Sa Nga Be Yoli’n 15:28, 29) ?Wafa sɛ yɛ sɛ be yo sɔ’n, ɔ ti kpa man be ɔ?

Tukpacɛ’n kwlaa wíe, i ti nán e kunndɛ aunkpinndiɛ’n tratra su

17. ?Wafa sɛ yɛ Biblu’n nun mmla mɔ e fa su’n yo e wun sa ye ɔ?

¹⁷ Ɔ fata kɛ e tinuntinun e fa kosan yɛ’n e usa e wun: ‘?Mmoja nin bian nin bla kunndɛlɛ sukusuku’n i su mmla nga Biblu’n man’n mɔ n fa su kpa’n, i su ye nga n ɲɛn i’n, n wun i wlɛ kpa?’ Asa ekun’n, kɛ e ‘wla sa ng’ɔ saci sran’n i kwlaa nin akunndan tɛtɛ’n kwlaa be ase’n,’ i kpa ng’ɔ yo e’n, maan e bu i sin e nian. (2 Korɛntfuɛ Mun 7:1) Kɛ e fa Biblu’n nun mmla’m be su mɔ e yo e wun yɛiinyɛiin’n, e sasa e wun tukpacɛ wie’m be lika. Kɛ mɔ e guaman asra’n mɔ e nɔnman siklɛti ɔ nin drɔgi ti’n, ɔ ti kpa man e, kpɛkun i sɔ’n ti’n e nin Ɲanmiɛn e afiɛn’n saciman. ?Kusu’n, e wunman kɛ, kɛ mɔ e timan aliɛ safuɛ, annzɛ nzannunmunfuɛ ti’n, e tɔman su tukpacɛ’n? (An kanngan Nyanndra Mun 23:20 nin Tit 2:2, 3 be nun.) Wunmiɛn lolɛ nin be wun kpinngbinlɛ’n ti’n, e kwla yo juejue. Sanngɛ kɛ e niɛn i kpa’n, Ɲanmiɛn Ndɛ’n mɔ e fa su ti yɛ e nin i e afiɛn’n sɛ, yɛ e ti juejue ɔ.

18. ?Ngue like yɛ ɔ fata kɛ ɔ yo e cinnjin kpa ɔ? ?Yɛ juejue yolɛ’n i su ndɛ benin yɛ Ɲanmiɛn kannin m’ɔ́ kpɛ́n su ɔ?

¹⁸ Like ng’ɔ ti kpa trɛ i ngba’n yɛle kɛ ɔ fata kɛ e yo naan e nin e Si Ɲanmiɛn e afiɛn’n sɛ kpa. Afin ‘kɛ e o yɛ’n e nguan’n nin blɛ ng’ɔ ba lɔ’n nun’ liɛ’n, yɛle kɛ, kɛ é trán mɛn uflɛ nun’n, i bo’n wo i sa nun. (1 Timote 4:8; Jue Mun 36:9) Ɲanmiɛn i mɛn uflɛ ng’ɔ́ bá lɔ’n nun’n, e nin i e afiɛn’n, ɔ́ sɛ́ klanman, kpɛkun é yó juejue titi, e su tɔman tukpacɛ kun le. Afin Zezi i wun m’ɔ fa kpɔli e ti’n ti’n, e sa tɛ’n kwlakwla wíe. Zezi Klist m’ɔ ti Ɲanmiɛn Bua Gbanflɛn’n, ɔ́ fá e kɔ́ ‘nzue ti mun mɔ be man nguan’n be nuan.’ Yɛ Ɲanmiɛn ‘núnnún e ɲinmuɛn’n kwlaa.’ (Sa Nglo Yilɛ 7:14-17; 22:1, 2) Ɔ maan, ndɛ fɛfɛ nga kpɛ́n su. Ndɛ sɔ’n yɛ: ‘Sran wie fi su seman kɛ: “N kpinndinman.”’—Ezai 33:24.

19. ?Kɛ é yó e wun are kɛ ɔ nin i fata’n sa’n, ngue like yɛ e kwla lafi su ɔ?

¹⁹ E lafi su kpa kɛ e su wa ɲan e ti. Yɛ blɛ mɔ Zoova wá yó maan é yáci tukpacɛ tɔlɛ nin wie wulɛ’n, e ɲin o i sin kpa. Sanngɛ ka naan blɛ sɔ’n w’a ju’n, e si kɛ e Si Ɲanmiɛn m’ɔ klo e ‘m’ɔ nian e lika’n,’ ɔ́ súan e bo naan y’a kwla tra e awlɛn awunɲalɛ’n nun. (1 Piɛr 5:7) I sɔ’n ti’n, maan e yo e wun are. Sanngɛ kɛ é yó sɔ’n, maan e nanti mmla weiin nga be o Ɲanmiɛn Ndɛ’n nun’n, be su titi!

[Ja ngua lɛ ndɛ’n]

?Wafa sɛ yɛ amún tɛ́ kosan’m be su ɔ?

• ?Wan ti yɛ maan e tɔ tukpacɛ’n niɔn? ?Yɛ wan yɛ ɔ́ dé e sa tɛ’n nin i sin ɲrɛnnɛn’n be sa nun ɔn?

• ?Kannzɛ ɔ ti su kɛ juejue yolɛ’n lo e’n, ngue yɛ ɔ fataman kɛ e yo ɔ?

• ?Ngue ti yɛ are i wafa nga e klo kɛ é fá yó e wun’n, ɔ lo Zoova ɔ?

• ?E wun are yolɛ nun’n, ngue ti yɛ sɛ e nanti ndɛ nga Biblu’n kan’n su’n, ɔ́ yó e wun sa ye ɔ?

[Foto, bue 24]

Zoova w’a yiman e kɛ e tɔ tukpacɛ naan e yo oke.

[Foto, bue 26]

Kannzɛ tukpacɛ’n kle Zoova i sufuɛ’m be yalɛ’n, sanngɛ be di aklunjuɛ jasin fɛ’n i bolɛ’n nun.