Wafa nga bla ta’n fa klo i wa’n ɔ yi Ɲanmiɛn i sran klolɛ’n i nglo

“?Bla ta kun wla fi i wa’n su? ?Ɔ simɛn i bɔbɔ i klun ba’n i aunnvuɛ? Kannzɛ i wla fi i wa’n su bɔbɔ’n, sanngɛ min liɛ’n, min wla su fiman amun le.”—EZAI 49:15.

BA NƆNMAN’N nɔ́n ɲɔnflɛn’n nn ɔ́ núnkunnúnkun i nin sa nun. Sran klolɛ’n i kun yɛ o lɛ ɔ. Pam ti bla ta. Ɔ seli kɛ: “Cɛn klikli nga n fali min wa’n sa’n, n kloli i kpa. Kpɛkun n wunnin kɛ sran mɔ m’an ɲɛn i ti’n m’an ɲan junman.”

Sran kwlakwla si kɛ sɛ bla ta’n klo i wa’n, ɔ ti kpa, naan i sɔ’n uka ba’n naan w’a yo kpa. Sanngɛ sa sifuɛ’m be kannin ndɛ kunngba’n. Annuanzɛ nga be nian like ng’ɔ kwla yo naan sran be ti’n nun w’a sannganman’n, be klɛli fluwa kun. Fluwa sɔ’n i nun’n, be seli kɛ: “E niannin nun e wunnin kɛ ba kanngan nga kɛ be nin’m be wuli be’n b’a faman be’n, annzɛ be nin be tili nun’n, be diman aklunjuɛ, yɛ be wla’n bo be wun. Wie liɛ bɔbɔ’n, be kwlá buman akunndan kun.” Sanngɛ fluwa kunngba’n waan sa’m be kle kɛ ba kanngan nga be klo be be kaan nun’n, be si ngwlɛlɛ tra ba nga be kloman be’n.

Alan Schore ti suklu klefuɛ fiaunfuɛ’m be are yolɛ suklu kun nun Amlɛnkɛn’m be mɛn’n nun lɔ. Ɔ kannin kɛ klolɛ nga bla ta’n klo i wa’n, ɔ ti cinnjin. I waan: “Wafa nga ba’n nin i nin’m be afiɛn’n fa ti i klikli nun’n, i su yɛ ba’n nían nánti ɔ. Afin, ɔ ti kɛ w’a kɛ i aeliɛ’n nun. Sɛ ba’n ɔ́ kló sran o, annzɛ ɔ́ yó tɛfuɛ o, ɔ fin i bo bolɛ’n nun.”

Sanngɛ awlabɔɛ’n, ɔ nin tukpacɛ’n, annzɛ sa uflɛ ekun be yo maan bla kun i ɲin kpa i wa’n su, annzɛ “bla ta kun i wla fi i wa’n” su. (Ezai 49:15) Sanngɛ, titi’n nán kɛ bla ta’m be yo sɔ. I kpa bɔbɔ’n, wafa nga be yili be’n, ɔ ti kɛ, kɛ bla ta’m be wu ba’n, be ka lɛ be klo be. Sa sifuɛ’m be waan like kun mɔ blɔfuɛ’n flɛ i ocytocine o bla nin yasua’m be nun, yɛ kɛ bla’m be koto awuliɛ’n, be liɛ’n uka su. Ocytocine yɛ ɔ yo maan bla’n i klun’n yo i ya ɔ. Like kunngba’n yɛ maan bla’n ɲan ɲɔnflɛn nzue ɔ. Sran’m be waan like sɔ’n yo maan bla ta’n, ɔ klo i wa’n kpa liɛ su.

?Ɔ yo sɛ yɛ maan e klo sran ɔn?

Sran nga be bu i kɛ nnɛn mun yɛ be kacili sran’n, be like nga be kle’n yɛle kɛ sran klolɛ’n finman sran. Naan kɛ sran’m bé káci bé kɔ́’n, yɛ be kloli be wiengu ɔ, afin ɔ uka be naan b’a ɔ be ɲrun. Zronali kun m’ɔ kan bla ta’m be ndɛ ɛntɛnɛti nun’n waan klɔ sran’m be ti nun miɛn’n fin oteku nin wuo’m be akpasua’m be liɛ’n. Be waan kɛ be ti nun miɛn’n boli kacilɛ’n bo’n, like ng’ɔ yo maan be klo sran annzɛ be kpɔ i’n yɛ ɔ dun mmua kacili ɔ. Zronali sɔ’n waan i sɔ ti yɛ maan bla ta’n nin i wa’n be klo be wun’n niɔn.

?I yo, kannzɛ like kun o e ti nun miɛn nun ti yɛ e kwla klo sran’n, é sé kɛ like sɔ’n bali sa ngbɛn, annzɛ ɔ fin wuo mun?

?Wafa sɛ yɛ e kwla yiyi ndɛ sɔ nun uflɛ ɔ? Biblu’n waan Ɲanmiɛn yili sran’n kɛ i bɔbɔ sa. Yɛle kɛ ɔ yili i kɛ ɔ niɛn i nzuɛn liɛ’n su. (Bo Bolɛ 1:27) Sran klolɛ’n yɛ ɔ ti Ɲanmiɛn i nzuɛn’n cinnjin’n niɔn. Akoto Zan klɛli i kɛ: ‘Sran ng’ɔ kloman sran’n, nn ɔ siman Ɲanmiɛn.’ ?Ngue ti ɔ? ‘Afin Ɲanmiɛn’n yɛ ɔ ti sran klofuɛ’n niɔn.’ (1 Zan 4:8) Sɛ amun fa amun ɲin sieli i ndɛ sɔ su kpa’n, b’a seman kɛ Ɲanmiɛn klo sran. Sanngɛ be seli kɛ Ɲanmiɛn ti sran klofuɛ. Sran klolɛ’n fin i.

Kɛ Biblu’n kán sran klolɛ’n ndɛ’n ɔ se kɛ: ‘Sran m’ɔ klo sran’n, ɔ trɛ i awlɛn sran wun, sran m’ɔ klo sran’n, ɔ yo aklunye, yɛ i ɲin bloman sran like su, sran m’ɔ klo sran’n, ɔ diman tutre, ɔ tumɛn i wun, i nzuɛn ti kpa, ɔ bumɛn i bɔbɔ wun akunndan, ɔ faman ya finfin, ɔ faman sa siemɛn i klun, sa tɛ’n yomɛn i fɛ, nanwlɛ dilɛ’n yɛ ɔ yo i fɛ ɔ. Sran m’ɔ klo sran’n, sa’n kwlaa sɔn i nun, sa’n kwlaa nun ɔ lafi Ɲanmiɛn su, i wla’n wo i su, ɔ trɛ i awlɛn sa’n kwlaa nun, yɛ ɔ siman afɛ. Sran m’ɔ klo sran’n, ɔ klo i guɛ i ti nin i bo.’ (1 Korɛntfuɛ Mun 13:4-8) ?Wan yɛ ɔ kwla se kɛ nzuɛn cinnjin sɔ’n, ɔ bali sa ngbɛn ɔn?

Wafa nga e wun yo e’n

?Kɛ amun kanngannin wafa nga Biblu’n yiyi sran klolɛ’n nun lɛ’n, ɔ yo amun kɛ amun ɲan sran naan ɔ klo amun sɔ wie? Sɛ ɔ yo amun sɔ’n, ɔ ti su. ?Ngue ti ɔ? Afin ‘e ti Ɲanmiɛn mma mun.’ (Sa Nga Be Yoli’n 17:29) Wafa nga Ɲanmiɛn yili e’n, ɔ kle kɛ be klo e, yɛ e kusu e ko e wiengu. Kusu’n, e si kɛ Ɲanmiɛn klo e kpa. (Zan 3:16; 1 Piɛr 5:6, 7) Biblu’n nun ndɛ mma nga e fa boli ndɛ nga i kanlɛ bo’n, ɔ seli kɛ wafa nga Ɲanmiɛn fa klo e’n, ɔ tra e sran klolɛ liɛ’n. Afin i sran klolɛ’n ti dan, yɛ ɔ cɛ. Ɔ tra wafa nga bla ta kun fa klo i wa’n bɔbɔ!

Sɛ ɔ ti sɔ’n, amun kwla usa amun wun kɛ: ‘?Sɛ Ɲanmiɛn si ngwlɛlɛ, ɔ le wunmiɛn yɛ ɔ klo sran’n, ngue ti yɛ ɔ yoman naan ɲrɛnnɛn’n wieman e su ɔ? ?Ngue ti yɛ ɔ yaci ba kanngan’m be lɛ maan be wu, kpɛkun ɔ yaci sran’m be lɛ maan be kle be wiengu yalɛ ɔ? ?Annzɛ sran’m be aɲinkpli’n, annzɛ junman mɔ be simɛn i di ti be saci asiɛ’n niɔn?’ Kosan sɔ’m be ti su. Ɔ fata kɛ be wun be su tɛwlɛ.

Kannzɛ sran wie’m be waan sran kwlá siman Ɲanmiɛn i su ndɛ nanwlɛ’n, sanngɛ, e kwla si kosan sɔ’m be su tɛlɛ’n. Sran kpanngban’m be nin Zoova i Lalofuɛ’m b’a suan Biblu’n nun like. Ɔ maan, nvle ya ko ju wie’m be nun sran akpinngbin b’a si kosan sɔ’m be bo’n. Fluwa nga i klɛfuɛ’m be yia amun kɛ amun kusu, an yo i sɔ wie. Kɛ amún súan Biblu’n nun like kɔ́ i ɲrun’n, yɛ kɛ amún súan ninnge nga Ɲanmiɛn yili be’n be su like’n, kpɛkun amún wún i kɛ Ɲanmiɛn nin e e afiɛn’n timan nun, naan e kwla si i. Amún sí kɛ Ɲanmiɛn ‘nin e nun wie fi nunman mmua.’—Sa Nga Be Yoli’n 17:27.

[Ndɛ kwle, bue 8]

Klolɛ nga Ɲanmiɛn fa klo e’n, ɔ ti dan tra klolɛ nga bla ta kun fa klo i wa’n.