Nán an lo amun wun man Satan yɛ ɔ́ wánndi amun!

‘An fa amun wun man Ɲanmiɛn. Nán an lo amun wun man mmusu’m be si Satan’n, an jran kekle yɛ ɔ́ wánndi amun.’—ZAK 4:7.

1, 2. (a) ?Satan i nzuɛn mennin yɛ be kɛnnin Ezai ndɛ tre 14 nun ɔn? (b) ?Kosan mennin mun yɛ é wá tɛ́ be su ɔ?

SƐ BE wun tulɛ’n ti sran’n, nn é sé kɛ yɛle mmusu’m be si Satan’n. I wun tulɛ sɔ’n, be kɛnnin i ndɛ Ɲanmiɛn nuan ijɔfuɛ Ezai i fluwa’n nun. Zoova i nvle’n yɛ ɔ kannin ɔn. Be kan mannin “Babilɔni famiɛn’n,” afuɛ ya tra su lele naan Babilɔnifuɛ’m b’a sie mɛn wunmuan’n. Be seli kɛ: ‘A seli ɔ klun lɔ kɛ: “Ń fú lele ń jú ɲanmiɛn su lɔ. Ń fá min famiɛn bia’n ń síe i Ɲanmiɛn i nzraama’m be su nglo. E nin Ɲanmiɛn mɔ like fi nunmɛn i sin’n é sɛ́.”’ (Ezai 14:3, 4, 12-15; Kalɛ 24:17) “Babilɔni famiɛn’n” tuli i wun kɛ nga Satan m’ɔ ti “mɛn nga i min’n,” ɔ fa yoli’n sa. (2 Korɛntfuɛ Mun 4:4) Wun tulɛ sɔ’n ti’n, Babilɔnifuɛ’m be mɛn sielɛ’n wieli tɛ kpa. I sɔ kunngba’n, awieliɛ wá wíe mmusu’m be si Satan’n wun tufuɛ’n, i tɛtɛ kpa wie.

² Sanngɛ, kɛ mɔ Satan te o lɛ’n ti’n, e kwla usa e wun kosan wie mun. Kosan sɔ mun yɛle kɛ: ?Ɔ fata kɛ e sro Satan? ?Ngue ti yɛ ɔ wlawla sran mun mɔ be kle Klistfuɛ’m be ɲrɛnnɛn’n niɔn? ?Yɛ ngue yɛ e kwla yo naan Satan w’a ɲanman e ɔ?

?Ɔ fata kɛ e sro mmusu’m be si Satan’n?

3, 4. ?Ngue ti yɛ Klistfuɛ nga be kpali be sieli be ngunmin’n be nin be janvuɛ’m be sroman Satan ɔn?

³ Zezi Klist seli kɛ: ‘Nán srɛ kun amun ɲrɛnnɛn nga an wá wún i’n ti. An nian, mmusu’m be si Satan’n ɔ́ wá wlá amun nun wie’m be bisua, ɔ́ sá amun nian. Amún wún ɲrɛnnɛn le blu. Sɛ kunlɛ bɔbɔ yɛ bé kún amun’n, an tra amun awlɛn, yɛ like nga ń fá yó amun mo’n yɛle nguan’n, ɔ ti kɛ famiɛn kle sa.’ (Sa Nglo Yilɛ 2:10) Ndɛ sɔ’n wla Klistfuɛ nga bé kɔ́ ɲanmiɛn su’n, ɔ nin be janvuɛ mɔ be lafi su kɛ bé ká asiɛ’n su wa’n, be fanngan kpa. Ɔ maan, be sroman Satan. Be akpasua nɲɔn’n be yakpa yolɛ sɔ’n, be nin i fiman be nin klun. Sanngɛ, kɛ mɔ be sro Ɲanmiɛn mɔ be ɲin yi i’n ti’n, be ‘fiɛ i ndɛwa’n bo.’—Jue Mun 34:10; 36:8.

⁴ Kannzɛ be kleli Klistfuɛ klikli’m be ɲrɛnnɛn lele naan ɔ wie kunlɛ yɛ bé kún be’n, srɛ w’a kunman be. B’a sroman ɲrɛnnɛn kwlaa nga Satan kwla kleli be’n. Afin, be si kɛ Zoova sokpɛmɛn i gbaflɛn difuɛ’n. I sɔ kunngba’n, kɛ ɲrɛnnɛn tɔ andɛ Klistfuɛ nga be kpali be sieli be ngunmin’n, ɔ nin be janvuɛ’m be su’n, be jran kekle. Be kpɔciman Ɲanmiɛn. Sanngɛ nn Pɔlu seli kɛ Satan kwla kun e. ?Sɛ Satan kwla kun e’n niɔn, nán i srolɛ cɛ yɛ ɔ fata kɛ e sro i ɔ?

 5. ?Ngue yɛ Ebre Mun 2:14, 15 kle e ɔ?

⁵ Pɔlu seli kɛ Zezi kacili klɔ sran ‘naan sɛ ɔ wu’n ɔ́ kwlá mmusu’m be si Satan’n mɔ maan wie’n kwla sran mun’n. Yɛ ɔ́ dé be kwlaa nga kɛ be wuli be lele’n wie’n i srolɛ’n ti b’a kaci kɛ kanga sa’n.’ (Ebre Mun 2:14, 15) Satan yɛ ‘maan wie’n kwla sran mun’ ɔn. Afin, ɔ fali Zida Iskariɔti. Kpɔkun, ɔ suli Zuifu kpɛnngbɛn nin Rɔmufuɛ’m be bo maan be kunnin Zezi. (Lik 22:3; Zan 13:26, 27) Sanngɛ Zezi i wulɛ sɔ’n ti’n, sran’m bé fló Satan sa nun kpɔkun bé kwlá ɲán anannganman nguan.—Zan 3:16.

6, 7. ?Nin yɛ Satan kwla fɛ i sran kunlɛ’n ju ɔ?

⁶ ?Nin yɛ Satan kwla fɛ i sran kunlɛ’n ju ɔ? Gblɛ’n yɛ Satan fa boli i sa tɛ yolɛ’n i bo ɔ. Ɔ lakali Adam maan ɔ yoli sa tɛ. Kɛ ɔ yoli sɔ’n, yɛ sa tɛ’n nin wie’n be bali mɛn’n nun yɛ be sali sran kwlaa ɔ. (Rɔmfuɛ Mun 5:12) Asa ekun’n, Satan su sran’m be bo maan be kle Zoova i sufuɛ’m be ɲrɛnnɛn. Wie liɛ’n, be kle be ɲrɛnnɛn kɛ Zezi liɛ sa lele be kun be.

⁷ Sanngɛ, nán e bu i kɛ Satan kwla kun sran kwlaa ng’ɔ klo kɛ ɔ́ kún i’n. Afin, Ɲanmiɛn sasa i sufuɛ kpa mɔ be o asiɛ’n su wa’n. Ɔ maan, ɔ su kplinman su kɛ Satan kun be ngba. (Rɔmfuɛ Mun 14:8) Yɛ sɛ bɔbɔ Zoova kplin su naan Satan kle i sufuɛ’m be kwlaa be ɲrɛnnɛn naan ɔ kun be nun wie’n, sanngɛ sran cɛnlɛ ndɛ’n m’ɔ o Biblu’n nun’n fɔnvɔ be. I waan be nga be wuli’n, “be klɛli be dunman” naan Ɲanmiɛn cɛ́n be. I sɔ sa liɛ’n, Satan, ɔ su kwla tɛnndɛnmɛn i ɲrun!—Malasi 3:16; Zan 5:28, 29; Sa Nga Be Yoli’n 24:15.

?Ngue ti yɛ Satan kle Klistfuɛ’m be ɲrɛnnɛn ɔn?

 8. ?Ngue ti yɛ Satan kle Ɲanmiɛn i sufuɛ’m be ɲrɛnnɛn ɔn?

⁸ E mɔ e ti Ɲanmiɛn i sufuɛ kpa’n, e nin i e afiɛn’n mantan kpa, kpɔkun e lafi i su. Yɛ like nga Satan kunndɛ mɔ i ti yɛ ɔ kle e ɲrɛnnɛn’n, yɛle kɛ nán e lafi Ɲanmiɛn su naan e yo sa nga mɔ maan e nin e Si Ɲanmiɛn e afiɛn’n sáci’n. Sanngɛ, ɔ fataman kɛ i sɔ’n bo e nuan. Afin Edɛni fie’n nun lɔ’n, Zoova seli kɛ ɔ́ fá kpɔlɛ wlá “bla’n” m’ɔ ti nzɔliɛ like’n, ɔ nin “wuo’n,” ɔ nin be bue nɲɔn’n be ‘osufuɛ mun’ be afiɛn. (Bo Bolɛ 3:14, 15) Kpɔkun, Biblu kle weiin kɛ be flɛ mmusu’m be si Satan’n kɛ “wuo lalaa” naan w’a fa ya dan kpa. Afin, i cɛn’n w’a sɔnman kun. (Sa Nglo Yilɛ 12:9, 12) Kpɔlɛ’n m’ɔ o bla’n nin wuo’n, ɔ nin be ‘osufuɛ mun’ be afiɛn’n, ɔ te o lɛ. Ɔ maan, Zoova i sufuɛ kpa’m be si weiin kɛ bé klé be ɲrɛnnɛn. (2 Timote 3:12) ?Sanngɛ amun si sa cinnjin kpa nga ti yɛ Satan kle e ɲrɛnnɛn’n?

9, 10. ?Akplowa mennin yɛ Satan sili ɔ? ?Yɛ wafa sɛ yɛ akplowa sɔ’n kan sran’m be sein nantilɛ’n niɔn?

⁹ Ɲanmiɛn m’ɔ sie nglo nin asiɛ’n, mmusu’m be si Satan’n sili i sielɛ’n i su akplowa. Kpɔkun ɔ seli kɛ klɔ sran fi kwlá nantiman sein. Ndɛ nɲɔn sɔ’m be afiɛn’n ti kun. Kɛ Satan ko yo naan w’a kle kɛ Zɔbu kwlá nantiman sein ti’n, ɔ fali ɲrɛnnɛn yili i su. ?Wafa sɛ? Satan yoli maan Zɔbu i yi’n, ɔ nin Zɔbu i janvuɛ nsan, mɔ be waan bé fɔ́nvɔ i’n, be sran ‘fɔnvɔlɛ’n yoli kekle.’ Kɛ nga Zɔbu fluwa fa kan’n sa’n, Satan seli Ɲanmiɛn kɛ sɛ ɔ mɛn i atin naan ɔ kle Zɔbu ɲrɛnnɛn’n, Zɔbu yaci Ɲanmiɛn i sulɛ. Sanngɛ, Zɔbu jrannin kekle. Ɔ maan, Satan ti ato buafuɛ. (Zɔb 1:8–2:9; 16:2; 27:5; 31:6) Andɛ kusu’n, Satan kle Zoova i Lalofuɛ’m be ɲrɛnnɛn naan be yaci Ɲanmiɛn sulɛ naan i liɛ’n, ɔ́ sé kɛ ndɛ m’ɔ kannin’n ti nanwlɛ.

¹⁰ Kɛ mɔ Satan kunndɛ kɛ e yaci Ɲanmiɛn sulɛ’n, i ti yɛ ɔ kle e ɲrɛnnɛn ɔn. I sɔ mɔ e wun i wlɛ’n, ɔ uka e maan e tra e awlɛn e jran kekle e usuman. (Mmla’n 31:6) E Ɲanmiɛn’n yɛ ɔ sie nglo nin asiɛ’n niɔn. Ɔ maan, ɔ́ úka e maan é nánti sein titi. I sɔ’n ti’n, maan e nanti sɔ titi naan Zoova klun jɔ. I liɛ’n, ɔ́ tɛ́ Satan m’ɔ kɛn i wun ndɛ tɛ’n i su.—Nyanndra Mun 27:11.

‘De e Lakafuɛ’n i sa nun’

11. ?Kɛ é srɛ́ Ɲanmiɛn mɔ e se kɛ, ‘Nán yaci e lɛ maan Lakafuɛ’n laka e’n,’ i bo’n yɛle mennin?

¹¹ Zoova i ɲrun nantilɛ seiin titi’n, ɔ leman ba. Ɔ maan, sɛ y’a srɛman Zoova naan y’a jranman su kpa’n, ɔ kwlá yoman ye. I sɔ’n ti’n, Zezi kleli e Ɲanmiɛn srɛlɛ ajalɛ kun. Ɔ seli kɛ: ‘Nán yaci e lɛ maan Lakafuɛ’n laka e, sanngɛ de e i sa nun.’ (Matie 6:13) Zoova lakaman e kɛ e yo sa tɛ. (Zak 1:13) Sanngɛ wie liɛ’n, Biblu’n kle kɛ ɔ kwla yaci sa’m be lɛ maan be tɔ e su. (Rit 1:20, 21) Ɔ maan srɛlɛ nga Zezi kleli e kɛ é srɛ́’n i bo’n yɛle kɛ, nán maan Zoova kplin su naan e tɔ Lakafuɛ’n i sa nun naan ɔ ɲan e. Sɛ sa tɔ e su kusu’n, Biblu’n fɔnvɔ e. I waan: ‘E kwla fa e wla’n kwlaa guɛ i Ɲanmiɛn su, afin ɔ kplinman su kɛ sa ng’ɔ sɔnman amun nun’n ɔ tɔ amun su. I sɔ’n ti’n, sɛ sa tɔ amun su’n, ɔ́ yó maan ɔ́ sɔ́n amun nun yɛle kɛ ɔ́ yó sa nga mɔ maan an fíte nun’n.’—1 Korɛntfuɛ Mun 10:13.

12. ?Ngue ti yɛ e srɛ Ɲanmiɛn kɛ ɔ “de e Klunwifuɛ’n i sa nun” ɔn?

¹² Kɛ Zezi kannin lakafuɛ’n i ndɛ wieli’n, ɔ kan guali su kɛ: ‘De e Lakafuɛ’n i sa nun.’ Biblu’n nga be klɛli i Glɛki aniɛn’n nun’n i klikli nun’n, ndɛ sɔ mɔ Zezi kannin’n i kacilɛ’n yɛle kɛ: “De e Klunwifuɛ’n i sa nun.” Sanngɛ Biblu wie’m be nun be kacili i kɛ: “De e sa tɛ’n sa nun” (King James Version; Revised Standard Version), annzɛ kusu “Sasa e sa tɛ’n i lika.” (Contemporary English Version) Sanngɛ nn titi’n, kɛ be se kɛ ‘de e i sa nun’n,’ sran ndɛ yɛ be kan ɔn. Matie fluwa’n nun’n, “Lakafuɛ’n” yɛle mmusu’m be si Satan’n. (Matie 4:3, 11) I sɔ’n ti’n, ɔ ti cinnjin kpa kɛ e srɛ Ɲanmiɛn naan ɔ de e Satan m’ɔ ti “Klunwifuɛ’n,” i sa nun. Afin, ɔ fa sa tɛ yolɛ’n sie e ɲrun titi naan e fɔn Ɲanmiɛn wun. (1 Tɛsalonikfuɛ Mun 3:5) Ɔ maan kɛ e se Ɲanmiɛn kɛ ɔ ‘de e klunwifuɛ’n i sa nun’n,’ i bo’n yɛle kɛ maan Ɲanmiɛn fa e sie atin kpafuɛ’n su. Kpɔkun, maan ɔ uka e naan Satan w’a ɲanman e.

Nán maan Satan ɲan e

13, 14.  ?Ngue ti yɛ ɔ fata kɛ Korɛnti lɔ Klistfuɛ’m be kaci be wafa nga be nin sran mɔ kunndɛli bla sukusuku asɔnun’n nun’n, be nanti’n niɔn?

¹³ Pɔlu srɛli Korɛnti lɔ Klistfuɛ’m be kpa kɛ be yaci sran wun sa cɛ i. Ɔ seli be kɛ: ‘Sran nga an yaci i wun sa cɛ i’n, n kusu n yáci cɛ́ i wie, afin sɛ n yacili sran wie wun sa cɛli i’n, amun ti yɛ n yaci cɛli ɔ, ɔ yoli Klist ɲrun. Sɛ w’a yoman sɔ ɔ, ɔ cɛman naan Satan w’a ɲan e, afin e si i nzuɛn’n.’ (2 Korɛntfuɛ Mun 2:10, 11) E si kɛ wafa nga Satan kwla ɲan e’n sɔnnin. ?Ɔ maan ngue sa yɛ ɔ juli mɔ i ti yɛ Pɔlu klɛli i sɔ fluwa’n niɔn?

¹⁴ Pɔlu ijɔli Korɛnti lɔ Klistfuɛ mun. Afin, sran kun kunndɛli bla sukusuku asɔnun’n nun kpɔkun b’a kɛnmɛn i bo. ‘Bla kunndɛlɛ wafa sɔ’n mɔ be mɔ be timan Klistfuɛ bɔbɔ’n be yoman’n,’ mɔ sanngɛ sran kun yoli kpɔkun b’a kɛnmɛn i bo’n, i sɔ’n yoli Satan i fɛ dan. Sanngɛ i sin’n, be kannin sa tɛ yofuɛ’n i bo. (1 Korɛntfuɛ Mun 5:1-5, 11-13) Kpɔkun kɛ ɔ́ kɔ́ i ɲrun’n, ɔ kacili i nzuɛn’n. Ɔ maan sɛ i niaan Klistfuɛ’m b’a yacimɛn i wun sa’n b’a cɛmɛn i naan b’a sɔmɛn i nun asɔnun’n nun’n, Satan kwla ɲan be ekun. ?Wafa sɛ yɛ ɔ kwla ɲan be ɔ? Wafa ng’ɔ kwla ɲan be’n yɛle kɛ, be kwla fa ndɛ sie be klun kpɔkun be yo klunwifuɛ kɛ Satan sa. Kpɔkun sɛ ‘awlabɔɛ’n kun’ sa tɛ yofuɛ’n naan ɔ yaci Ɲanmiɛn sulɛ’n, Zoova m’ɔ si aunnvuɛ’n ɔ fa usa asɔnun kpɛnngbɛn mun. (2 Korɛntfuɛ Mun 2:7; Zak 2:13; 3:1) Ɔ maan, Klistfuɛ kpa fi kunndɛman kɛ ɔ́ fá sran wun ndɛ síe i klun naan ɔ́ yó klunwifuɛ nin wlɛfuɛ kɛ Satan sa.

Maan e fa Ɲanmiɛn i alɛ ninnge mun e sasa e wun

15. ?Alɛ mennin yɛ e kun ɔn? ?Yɛ ngue yɛ ɔ fata kɛ e yo naan y’a fite nun ɔn?

¹⁵ Sɛ e waan é ɲán e ti Satan’n nin i mmusu tɛtɛ’m be sa nun’n, ɔ fata kɛ e nin be e kun kpa. Kpɔkun sɛ e waan é fíte alɛ sɔ’n nun’n, ɔ fata kɛ e fa ‘Ɲanmiɛn i alɛ ninnge’n kwlaa’ wla e wun. (Efɛzfuɛ Mun 6:11-18) Ɲanmiɛn i alɛ ninnge sɔ’n kun yɛle kɛ, maan e ‘yo sa ng’ɔ ti i nuan su’n, maan ɔ yo kɛ like kokloko mɔ e fá kata e wue’n su’n sa.’ (Efɛzfuɛ Mun 6:14) Kɛ Saili m’ɔ ti laa Izraɛli Famiɛn’n i ɲin w’a yiman Ɲanmiɛn’n, ɔ fɛli kpa. Afin, Ɲanmiɛn yili i wawɛ’n i su. (1 Samiɛl 15:22, 23) Sanngɛ sɛ e yo sa i nuan su naan e wla Ɲanmiɛn i alɛ ninnge mun’n, ɔ́ fɛ́ i wawɛ’n mán e. Kpɔkun, ɔ́ sásá e Satan nin i mmusu tɛtɛ’m be lika.—Nyanndra Mun 18:10.

16. ?Ngue yɛ ɔ fata kɛ e yo naan Ɲanmiɛn w’a sasa e titi mmusu tɛtɛ’m be lika ɔ?

¹⁶ Sɛ e waan é sásá e wun titi mmusu tɛtɛ’m be lika’n, ɔ fata kɛ e kanngan Biblu’n nin i akua nga Ɲanmiɛn i ‘ninnge sunianfuɛ kpa’n’ yi be’n, be nun titi. (Lik 12:42) Sɛ e yo sɔ’n, e angunndan’n trán Ɲanmiɛn ninnge’m be su titi kɛ nga Pɔlu waan e yo’n sa. Ɔ seli kɛ: ‘Aniaan mun, min ndɛ’n i atabo’n yɛ: maan amun angunndan’n tran like kwlaa ng’ɔ ti kpa’n, nin sa kwlaa mɔ sran yo ɔ ɔ ti kpa’n be su, yɛle: ndɛ nanwlɛ’n, nin like nga be bu i like kpa’n, nin like ng’ɔ ti i nuan su’n, nin sa ng’ɔ timan tɛ mlɔnmlɔn’n, nin like ng’ɔ ti klanman’n, yɛ ndɛ nga be ti ɔ ɔ jɔ be klun’n.’—Filipfuɛ Mun 4:8.

17. ?Ngue yɛ ɔ́ úka e naan y’a yo jasin fɛ’n bofuɛ kpa ɔ?

¹⁷ Zoova yo maan e awlɛn mɔ e ‘tra kan jasin fɛ’n yo kɛ e ngbabua sa.’ (Efɛzfuɛ Mun 6:15) Sɛ e kɔ asɔnun aɲia’m be bo naan e fa ijɔlɛ titi’n, é yó Ɲanmiɛn Sielɛ Blɛ’n jasin fɛ’n bofuɛ kpa. Kɛ e uka sran mun mɔ be si Ɲanmiɛn kpɔkun be ɲan be ti’n, i sɔ’n man aklunjuɛ dan! (Zan 8:32) Like kun ekun m’ɔ fata kɛ e yo naan y’a sasa e wun ato ndɛ’m be lika’n, yɛle kɛ maan e fa ‘Ɲanmiɛn ndɛ’n m’ɔ ti kɛ i wawɛ’n i tokofi’n sa’n,’ i liɛ e ‘bu be kwlaa nga be angunndan’n ti tɛ’n be bue.’ (Efɛzfuɛ Mun 6:17; 2 Korɛntfuɛ Mun 10:4, 5) Sɛ e si Ɲanmiɛn Ndɛ’n kpa’n, é klé ndɛ nanwlɛ’n. Ɔ maan Satan su fɛmɛn i ato ndɛ mun ɲanman e.

18. ?Wafa sɛ yɛ e kwla ‘jran mmusu’m be si Satan m’ɔ kpɛ e gblɛ’n i ɲrun’ ɔn?

¹⁸ Kɛ Pɔlu kán Ɲanmiɛn i alɛ ninnge’m be ndɛ’n, ɔ fitili su kɛ: ‘Min ndɛ’n i atabo’n yɛ: Maan e Min’n tin amun sran wunmuan mɔ amun nin i amun a kaci nin i kwlalɛ m’ɔ leman wunsu’n ti. Kɛ ɔ ko yo naan amun a kwla jran mmusu’m be si Satan m’ɔ kpɛ amun gblɛ’n i ɲrun’n ti’n, an fa Ɲanmiɛn i alɛ ninnge’n kwlaa wla amun wun.’ (Efɛzfuɛ Mun 6:10, 11) Glɛki aniɛn’n nun ndɛ nga be kaci i kɛ ‘jran i ɲrun’n,’ be fa kan sonja mɔ be jranjran be kun’n, i ndɛ. E kusu’n, ɔ fata kɛ e jranjran naan e kun Ɲanmiɛn ninnge’m be nun alɛ’n. Afin, Satan’n kpɛ e gblɛ fanunfanun naan ɔ́ sáci e bo kun yolɛ’n, nin e like klelɛ’n, annzɛ e nantilɛ seiin. Sanngɛ, i sɔ’n ti i wun yalɛ klɛ. Afin ɔ kwlaman e, yɛ ɔ su kwlaman e le!a

Nán an lo amun wun man Satan yɛ ɔ́ wánndi amun

19. ?Wafa kun nga e kwla jran mmusu’m be si Satan’n i ɲrun kekle’n yɛle mennin?

¹⁹ Alɛ nga Satan nin i mmusu’m be nin e kun’n, e kwla fite nun. Ɔ maan, ɔ fataman kɛ e sro be. Zaki seli kɛ: ‘An fa amun wun man Ɲanmiɛn. Nán an lo amun wun man mmusu’m be si Satan’n, an jran kekle yɛ ɔ́ wánndi amun.’ (Zak 4:7) Satan i ɲrun kekle jranlɛ sɔ’n i wafa’n kun yɛle kɛ, nán maan e yo tinwafuɛ annzɛ e nin be nga be ti i sɔfuɛ’n, e san nun. Biblu’n kle weiin kpa kɛ, ɔ fataman kɛ Zoova i sufuɛ’m be di bae annzɛ be yi wunnzue, annzɛ be nian nzraama’m be su be yi wunnzue. Sɛ e ti juejue Ɲanmiɛn ninnge’m be nun kpa naan sran wie kunndɛ kɛ ɔ́ tó e amuɛn’n, srɛ su kunman e.—Kalɛ 23:23; Mmla’n 18:10-12; Ezai 47:12-15; Sa Nga Be Yoli’n 19:18-20.

20. ?Wafa sɛ yɛ e kwla jran Satan i ɲrun kekle ɔ?

²⁰ Wafa kun ekun nga e kwla ‘jran mmusu’m be si Satan’n i ɲrun kekle’n,’ yɛle kɛ maan e nanti Biblu’n nun ndɛ’n m’ɔ ti nanwlɛ’n, ɔ nin i nun mmla’m be su kpa. Kɛ mɔ Satan yɛ ɔ ti “mɛn nga i min’n” ti’n, mɛn nunfuɛ’m be fɛ i nzuɛn’n. (2 Korɛntfuɛ Mun 4:4) Sanngɛ e liɛ’n, e fɛmɛn i nzuɛn’n wie. Ɔ maan, e kpalo wun tulɛ’n, ɔ nin be ɲin m’ɔ blo ninnge’m be su’n, ɔ nin bla nin bian kunndɛlɛ sukusuku’n, ɔ nin sa kekleekle yolɛ’n, ɔ nin be ɲin m’ɔ blo aɲanbeun kunndɛlɛ’n su’n. E si kɛ, i nun mɔ Satan láka Zezi aawlɛ flɛnnɛn’n nun lɔ’n mɔ Zezi fali Biblu’n nun ndɛ’n jrɛnnin i ɲrun kekle’n, ɔ yacili Zezi nun. (Matie 4:4, 7, 10, 11) Sɛ e kusu e fa e wun mantan Zoova naan e srɛ i kɛ ɔ jran e sin’n, Satan ‘wánndi e.’ (Efɛzfuɛ Mun 6:18) Ɲanmiɛn Zoova, ɔ nin i awlɛn su Ba’n be fanngan nun’n, sran fi, kannzɛ maan ɔ yo Satan’n, ɔ su kwla yoman e tɛ titi!—Jue Mun 91:9-11.

[Ja ngua lɛ ndɛ’n]

?Wafa sɛ yɛ amún tɛ́ su ɔ?

• ?Ɔ fata kɛ e sro mmusu’m be si Satan’n?

• ?Ngue ti yɛ Satan kle Klistfuɛ’m be ɲrɛnnɛn ɔn?

• ?Ngue ti yɛ e srɛ Ɲanmiɛn kɛ ɔ de e “Klunwifuɛ’n” i sa nun ɔn?

• ?Ngue yɛ e kwla yo naan y’a fite Ɲanmiɛn ninnge’m be nun alɛ nga e kun’n, i nun ɔn?

[Foto, bue 8]

Klist i sɔnnzɔnfuɛ klikli’m be yoli yakpafuɛ wie’n, i ɲrun.

[Foto, bue 9]

Kɛ Zoova wá cɛ́n sran mun’n, Satan su kwlá tɛnndɛnmɛn i ɲrun.

[Foto, bue 10]

?E srɛ Ɲanmiɛn titi kɛ ɔ de e “Klunwifuɛ’n” i sa nun?

[Foto, bue 11]

?E fa ‘Ɲanmiɛn i alɛ ninnge’n kwlaa’ e wla e wun?