Maan e “tran minndɛ”

1, 2. (a) ?Mɛn’n i awieliɛ’n i su ndɛ benin yɛ Zezi kannin ɔn? (b) ?Kosan benin mun yɛ like suanlɛ nga wá tɛ́ be su ɔ?

CƐN kun’n, Zezi ko trannin ase Olivie Oka’n su. I sɔnnzɔnfuɛ Piɛli, nin Andre, Zaki nin Zan be ko trɛnnin i wun lɛ. Kɛ be o lɔ’n, be ɲin ta Ɲanmiɛn i sua’n m’ɔ o Zerizalɛmu lɔ’n. Zezi kannin sa cinnjin nga cɛn wie lele bé wá jú’n, be ndɛ kleli be. Kɛ ɔ́ wá dí famiɛn mɛn’n i awieliɛ blɛ’n nun’n, yɛ sa sɔ’m bé jú ɔ. Ɔ seli be kɛ blɛ sɔ’n nun’n, ɔ́ fá “sran kpa nanwlɛfuɛ b’ɔ si ngwlɛlɛ’n” síe i sran’m be su naan ɔ man be aliɛ blɛ ng’ɔ ti i nuan su’n i su.​—Mat. 24:45-47.

² I sin’n, Zezi buli talua blu be wun ɲanndra’n. (An kanngan Matie 25:1-13 nun.) E kwla usa e wun kɛ: (1) ?Ngue ti yɛ Zezi buli ɲanndra sɔ’n niɔn? (2) ?I sɔnnzɔnfuɛ nga Ɲanmiɛn kpali be sieli be ngunmin’n, be nantili ɲanndra sɔ’n i nun afɔtuɛ’n su? ?Kɛ be nantili su’n, mmlusuɛ benin yɛ be ɲɛnnin i ɔ? (3) ?Afɔtuɛ benin yɛ ɲanndra sɔ’n man e kwlaa e tinuntinun ɔn? Like suanlɛ nga wá tɛ́ kosan sɔ’m be su.

 3. (a) ?Talua blu be wun ɲanndra nga Zezi buli’n i nun yiyilɛ’n nun’n, ngue su yɛ laa’n, e fluwa’m be fa e ɲin sieli ɔ? (b) ?Wafa sɛ yɛ ndɛ’n i nun yiyilɛ wafa sɔ’n i bo’n kwla gua ɔ?

³ Like suanlɛ ng’ɔ sinnin lɛ’n nun’n, e wunnin kɛ le nɲɔn nga nun’n, wafa nga sran kpa nanwlɛfuɛ’n yiyi sa wie mɔ Biblu’n kan be ndɛ’n be nun’n, ɔ timan kɛ laa’n sa. Yɛle kɛ siɛn’n, afɔtuɛ nga sa sɔ’m be man e’n, be su yɛ ɔ fa e ɲin sie ɔ. Ɔ faman e ɲin sieman ninnge nga sa sɔ’m be ti be nzɔliɛ’n, be su. I wie yɛle talua blu be wun ɲanndra nga Zezi buli’n. Laa’n, e fluwa’m be kleli kɛ ninnge tɛkɛtɛkɛ kɛ kannin’n, nin kannin nzue’n, ɔ nin kannin nzue guawlɛ’n, be ti ninnge wie’m be nzɔliɛ. Ndɛ’n i nun yiyilɛ wafa sɔ’n ti’n, ɔ cɛman naan e ɲin w’a kpa afɔtuɛ cinnjin nga ɲanndra sɔ’n man’n su. ?Ɔ yoli sɔ sakpa? Like suanlɛ nga wá tɛ́ su.

 4. (a) ?Ngue yɛ ɔ kle kɛ yasua m’ɔ su fa atɔnvlɛ’n yɛle Zezi ɔ? (b) ?Ngue yɛ ɔ kle kɛ talua blu mun yɛle be nga Ɲanmiɛn kpali be sieli be ngunmin’n mun ɔn?

⁴ Maan e fa e ɲin sie i talua blu be wun ɲanndra nga Zezi buli’n su e nian. ?Wan yɛle yasua m’ɔ su fa atɔnvlɛ’n? Yasua sɔ’n yɛle Zezi. Afin cɛn kun’n, Zezi kɛnnin i bɔbɔ i wun ndɛ kɛ i yɛ ɔ ti yasua m’ɔ su fa atɔnvlɛ’n niɔn. (Lik 5:34, 35) ?Yɛ wan yɛle talua blu mun? Be yɛle Zezi i sɔnnzɔnfuɛ nga Ɲanmiɛn kpali be sieli be ngunmin’n, mɔ be ti kɛ “bua akpasua kaan” kun sa’n. ?Ngue yɛ ɔ kle sɔ ɔ? Ɲanndra nga Zezi buli’n nun’n, ɔ fata kɛ talua blu’n be sɔ be kannin’m be nuan. Yɛ maan be ɲin tran su naan b’a kwla kpa yasua m’ɔ su fa atɔnvlɛ’n i atin. Like kunngba’n yɛ Zezi seli i sɔnnzɔnfuɛ nga Ɲanmiɛn kpali be sieli be ngunmin’n kɛ be yo ɔ. Ɔ seli be kɛ: “An tanndan amun wun, an sɔ amun kannin’n. Sran bɔ be su minndɛ be min’n bɔ kɛ ɔ fin atɔnvlɛ bo ju lɛ cɛ’n, b’ɔ bobo anuan’n be tike’n, an yo kɛ be liɛ’n sa.” (Lik 12:32, 35, 36) Akoto Pɔlu kusu seli kɛ Klistfuɛ nga Ɲanmiɛn kpali be sieli be ngunmin’n, be ti kɛ talua m’ɔ nin a siman bian’n sa. (2 Kor. 11:2) Ɔ maan, Klistfuɛ nga Ɲanmiɛn kpali be sieli be ngunmin’n be fɔ tulɛ, ɔ nin be afɔtuɛ manlɛ ti yɛ Zezi buli ɲanndra ng’ɔ o Matie 25:1-13 nun’n niɔn.

 5. ?Ndɛ benin yɛ Zezi kannin m’ɔ kle blɛ mɔ talua blu be wun ɲanndra’n, ɔ́ kpɛ́n su’n niɔn?

⁵ ?Blɛ benin nun yɛ talua blu be wun ɲanndra’n, ɔ́ kpɛ́n su ɔ? Ndɛ nga Zezi kɛnnin i ɲanndra’n i agualiɛ lɔ’n, ɔ tike e ɲin. Ɔ seli kɛ: “Bian’n juli lɛ.” (Mat. 25:10) Afuɛ 2013, Zuie 1, Sasafuɛ Tranwlɛ’n yiyili Matie ndɛ tre 24 nin 25 be nun. Matie fluwa’n i ndɛ tre sɔ’m be nun’n, Zezi kɛnnin i balɛ’n i ndɛ kpɛ mɔcuɛ. Wie liɛ’n, ɔ se kɛ ɔ́ “bá,” wie liɛ ekun’n ɔ se kɛ ɔ “bali,” annzɛ ɔ “juli lɛ.” I kwlaa m’ɔ yoli o, Glɛki nun ndɛ nga be kacili i wafawafa sɔ’n, be kan blɛ kunngba’n i ndɛ. Blɛ mɔ Zezi bá wá dí sran’m be jɔlɛ ɲrɛnnɛn dan blɛ’n nun’n, m’ɔ́ núnnún klunwifuɛ mun’n, i ndɛ yɛ ɔ kan ɔn. Ɔ maan, e kwla se kɛ mɛn’n i awieliɛ blɛ’n nun yɛ talua blu be wun ɲanndra nga Zezi buli’n, ɔ́ kpɛ́n su ɔ.

 6. ?Ngue ti yɛ Zezi buli talua blu be wun ɲanndra’n niɔn?

⁶ ?Ngue ti yɛ Zezi buli ɲanndra sɔ’n niɔn? Maan e wla kpɛn ndɛ nga Zezi dun mmua kannin’n su. Ɔ kannin sran kpa nanwlɛfuɛ m’ɔ si ngwlɛlɛ’n i ndɛ. Sran sɔ’n, ɔ timan sran kunngba cɛ. Sanngɛ, sran akpasua kaan kun mɔ Ɲanmiɛn kpali be sieli be ngunmin’n, be ndɛ yɛ ɔ kan ɔn. Sran akpasua sɔ’n, yɛ Zezi fɛ i sieli i sɔnnzɔnfuɛ’m be su mɛn’n i awieliɛ blɛ’n nun ɔn. Zezi wlali be su nun kɛ be yo nanwlɛfuɛ titi. I sin’n, yɛ ɔ buli talua blu be wun ɲanndra’n niɔn. Ɔ buli ɲanndra sɔ’n naan ɔ́ tú i sɔnnzɔnfuɛ nga Ɲanmiɛn kpali be sieli be ngunmin mɛn’n i awieliɛ blɛ’n nun’n, be kwlaa be fɔ. Ɔ seli be kɛ be “tran minndɛ.” Afin, sɛ b’a yoman sɔ’n, be su kɔman ɲanmiɛn su. (Mat. 25:13) Maan e yiyi ɲanndra sɔ’n nun e nian. I liɛ’n, sɛ i sɔnnzɔnfuɛ nga Ɲanmiɛn kpali be sieli be ngunmin’n be nantili afɔtuɛ ng’ɔ mannin be’n su’n, é wún i wlɛ.

7, 8. (a) ?Ngue ti yɛ talua nga be ti ngwlɛlɛfuɛ’n, be kwla kpali bian m’ɔ su fa atɔnvlɛ’n i atin ɔn? (b) ?Ngue yɛ ɔ kle kɛ Klistfuɛ nga Ɲanmiɛn kpali be sieli be ngunmin’n, be kusu be buabuali be wun ɔn?

⁷ Zezi seli kɛ talua blu’n, be nun nnun ti ngwlɛlɛfuɛ. Kɛ bian m’ɔ su fa atɔnvlɛ’n juli lɛ’n, be kwla kpɛli i atin. ?Ngue ti yɛ be kwla yoli sɔ ɔ? Afin, be buabuali be wun. Yɛ be ɲin trannin su. Ɔ fata kɛ talua blu’n, be kwlakwla be tran minndɛ. Yɛ ɔ fataman kɛ be kannin’m be nuan. I sɔ’n ti, talua nnun nga be ti ngwlɛlɛfuɛ’n, b’a yoman kɛ sinnglinfuɛ mun sa. Be liɛ’n, be guali be kannin’m be nun nzue. Kpɛkun, be fa wie sieli be sa su. ?Ngue yɛ ɔ kle kɛ be nga Ɲanmiɛn kpali be sieli be ngunmin’n, be buabuali be wun sieli ɔ?

⁸ Klistfuɛ nga Ɲanmiɛn kpali be sieli be ngunmin’n, be wunnin i wlɛ kɛ, ɔ fata kɛ be di be junman’n lele mɛn’n i awieliɛ’n fa ju. Be wun i wlɛ kɛ, junman sɔ’n ti’n, ɔ fataman kɛ be kunndɛ pɔɔ nun tranlɛ. Sanngɛ, be tu be klun be di be junman’n. Nán mɛn’n i awieliɛ mɔ w’a mantan koko’n, i ti yɛ be yo sɔ ɔ. Sanngɛ, klolɛ mɔ be klo Ɲanmiɛn nin i Wa’n ti ɔ. Be nanti sein, be buman akunndan nga mɛn’n nunfuɛ’m be bu’n wie. Yɛle kɛ, be buman be ngunmin be wun akunndan, be yoman sa sukusuku yɛ be kunndɛman kɛ bé yó aɲanbeunfuɛ. Kɛ talua nga be ti ngwlɛlɛfuɛ’n be sa’n, be kannin’n w’a nuanman. Kannzɛ ɔ yo be kɛ yasua m’ɔ su fa atɔnvlɛ’n baman ndɛndɛ’n, sanngɛ be tran be minndɛ i naan bé kpɛ́ i atin.​—Fil. 2:15.

 9. (a) ?Ndɛ benin yɛ Zezi kannin m’ɔ kle kɛ awlɛn tralɛ’n ti kekle ɔ? (b) ?Kɛ Klistfuɛ nga Ɲanmiɛn kpali be sieli be ngunmin’n be tili i kɛ ‘an nian, bian’n su ba’n,’ ngue yɛ be yoli ɔ? (An nian ndɛ ng’ɔ o ja ngua lɔ’n nun.)

⁹ Like kun ekun nga talua blu’m be yoli mɔ i ti yɛ be kwla kpali bian m’ɔ ɔli atɔnvlɛ falɛ’n i atin’n, yɛle kɛ be ɲin trannin su. Zezi seli kɛ, kɛ yasua’n cɛli m’ɔ baman’n, “lafilɛ’n fali [talua’m] be kwlaa naan b’a lafi.” Andɛ Klistfuɛ nga Ɲanmiɛn kpali be sieli be ngunmin’n be kusu, ‘lafilɛ’n kwla fa be.’ Yɛle kɛ, junman nga Ɲanmiɛn fa mannin be kɛ be di i lele naan Klist to be su’n, be ɲin kwla kpa su. Zezi bɔbɔ si kɛ awlɛn tralɛ’n ti kekle, naan lafilɛ kwla fa sran kwlakwla. Klistfuɛ nanwlɛfuɛ nga Ɲanmiɛn kpali be sieli be ngunmin’n, be wun i wlɛ sɔ. I sɔ’n ti, be mian be ɲin naan b’a kwla tran b’a minndɛ. Ɲanndra nga Zezi buli’n nun’n, sran kun kpannin kɔnguɛ afiɛn seli kɛ: “An nian, bian’n su ba.” Kɛ ɔ kpannin sɔ’n, talua’m be kwlakwla be jasoli. Sanngɛ, ngwlɛlɛfuɛ mun yɛ be ɲin trannin su lele be guɛli i ti’n nin i bo ɔ. (Mat. 25:5, 6; 26:41) Klistfuɛ nga Ɲanmiɛn kpali be sieli be ngunmin’n be yoli sɔ wie mɛn’n i awieliɛ blɛ nga nun. Kɛ be tili i kɛ ‘an nian, bian’n su ba’n,’ b’a sisiman be bo. Like ng’ɔ kle weiin kɛ Zezi su ba’n, be wunnin i wlɛ. Ɔ maan, be buabua be wun naan bé kpɛ́ i atin.a Ɲanndra’n i agualiɛ su’n, Zezi fa e ɲin sie i blɛ trele kun su. Maan e nian.

10. ?Kɛ mɔ talua nga be ti ngwlɛlɛfuɛ’n b’a manman sinnglinfuɛ’m be kannin nzue’n ti’n, kosan benin yɛ e kwla usa e wun ɔn?

¹⁰ Zezi seli kɛ talua nnun nga be ti sinnglinfuɛ’n, be srɛli ngwlɛlɛfuɛ’m be kannin nzue. Sanngɛ, ngwlɛlɛfuɛ’m b’a manman be. (An kanngan Matie 25:8, 9 nun.) ?Yɛ Klistfuɛ nga Ɲanmiɛn kpali be sieli be ngunmin’n be li? ?Blɛ benin yɛ b’a kplinman su kɛ bé yó sran wie’m be ye ɔ? Maan e wla kpɛn su kɛ, kɛ ɲrɛnnɛn dan’n wá wíe’n, yɛ yasua m’ɔ su fa atɔnvlɛ’n bá ɔ. Ɔ maan, e kwla se kɛ, blɛ sɔ’n nun yɛ be nga Ɲanmiɛn kpali be sieli be ngunmin’n, b’a kplinman su kɛ bé yó sran wie’m be ye ɔ. Afin blɛ sɔ’n nun’n, nn Ɲanmiɛn w’a wie be ng’ɔ kpali be sieli be ngunmin’n be nzɔliɛ sie.

11. (a) ?Kɛ ɲrɛnnɛn dan’n wá bó i bo’n, ngue sa yɛ ɔ́ jú ɔ? (b) ?Kɛ ɔ́ fá jú mɔ talua nga be ti ngwlɛlɛfuɛ’n bé sé sinnglinfuɛ mun kɛ be ko to be kannin nzue liɛ’n, i sɔ’n kle sɛ?

¹¹ Kɛ ɲrɛnnɛn dan’n wá bó i bo’n, nn Ɲanmiɛn w’a wie Klistfuɛ nanwlɛfuɛ ng’ɔ kpali be sieli be ngunmin mɔ be te o asiɛ’n su wa’n, be kwlakwla be nzɔliɛ sie. (Ngl. 7:1-4) Ɔ maan, saan fii bé kɔ́ ɲanmiɛn su. ?Sanngɛ, kwlaa naan ɲrɛnnɛn dan’n w’a bo i bo’n, be nga b’a yoman nanwlɛfuɛ’n, be liɛ’n yó sɛ? Ɲanmiɛn su sieman be nzɔliɛ wie. Ɔ́ fá Klistfuɛ nanwlɛfuɛ uflɛ síe be osu naan ɲrɛnnɛn dan’n w’a bo i bo. Kɛ ɲrɛnnɛn dan’n ko bo i bo’n, bé núnnún Babilɔni klɔ dan’n. Atrɛkpa’n, sa sɔ’n fú be nun. Bé wún i wlɛ kɛ be dili sinnzin. Afin b’a buabuaman be wun naan b’a kpa Zezi i atin. Blɛ sɔ’n nun’n, sɛ be se be niaan nga be yoli nanwlɛfuɛ’n kɛ be yo be ye’n, be su kplinman su. Afin, be kwlá yoman sran fi i ye kun. Ɲanndra nga Zezi buli’n, ɔ kle sɔ weiin. Kɛ talua nga be ti sinnglinfuɛ’n be srɛli ngwlɛlɛfuɛ’m be kannin nzue’n, b’a manman be. Be seli be kɛ be ko to be liɛ. Kɛ mɔ “lika’n buli nun’n” ti’n, be kwlá ɲanman kannin nzue atɛ yofuɛ. Ɔ maan, be liɛ wieli.

12. (a) ?Ɲrɛnnɛn dan’n nun’n, Klistfuɛ nga Ɲanmiɛn kpali be sieli be ngunmin mɔ b’a yoman nanwlɛfuɛ’n, be liɛ’n yó sɛ? (b) ?Kɛ talua nga be ti sinnglinfuɛ’n be sa’n, ngue yɛ Zezi su yo manman be ɔ?

¹² Ɲrɛnnɛn dan’n i blɛ’n nun’n, Klistfuɛ nga Ɲanmiɛn kpali be sieli be ngunmin’n, be su kwlá yoman be niaan nga b’a yoman nanwlɛfuɛ’n be ye. Afin blɛ sɔ’n nun’n, be su kwlá yoman sran fi i ye. ?I lɛ’n nun’n, be nga b’a yoman nanwlɛfuɛ’n be liɛ’n yó sɛ? Ɲanndra nga Zezi buli’n tɛ su. Ɔ seli kɛ talua nnun nga be ti sinnglinfuɛ’n, be ɔli kannin nzue tolɛ. Kɛ bé kɔ́’n, yɛ “bian’n juli lɛ-ɔ, be nga be buabuali be wun’n, be nin bian’n be wluli kan be fa atɔnvlɛ’n lɔ’n naan b’a to anuan’n nun.” Kɛ ɲrɛnnɛn dan’n wá wíe’n, Klist bá, i ɲrun ɲanɲan yɛ ɔ yo sro. I sɔnnzɔnfuɛ nanwlɛfuɛ nga Ɲanmiɛn kpali be sieli be ngunmin’n, ɔ́ fá be kɔ́ ɲanmiɛn su. (Mat. 24:31; 25:10; Zan 14:1-3; 1 Tɛs. 4:17) Kpɛkun sɛ é kwlá sé’n, bé tó anuan’n nun. Ɔ maan, be nga b’a yoman nanwlɛfuɛ’n be su kɔman wie. Kɛ talua nga be ti sinnglinfuɛ’n be sa’n, atrɛkpa’n, bé sé kɛ: “Nja, Nja tike ye anuan.” Sanngɛ, Zezi su tikeman. Ndɛ ng’ɔ́ kán klé be nga be ti kɛ boli mun sa’n, i kunngba’n yɛ ɔ́ kán klé be ɔ. Ɔ́ sé be kɛ: “Nanwlɛ, n si-man amun.”​—Mat. 7:21-23; 25:11, 12.

13. (a) ?Ngue ti yɛ ɔ fataman kɛ e bu i kɛ Klistfuɛ nga Ɲanmiɛn kpali be sieli be ngunmin’n, be nun kpanngban be su yoman nanwlɛfuɛ ɔ? (b) ?Ngue ti yɛ e kwla se kɛ ɲanndra nga Zezi buli’n nun’n, ɔ lafi i sɔnnzɔnfuɛ nga Ɲanmiɛn kpali be sieli be ngunmin’n be su ɔ? (An nian desɛn ng’ɔ o kan like suanlɛ’n bo i bo lɛ’n.)

¹³ ?Zezi su se kɛ i sɔnnzɔnfuɛ nga Ɲanmiɛn kpali be sieli be ngunmin’n, be nun kpanngban be su yoman nanwlɛfuɛ naan bé fá sran uflɛ káci be? Cɛcɛ. Maan e wla kpɛn afɔtuɛ nga Zezi mannin “sran kpa nanwlɛfuɛ m’ɔ si ngwlɛlɛ’n” i su. Ɔ seli i kɛ nán maan ɔ yo junman difuɛ m’ɔ timan nanwlɛfuɛ’n. I sɔ’n kle kɛ, Zezi kunndɛman kɛ i sɔnnzɔnfuɛ nga Ɲanmiɛn kpali be sieli be ngunmin’n be yo i sɔfuɛ. I sɔ kunngba’n, afɔtuɛ yɛ talua blu be wun ɲanndra’n man ɔn. Talua sɔ mun’n, nnun ti sinnglinfuɛ yɛ nnun ti ngwlɛlɛfuɛ. I sɔ’n kle kɛ Klistfuɛ nga Ɲanmiɛn kpali be sieli be ngunmin’n, ɔ fata kɛ be tinuntinun be buabua be wun naan be ɲin tran su. Sran nga w’a yoman sɔ’n, nn ɔ ti sinnglinfuɛ. Kɛ Pɔlu klɛ́ i niaan Klistfuɛ nga Ɲanmiɛn kpali be sieli be ngunmin’n be fluwa’n, ɔ mannin be afɔtuɛ kunngba’n. (An kanngan Ebre Mun 6:4-9 nun; an nian Mmla’n 30:19 nun wie.) Afɔtuɛ ng’ɔ mannin be’n ti trelele. Sanngɛ, ɔ lafi i niaan’m be su kɛ bé yó like ng’ɔ ti kpa’n. I sɔ kunngba’n, afɔtuɛ nga Zezi man i sɔnnzɔnfuɛ mun talua blu be wun ɲanndra’n nun’n, ɔ kle kɛ ɔ lafi be su. Ɔ si kɛ be tinuntinun be kwla yo nanwlɛfuɛ, naan be kwla ɲan like nanndoliɛ nga be ɲin o i sin’n.

14. ?Ngue yɛ ɔ kle kɛ talua blu be wun ɲanndra’n i nun afɔtuɛ’n, ɔ ti Zezi i “bua’m be wie” mun be liɛ wie ɔ?

¹⁴ Zezi buli talua blu be wun ɲanndra’n naan ɔ́ tú i sɔnnzɔnfuɛ nga Ɲanmiɛn kpali be sieli be ngunmin’n be fɔ. Sanngɛ, ɲanndra sɔ’n ti i sɔnnzɔnfuɛ nga be ti i “bua’m be wie” mun’n be liɛ wie. (Zan 10:16) Maan e wla kpɛn afɔtuɛ nga Zezi mannin’n su. Ɔ seli wein kɛ: “An tran minndɛ.” Nán be nga Ɲanmiɛn kpali be sieli be ngunmin’n, be ngunmin yɛ ɔ kan man be ɔ. Afin cɛn kun ekun’n, ɔ seli kɛ: ‘Ndɛ nga ń kán klé amun yɛ’n, n kan kle sran’m be kwlaa kɛ be tran minndɛ.’ (Mar. 13:37) Nanwlɛ, Zezi kunndɛ kɛ i sɔnnzɔnfuɛ’m be kwlakwla be buabua be wun naan be tran minndɛ. I sɔ yɛ Klistfuɛ nga Ɲanmiɛn kpali be sieli be ngunmin’n be yo ɔ. Be tu be klun be bo jasin fɛ’n, yɛ be nzuɛn’n ti kpa. Klistfuɛ onga’m be kwla yo kɛ be sa wie. Maan e tinuntinun e wla kpɛn talua blu be wun ɲanndra’n su. Sinnglinfuɛ’m be seli ngwlɛlɛfuɛ mun kɛ be man be kannin nzue. Sanngɛ, b’a manman be wie. I sɔ’n kle e kɛ, nán sran uflɛ yɛ ɔ́ láfi Ɲanmiɛn su annzɛ ɔ́ trán mínndɛ naan y’a ɲan su ye ɔ. Sanngɛ, e bɔbɔ yɛ ɔ fata kɛ e yo sɔ naan y’a fite nun ɔn. Afin kɛ Zezi Klist m’ɔ ti jɔlɛ difuɛ kpa’n, ɔ́ wá bá’n, sran kun bɔbɔ yɛ ɔ́ kán sa ng’ɔ yoli’n i ndɛ klé i ɔ. I sɔ’n ti’n, ɔ fata kɛ e tran minndɛ titi.

15. ?Ngue ti yɛ Klistfuɛ’m be kwlakwla be kunndɛ kɛ Klist fɛ i atɔnvlɛ’n ndɛndɛ ɔ?

¹⁵ Atɔnvlɛ falɛ nga Zezi kɛnnin i ndɛ talua blu be wun ɲanndra’n nun’n, Klistfuɛ’m be kwlakwla be kunndɛ kɛ i blɛ’n ju ndɛndɛ. Klistfuɛ nga Ɲanmiɛn kpali be ngunmin’n bé kɔ́ ɲanmiɛn su. Bé yó kɛ atɔnvlɛ kun mɔ w’a fɛfɛ i wun’n sa. Kpɛkun, kɛ Armagedɔn alɛ’n ko wie’n, Zezi fɛ́ i atɔnvlɛ. (Ngl. 19:7-9) Kɛ Klist ko fɛ i atɔnvlɛ sɔ’n, asiɛ’n i sufuɛ’m be kwlakwla be liɛ yó ye. Afin, Zezi nin i atɔnvlɛ’n yɛ bé síe sran mun ɔn. I sɔ’n ti’n, sɛ e lafi su kɛ é kɔ́ ɲanmiɛn su o, annzɛ é trán asiɛ’n su wa o, maan e buabua e wun. Yɛ maan e tran minndɛ. Sɛ e yo sɔ’n, like nanndoliɛ nga Zoova fa sie e ɲrun’n, é ɲɛ́n i.