“Like kwlaa nga amún yó’n, an yo i klolɛ’n ti”

1-3. ?Sɛ e klo sran kɛ Zoova sa’n, mmlusuɛ benin yɛ é ɲɛ́n i-ɔ?

ZEZI seli kɛ: “Sɛ a cɛ sran like’n, ɔ klun jɔ kpa tra kɛ be cɛ wɔ like’n.” (Sa Nga Be Yoli’n 20:35) Ndɛ ngalɛ’n yi ndɛ nanwlɛ cinnjin kpa kun nglo. Yɛle kɛ, kɛ e klo sran’n, e ɲan su mmlusuɛ. Sɛ sran wie yɛ ɔ klo e’n, i sɔ’n yo e fɛ. Sanngɛ sɛ e bɔbɔ yɛ e klo e wiengu mun’n, aklunjɔɛ nga e di’n, ɔ leman wunsu.

² E Si m’ɔ o ɲanmiɛn su lɔ’n wun i sɔ liɛ’n i wlɛ kpa tra sran kwlakwla. Kɛ nga e fa wunnin i ndɛ tre nga be sinnin lɛ’n be nun’n sa’n, Zoova yɛ ɔ kle e sran klolɛ’n i su ajalɛ dan kpafuɛ’n niɔn. Like ng’ɔ yo fa kle kɛ ɔ klo sran’n, ɔ leman wunsu. Yɛ kusu sran fi nin a kloman sran nin-a cɛman kɛ i sa le. Ɔ maan kɛ be flɛ Zoova kɛ “Ɲanmiɛn m’ɔ di aklunjɔɛ’n,” i sɔ’n boman e nuan.—1 Timote 1:11.

³ E Ɲanmiɛn m’ɔ klo sran’n kunndɛ kɛ e fɛ i nzuɛn’n. Ɔ kunndɛ kɛ e klo sran kɛ i sa. Efɛzifuɛ Mun 5:1, 2 se e kɛ: “Kɛ mɔ amun ti Ɲanmiɛn i awlɛn su ba’n ti’n, an nian like ng’ɔ yo’n su yo wie. Asa ekun’n, like kwlaa nga amún yó’n, an yo i klolɛ’n ti.” Kɛ e klo sran kɛ Zoova sa’n, aklunjɔɛ dan nga kɛ be cɛ sran like’n be di’n, e di wie. Asa ekun’n, e wun i wlɛ kɛ Zoova i klun jɔ e wun. Ɔ maan i sɔ’n yo e fɛ. Afin i Ndɛ’n se e kɛ maan ‘e klo e wiengu.’ (Rɔmunfuɛ Mun 13:8) Sanngɛ like nga ti yɛ ɔ fata kɛ ‘like kwlaa nga é yó’n, e yo i klolɛ’n ti’n,’ i wie ekun te o lɛ.

4, 5. ?Ngue ti yɛ ɔ ti cinnjin kɛ e klo e niaan mun-ɔn?

⁴ ?Ngue ti yɛ ɔ ti cinnjin kɛ e klo e niaan nga be lafi Ɲanmiɛn su’n niɔn? Sɛ e waan é bó i kpɔlɛ’n, é sé kɛ klolɛ’n yɛ ɔ ti nzuɛn cinnjin kpafuɛ ng’ɔ fata kɛ Klisifuɛ’m be yi i nglo’n niɔn. Sɛ e kloman sran’n, e su kwlá faman e wun mantanman e niaan Klisifuɛ mun. Kpɛkun ng’ɔ ti tɛ man e’n, yɛle kɛ Zoova ɲrun’n, e timan like fi. Maan e nian wafa nga Ɲanmiɛn Ndɛ’n yiyi i sɔ liɛ’n nun’n.

⁵ Kɔnguɛ kasiɛn ka naan Zezi w’a wu’n, ɔ seli i sɔnnzɔnfuɛ’m be kɛ: “Ń má mán amun mmla uflɛ: Amun klo amun wiengu. Kɛ nga n fa kloli amun sa’n, amun kusu amun klo amun wiengu sɔ. Sɛ amun klo amun wiengu’n, yɛ sran’m be kwlaa bé sí kɛ amun ti min sɔnnzɔnfuɛ-ɔ.” (Zan 13:34, 35) Zezi waan e klo e wiengu ‘kɛ ng’ɔ fa kloli e’n sa.’ Mmla yɛ ɔ mannin e lɛ-ɔ. Fluwa nga i Ndɛ tre 29 nun’n, e wunnin kɛ, wafa nga Zezi kleli kɛ ɔ klo sran mun’n, ɔ leman wunsu. Yɛle kɛ sran’m be ninnge’m be yoli i cinnjin trɛli i bɔbɔ i liɛ mun. Maan e kusu e klo e wiengu’m be sɔ wie. Maan be nga be timan Klisifuɛ’n, be wun i wlɛ kɛ e klo sran sakpasakpa. Nanwlɛ, sɛ e klo e niaan mun lele naan be ninnge liɛ’m be yo e cinnjin tra e liɛ mun’n, sran’m be kwlaa bé sí kɛ e ti Klisi i sɔnnzɔnfuɛ.

6, 7. (1) ?Wafa sɛ yɛ Zoova i Ndɛ’n kle kɛ sran klolɛ’n ti cinnjin-ɔn? (2) ?Ndɛ benin yɛ Pɔlu kɛn i 1 Korɛntifuɛ Mun 13:4-8 nun-ɔn?

⁶ ?Yɛ sɛ e kloman sran nin? Akoto Pɔlu seli kɛ: “Sɛ n kloman sran’n, nn m’an yo kɛ blalɛ m’ɔ tɛ gleinglein’n sa, annzɛ kɛ aaba mɔ be fa bo ndɛ’n sa.” (1 Korɛntifuɛ Mun 13:1) Aaba nga be fa bo ndɛ’n, ɔ nin blalɛ ng’ɔ tɛ gleinglein’n be tɛman klanman mlɔnmlɔn. Sran ng’ɔ kloman sran’n, ɔ ti kɛ miziki bolɛ ninnge sɔ mɔ be tɛman klanman mlɔnmlɔn’n sa. ?I sɔ sran liɛ’n, ɔ́ yó sɛ naan ɔ nin i wiengu’m be afiɛn w’a mantan? Pɔlu seli ekun kɛ: “Kannzɛ i su mɔ n lafi dan’n ti’n n kwla tu oka’m be bo n ko sie be lika uflɛ bɔbɔ’n, naan sanngɛ n kloman sran’n, nn n timan like fi.” (1 Korɛntifuɛ Mun 13:2) Maan e bu i akunndan kan e nian. Sɛ e yo like kpanngban, naan sanngɛ e kloman sran’n, ‘e timan like fi.’ I sɔ’n kle kɛ Zoova i Ndɛ’n waan e yi klolɛ’n i nglo.

⁷ ?É yó sɛ naan y’a kle kɛ e klo e wiengu? Sɛ e waan é tɛ́ su’n, maan e fa e ɲin e sie i ndɛ nga Pɔlu kɛnnin i 1 Korɛntifuɛ Mun 13:4-8 nun’n su. Ndɛ sɔ’n nun’n, Pɔlu kanman klolɛ mɔ Ɲanmiɛn klo e’n, i ndɛ. Kusu ɔ kanman klolɛ m’ɔ fata kɛ e klo Ɲanmiɛn’n i ndɛ. Sanngɛ wafa ng’ɔ fata kɛ e klo e wiengu’n, i su yɛ Pɔlu fa e ɲin sie-ɔ. Like nga sran ng’ɔ klo sran’n yo’n, ɔ nin like ng’ɔ yoman’n, i ndɛ yɛ Pɔlu kan-ɔn.

 8. ?Wafa sɛ yɛ e awlɛn tralɛ’n kwla uka e naan e nin e wiengu mun y’a kanman ndɛnngan-ɔn?

⁸ “Sran ng’ɔ klo sran’n, ɔ trɛ i awlɛn.” Kɛ be se kɛ e tra e awlɛn sran wun’n, i bo’n yɛle kɛ sa ng’ɔ yo e’n, ɔ sɔn e nun. (Kolɔsufuɛ Mun 3:13) Nanwlɛ, ɔ fata kɛ e tra e awlɛn sɔ. Kɛ mɔ fɔ o e ngba e nun’n, mɔ e su Ɲanmiɛn likawlɛ’n ti’n, saan e niaan Klisifuɛ’m bé ló e ngasi, annzɛ e bɔbɔ é ló be ngasi wie cɛn kun. Sanngɛ sɛ e tra e awlɛn’n, sa kanngan nga be yo e’n, bé sɔ́n e nun. Ɔ maan e su fa yoman ndɛnngan asɔnun’n nun.

 9. ?Wafa sɛ yɛ e kwla yo e wiengu’m be ye-ɔ?

⁹ “Sran ng’ɔ klo sran’n, […] ɔ yo sran ye.” Sran nga i klun ti ufue’n, ɔ yo i wiengu ye. Kɛ ɔ́ kán ndɛ klé sran’n, ɔ kɛn i amanniɛn su. Sran m’ɔ klo sran’n, ɔ kunndɛ wafa ng’ɔ kwla ti be nga be leman wie’n, be wun ɲanman nun’n. Wie liɛ’n, aniaan wie’m b’a yo oke. Atrɛkpa’n be leman sran naan w’a nian be lika. Sɛ e ko nian be osu’n, i sɔ’n kwla wla be fanngan. Aniaan bla wie’m be kunngba yɛ be ta be mma mun-ɔn, annzɛ be wun’m be timan Klisifuɛ. E kwla uka be wie. Ɔ kwla yo aniaan wie mɔ w’a tɔ tukpacɛ, annzɛ sa kekle wie w’a tɔ i su’n. Blɛ sɔ’n nun’n, like nga be kunndɛ’n yɛle kɛ e mɔ e ti be janvuɛ’n e fɔnvɔ be. (Ɲanndra Mun 12:25; 17:17) Sɛ e yo be ye’n, é klé kɛ nán e nuan bui su yɛ e klo sran-ɔn.—2 Korɛntifuɛ Mun 8:8.

10. ?Kɛ mɔ e klo Ɲanmiɛn nin sran’n ti’n, wafa sɛ yɛ i sɔ’n kwla su e bo naan y’a jran ndɛ nanwlɛ’n sin, naan kusu y’a kan ndɛ nanwlɛ’n y’a kle e wiengu-ɔ?

¹⁰ “Sran ng’ɔ klo sran’n, [...] sa kpa’n yɛ ɔ yo i fɛ-ɔ.” Biblu kun se kɛ: “Sran m’ɔ klo sran’n, [...] ɔ jran ndɛ nanwlɛ’n sin. Kɛ be di nanwlɛ’n, ɔ yo i fɛ.” Sɛ e klo sran’n, i sɔ’n kwla su e bo maan é jrán ndɛ nanwlɛ sin, kpɛkun é ‘kán ndɛ nanwlɛ klé e wiengu.’ (Zakari 8:16) I wie yɛle kɛ sɛ sran nga e klo i’n fɔn tɛ kpa’n, klolɛ mɔ e klo Zoova nin sran sɔ’n ti’n, e su kataman sa tɛ ng’ɔ yoli’n su. E su kplimɛn i ti naan se kɛ é búa ato é fá tí i wun ɲanman nun. Sanngɛ Ɲanmiɛn i mmla’m be su yɛ é nánti-ɔ. Ndɛ ng’ɔ ti nanwlɛ’n i sin jranlɛ’n kwla yo kekle. Sanngɛ e awlɛn su sran’n i kpa yolɛ’n ti’n, e kunndɛ kɛ Ɲanmiɛn tu i fɔ, naan i kusu sɔ nun klanman. (Ɲanndra Mun 3:11, 12) Kɛ mɔ e ti Klisifuɛ mɔ e klo Ɲanmiɛn nin sran ti’n, “e klo kɛ é yó nanwlɛfuɛ sa kwlaa nun.”—Ebre Mun 13:18.

11. ?Klolɛ mɔ e klo e niaan Klisifuɛ mun’n ti’n, sɛ be fɔn’n, ngue yɛ e su yoman-ɔn?

¹¹ “Sran ng’ɔ klo sran’n, sa kwlaa sɔn i nun.” Biblu’n kɛn i 1 Piɛli 4:8 nun kɛ: “Klolɛ’n kata sa tɛ kpanngban su.” Nanwlɛ, Klisifuɛ ng’ɔ klo sran’n, ɔ yiyimɛn i niaan Klisifuɛ’m be bo. Ɔ su kunndɛman kɛ ɔ́ kán fɔnlɛ kannganngan kwlaa nga be fɔn’n, klé sran. Blɛ sunman’n, fɔnlɛ nga be fɔn’n timan dan sɔ liɛ. I lɛ’n nun’n, klolɛ mɔ e klo be’n ti’n maan e yaci cɛ be.—Ɲanndra Mun 10:12; 17:9.

12. ?Wafa sɛ yɛ Pɔlu kleli kɛ ɔ bu Filemɔn wun akunndan kpa-ɔ? ?Yɛ ngue yɛ Pɔlu i ajalɛ’n kle e-ɔ?

¹² “Sran ng’ɔ klo sran’n, [...] ɔ bu like kwlaa nanwlɛ.” Biblu kun nun liɛ’n, be klɛli i kɛ sran m’ɔ klo sran’n, “sa kwlaa nun’n ɔ bu sran wun akunndan kpa.” Ɔ maan e su buman e niaan’m be wun akunndan tɛ kaan sa. E su seman e klun lɔ kɛ be timan kpa. Klolɛ mɔ e klo aniaan mun’n, ɔ uka e maan e ‘bu be wun akunndan kpa’ yɛ e lafi be su.a I sɔ wie yɛ Pɔlu yoli-ɔ. Onezimun m’ɔ ti Filemɔn i kanga’n, ɔ wanndili. Kpɛkun Ɲanmiɛn sa, Onezimun wa kacili Klisifuɛ. I sɔ’n ti’n, Pɔlu klɛli fluwa ko mannin Filemɔn kɛ, sɛ Onezimun sɛ i sin i wun lɔ’n, ɔ sɔ i nun klanman. Pɔlu w’a miɛnmɛn i fii kɛ ɔ sɔ i nun. Sanngɛ ɔ wlɛli i fanngan. Afin Pɔlu lafili su kɛ Filemɔn fá ajalɛ ng’ɔ ti kpa’n. I sɔ’n ti’n, ɔ seli i kɛ: “N lafi su kɛ á yó like nga n se wɔ kɛ a yo’n, i ti yɛ n su klɛ ndɛ nga n blɛ wɔ-ɔ. N si kɛ like nga á wá yó’n, ɔ́ trá nga n se wɔ kɛ a yo’n bɔbɔ.” (Filemɔn 21) Kɛ klolɛ’n ti’n e lafi aniaan’m be su kɛ ngalɛ’n sa’n, be ɲan wunmiɛn be yi nzuɛn kpakpa’m be nglo.

13. ?Wafa sɛ yɛ e kwla kle kɛ e wla o su kɛ e niaan’m be liɛ yó ye-ɔ?

¹³ “Sran ng’ɔ klo sran’n, […] i wla o like kwlaa su.” Sran m’ɔ klo sran’n, ɔ lafi sran su, kpɛkun i wla o su kɛ sran sɔ’n i liɛ yó ye. Klolɛ mɔ e klo e niaan mun’n ti’n, e wla o su kɛ like ng’ɔ ti kpa’n yɛ bé yó-ɔ. Sɛ aniaan kun “yo sa wie m’ɔ timan kpa’n, ka naan w’a wun i sɔ liɛ’n i wlɛ bɔbɔ’n,” e wla o su kɛ ɔ́ fá atin kpa mɔ e kle i’n su. (Galasifuɛ Mun 6:1) Kusu sɛ aniaan wie’m b’a kpɔnzɔ Ɲanmiɛn sulɛ’n nun’n, e wla osu kɛ bé sá be sin bé sú Ɲanmiɛn kpa ekun. Maan e tra e awlɛn be wun. Kpɛkun e uka be lele maan be ɲan wunmiɛn be su Ɲanmiɛn. (Rɔmunfuɛ Mun 15:1; 1 Tesalonikifuɛ Mun 5:14) ?Yɛ sɛ e awlɛn su sran kun fali atin tɛ su nin? I lɛ’n nun bɔbɔ’n, maan e wla tran su kɛ cɛn wie lele’n ɔ́ trán bú akunndan. Kɛ ba wannzofuɛ nga Zezi kɛnnin i ndɛ’n sa’n, ɔ́ yáci atin tɛ’n i su falɛ, yɛ ɔ́ sɛ́ i sin Zoova wun ekun.—Liki 15:17, 18.

14. ?Sa benin ti yɛ e awlɛn tralɛ’n kwla yo kekle-ɔ? ?Yɛ klolɛ mɔ e klo aniaan mun’n ti’n, ngue yɛ e su yoman-ɔn?

¹⁴ “Sran ng’ɔ klo sran’n, […] ɔ trɛ i awlɛn sa kwlaa nun.” E awlɛn mɔ e tra’n ti’n, e sa sin bubuman e. Sa nga ti yɛ e awlɛn tralɛ’n kwla yo kekle’n, be kwla fin gua su lɔ, sanngɛ be kwla fin asɔnun’n nun wie. Ɔ ju wie’n, fɔ m’ɔ o aniaan’m be nun’n ti’n, be kwla bubu e sa sin kpa. Be nuan kwla fite tɛtɛ. I sɔ’n kwla lo e ngasi. (Ɲanndra Mun 12:18) Ɔ kwla yo like wie mɔ be yoli i asɔnun’n nun m’ɔ timan e liɛ’n su-ɔ. Ɔ kwla yo aniaan kun mɔ e ɲin yi i dan, kpɛkun ɔ yoli like wie m’ɔ sanngannin e akunndan-ɔn. Ɔ maan e usali e wun kɛ: ‘?Ngue ti yɛ Klisifuɛ kun kwla yo like kɛ nga sa-ɔ?’ E sunnzunman-o. ?Sanngɛ sɛ i sɔ sa liɛ’m be ju’n, e nin asɔnun’n é bú? ?É yáci Zoova i sulɛ? Sɛ e klo sran’n, e su yoman sɔ mlɔnmlɔn! Sɛ aniaan kun fɔn’n, klolɛ mɔ e klo i’n ti’n, i wun su yoman e tɛ. Yɛ e su seman kɛ asɔnun’n timan kpa. Nanwlɛ, sran klolɛ’n uka e kpa. Ɔ maan kannzɛ sran mɔ fɔ o i nun’n, ɔ́ kán e ndɛ tɛ sɛ annzɛ ɔ́ yó like wie m’ɔ ti tɛ sɛ’n, sanngɛ e su kpɔciman Zoova le. É ká asɔnun’n nun titi.—Jue Mun 119:165.

15. ?Kɛ be se kɛ sran kun i ɲin blo sran like su’n, i bo’n yɛle benin? ?Yɛ wafa sɛ yɛ sran klolɛ’n kwla uka e naan y’a wla nzuɛn tɛ sɔ’n i ase-ɔ?

¹⁵ “Sran ng’ɔ klo sran’n, i ɲin bloman sran like su.” Kɛ e ɲin blo sran like su’n, sran’n i aɲanbeun ninnge mun yɛ e klo kɛ é ɲán be-ɔ. I junman ng’ɔ di’n yɛ e klo kɛ é dí-ɔ. Sɛ ɔ si like wie yo’n, i sɔ like liɛ’n cɛ yɛ e klo kɛ é yó-ɔ. Nzuɛn sɔ’n timan kpa kaan sa. Afin ɔ yo maan e bu e ngunmin e wun akunndan. Sɛ i sɔ liɛ’n w’a tuman e nun’n, ɔ cɛman naan y’a fa ndɛnngan y’a wlɛ i asɔnun’n nun. ?Yɛ ngue yɛ ɔ́ úka e naan e konvi w’a sɔman e wiengu’m be ninnge mun-ɔn? (Zaki 4:5) Sran klolɛ’n cɛ yɛ ɔ kwla uka e-ɔ. Afin sran m’ɔ klo sran’n, kɛ i wiengu ng’ɔ le like trɛ i’n, ɔ su di aklunjɔɛ’n, ɔ di aklunjɔɛ wie. (Rɔmunfuɛ Mun 12:15) Kɛ mɔ e klo sran’n ti’n, sɛ e wiengu yo like kpa wie naan be su yi i ayɛ’n, e su faman ya.

16. ?Ngue ti yɛ ɔ fataman kɛ e fa junman nga Zoova man e’n, e di e nuan-ɔn?

¹⁶ “Sran ng’ɔ klo sran’n, […] ɔ dimɛn i nuan, ɔ tumɛn i wun.” Kɛ mɔ e klo sran’n ti’n, e blɔman junman nga e si be di’n. Sɛ nán e nuan bui su yɛ e klo e niaan mun’n, e su diman e nuan kɛ e si jasin’n fɛ’n i bo, naan e le junman dan asɔnun’n nun. Sɛ e yo sɔ’n, aniaan wie’m be sa sin kwla bubu be. Afin be kwla se be wun kɛ, be liɛ’n, be siman like fi yo. Sran ng’ɔ klo sran’n ɔ faman junman nga Ɲanmiɛn mɛnnin i’n, ɔ dimɛn i nuan. (1 Korɛntifuɛ Mun 3:5-9) Sran ng’ɔ klo sran’n, ɔ “tumɛn i wun” annzɛ kɛ nga Biblu kun fa kan sa’n, ɔ “bumɛn i wun sran dan ngboko.” Ɛɛn, sran klolɛ’n kwla uka e naan y’a buman e wun sran dan y’a traman wafa nga e ti’n su.—Rɔmunfuɛ Mun 12:3.

17. ?Sɛ e klo e wiengu mun sakpasakpa’n, ngue yɛ é yó-ɔ? ?Yɛ ngue yɛ e su yoman-ɔn?

¹⁷ “Sran ng’ɔ klo sran’n, […] ɔ yoman like m’ɔ timan su’n.” Sran nga i nzuɛn’n timan kpa’n, i ninnge yolɛ’n lo i wiengu’m be ngasi. Sran nga i nzuɛn’n ti tɛ’n, ɔ kloman sran. Afin ɔ bumɛn i wiengu’m be sran kaan sa. Sanngɛ sɛ ɔ klo be’n, i ɲin yí be. Sran ng’ɔ klo sran’n, ɔ bu sran sran. I ayeliɛ’n ti Ɲanmiɛn liɛ’n su. Yɛ i ɲin yi i wiengu nga be su Ɲanmiɛn’n. Sɛ e klo e wiengu Klisifuɛ mun sakpasakpa’n, e su yoman “ɲannzuɛn sa” naan be akunndan’n sanngan, annzɛ sa wie m’ɔ kwla lo be ngasi’n.—Efɛzifuɛ Mun 5:3, 4.

18. ?Ngue ti yɛ sran m’ɔ klo sran’n, ɔ seman kɛ saan fii i liɛ’n su yɛ ɔ ka-ɔ?

¹⁸ “Sran ng’ɔ klo sran’n, […] ɔ bumɛn i ngunmin i wun akunndan.” Biblu kun nun’n, be klɛli kɛ: “Sran m’ɔ klo sran’n, ɔ seman kɛ saan fii i liɛ’n su yɛ ɔ ka-ɔ.” Sran m’ɔ klo sran’n, ɔ seman kɛ i ndɛ liɛ’n ɔ ti nanwlɛ titi, naan ng’ɔ kan’n, i su yɛ ɔ ka-ɔ. Ɔ faman sasu m’ɔ le i’n wlanwlanman sran mun naan be su i su. Yɛ ɔ fɛmɛn i nuan nun fɛ’n fa lakaman sran mun. Sran ng’ɔ yo sɔ’n, nn ɔ su tu i wun. Biblu’n kusu se kɛ: “Be wun tulɛ’n i like ng’ɔ su i su’n yɛle ɲrɛnnɛn’n.” (Ɲanndra Mun 16:18) Sɛ e klo e niaan mun sakpa’n, e su kpaloman be ndɛ liɛ nga be kan’n. Sanngɛ sɛ é nían naan be ndɛ’n ti kpa’n, maan e fa su. Afin akoto Pɔlu seli kɛ: “Nán maan sran fi bu i bɔbɔ i wun akunndan, sanngɛ maan ɔ bu i wiengu akunndan titi.”—1 Korɛntifuɛ Mun 10:24.

19. ?Sɛ sran kun lo e ngasi’n, wafa sɛ yɛ sran klolɛ’n kwla uka e-ɔ?

¹⁹ “Sran ng’ɔ klo sran’n, […] ɔ faman ya ndɛndɛ. […] Ɔ faman sa siemɛn i klun.” Sran m’ɔ klo sran’n, ɔ faman like nga be yo i’n annzɛ ndɛ ng’ɔ fin sran nuan fite’n, i su ya ngbɛnngbɛn. Sɛ sran wie lo e ngasi naan e fa ya’n, ɔ ti su. Ɔ ju wie bɔbɔ’n e kwla fa ya dan. Sanngɛ sran m’ɔ klo sran’n, ɔ fɛmɛn i wiengu wun ya lelele. (Efɛzifuɛ Mun 4:26, 27) E su klɛman like nga be yo e’n annzɛ ndɛ nga be kan m’ɔ loli e ngasi’n, e sieman. Sran mɔ e klo i’n ti’n, e kunndɛ kɛ é nían Ɲanmiɛn i ajalɛ’n su. Kɛ nga e fa wunnin i fluwa nga i Ndɛ tre 26 nun’n sa’n, kɛ sran nin aunnvɔɛ silɛ’n fata’n, Zoova yaci i wun sa cɛ i weiin. Kɛ e yo sa tɛ’n mɔ Zoova yaci cɛ e’n, i wla fi su mlɔnmlɔn. Ɔ boman e sa tɛ sɔ’n su diman jɔlɛ kun. Zoova klɛman sa tɛ nga e yo’n sieman. ?I sɔ’n yoman e fɛ?

20. ?Sɛ aniaan kun i sa tɛ m’ɔ yoli’n ti’n, ɲrɛnnɛn w’a tɔ i su’n, ngue yɛ ɔ fataman kɛ e yo-ɔ?

²⁰ “Sran ng’ɔ klo sran’n, sa tɛ’n yomɛn i fɛ.” Biblu kun se kɛ: “Sran ng’ɔ klo sran’n, sa tɛ nga i wiengu’m be yo’n, ɔ yomɛn i fɛ.” Kɛ mɔ sa tɛ’n yoman sran m’ɔ klo sran’n i fɛ’n ti’n, nán maan e klo bla nin bian kunndɛlɛ sukusuku’n. ?Yɛ sɛ aniaan kun i sa tɛ m’ɔ yoli’n ti’n, ɲrɛnnɛn w’a tɔ i su’n nin? ?É srí i? ?É sé kɛ ‘ɔ ti kpa ke, naan like ng’ɔ kunndɛli’n yɛ ɔ ɲɛnnin i-ɔ?’ Cɛcɛ, afin e klo i. (Ɲanndra Mun 17:5) Sanngɛ kɛ aniaan kun fa atin tɛ’n, m’ɔ sɛ i sin ba Ɲanmiɛn sulɛ ekun’n, i sɔ’n yɛ ɔ fata kɛ ɔ yo e fɛ-ɔ.

21-23. (1) ?Kɛ Pɔlu se kɛ ‘klolɛ’n wieman le’n,’ i bo’n yɛle benin? (2) ?Ndɛ benin yɛ é wá fá e ɲin síe su fluwa nga i ndɛ tre kasiɛn’n nun-ɔn?

²¹ “Klolɛ’n wieman le.” ?Pɔlu i ndɛ sɔ’n i bo’n yɛle benin? Kwlaa naan Pɔlu w’a kan klolɛ’n i ndɛ’n, ɔ dun mmua kannin ninnge nga Ɲanmiɛn wawɛ’n maan Klisifuɛ klikli’m be kwla yo be’n, be ndɛ. Ninnge sɔ’m be kle kɛ be asɔnun mɔ b’a tɛkɛ i uflɛuflɛ’n yɛ Ɲanmiɛn i klun jɔ su-ɔ. Sanngɛ nán Klisifuɛ’m be ngba yɛ be yo sran juejue-ɔ, nán be ngba yɛ be ijɔ Ɲanmiɛn nuan-ɔn, nán be ngba kusu yɛ be kan aniɛn wafawafa-ɔ. Ninnge sɔ’m be timan cinnjin. I li bɔbɔ bé wíe. Sanngɛ like kun o lɛ m’ɔ wieman-ɔn. Klisifuɛ’m be kwlaa be kwla yo like sɔ’n. Ɔ ti kpa tra abonuan ninnge nga Ɲanmiɛn maan sran’m be yoli’n. Kpɛkun ɔ cɛ tra be ekun. Pɔlu kpɛ i kpo seli kɛ, like sɔ’n “ti kpa trɛ i ngba’n.” (1 Korɛntifuɛ Mun 12:31) ?Yɛ like benin yɛ ɔ ‘ti kpa trɛ i ngba-ɔ’? Like sɔ’n yɛle klolɛ’n.

²² Klisifuɛ’m be sran klolɛ nga Pɔlu kɛnnin i ndɛ’n, yɛle klolɛ m’ɔ ‘wieman le’n.’ Andɛ ekun’n, be nga be tu be klun be klo sran kɛ Zezi sa’n, be yɛ be kle kɛ be ti i sɔnnzɔnfuɛ kpakpa mun-ɔn. ?Nán Zoova i sufuɛ’m be asɔnun’m be nun yɛ be wun sran klolɛ’n kɛ ngalɛ’n sa-ɔ? Klolɛ wafa sɔ’n su wieman le. Afin Zoova tali nda kɛ ɔ́ mɛ́n i sufuɛ kpa’m be nguan m’ɔ leman awieliɛ’n. (Jue Mun 37:9-11, 29) I sɔ’n ti’n, maan e mian e ɲin titi naan ‘like kwlaa nga é yó’n, e yo i klolɛ’n ti.’ Sɛ e yo sɔ’n, é wún i wlɛ kɛ kannzu sran like cɛlɛ’n man aklunjɔɛ dan. Ng’ɔ ti cinnjin kpa ekun’n, yɛle kɛ e kwla tran nguan nun tititi, yɛ e kwla yi klolɛ’n i nglo tititi kɛ e Ɲanmiɛn Zoova m’ɔ yi klolɛ’n i nglo’n sa’n.

²³ Ndɛ tre nga y’a wun i yɛ’n, ɔ ti fluwa’n i akpasua ng’ɔ kan Ɲanmiɛn nin sran be klolɛ’n i ndɛ’n, i atabo. E wunnin like nga e kwla yo naan y’a kle kɛ e klo e wiengu’n. Sanngɛ e si kɛ Zoova klo e. Kpɛkun ɔ fɛ i tinmin’n, nin i sa nuan su sɛsɛ yolɛ’n, ɔ nin i ngwlɛlɛ’n fa yo e ye. ?Yɛ e li? ?Wafa sɛ yɛ e kwla kle Zoova kɛ, e kusu, e klo i wie-ɔ? Fluwa nga i ndɛ tre kasiɛn’n wá tɛ́ kosan sɔ’n su.