-
?Ngue yɛle Ɲanmiɛn Sielɛ’n?A kwla di aklunjɔɛ tititi!—Biblu’n nun like suanlɛ
-
-
7. Ɲanmiɛn Sielɛ’n i mmla liɛ’m be kpa tra klɔ sran’m be liɛ’n
Klɔ sran’m be siefuɛ mun be kpɛ mmla naan be nga be sie be’n b’a kwla ɲan su ye. Ɲanmiɛn Sielɛ’n kusu le mmla m’ɔ fata kɛ be ng’ɔ́ síe be’n be di su-ɔ. An kanngan 1 Korɛntifuɛ Mun 6:9-11 nun, i sin’n, an koko kosan yɛ’m be su yalɛ:
?Kɛ a niɛn i sa’n, kɛ klɔ sran’m be kwlaa bé wá dí Ɲanmiɛn i mmla’m be su’n,a wafa sɛ yɛ mɛn’n nun tranlɛ’n yó-ɔ?
?Kɛ a niɛn i sa’n, sɛ be nga Ɲanmiɛn Sielɛ’n wá síe be’n be di mmla sɔ’m be su’n ɔ ti su? ?Ngue ti yɛ a bu i sɔ-ɔ?
?Ngue yɛ ɔ kle kɛ be nga be diman mmla sɔ’m be su’n be kwla kaci-ɔ?—Nian ndɛ mma 11 nun.
Klɔ sran’m be siefuɛ mun be kpɛ mmla naan be nga be sie be’n b’a ɲan su ye. Ɲanmiɛn i sielɛ’n i mmla’m be liɛ’n be leman wunsu.
-
-
?Bian nin bla nna’n i su ndɛ benin yɛ Biblu’n kan-ɔn?A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 41
?Bian nin bla nna’n i su ndɛ benin yɛ Biblu’n kan-ɔn?
Bian nin bla nna’n i ndɛ kanlɛ’n ɔ yo sran wie’m be kɛnsrɛn. Sanngɛ kɛ Biblu’n kán bian nin bla nna’n i ndɛ’n, ɔ yo i sɔ kɛ ng’ɔ nin i fata’n sa. Yɛ kusu ndɛ ng’ɔ kan’n ɔ yo e ye. I sɔ’n boman e nuan, afin Zoova yɛ ɔ yili e-ɔ. Ɔ maan ɔ si like ng’ɔ ti kpa man e’n. Ɔ kle e ninnge nga sɛ e yo’n i klun jɔ́ e wun’n, ɔ nin like ng’ɔ kwla uka e naan y’a di aklunjɔɛ tititi’n.
1. ?Wafa sɛ yɛ Zoova bu bian nin bla nna’n niɔn?
Bian nin bla nna’n ɔ ti like mɔ Ɲanmiɛn fa cɛli klɔ sran mun-ɔn. Be nga be o aja nun’n yɛ ɔ fɛli i sɔ like mannin be-ɔ. Like sɔ mɔ Zoova fa man be nga b’a ja bla annzɛ bian’n, ɔ yo maan be kwla wu ba yɛ kusu be kwla yi be wiengu klolɛ’n i nglo. I sɔ’n ti’n, Ɲanmiɛn Ndɛ’n se kɛ: “Maan a nin ɔ gbanflɛn nun bla’n be di aklunjɔɛ.” (Ɲanndra Mun 5:18, 19) Zoova kunndɛman kɛ Klisifuɛ nga be o aja nun’n be kunndɛ bla annzɛ bian be wiengu bo.—Kanngan Ebre Mun 13:4 nun.
2. ?Ngue yɛle bla nin bian kunndɛlɛ sukusuku nin i wunsu ɲannzuɛn sa mun’n?
Biblu’n se kɛ ‘be nga be kunndɛ bla nin bian sukusuku annzɛ be yo i wunsu ɲannzuɛn sa mun’n, be su diman Ɲanmiɛn Sielɛ’n i aja’n wie.’ (1 Korɛntifuɛ Mun 6:9, 10) Be klɛli Biblu’n i bue sɔ’n Glɛki nun. Yɛ Glɛki nun’n, bla nin bian kunndɛlɛ sukusuku nin i wunsu ɲannzuɛn sa mun’n be flɛ i kɛ pɔɔneia. Kɛ be se kɛ pɔɔneia’n i wie yɛle (1) be nga b’a jaman mɔ be si sua’n,a (2) be nga be nin be wiengu yasua annzɛ be wiengu bla be la’n, yɛ (3) be nga be nin nnɛn’m be la’n. Kɛ e faman e wun e wlaman ‘bla nin bian kunndɛlɛ sukusuku nin i wunsu ɲannzuɛn sa mun’ be yolɛ nun’n, Zoova i klun jɔ e wun, kpɛkun e bɔbɔ e ɲan su ye.—1 Tesalonikifuɛ Mun 4:3.
SI NDƐ’N NUN KPA EKUN
Like nga e kwla yo naan y’a faman e wun y’a wlaman bla nin bian kunndɛlɛ sukusuku nin i wunsu ɲannzuɛn sa’m be yolɛ nun’n, ɔ nin i su ye nga é ɲɛ́n i’n é wá kɛ́n i ndɛ wie.
3. Kpalo bla nin bian kunndɛlɛ sukusuku’n
Bian kun mɔ be flɛ i Zɔzɛfu’n, ɔ mɛnnin i ɲin naan w’a fɛmɛn i wun w’a wlaman bla nin bian kunndɛlɛ sukusuku’n nun. An kanngan Bo Bolɛ 39:1-12 nun, i sin’n an koko kosan yɛ’m be su yalɛ.
?Ngue ti yɛ Zozɛfu wanndili-ɔ?—Nian ndɛ mma 9 nun.
?Kɛ a niɛn i sa’n ajalɛ kpa yɛ Zozɛfu fɛli i lɛ-ɔ? ?Ngue ti-ɔ?
?Wafa sɛ yɛ gbanflɛn nin talua mun be kwla kpalo bla nin bian kunndɛlɛ sukusuku’n kɛ Zozɛfu sa-ɔ? An bo VIDEO’N.
Zoova kunndɛ kɛ e kpalo bla nin bian kunndɛlɛ sukusuku’n. An kanngan 1 Korɛntifuɛ Mun 6:18 nun, i sin’n an koko kosan yɛ’m be su yalɛ:
?Sa benin yɛ ɔ kwla fa sran kun yi i bla nin bian kunndɛlɛ sukusuku’n nun-ɔn?
?Ngue yɛ á yó naan w’a kpalo bla nin bian kunndɛlɛ sukusuku’n niɔn?
4. A kwla kpalo bla nin bian kunndɛlɛ sukusuku’n
?Ngue yɛ ɔ kwla yo maan bla nin bian kunndɛlɛ sukusuku’n i kpalolɛ’n kwla yo kekle-ɔ? An bo VIDEO’N, i sin’n an koko kosan yɛ’n i su yalɛ.
?Kɛ bian’n wunnin kɛ akunndan ng’ɔ bu’n ɔ nin i ayeliɛ’n ɔ kwla yo maan ɔ kunndɛ bla i yi bo’n ngue yɛ ɔ yoli-ɔ?
Klisifuɛ nga be su Zoova kpa bɔbɔ’n wie liɛ’n ɔ fata kɛ be mian be ɲin kpa naan b’a kwla kpalo akunndan tɛ’n. ?Ngue yɛ a kwla yo naan ɔ akunndan w’a tranman bla nin bian kunndɛlɛ sukusuku’n su-ɔ? An kanngan Filipufuɛ Mun 4:8 nun, i sin’n an koko kosan yɛ’m be su yalɛ:
?Ninnge wafa benin mun yɛ ɔ fata kɛ e bu be akunndan-ɔn?
?Wafa sɛ yɛ Biblu’n nun kannganlɛ’n ɔ nin Zoova i sulɛ juejue su’n be kwla uka e naan y’a tɔman sa tɛ yolɛ’n nun-ɔn?
5. Zoova i mmla’m be yo e ye
Zoova si like ng’ɔ ti kpa man e’n. Ɔ kle e like ng’ɔ fata kɛ e yo naan e ayeliɛ’n w’a yo kpa’n, ɔ nin i su ye nga e ɲɛn i’n. An kanngan Ɲanndra Mun 7:7-27 nun annzɛ an bo VIDEO’N, i sin’n an koko kosan yɛ’m be su yalɛ.
?Wafa sɛ yɛ gbanflɛn sɔ’n kpɛli ndɛ mɛnnin i wun-ɔn?—Nian Ɲanndra Mun 7:8, 9 nun.
Ɲanndra Mun 7:23, 26 kle kɛ bla nin bian kunndɛlɛ sukusuku’n ɔ kpɛ ndɛ ba. ?Sɛ e mian e ɲin naan e ayeliɛ’n w’a yo kpa’n, sa benin yɛ bé tó fúan e-ɔ?
?Sɛ e mian e ɲin naan e ayeliɛ’n yo kpa’n, wafa sɛ yɛ i sɔ’n úka e naan y’a tran nguan nun titi-ɔ?
Sran wie’m be waan yasua nga be nin be wiengu yasua be la’n, ɔ nin bla nga be nin be wiengu bla be la’n i su ndɛ nga Biblu’n kan’n ɔ timan su. Sanngɛ Zoova ti klolɛ, yɛ ɔ kunndɛ kɛ sran’m be kwlaa be ɲan nguan m’ɔ leman awieliɛ’n. Kɛ ɔ ko yo naan i sɔ’n w’a yo ye w’a man e’n, ɔ fata kɛ e di i mmla’m be su. An kanngan 1 Korɛntifuɛ Mun 6:9-11 nun, i sin’n an koko kosan yɛ’n i su yalɛ:
?Yasua mɔ be nin be wiengu yasua be la’n, ɔ nin bla mɔ be nin be wiengu bla be la’n, i sɔ’n ngunmin yɛ ɔ ti tɛ Ɲanmiɛn ɲrun-ɔn?
Kɛ ɔ ko yo naan Ɲanmiɛn i klun w’a jɔ e wun’n, ɔ fata kɛ e kaci e sa ninnge wie’m be yolɛ’n nun. ?Ɔ ti cinnjin kɛ e mian e ɲin e yo sɔ? An kanngan Jue Mun 19:8, 11 nun, i sin’n an koko kosan yɛ’m be su yalɛ.
?Kɛ a niɛn i sa’n, bian nin bla nna’n i su mmla nga Ɲanmiɛn kpɛli’n ɔ ti su? ?Ngue ti yɛ a bu i sɔ-ɔ?
Zoova ukali sran kpanngban naan b’a nanti i mmla’m be su. Ɔ kwla uka wɔ wie.
SRAN WIE’M BE WAAN: “Sɛ sran wie’m be klo be wun naan be si sua’n, kannzɛ be nunman aja nun’n i sɔ’n timan tɛ.”
“?Sɛ be se wɔ sɔ’n, á sé sɛ?
NDƐ’N I KPƆLƐ BOLƐ
Bian nin bla nna’n ɔ ti like mɔ Zoova fa cɛli be nga be o aja nun’n.
Ndɛ’n i nun flanlɛ
?Bian nin bla nna ng’ɔ timan su’n i wafa wie mun yɛle benin?
?Ngue yɛ ɔ́ úka e naan y’a kpalo bla nin bian kunndɛlɛ sukusuku nin i wunsu ɲannzuɛn sa mun-ɔn?
?Kɛ e nanti bian nin bla nna’n i su mmla nga Zoova kpɛli’n su’n, i su ye benin yɛ é ɲɛ́n i-ɔ?
NDƐ WIE MUN EKUN
Sa nga ti yɛ Zoova kunndɛ kɛ yasua nin bla nga be waan bé trán likawlɛ titi’n be ja’n.
“?Bla nin yasua nga be nin-a jaman’n be kwla tran likawlɛ?” (jw.org su ndɛ)
Biblu’n seman kɛ ɔ fata kɛ e kpɔ yasua nga be nin be wiengu yasua be la’n, annzɛ bla nga be nin be wiengu bla be la’n.
Wafa nga bian nin bla nna’n i su mmla nga Zoova kpɛli’n ɔ sasa e’n.
Like ng’ɔ ukali bian kun mɔ laa ɔ nin i wiengu yasua’m be la’n naan w’a kaci i ayeliɛ’n.
a Bian nin bla nna ng’ɔ timan su’n i wie ekun yɛle be nga be tafitafi sran wie i bla lika annzɛ i yasua lika wun’n, annzɛ be fa be yasua lika be wlɛ i sran wie i wuntuan nun’n, annzɛ be kan sran wie i yasua lika annzɛ i bla lika i nun ngowa’n.
-
-
?Wafa sɛ yɛ ɔ fata kɛ Klisifuɛ’m be bu nzan nɔnlɛ’n niɔn?A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 43
?Wafa sɛ yɛ ɔ fata kɛ Klisifuɛ’m be bu nzan nɔnlɛ’n niɔn?
Nzan nɔnlɛ’n i su akunndan nga sran’m be bu’n ɔ ti fanunfanun. Kɛ sran wie’m be nin be janvuɛ’m be yia’n be klo nzan nɔnlɛ kan. Sanngɛ wie’m be nɔnman nzan mlɔnmlɔn. Yɛ wie’m be kusu be nɔn nzan lele be bo. ?Ngue ndɛ yɛ Biblu’n kɛn i nzan nɔnlɛ’n su-ɔ?
1. ?Nzan nɔnlɛ’n ɔ ti like tɛ?
Biblu’n seman kɛ nzan nɔnlɛ’n ti like tɛ. Ɲanmiɛn Ndɛ’n se kɛ nzan’n o ninnge nga Ɲanmiɛn fa cɛli klɔ sran mun’n be nun wie. Ɔ se kɛ: ‘Duvɛn’n man aklunjɔɛ.’ (Jue Mun 104:14, 15) Biblu’n kan sran kpa wie mɔ be nɔnnin nzan’n be ndɛ.—1 Timote 5:23.
2. ?Afɔtuɛ benin yɛ Biblu’n man be nga be nɔn nzan mun-ɔn?
Zoova kloman nzan nɔnlɛ ngboko’n, ɔ nin nzan mɔ be nɔn i lele be bo’n. (Galasifuɛ Mun 5:21) Biblu’n se kɛ: ‘Be nga be nɔn duvɛn ngboko’n, nán tran be nun.’ (Ɲanndra Mun 23:20) Ɔ maan kannzɛ e fa ajalɛ kɛ é nɔ́n nzan’n, kannzɛ bɔbɔ sran fi wunman e’n, ɔ fata kɛ e nian e wun su. Sɛ e nɔn nzan lele naan e kwlá buman akunndan kɛ ng’ɔ nin i fata’n sa’n, annzɛ e kwlá nianman ndɛ nga e kan’n ɔ nin e ayeliɛ’n su, annzɛ sɛ e tɔ su tukpacɛ’n, i sɔ’n timan kpa Ɲanmiɛn ɲrun. Sɛ e kwlá nianman e wun su nzan nɔnlɛ nun’n, maan e kpɛ i kpo e se kɛ e nɔnman wie mlɔnmlɔn.
3. ?Sɛ sran kun nɔ́n nzan annzɛ ɔ su nɔnman’n, ngue ti yɛ ɔ fataman kɛ e di i jɔlɛ-ɔ?
Sɛ sran kun nɔ́n nzan annzɛ ɔ su nɔnman’n, ɔ o i bɔbɔ i sa nun. Sɛ sran kun nɔn nzan’n nán maan e se kɛ ngue ti yɛ ɔ su nɔn-ɔn. Kusu sɛ sran kun se kɛ ɔ nɔnman nzan’n nán e miɛn i kɛ ɔ nɔn. (Rɔmunfuɛ Mun 14:10) Asa’n, sɛ e wun kɛ sɛ e nɔn nzan’n ɔ́ sánngan sran wie’m be akunndan’n, e su nɔnman. (Kanngan Rɔmunfuɛ Mun 14:21 nun.) ‘E buman e bɔbɔ e wun akunndan sanngɛ e bu e wiengu’m be akunndan titi.’—Kanngan 1 Korɛntifuɛ Mun 10:23, 24 nun.
SI NDƐ’N NUN KPA EKUN
É wá wún Biblu’n nun ndɛ mma wie mɔ be kwla uka wɔ naan w’a nian sɛ á nɔ́n nzan annzɛ a su nɔnman-o. Asa’n, é wá wún like nga ti yɛ ɔ timan kpa kɛ a nɔn nzan ngboko’n. Sɛ nzan nɔnlɛ’n kle ɔ yalɛ kusu’n é wá wún like nga a kwla yo’n.
4. Sɛ á nɔ́n nzan annzɛ a su nɔnman’n bu i akunndan
?Wafa sɛ yɛ Zezi buli nzan nɔnlɛ’n niɔn? Atrɛ klikli ng’ɔ yili’n uka e naan y’a wun i wlɛ. An kanngan Zan 2:1-11 nun, i sin’n an koko kosan yɛ’m be su yalɛ:
?Kɛ e fa e ɲin e sie sa sɔ’n su’n, wafa sɛ yɛ Zezi bu nzan nɔnlɛ’n niɔn?
?Kɛ mɔ Zezi w’a seman kɛ nzan nɔnlɛ’n ti like tɛ’n, wafa sɛ yɛ ɔ fata kɛ e bu Klisifuɛ kun m’ɔ nɔn nzan’n niɔn?
Kannzɛ bɔbɔ Klisifuɛ kun le atin nɔn nzan’n, sanngɛ i sɔ’n kleman kɛ saan fii ɔ fata kɛ ɔ nɔn. An kanngan Ɲanndra Mun 22:3 nun, i sin’n nian sɛ sa nga be boboli be su lɛ’n be nun’n, ɔ fata kɛ a nɔn nzan annzɛ nán a nɔn-o.
Sɛ a su wa kɔndi loto annzɛ moto annzɛ mannzin uflɛ’n.
Sɛ a ti wunnzɛfuɛ’n.
Sɛ dɔɔtrɔfuɛ kun seli ɔ kɛ nán a nɔn nzan’n.
Sɛ a kwlá nianman ɔ wun su nzan nɔnlɛ’n nun’n.
Sɛ awa’n i mmla’n ɔ manman wɔ atin kɛ a nɔn nzan’n.
Sɛ a nin sran kun m’ɔ kwlá niɛnmɛn i wun su nzan nɔnlɛ’n nun’n, mɔ i ti’n ɔ fali ajalɛ kɛ ɔ su nɔnman wie mlɔnmlɔn’n be o’n.
?Sɛ a nin ɔ janvuɛ wie’m be yia kɛ amún yíyí amun ɲin su kan’n, annzɛ kusu sɛ amun o aja wie bo’n, ɔ fata kɛ be su sran’m be nzan? Video nga i nun ndɛ’n kwla uka ɔ naan w’a wun ajalɛ nga á fá’n. An bo VIDEO’N.
An kanngan Rɔmunfuɛ Mun 13:13 nin 1 Korɛntifuɛ Mun 10:31, 32 nun. Kɛ amun ko wie ndɛ mma kun nun kanngan’n amun koko kosan yɛ’n i su yalɛ:
?Wafa sɛ yɛ ndɛ mma nga kwla uka wɔ naan m’an fa ajalɛ ng’ɔ́ jɔ́ Zoova klun’n niɔn?
Sɛ Klisifuɛ kun nɔ́n nzan annzɛ ɔ su nɔnman’n, ɔ o i bɔbɔ i sa nun. Kannzɛ bɔbɔ ɔ nɔn nzan’n sanngɛ blɛ wie nun’n, ɔ kwla fa ajalɛ kɛ ɔ su nɔnman.
5. Nán nɔn nzan tratra su
Sɛ a fa ajalɛ kɛ á nɔ́n nzan’n nán ɔ wla fi su kɛ kannzɛ bɔbɔ Zoova tanninman e nzan nɔnlɛ’n, sanngɛ ɔ kunndɛman kɛ e nɔn nzan tratra su. ?Ngue ti-ɔ? An kanngan Oze 4:11, 18 nun, i sin’n an koko kosan yɛ’n i su yalɛ:
?Kɛ sran kun nɔn nzan tratra su’n ngue sa yɛ ɔ kwla ju-ɔ?
?Ngue yɛ é yó naan y’a nɔnman nzan y’a tratraman su-ɔ? Ɔ fata kɛ e yo wun ase kanfuɛ naan e si e jranwlɛ’n. An kanngan Ɲanndra Mun 11:2 nun, i sin’n an koko kosan yɛ’n i su yalɛ:
?Nzan nɔnlɛ nun’n, ngue ti yɛ ɔ ti cinnjin kɛ e si e jranwlɛ-ɔ?
6. Like ng’ɔ kwla uka sran kun naan w’a yaci nzan nɔnlɛ dan’n
Like ng’ɔ ukali bian kun mɔ laa ɔ nɔn nzan dan’n. An bo VIDEO’N, i sin’n an koko kosan yɛ’m be su yalɛ.
?Kɛ Dimitri ko nɔn nzan’n, wafa sɛ yɛ ɔ yo ninnge mun-ɔn?
?Kɛ ɔ ko yo naan w’a jran nzan nɔnlɛ’n ɔ yoli pɔpɔ?
?Ngue yɛ ɔ ukɛli i naan w’a jran nzan nɔnlɛ’n niɔn?
An kanngan 1 Korɛntifuɛ Mun 6:10, 11 nun, i sin’n an koko kosan yɛ’m be su yalɛ:
?Kɛ sran kun nɔn nzan tratra su’n, ngue ti yɛ i sɔ’n ti tɛ dan-ɔn?
?Ngue yɛ ɔ kle kɛ sran ng’ɔ nɔn nzan tratra su’n ɔ kwla kaci-ɔ?
An kanngan Matie 5:30 nun, i sin’n an koko kosan yɛ’n i su yalɛ:
Kɛ Zezi seli kɛ e kpɛ e sa’n, i sɔ’n kle kɛ ɔ fata kɛ e mian e ɲin e fa ajalɛ wie mun naan Zoova i klun jɔ e wun. ?Sɛ a su mian ɔ ɲin kpa naan w’a wla nzan nɔnlɛ’n i ase’n ngue yɛ ɔ kwla uka ɔ?a
An kanngan 1 Korɛntifuɛ Mun 15:33 nun, i sin’n an koko kosan yɛ’n i su yalɛ:
?Ngue ti yɛ sɛ a kunndɛ kɛ á jrán nzan nɔnlɛ’n ɔ fata kɛ a kpa ɔ janvuɛ’m be nun-ɔn?
SRAN KUN KWLA USA KƐ: “?Nzan nɔnlɛ’n ti like tɛ?”
?Wafa sɛ yɛ á tɛ́ i su-ɔ?
NDƐ’N I KPƆLƐ BOLƐ
Zoova yɛ ɔ fali nzan’n mannin klɔ sran mun-ɔn. Ɔ kloman nzan nɔnlɛ dan’n ɔ nin nzan nga be nɔn tratra su’n.
Ndɛ’n i nun flanlɛ
?Ngue ndɛ yɛ Biblu’n kɛn i nzan nɔnlɛ’n su-ɔ?
?Ngue ti yɛ nzan nɔnlɛ dan’n timan kpa-ɔ?
?Sɛ sran kun se kɛ ɔ́ nɔ́n nzan annzɛ ɔ su nɔnman’n, ngue ti yɛ ɔ fataman kɛ e di i jɔlɛ-ɔ?
NDƐ WIE MUN EKUN
?Nzan nɔnlɛ’n nun’n wafa sɛ yɛ gbanflɛn nin talua’m be kwla fa ajalɛ kpa-ɔ?
Nian ninnge nga a kwla yo naan w’a yaci nzan nɔnlɛ’n.
“Maan e yo nzan’n i cɛcɛ” (Sasafuɛ Tranwlɛ’n, afuɛ 2010, Zanvie 1)
?Nzan vɛli nga be fa bo su naan b’a nɔn’n, Klisifuɛ kun kwla yo sɔ wie?
“Fluwa’n nun kannganfuɛ’m be kosan mun” (Sasafuɛ Tranwlɛ’n, afuɛ 2007 nun ndɛ)
Like ng’ɔ ukali bian kun naan w’a yaci nzan nɔnlɛ dan’n.
a Sran wie’m be liɛ’n, ɔ fata kɛ be wun dɔɔtrɔfuɛ’m be wun naan be uka be naan b’a kwla jran nzan nɔnlɛ’n. Dɔɔtrɔfuɛ kpanngban be waan sran nga nzan nɔnlɛ’n kle i yalɛ’n, ɔ flunman kɛ ɔ yaci i nɔnlɛ mlɔnmlɔn.
-
-
?Sɛ a yo sa tɛ dan wie’n ngue yɛ ɔ fata kɛ a yo-ɔ?A kwla di aklunjɔɛ tititi!—Biblu’n nun like suanlɛ
-
-
Kannzɛ bɔbɔ a klo Zoova sɛ naan a mian ɔ ɲin naan w’a yoman like tɛ wie’n, sanngɛ á fɔ́n cɛn kunngun. Sanngɛ fɔnlɛ wie’m be ti tɛ tra wie mun. (1 Korɛntifuɛ Mun 6:9, 10) Sɛ a yo sa tɛ dan wie’n, nán ɔ wla fi su kɛ Zoova w’a yaciman ɔ klolɛ. Ɔ kunndɛ kɛ ɔ́ yáci ɔ wun sa’n cɛ́ wɔ naan ɔ́ úka wɔ.
1. ?Ngue yɛ ɔ fata kɛ e yo naan Zoova w’a yaci e wun sa’n w’a cɛ e-ɔ?
Kɛ sran kun m’ɔ klo Zoova’n ɔ yo sa tɛ dan wie’n, i wla bo i wun dan. Sanngɛ Zoova kannin ndɛ kun m’ɔ kwla fɔnvɔ i sɔfuɛ mun-ɔn. Ɔ seli kɛ: “Sɛ amun sa tɛ’m be ti ɔkwlɛ bioun’n, bé fɛ́n fuai kɛ laglasi m’ɔ fin nglo lɔ gua munkɛnmunkɛn’n sa.” (Ezai 1:18) Sɛ e kaci e sa’n, Zoova yáci sa nga e yoli’n cɛ́ e mlɔnmlɔn. ?Wafa sɛ yɛ e kwla kle kɛ y’a kaci e sa-ɔ? Ɔ fata kɛ sa nga e yoli’n ɔ yo e nsisɔ, kpɛkun e yaci sa sɔ’n i yolɛ, yɛ e srɛ Zoova kɛ ɔ yaci cɛ e. I sin’n, ɔ fata kɛ e mian e ɲin kpa e wla akunndan tɛ ng’ɔ fali e wlali sa tɛ’n nun’n i ase. Kpɛkun e kaci e ayeliɛ’n. Asa’n, ɔ fata kɛ e mian e ɲin e nanti Zoova i mmla’m be su.—Kanngan Ezai 55:6, 7 nun.
2. ?Kɛ e yo sa tɛ’n wafa sɛ yɛ Zoova sin asɔnun kpɛnngbɛn’m be lika uka e-ɔ?
Sɛ e yo sa tɛ dan wie’n Zoova kunndɛ kɛ e “flɛ asɔnun kpɛnngbɛn mun.” (Kanngan Zaki 5:14, 15 nun.) Aniaan sɔ’m be klo Zoova, yɛ be klo i sufuɛ mun. Be kwla uka e naan e nin Zoova e afiɛn w’a mantan kpa ekun.—Galasifuɛ Mun 6:1.
?Sɛ e yo sa tɛ dan wie’n wafa sɛ yɛ asɔnun kpɛnngbɛn’m bé úka e-ɔ? Asɔnun kpɛnngbɛn nɲɔn annzɛ nsan bé fá Biblu’n bé mán e afɔtuɛ. Asa’n, bé klé e ninnge trele wie mɔ be kwla uka e naan y’a yoman sa sɔ’n kun’n. Sɛ aniaan kun yo sa tɛ wie naan ɔ kacimɛn i sa’n, asɔnun kpɛnngbɛn’m bé tú i asɔnun’n nun naan i ayeliɛ tɛ’n w’a saman asɔnun’n nunfuɛ mun.
SI NDƐ’N NUN KPA EKUN
É wá kán wafa nga Zoova uka sran wie m’ɔ yo sa tɛ dan wie’n i ndɛ. I sɔ’n yó maan á sí ukalɛ mɔ Zoova uka e’n i su ye.
3. Sɛ e di sa tɛ nga e yoli’n i nanwlɛ’n é ɲán su ye
Kɛ e yo sa tɛ’n i sɔ’n yo Zoova i ya. Ɔ maan ɔ fata kɛ e di sa tɛ nga e yoli’n i nanwlɛ e kle i. An kanngan Jue Mun 32:1-5 nun, i sin’n an koko kosan yɛ’n i su yalɛ:
?Ngue ti yɛ ɔ ti cinnjin kɛ e di e sa tɛ nga e yoli’n i nanwlɛ e kle Zoova-ɔ?
Kɛ e ko di sa tɛ nga e yoli’n i nanwlɛ e ko kle Zoova’n, like kun ekun ng’ɔ fata kɛ e yo’n yɛle kɛ e bo su e kle asɔnun kpɛnngbɛn mun. Sɛ e yo sɔ’n e wun fá e feke. An bo VIDEO’N, i sin’n an koko kosan yɛ’n i su yalɛ.
?Video’n nun’n, wafa sɛ yɛ asɔnun kpɛnngbɛn’m be ukali Kanɔn naan w’a sɛ i sin Zoova wun-ɔn?
Ɔ fata kɛ e kan e klun ndɛ kwlaa e kle asɔnun kpɛnngbɛn mun, yɛ e di sa nga e yoli’n i nanwlɛ. Afin e ukalɛ ti yɛ be o lɛ-ɔ. An kanngan Zaki 5:16 nun, i sin’n an koko kosan yɛ’n i su yalɛ:
?Ngue ti yɛ sɛ e di e sa tɛ’m be nanwlɛ e kle asɔnun kpɛnngbɛn mun’n, e ukalɛ’n yó pɔpɔ-ɔ?
Di sa tɛ nga a yoli’n i nanwlɛ, kan ɔ klun ndɛ kwlaa kle asɔnun kpɛnngbɛn mun, yɛ kplin su kɛ Zoova uka wɔ.
4. Zoova si sa tɛ yofuɛ’m be aunnvɔɛ
Sɛ sran kun yoli sa tɛ dan kun naan ɔ kunndɛman kɛ ɔ́ nánti Zoova i mmla’m be su’n, be tu i asɔnun’n nun, kpɛkun e nin i e sanman nun kun. An kanngan 1 Korɛntifuɛ Mun 5:6, 11 nun, i sin’n an koko kosan yɛ’n i su yalɛ:
?Kɛ nga levii’n fa wla sanmlɛn nga be fa yo kpanwun sa’n, sɛ e nin be nga be yo sa tɛ mɔ be kunndɛman kɛ bé káci be sa’n e san nun’n, wafa sɛ yɛ i bo’n gúa-ɔ?
Asɔnun kpɛnngbɛn’m be mian be ɲin be si sran aunnvɔɛ kɛ Zoova sa. I sɔ’n ti’n, be kpɛ be nga be tuli be asɔnun’n nun’n be sin atin, kpɛkun be uka be. Be nun kpanngban be sali be sin be wa suli Zoova ekun. Fɔ nga be tuli be’n ɔ yoli be ya sɔ, sanngɛ i sɔ’n ukali be naan b’a wun i wlɛ kɛ like nga be yoli’n ti tɛ sakpa.—Jue Mun 141:5.
?Wafa sɛ yɛ Zoova kle kɛ i like yolɛ yoman ya naan ɔ si be nga be yoli sa tɛ’n be aunnvɔɛ naan ɔ klo be-ɔ?
5. Kɛ e kaci e sa’n Zoova yaci sa nga e yoli’n cɛ e
Kɛ sa tɛ yofuɛ kun kaci i sa’n wafa nga Zoova i wun yo i’n, Zezi fali sunnzun ase kun yiyili nun. An kanngan Liki 15:1-7 nun, i sin’n an koko kosan yɛ’n i su yalɛ:
?Ngue yɛ ndɛ sɔ’n kle wɔ Zoova su-ɔ?
An kanngan Ezekiɛli 33:11 nun, i sin’n an koko kosan yɛ’n i su yalɛ:
?Ngue yɛ ɔ fata kɛ e yo naan y’a kle kɛ sa nga e yoli’n ɔ yo e nsisɔ sakpa-ɔ?
Wafa kunngba nga bua sunianfuɛ kun i bua’m be ndɛ lo i’n, Zoova kusu i sufuɛ’m be ndɛ lo i wie.
SRAN WIE’M BE WAAN: “Sɛ n kan sa tɛ nga n yoli’n i ndɛ n kle asɔnun kpɛnngbɛn mun’n, bé tú min asɔnun’n nun.”
?Sɛ sran kun se sɔ’n, wafa sɛ yɛ á tɛ́ i su-ɔ?
NDƐ’N I KPƆLƐ BOLƐ
Sɛ e yoli sa tɛ dan wie naan ɔ yo e nsisɔ sakpa’n naan e fa ajalɛ kɛ e su yoman sɔ kun’n, Zoova yáci e wun sa’n cɛ́ e.
Ndɛ’n i nun flanlɛ
?Sɛ e di sa tɛ nga e yoli’n i nanwlɛ e kle Zoova’n, ngue ti yɛ i sɔ’n ti kpa-ɔ?
?Sɛ e kunndɛ kɛ Zoova yaci e wun sa’n cɛ e’n, ngue yɛ ɔ fata kɛ e yo-ɔ?
?Sɛ e yoli sa tɛ dan wie’n, ngue ti yɛ ɔ fata kɛ e bo su e kle asɔnun kpɛnngbɛn mun-ɔn?
NDƐ WIE MUN EKUN
Wafa nga bian kun wunnin i wlɛ kɛ Zoova i aunnvɔɛ silɛ’n i su ndɛ nga be kɛnnin i Ezai 1:18 nun’n ti nanwlɛ’n.
?Ngue yɛ asɔnun kpɛnngbɛn’m be yo fa uka be nga be yo sa tɛ dan’n niɔn?
Wafa nga be kle be nga be yoli sa tɛ dan mɔ be kloman kɛ bé káci be akunndan’n kɛ be klo be naan be si be aunnvɔɛ’n.
Bian kun m’ɔ jasoli nanwlɛ atin’n su’n, ɔ wunnin i wlɛ kɛ Zoova fɛli i sɛli i sin.
-