Klist m’ɔ ti famiɛn’n, maan e su i titi

‘Be fali kwlalɛ’n be mɛnnin, be mɛnmɛnnin i, yɛ be fali famiɛn diwlɛ’n be wlɛli i sa nun. Nvlenvle’n kwlaa nin mɛnmɛn’n kwlaa be nunfuɛ mɔ be kan aniɛn wafawafa’n kwlaa’n, be suli i.’—DANIƐL 7:14.

1, 2. ?Ngue ti yɛ e wun i wlɛ kɛ afuɛ 33 nun Klistfuɛ klikli’m be blɛ su’n, nn Klist nin a sieman sran ngba ɔ?

?FAMIƐN mennin yɛ i sran’m be ti’n, ɔ wuli m’ɔ sɛ i sin yoli famiɛn ekun ɔn? ?Famiɛn mennin yɛ ɔ trannin asiɛ’n su wa, m’ɔ kwla yoli maan i sran’m be lafili i su titi, mɔ i sin’n, ɔ sɛli i sin ɲanmiɛn su lɔ ko yoli famiɛn, kpɔkun ɔ sie sran mun asiɛ’n su wa ekun ɔn? Sran ng’ɔ kwla yoli sɔ’n, m’ɔ kwla yoli ninnge wie mun ekun’n, ɔ ti kunngba cɛ. Sran sɔ’n yɛle Zezi Klist. (Lik 1:32, 33) Kɛ Klist wuli mɔ Ɲanmiɛn cɛnnin i’n, ɔ sɛli i sin ɲanmiɛn su lɔ. Kpɔkun afuɛ 33 nun Klistfuɛ klikli’m be blɛ su Pantekɔtu nun’n, Ɲanmiɛn maan ɔ ‘sie like’n kwlaa yɛ ɔ fɛ i sieli asɔnun’n su kpɛn.’ (Efɛzfuɛ Mun 1:20-22; Sa Nga Be Yoli’n 2:32-36) Kɛ ɔ fin i lɛ’n, yɛ Klist boli i sielɛ’n bo ɔ. Sanngɛ Klistfuɛ nga be kpali be sieli be ngunmin mɔ be ti ‘Izraɛlifuɛ nga be ti Ɲanmiɛn liɛ sakpa’n,’ be ngunmin cɛ yɛ ɔ sie be ɔ.—Galasifuɛ Mun 6:16; Kolɔsfuɛ Mun 1:13.

² Afuɛ 33 nun Klistfuɛ klikli’m be blɛ su’n, kɛ be wieli Pantekɔtu’n di’n, i afuɛ 30 m’ɔ́ jú nun’n, akoto Pɔlu kleli kɛ Klist sieman sran ngba, naan sanngɛ ɔ ko ‘trannin Ɲanmiɛn i fama su, ɔ su minndɛ kɛ Ɲanmiɛn maan ɔ tiɛ i kpɔfuɛ’m be su.’ (Ebre Mun 10:12, 13) Sanngɛ kɛ Klistfuɛ klikli’m be blɛ’n kɔ́ i bue nuan’n, akoto Zan wunnin Zoova m’ɔ sie nglo nin asiɛ’n, aolia nun. Ɔ́ nían ɔn, famiɛn diwlɛ mɔ Zoova tɛkɛli i uflɛuflɛ ɲanmiɛn su lɔ’n, Zoova su sie Klist Zezi kɛ ɔ yo i su famiɛn. (Sa Nglo Yilɛ 11:15; 12:1-5) Blɛ nga e o nun yɛ nun’n, e kwla wun i wlɛ weiin kpa kɛ Klist boli i famiɛn dilɛ’n bo ɲanmiɛn su lɔ afuɛ 1914 nun.a

 3. (a) ?Kɛ ɔ fɛ i afuɛ 1914 nun’n, sa uflɛ mennin yɛ ɔ wa ukali jasin fɛ’n nga e bo’n su ɔ? (b) ?Kosan mennin mun yɛ e kwla fa usa e wun ɔn?

³ Kɛ ɔ fɛ i afuɛ 1914 nun’n, sa fɛfɛ kun wa ukali jasin fɛ’n nga e bo’n su. Sa sɔ’n yɛle kɛ, Klist ti famiɛn ɲanmiɛn su lɔ. Yɛ kannzɛ ɔ sie “i kpɔfuɛ mun” be afiɛn’n, sanngɛ ɔ nian junman nga i sufuɛ’m be di i asiɛ’n su wa’n su. (Jue Mun 110:1, 2; Matie 24:14; Sa Nglo Yilɛ 12:7-12) I sufuɛ sɔ’m be kle kɛ be ɲin yi i. Afin be tu be klun be kle sran’m be Biblu’n nun like. I sɔ junman liɛ’n, be nin a dimɛn i sɔ asiɛ’n su wa le. (Daniɛl 7:13, 14; Matie 28:18) Junman sɔ’n i dilɛ’n nun’n, Klistfuɛ nga Ɲanmiɛn kpali be sieli be ngunmin mɔ be ti ‘Ɲanmiɛn mma mun’n,’ be ti ‘Klist i ja nun jranfuɛ.’ Kpɔkun be kusu’n, be sunman be janvuɛ kpanngban kpa mɔ be ti Klist i ‘bua’m be wie mun’n.’ (Matie 13:38; 2 Korɛntfuɛ Mun 5:20; Zan 10:16) Kannzɛ ninnge’m be ti siesiewa kɛ ngalɛ sa’n, sanngɛ ɔ fata kɛ e tinuntinun e nian sɛ e kplin su kɛ Klist sie e o. I lɛ nun’n, e kwla fa kosan yɛ mun e usa e wun. ?N kle kɛ n jrɛn i sin kpa titi? ?Sran mɔ ɲanmiɛn su lɔ yɛ ɔ ti famiɛn’n niɔn, wafa sɛ yɛ n kwla kle kɛ min ɲin yi i titi ɔ? Sa nga ti yɛ ɔ fata kɛ e ɲin yi Klist titi’n, amun e dun mmua e yiyi nun.

Famiɛn kun mɔ i nzuɛn’n ti’n, i sran’m be kpɔcimɛn i’n

 4. ?I nun mɔ Zezi o asiɛ’n su wa m’ɔ nin a yoman Famiɛn’n, ngue yɛ ɔ yoli ɔ?

⁴ Like nga Klist yoli be’n, ɔ nin i nzuɛn klanman’n, i ti yɛ e ɲin yi i mɔ e kpɔcimɛn i’n niɔn. (1 Piɛr 1:8) I nun mɔ Zezi o asiɛ’n su wa’n, ninnge nga kɛ ɔ́ wá yó Famiɛn asiɛ wunmuan su’n ɔ́ yó be’n, ɔ yoli i kan. Ɔ mannin sran mɔ awe kun be’n be aliɛ. Ɔ yoli tukpacifuɛ mun, nin cɛcɛwafuɛ mun, nin bubuwafuɛ mun, nin aɲansifuɛ mun, nin bobofuɛ’m be juejue. Sran nga be wuli bɔbɔ’n, ɔ cɛnnin wie mun. (Matie 15:30, 31; Lik 7:11-16; Zan 6:5-13) Ninnge kwlaa sɔ m’ɔ yoli be’n, be uka e maan e wun nzuɛn ng’ɔ́ wá fá síe asiɛ wunmuan’n. Nzuɛn sɔ’n i dan kpafuɛ’n, yɛle sran m’ɔ klo be lele mɔ maan ɔ fɛ i wun mannin’n. (Mark 1:40-45) I sɔ’n kwlaa ngalɛ’n ti’n, Napoléon Bonaparte m’ɔ sieli mɛn’n e blɛ liɛ’n nun’n, ɔ seli kɛ: “Alɛzandri, nin Sezar, nin Sarlemaɲi, yɛ n bɔbɔ e takali famiɛn diwlɛ mun. ?Sanngɛ sa dandan nga e yoli be’n, ngue su yɛ e jrannin e yoli be ɔ? E yoli be wue kekle su. Sran kunngba cɛ nga i famiɛn dilɛ takali sran klolɛ su’n, yɛle Zezi Klist. Ɔ maan kɛ é sé yɛ’n i dunman nun ti’n, sran kpanngban be kwla fa be wun man.”

 5. ?Zezi i nzuɛn’n ti sɛ ti yɛ sran’m be suli i su ɔ?

⁵ Zezi ti sran wɛtɛɛ yɛ i awlɛn’n ti flɔlɔ. I nzuɛn sɔ’n, ɔ nin like ng’ɔ kle’n, ɔ fɔnvɔli be nga be sua trɔ mɔ be wla w’a bo be wun’n. (Matie 11:28-30) Ba kanngan’m be kloli i wun tranlɛ. Yɛ sran nga be ti aenvuɛfuɛ mɔ be wun sa sin’n, be kacili i sɔnnzɔnfuɛ. (Matie 4:18-22; Mark 10:13-16) Asa ekun’n, Zezi i ɲin m’ɔ yi sran’n ti’n, bla kpanngban kpa mɔ be sro Ɲanmiɛn’n be suli i su. Kpɔkun, kɛ ɔ́ dí Ɲanmiɛn junman’n, bla sɔ’m be fali be bɔbɔ be sa nun like be fa niɛnnin i lika.—Lik 8:1-3.

 6. ?Kɛ Lazali wuli’n, wafa sɛ yɛ Zezi yili i sran klolɛ dan’n i nglo ɔ?

⁶ Kɛ Lazali m’ɔ ti Zezi i janvuɛ kpa’n wuli’n, Zezi yili i sran klolɛ dan’n i nglo wafa kun ekun. Blɛ sɔ nun mɔ Lazali i niaan bla Mali nin Marti bé sún’n, Zezi w’a kwlá trɛmɛn i awlɛn. Ɔ “sunnin” wie. Yɛ kannzɛ bɔbɔ Zezi si kɛ ɔ́ wá cɛ́n Lazali’n, sanngɛ i wie’n yoli i ya dan. Ɔ maan, i ‘awlɛn’n kpɛli i klun.’ Kpɔkun i sran klolɛ nin i aunnvuɛ silɛ’n ti’n, ɔ fali tinmin mɔ Ɲanmiɛn fa mɛnnin i’n cɛnnin Lazali.—Zan 11:11-15, 33-35, 38-44.

 7. ?Kɛ e kpɔciman Zezi’n, ngue ti yɛ i sɔ’n ti su ɔ? (An nian kuku m’ɔ o fluwa’n i bue 31 nun wie.)

⁷ Kɛ e wun kɛ Zezi klo sa ng’ɔ ti kpa’n naan ɔ kloman gblɛ nin sa tɛ yolɛ’n mlɔnmlɔn’n, e ɲin yi i dan. Be kwlaa nga be yo like atɛ Ɲanmiɛn i sua’n nun lɔ’n, ɔ fuannin be lele kpɛ nɲɔn. (Matie 21:12, 13; Zan 2:14-17) Asa ekun’n, i nun m’ɔ o asiɛ’n su wa’n, ɔ wunnin ɲrɛnnɛn wafawafa kwlakwla nga e wun be’n, be wie. (Ebre Mun 5:7-9) Kpɔkun kɛ be se kɛ be kpɔ sran naan be bu i lufle’n, ɔ wunnin i sɔ’n wie ekun. (Zan 5:15-18; 11:53, 54; 18:38–19:16) I agualiɛ su’n, kɛ ɔ ko yo naan w’a yo i Si’n i klun sa’n naan sran’m b’a ɲan anannganman nguan’n ti’n, ɔ fɛ i wun mannin maan be kunnin i. (Zan 3:16) ?Klist i nzuɛn kwlaa sɔ’m be suman e bo kɛ e su i titi? (Ebre Mun 13:8; Sa Nglo Yilɛ 5:6-10) ?Sanngɛ ngue yɛ ɔ fata kɛ e yo naan Klist w’a sie e ɔ?

Like ng’ɔ fata kɛ e yo naan Klist w’a sie e’n

 8. ?Ngue yɛ ɔ fata kɛ Klist i sran’m be yo ɔ?

⁸ Amun e fa sunnzun ase kun. Titi’n, sran nga i waan ɔ́ káci nvle uflɛ kun nunfuɛ’n, ɔ yia ninnge wie’m be nuan. I wie yɛle kɛ, ɔ fata kɛ ɔ yo sran kpa naan ɔ yo juejue. I sɔ kunngba’n, ɔ fata kɛ Klist i sran’m be ɲan nzuɛn kpa titi naan Ɲanmiɛn sulɛ nun’n, be yo juejue kpa wie.—1 Korɛntfuɛ Mun 6:9-11; Galasifuɛ Mun 5:19-23.

 9. ?Wafa sɛ yɛ e kwla kle kɛ e kpɔciman Klist ɔ?

⁹ Like kun ekun ng’ɔ fata kɛ Zezi Klist i sran’m be yo’n, yɛle kɛ nán be kpɔci i, yɛ maan be jrɛn i Famiɛn diwlɛ’n i sin titi. Wafa nga be kle kɛ be yo sɔ’n, yɛle kɛ like nga i nun mɔ Zezi o asiɛ’n su wa’n ɔ kleli be’n, be nanti su. I wie yɛle kɛ, be fa Ɲanmiɛn Sielɛ Blɛ junman’n, ɔ nin Ɲanmiɛn klun sa yolɛ’n sie i aɲanbeun ninnge’m be kunndɛlɛ’n i ɲrun. (Matie 6:31-34) Asa ekun, sɛ ɲrɛnnɛn o be su, annzɛ ɲrɛnnɛn nunman be su o, cɛn kwlaa be mian be ɲin be nian Klist i nzuɛn’n su. (1 Piɛr 2:21-23) Like kun ekun nga Klist i sran’m be yo m’ɔ kle kɛ be nian Klist i ajalɛ’n su’n, yɛle kɛ be klunklo su be yo be wiengu’m be ye.—Matie 7:12; Zan 13:3-17.

10. (a) ?Wafa sɛ yɛ awlo lɔ’n, e kle kɛ e kpɔciman Klist ɔ? (b) ?Yɛ wafa sɛ yɛ e kwla kle i sɔ wie asɔnun’n nun ɔn?

¹⁰ Wafa nga Klist i sran’m be niɛn i nzuɛn’n su be awlo’m be nun’n, ɔ kle ekun kɛ be kpɔciman Zezi. I wie yɛle kɛ, siɛ’m be nian Klist i nzuɛn su be nin be yi nin be mma’m be tran kpa. (Efɛzfuɛ Mun 5:25, 28-30; 6:4; 1 Piɛr 3:7) Bla’m be fa be nzuɛn kpa nin be ‘awlɛn wɛtɛɛ, ɔ nin diin’ mɔ be ti’n, be kle kɛ be kpɔciman Klist. (1 Piɛr 3:1-4; Efɛzfuɛ Mun 5:22-24) Ba kanngan’m be kusu be nian Zezi i aɲinyiɛ su. Kɛ be yo sɔ’n, be kle kɛ be kpɔcimɛn i. Afin Zezi i bakan nun’n, i ɲin yili i si nin i nin. Sanngɛ nn fɔ o be nun. (Lik 2:51, 52; Efɛzfuɛ Mun 6:1) Nanwlɛ, Klist i sran’m be mian be ɲin be yo kɛ i sa. Yɛle kɛ, be ‘klo be wiengu kɛ be niaan sa, be si i aunnvuɛ.’ Asa ekun’n, be ‘yo be wun aenvuɛ. Sɛ sran yo be tɛ’n, be yomɛn i wie, sɛ be kpɛ be nzowa’n, be yi manman be.’—1 Piɛr 3:8, 9; 1 Korɛntfuɛ Mun 11:1.

Klist i sran’m be fɛ i mmla’n su

11. ?Mmla mennin mun yɛ Klist i sran’m be nanti be su ɔ?

¹¹ Kɛ sran kun ko yo nvle uflɛ kun nunfuɛ’n, ɔ fata kɛ ɔ nanti nvle sɔ’n i nun mmla’m be su. Klist i sran’m be kusu be nanti “Klist mmla’n su.” Yɛle kɛ like kwlaa nga Zezi kleli be’n, ɔ nin ng’ɔ seli kɛ be yo’n, be nanti be su. (Galasifuɛ Mun 6:2) I li ‘mmla nga wie nunmɛn i sin’n’ mɔ yɛle sran klolɛ’n, yɛ be nanti su kpa’n niɔn. Kɛ be yo sɔ’n, be kle kɛ be kpɔciman Zezi. ?Sanngɛ wafa sɛ yɛ Klistfuɛ’m be nanti mmla sɔ’m be su ɔ?

12, 13. ?Wafa sɛ yɛ e kle kɛ e nanti ‘Klist mmla’n su’ titi ɔ?

¹² Fɔ o Klist i sran’m be nun wie, ɔ maan be yo sa tɛ. (Rɔmfuɛ Mun 3:23) I sɔ’n ti’n, kɛ ɔ ko yo naan b’a ‘kloman be niaan Klistfuɛ’m be nuan bui su’n,’ ɔ fata kɛ be mian be ɲin be ‘klo be wun kpa.’ (1 Piɛr 1:22) Klist i sufuɛ kpa’m be nanti Klist i mmla’n su sɛsɛsɛ. Yɛle kɛ, ‘sa nga be wiengu yo mɔ be wun i’n, ɔ sɔn be nun, sɛ sran kun yo i wiengu sa’n, ɔ yaci cɛ i.’ I sɔ mmla mɔ be nanti su’n, ɔ uka be maan be faman be ɲin sieman be niaan’m be fɔnlɛ’m be su. Sanngɛ sa kpa nga be wiengu’n yo mɔ maan be kwla klo i’n, i su yɛ be fa be ɲin sie ɔ. Nanwlɛ, sran mɔ be fa be wiengu klolɛ’n cici be ti’n ‘mɔ maan sa kwlaa be kwla yo ye’n,’ kɛ e nin i sɔfuɛ mun yɛ e nanti’n, ɔ yo e fɛ dan.—Kolɔsfuɛ Mun 3:13, 14.

¹³ Zezi kleli kɛ wafa ng’ɔ fa kloli e’n, ɔ ti dan tra wafa nga sran’m be fa klo be wiengu titi. (Zan 13:34, 35) ?Afin sɛ e klo e klofuɛ’m be ngunmin’n, ‘ngue like yɛ é ɲɛ́n i ɔ?’ Sɛ e yo sɔ’n, nn e sran klolɛ’n nin i fataman. I sɔ’n ti’n, Zezi wlali e fanngan kɛ e niɛn i Si’n i sran klolɛ’n su. Yɛle kɛ, e kpɔfuɛ mun nin be nga be yo e tɛtɛ bɔbɔ’n, maan e klo be. (Matie 5:46-48) Sran’m be kwlaa be klolɛ sɔ’n ti’n, Klist i sran’m be yaciman junman kun dilɛ. ?Junman mennin yɛle sɔ’n?

Be sa Klist i sran mun nian

14. ?Ngue ti yɛ jasin fɛ’n bolɛ’n ti junman cinnjin ɔn?

¹⁴ Junman cinnjin kpa nga Klist i sran’m be di i dɔ nga su’n, yɛle kɛ be ‘kan Ɲanmiɛn Sielɛ’n ndɛ kle’ sran mun. (Sa Nga Be Yoli’n 28:23) Junman sɔ’n i cinnjin m’ɔ ti’n yɛle kɛ Ɲanmiɛn Sielɛ Blɛ mɔ Mɛsi yɛ ɔ ti Famiɛn’n, ɔ́ wá yó maan sran’m be kwlaa bé sí kɛ nglo lɔ nin asiɛ’n su wa’n, Zoova sie like’n kwlakwlakwla. (1 Korɛntfuɛ Mun 15:24-28) Be nga be tie jasin fɛ’n mɔ e bo’n, be kwla kplin su kɛ Ɲanmiɛn sie be. Asa ekun’n, wafa nga sran’m be sɔ jasin fɛ’n mɔ e bo’n nun’n, i su yɛ Klist m’ɔ ti Famiɛn’n ɔ́ nían dí be jɔlɛ ɔ. (Matie 24:14; 2 Tɛsalonikfuɛ Mun 1:6-10) Ɔ maan like klikli kpafuɛ’n ng’ɔ fata kɛ e yo naan y’a kle kɛ e kpɔciman Klist’n, yɛle kɛ e kan Ɲanmiɛn Sielɛ Blɛ’n i ndɛ kle e wiengu mun. Afin i sɔ yɛ ɔ seli kɛ e yo ɔ.—Matie 28:18-20.

15. ?Ngue ti yɛ be sa Klistfuɛ’m be seiin nantilɛ’n nian ɔn?

¹⁵ Kɛ é bó jasin fɛ’n, Satan yo like kwlaa ng’ɔ kwla yo naan w’a tanndan e ɲrun’n. Kpɔkun asiɛ’n su famiɛn’m be kunndɛman kɛ Klist mɔ Ɲanmiɛn sieli i Famiɛn’n, ɔ sie be. (Jue Mun 2:1-3, 6-8) Zezi seli i sɔnnzɔnfuɛ mun kɛ: ‘Sran m’ɔ su sran’n timan kpa trɛmɛn i min’n. Sɛ be kleli n yalɛ’n, bé klé amun yalɛ wie.’ (Zan 15:20) Ndɛ sɔ mɔ Zezi kannin’n ti’n, i sɔnnzɔnfuɛ’m be wun i wlɛ kɛ sa fanunfanun nga be tɔ be su m’ɔ ti kɛ alɛ yɛ be kun sa’n, ɔ sa be seiin nantilɛ’n nian.—2 Korɛntfuɛ Mun 10:3-5; Efɛzfuɛ Mun 6:10-12.

16. ?Be nga Ɲanmiɛn Sielɛ Blɛ’n sie be’n, wafa sɛ yɛ be fa ‘like ng’ɔ ti Ɲanmiɛn liɛ’n be mɛn i’ ɔ?

¹⁶ Kannzɛ Ɲanmiɛn Sielɛ Blɛ’n sie Klistfuɛ mun’n, sanngɛ be bu be nga be sie mɛn’n be sran. (Tit 3:1, 2) Zezi seli kɛ: ‘An fa ng’ɔ ti Sezar liɛ’n mɛn i, yɛ ng’ɔ ti Ɲanmiɛn liɛ’n, an fa mɛn i.’ (Mark 12:13-17) I sɔ mɔ Zezi kannin’n ti’n, sɛ awa i mmla’n ɔ tanndanman Ɲanmiɛn liɛ’n i ɲrun’n, Klistfuɛ’m be nanti su. (Rɔmfuɛ Mun 13:1-7) Sanngɛ Klistfuɛ klikli’m be blɛ su’n, Zuifu’m be jɔlɛ difuɛ’m be kunndɛli kɛ bé tánndan Ɲanmiɛn i mmla’n i ɲrun. Be seli Zezi i sɔnnzɔnfuɛ mun kɛ be yaci jasin fɛ’n i bolɛ. I lɛ nun’n, Zezi i sɔnnzɔnfuɛ’m be tɛli be su yakpa su nin aɲinyiɛ su kɛ: ‘Sɛ e ɲin yi Ɲanmiɛn tra sran mun’n, ɔ ti kpa tra kɛ e ɲin yi sran’n.’—Sa Nga Be Yoli’n 1:8; 5:27-32.

17. ?Kɛ sa’m be tɔ e su’n, ngue ti yɛ e kwla jran be ɲrun kekle ɔ?

¹⁷ Kɛ be yo Klist i sran’m be tɛtɛ’n, ɔ fata kɛ be jran kekle naan b’a kwla su Klist m’ɔ ti be Famiɛn’n i su titi. Sanngɛ Zezi seli kɛ: ‘Kɛ bé kpɛ́ amun nzowa, mɔ bé klé amun yalɛ, mɔ bé tɔ́n amun suɛn tɛtɛ’n kwlaa n dunman nun’n, amun liɛ su ti ye, yɛle kɛ amun mo’n ɔ́ wá yó dan ɲanmiɛn su lɔ.’ (Matie 5:11, 12) Klist i sɔnnzɔnfuɛ klikli’m be wunnin ndɛ sɔ mɔ Zezi kannin’n, i nanwlɛ m’ɔ ti’n. Kɛ b’a yaciman jasin fɛ’n i bolɛ mɔ i sɔ’n ti’n be boli be nin ɲantiaan’n, kɛ bé kɔ́’n be ‘klun ti jɔwa yɛle kɛ be si kɛ be ɲin mɔ be guɛli i ase Zezi dunman nun’n ɔ ti kpa, afin Ɲanmiɛn yɛ ɔ sieli i sɔ ɔ. Cɛn kwlaa be yaciman Zezi Klist jasin fɛ’n i bolɛ nin i klelɛ Ɲanmiɛn i sua’n nun nin awlo’m be nun.’ (Sa Nga Be Yoli’n 5:41, 42) Amun kusu’n, kɛ amun wun ɲrɛnnɛn’n, annzɛ kɛ amun tɔ tukpaciɛ’n, annzɛ kɛ amun awlɛn su sran saci’n, annzɛ kɛ be kle amun yalɛ mɔ amun nian Klistfuɛ klikli’m be kekle jranlɛ’n su’n ti’n, e yo amun mo.—Rɔmfuɛ Mun 5:3-5; Ebre Mun 13:6.

18. ?Ngue yɛ ndɛ nga Zezi kan kleli Pɔnsu Pilati’n, ɔ kle ɔ?

¹⁸ I nun mɔ Zezi o asiɛ’n su wa’n m’ɔ nin a yoman Famiɛn’n, ɔ seli Pɔnsi Pilati m’ɔ ti Rɔmu siefuɛ’n kɛ: ‘Nán mɛn nga nunfuɛ mun yɛ be sieli min famiɛn ɔn. Sɛ be yɛ be sieli min’n, nn bé jrán n sin kún min ti alɛ, yɛ kusu nn be su faman min manman Zuifu mun. Sanngɛ ɔ timan sɔ, nán mɛn nga nunfuɛ mun yɛ be sieli min ɔn.’ (Zan 18:36) I sɔ mɔ Zezi kannin’n ti’n, sran nga Ɲanmiɛn Sielɛ Blɛ’n sie be’n be nin be wiengu be kunman alɛ. Kpɔkun kɛ sran’m bé kún alɛ’n, be jranman sran fi sin. Kɛ mɔ be kpɔciman Zezi m’ɔ ti ‘Aunjuɛ wlengbi’n’ ti’n, be faman be wun wlaman mɛn’n nun sa’m be nun.—Ezai 2:2-4; 9:5, 6.

Klist i sran kpa’m bé ɲán suyralɛ dan

19. ?Ngue ti yɛ Klist i sran’m be lafi su kɛ be ɲrun sa yó ye mán be ɔ?

¹⁹ Klist m’ɔ ti ‘famiɛn’m be Famiɛn’n,’ i sran kpa’m be lafi su kɛ be ɲrun sa yó ye mán be. Ɔ maan be kunndɛ kɛ be famiɛn’n, ɔ yi i tinmin’n i nglo asiɛ’n su wa ndɛndɛ. (Sa Nglo Yilɛ 19:11–20:3; Matie 24:30) Klistfuɛ nga be kpali be sieli be ngunmin mɔ be ti ‘Ɲanmiɛn mma mun’n,’ mɔ be nin Klist bé wá dí famiɛn ɲanmiɛn su lɔ’n, be ɲin o be famiɛn dilɛ sɔ’n i sin kpa. (Matie 13:38; Lik 12:32) Be nga kusu mɔ be ti Klist i ‘bua’m be wie mun’n,’ be kunndɛ kɛ be Famiɛn’n bla ndɛndɛ naan ɔ wa yra be su. Afin ɔ seli kɛ: “Amun mɔ n Si yoli amun ye’n, an bla be wa di famiɛn [‘an bla be wa di famiɛn’n su,’ NW] [asiɛ’n m’ɔ́ wá káci mɛn klanman’n] mɔ kɛ bé bó mɛn’n i bo’n be sie mannin amun’n,” i su. (Zan 10:16; Matie 25:34) Suyralɛ kwlaa sɔ’n ti’n, e kwlaa mɔ e kunndɛ kɛ Ɲanmiɛn Sielɛ Blɛ’n sie e’n, maan e ta nda kɛ é sú Klist m’ɔ ti Famiɛn’n i titi.

[Ja ngua lɛ ndɛ’n]

?Amun kwla yiyi nun?

• ?Kɛ e kpɔciman Zezi’n, ngue ti yɛ i sɔ’n ti su ɔ?

• ?Wafa sɛ yɛ Klist i sran’m be kle kɛ be kpɔcimɛn i ɔ?

• ?Ngue ti yɛ e kunndɛ kɛ é sú Klist m’ɔ ti Famiɛn’n i titi ɔ?

[Kuku, bue 31]

KLIST I NZUƐN KPA WIE MUN EKUN

Ɔ kpaman sran nun.—Zan 4:7-30.

Ɔ si aunnvuɛ.—Matie 9:35-38; 12:18-21; Mark 6:30-34; Ebre Mun 4:15, 16.

Ɔ klo sran lele ɔ fɛ i wun man.—Zan 13:1; 15:12-15.

Ɔ nanti seiin.—Matie 4:1-11; 28:20; Mark 11:15-18.

Ɔ yo sa ng’ɔ ti i nuan su’n.—Matie 15:21-28.

[Foto, bue 29]

Kɛ e klo e wiengu mun’n, e kle kɛ e nanti ‘Klist mmla’n su.’

[Foto mun, bue 31]

?Klist i nzuɛn’n su amun bo kɛ amun su i titi?