22 An bilang kan gabos na pinili na magin bantay sa mga entrada 212. Nag-istar sinda sa saindang mga baryo sigun sa saindang rekord nin mga ginikanan.+ Si David asin si Samuel na tagasabot*+ iyo an nagnombra kaidto sa saindang mga apuon sa posisyon na ini bilang mga pinagtitiwalaan. 23 Sinda asin an saindang mga aki an inasignaran na maglingkod bilang bantay sa mga trangkahan kan harong ni Jehova,+ an harong kan tolda. 24 An mga bantay sa trangkahan nakapuwesto sa apat na gilid—sa sirangan, sulnupan, norte, asin timog.+ 25 Sa pana-panahon, su mga tugang nindang nasa saindang mga baryo dinudumanan sinda tanganing maglingkod kaiba ninda sa laog nin pitong aldaw. 26 Igwa nin apat na namamayo sa* mga bantay sa trangkahan na ninombrahan sa posisyon bilang mga pinagtitiwalaan. Mga Levita sinda asin sa sainda ipinamahala an mga kuwarto* saka an mga sarayan nin kayamanan sa harong kan tunay na Diyos.+ 27 Nagdadanay sinda nin bilog na banggi sa saindang mga puwesto sa palibot kan harong kan tunay na Diyos, huling sinda an inasignaran na magbantay asin sinda an nagkakapot kan liyabe saka an nagbubukas kan harong kada aga.