An prinsipyo na nasa Santiago 1:19 aplikado nanggad sa mga nagtatao nin konseho. Nagsurat si Santiago: “An lambang saro dapat na andam tulos na magdangog, dai tulos nagtataram, dai tulos naaanggot.” Tibaad hunaon kan sarong elder na aram niya na kun ano talaga an sitwasyon, pero aram niya daw talaga? Ipinapagirumdom sato kan Talinhaga 18:13: “Pag an siisay man minasimbag sa sarong bagay bago niya madangog an mga totoong detalye, kamangmangan iyan asin makasusupog.” Pinakamarahay na makua niya an mga detalye sa mismong tatawan nin konseho. Kaya kaipuhan kan elder na magdangog nguna bago magtaram. Puwedeng ihapot kan elder: “Kumusta ka na?” “Ano an puwede kong maitabang?” Kun an mga elder matao nin panahon para maaraman kun ano talaga an sitwasyon, mas posibleng marhay na makatabang asin makapakusog sinda sa mga tugang. An pagtao nin epektibong konseho bako lang basta pagbasa nin nagkapirang teksto o pagtao nin saro o duwang suhestiyon. Kaipuhan na mamatian kan mga tugang na nagmamalasakit kita sa sainda, na nasasabutan ta sinda, asin na gusto ta sindang tabangan. w22.02 17 ¶14-15

Masakiton an pagbuhay kan babaying balo; posibleng marhay na nasasakitan siyang makua an panginot na mga pangangaipo niya. Pero nagduman man giraray siya sa saro sa mga lalagan asin maingat na naghulog nin duwang sadit na sinsilyo, na posibleng haros dai lamang nagkalansing kan ihulog niya—duwang sinsilyong lepta, an pinakasadit na sinsilyong ginagamit kan panahon na idto. Kulang pa ngani iyan para makabakal nin sarong dignos, na saro sa pinakabaratong gamgam na ipinapabakal bilang pagkakan. Naghangang marhay si Jesus sa babaying balong ini. Kaya inapod niya an saiyang mga disipulo, itinukdo an babaying balo, asin sinabi: “An pobreng balong ini naghulog nin labi sa gabos na iba [pa].” Dangan sinabi niya: “Huli ta sinda [lalo na an mayayaman] gabos naghulog hali sa sobra ninda, pero siya, maski tios, naghulog siya kan gabos na igwa siya, an saiyang bilog na pagbuhay.” (Mar. 12:43, 44) Kan itao kan maimbod na babaying balong ini an ultimong kuwarta niya kan aldaw na idto, ipinagkakatiwala niya sa mapagmakulog na kamot ni Jehova an buhay niya.—Sal. 26:3. w21.04 6 ¶17-18

Nagdanay na positibo si Jesus sa bilog niyang ministeryo digdi sa daga, asin gusto niya na magdanay man na positibo sa ministeryo an saiyang mga parasunod. (Juan 4:35, 36) Kan kaibanan si Jesus kan mga disipulo niya, ganado sinda sa gibuhon na paghuhulit. (Luc. 10:1, 5-11, 17) Pero kan arestaron saka magadan si Jesus, temporaryong nawara an gana nindang maghulit. (Juan 16:32) Pagkabuhay liwat ni Jesus, dinagka niya sinda na magpokus sa paghuhulit. Asin pagkasakat ni Jesus sa langit, maigot sindang marhay na naghulit mala ngani ta nagreklamo an mga kaiwal ninda arog kan sinabi sa teksto ngunyan na aldaw. Giniyahan ni Jesus an gibuhon kan inot na mga Kristiyanong idto, asin dahil sa bendisyon ni Jehova, dakul an nag-ako kan mensahe ninda. Halimbawa, kan Pentecostes 33 C.E., mga 3,000 an nabawtismuhan. (Gibo 2:41) Asin padagos na naglangkaw na marhay an bilang kan mga disipulo. (Gibo 6:7) Pero ihinula ni Jesus na mas dakul pa diyan an maako kan maugmang bareta sa huring mga aldaw.—Juan 14:12; Gibo 1:8. w21.05 14 ¶1-2