Ikaduwang Cronica

29 Nagin hadi si Hezekias+ sa edad na 25, asin namahala siya sa Jerusalem sa laog nin 29 taon. An saiyang ina iyo si Abias na aki ni Zacarias.+ 2 Padagos niyang ginibo kun ano an tama sa paghiling ni Jehova,+ arog kan ginibo ni David na saiyang apuon.+ 3 Kan inot na bulan, kan inot na taon kan saiyang paghadi, binuksan niya an mga pinto kan harong ni Jehova asin hinirahay an mga iyan.+ 4 Dangan dinara niya an mga saserdote saka an mga Levita asin tiniripon sinda sa plasa sa may sirangan. 5 Sinabi niya sa sainda: “Magdangog kamo sako, kamong mga Levita. Pabanalon nindo ngunyan an saindong sadiri+ asin pabanalon nindo an harong ni Jehova na Diyos kan saindong mga apuon, asin halion nindo sa banal na lugar an marigsok na mga bagay.+ 6 Huling dai nagin maimbod an satong mga ama asin ginibo ninda kun ano an maraot sa paghiling ni Jehova na satong Diyos.+ Binayaan ninda siya asin ipinaling an saindang lalawgon* parayo sa tabernakulo ni Jehova asin tinalikudan ninda siya.+ 7 Isinara man ninda an mga pinto kan portiko+ asin pinalsok an mga ilawan.+ Dai na sinda nagtutong nin insenso+ asin dai na nagdulot nin atang na pigtututong+ para sa Diyos kan Israel sa banal na lugar. 8 Huli kaini, naanggot si Jehova sa Juda asin Jerusalem,+ kaya ginibo niya sindang sarong bagay na nagin dahilan na an mga tawo tarakigan, magngalas, asin mapataghoy* sa sainda, arog kan mismong nahihiling nindo.+ 9 Iyan an dahilan kun taano ta ginaradan paagi sa espada an satong mga apuon,+ asin dinarang bihag an satong mga aking lalaki, mga aking babayi, asin mga agom.+ 10 Ngunyan, mawot kan puso ko na makipagtipan ki Jehova na Diyos kan Israel+ tanganing mawara an grabeng kaanggutan niya sa sato. 11 Mga aki ko, bako ini an panahon na magin pabaya,* huling pinili kamo ni Jehova tanganing magtindog sa atubangan niya, magin mga paralingkod niya,+ asin magpaaso nin mga atang para sa saiya.”+

12 Huli kaini, huminiro an mga Levita: sa mga Kohatita,+ si Mahat na aki ni Amasai asin Joel na aki ni Azarias; sa mga Merarita,+ si Kis na aki ni Abdi asin Azarias na aki ni Jehalelel; sa mga Gersonita,+ si Joa na aki ni Zima asin Eden na aki ni Joa; 13 sa mga aki ni Elizafan, si Simri asin Jeuel; sa mga aki ni Asaf,+ si Zacarias asin Matanias; 14 sa mga aki ni Heman,+ si Jehiel asin Simei; sa mga aki ni Jedutun,+ si Semaias asin Uziel. 15 Dangan tiniripon ninda an saindang mga tugang asin pinabanal an saindang sadiri asin nagduruman sinda sa harong ni Jehova tanganing linigon iyan, arog kan ipinagbuot kan hadi na isinabi sa saiya ni Jehova.+ 16 Dangan naglaog sa harong ni Jehova an mga saserdote para gibuhon an paglinig, asin ilinuwas ninda an gabos na maating mga bagay* na nahiling ninda sa templo ni Jehova asin dinara ninda iyan sa patyo+ kan harong ni Jehova. Pagkatapos, kinurua iyan kan mga Levita asin dinara sa luwas, sa Kababan nin Kidron.+ 17 Pinunan ninda an pagpabanal kan inot na aldaw kan inot na bulan, asin kan ikawalong aldaw kan bulan nakaabot sinda sa portiko kan harong ni Jehova.+ Pinabanal ninda an harong ni Jehova sa laog nin walo pang aldaw, asin natapos sinda kan ika-16 na aldaw kan inot na bulan.

18 Pagkatapos kaini, nagpasiring sinda ki Hading Hezekias asin nagsabi: “Nalinigan mi na an bilog na harong ni Jehova, an altar para sa dulot na pigtututong+ saka an gabos na kagamitan kaiyan,+ asin an lamesa para sa patong-patong na tinapay*+ saka an gabos na kagamitan kaiyan. 19 Asin inandam mi man saka pinabanal an gabos na kagamitan+ na hinarali ni Hading Ahaz sa templo kan panahon kan saiyang paghadi, kan siya nagin bakong maimbod,+ asin yaon an mga iyan sa atubangan kan altar ni Jehova.”

20 Amay na nagmata si Hading Hezekias asin tiniripon an mga pamayo* kan siyudad, asin nagpasiring sinda sa harong ni Jehova. 21 Nagdara sinda nin pitong torong baka, pitong lalaking karnero, pitong lalaking kordero, asin pitong lalaking kanding na mga iaatang bilang dulot para sa kasalan para sa kahadian, para sa santuwaryo, asin para sa Juda.+ Kaya sinabi niya sa mga saserdote na mga gikan ni Aaron na idulot an mga ini sa ibabaw kan altar ni Jehova. 22 Dangan binuno ninda an mga baka,+ asin kinua kan mga saserdote an dugo asin iwinirik iyan sa ibabaw kan altar;+ pagkatapos, binuno ninda an mga lalaking karnero asin iwinirik sa ibabaw kan altar an dugo, asin binuno ninda an mga lalaking kordero asin iwinirik sa ibabaw kan altar an dugo. 23 Dangan dinara ninda sa atubangan kan hadi asin kan katiripunan* an mga lalaking kanding na iaatang bilang dulot para sa kasalan, tapos ipinatong ninda sa mga ini an saindang mga kamot. 24 Binuno an mga ini kan mga saserdote asin iinatang bilang dulot para sa kasalan. Ilinaag ninda sa ibabaw kan altar an mga dugo kaini tanganing bayadan an kasalan kan bilog na Israel, huling sinabi kan hadi na dapat para sa bilog na Israel an dulot na pigtututong saka an dulot para sa kasalan.

25 Miyentras tanto, pinapuwesto niya sa harong ni Jehova an mga Levita na may mga simbal, mga instrumentong de-kuwerdas, asin mga arpa,+ sigun sa tugon ni David+ asin ni Gad+ na bisyonaryo kan hadi saka ni Natan+ na propeta, huling an tugon na ini hali ki Jehova na itinao niya paagi sa saiyang mga propeta. 26 Kaya nakatirindog an mga Levita na may mga instrumento ni David, asin an mga saserdote na may mga trumpeta.+

27 Dangan ipinagbuot ni Hezekias na idulot na sa ibabaw kan altar an atang na pigtututong.+ Kan pinunan an pag-atang kan dulot na pigtututong, pinunan man an pagkanta ki Jehova asin an pagpatanog kan mga trumpeta na nagsusunod sa panginginot kan mga instrumento ni Hading David kan Israel. 28 Asin nagduruko an bilog na katiripunan mantang kinakanta an kanta asin pinapatanog an mga trumpeta—padagos nindang ginibo ini sagkod na matapos an pag-atang sa dulot na pigtututong. 29 Kan matapos na ninda an pagdulot, tulos na nagduko asin naglaob an hadi saka an gabos na kaiba niya. 30 Dangan si Hading Hezekias asin an mga pamayo* nagsabi sa mga Levita na umawon si Jehova paagi sa mga salmo* ni David+ asin ni Asaf+ na bisyonaryo. Kaya nag-urumaw sinda na may dakulang kaugmahan, asin nagduruko sinda asin nagralaob.

31 Dangan sinabi ni Hezekias: “Ngunyan na isinuway na kamo* para ki Jehova, magdurulok kamo asin magdara nin mga atang asin mga dulot nin pasasalamat sa harong ni Jehova.” Kaya nagdara nin mga atang asin mga dulot nin pasasalamat an katiripunan, asin an gabos na andam na magtao nin gikan sa puso nagdara nin mga dulot na pigtututong.+ 32 An bilang kan mga iaatang bilang dulot na pigtututong na dinara kan katiripunan 70 baka, 100 na lalaking karnero, 200 na lalaking kordero—gabos iyan iaatang ki Jehova bilang dulot na pigtututong+— 33 asin 600 na baka saka 3,000 na karnero an dinara ninda para sa mga banal na dulot. 34 Pero diit lang an mga saserdote asin dai ninda kayang anitan an gabos na iaatang bilang dulot na pigtututong, kaya tinabangan sinda kan mga tugang nindang mga Levita+ sagkod na matapos an gibuhon asin sagkod na mapabanal kan mga saserdote an saindang sadiri,+ ta mas metikuloso an* mga Levita kun manungod sa pagpapabanal sa sadiri kisa sa mga saserdote. 35 Siring man, dakul an dulot na pigtututong+ saka an taba kan atang sa pakikikabtang+ pati an dulot na inumon para sa dulot na pigtututong.+ Kaya naibalik* an paglilingkod sa harong ni Jehova. 36 Huli kaini, nag-ugma si Hezekias asin an bilog na banwaan sa ginibo kan tunay na Diyos para sa banwaan,+ ta nagibo tulos an gabos na ini.