Ikaduwang Cronica

26 Dangan kinua kan bilog na banwaan nin Juda si Uzias,*+ na 16 anyos kaidto, asin ginibo ninda siyang hadi bilang kasalida kan saiyang ama na si Amazias.+ 2 Itinugdok niya giraray an Elot+ asin ibinalik ini sa Juda pagkagadan kan* hadi.*+ 3 An edad ni Uzias+ kan siya magin hadi 16 anyos, asin namahala siya sa Jerusalem sa laog nin 52 na taon. An saiyang ina iyo si Jecolia na taga Jerusalem.+ 4 Padagos niyang ginibo kun ano an tama sa paghiling ni Jehova, arog kan ginibo kan saiyang ama na si Amazias.+ 5 Asin padagos niyang hinanap an Diyos kan panahon ni Zacarias na iyo an nagtukdo sa saiya na magkaigwa nin pagkatakot sa tunay na Diyos. Sa mga panahon na hinahanap niya si Jehova, pinangyari kan tunay na Diyos na magin siyang mauswag.+

6 Luminuwas siya asin nakipaglaban sa mga Filisteo;+ linabot* niya an mga pader kan Gat,+ Jabne,+ asin Asdod+ asin linaog niya an mga ini. Dangan nagtugdok siya nin mga siyudad sa teritoryo kan Asdod asin kan mga Filisteo. 7 Padagos siyang tinabangan kan tunay na Diyos sa pakikilaban sa mga Filisteo, sa mga Arabeng+ nag-iistar sa Gurbaal, asin sa mga Meunim. 8 Asin nagpuon nang magtao ki Uzias nin tributo* an mga Ammonita.+ Pag-abot nin panahon, nagin bantog siya sagkod sa Ehipto, huling nagin makapangyarihan nanggad siyang marhay. 9 Nagtugdok man si Uzias nin mga tore+ sa Jerusalem sa kataid kan Kantong Trangkahan,+ kan Trangkahan kan Kababan,+ asin kan Hariging Pansuporta, asin pinasarig niya an mga iyan. 10 Nagtugdok man siya nin mga tore+ sa may kaawagan asin nagkalot* nin dakul na istakan nin tubig (dakulon kaya siyang ataman na hayop); arog man kaiyan an ginibo niya sa Sefela asin sa kapatagan.* May mga parauma siya saka mga nag-aataman nin ubasan sa mga bukid asin sa Carmel, huling hilig niya an agrikultura.

11 Apuwera diyan, nagkaigwa si Uzias nin hukbo na sinanay na marhay* para makigiyera. Grupo-grupo sinda sigun sa mga dibisyon pag minaluwas sinda pasiring sa mga pakikipaglaban. Sa pamamahala ni Hananias na saro sa mga pamayo* kan hadi, binibilang sinda asin irinerehistro+ ni Jeiel na sekretaryo+ asin ni Maaseias na opisyal. 12 An bilang kan mga pamayo nin mga angkan na namamahala sa matitibay na mga parapakilaban na ini 2,600 gabos. 13 An bilang kan mga suldados na nasa pamamahala ninda 307,500 na lalaki na andam na makigiyera, sarong makusog na puwersa militar tanganing sumuporta sa hadi sa pakikipaglaban sa kalaban.+ 14 Tinawan ni Uzias nin mga kalasag, mga garod,+ mga helmet, mga gubing na metal,*+ mga pana, asin mga gapong panglagpitaw+ an bilog na hukbo. 15 Dugang pa, naggibo siya sa Jerusalem nin mga darakulang armas na panggiyera na dinisenyo kan mga inhenyero; ibinugtak an mga iyan sa mga tore+ saka sa mga kanto kan mga pader asin kaya kan mga iyan na magpalayog nin mga pana saka darakulang gapo. Kaya nagin bantog siya sagkod sa hararayong lugar, huling nag-ako siya nin dakulang tabang asin nagin makusog siya.

16 Alagad kan siya makusog na, nagin mapalangkaw an saiyang puso na nagin dahilan kan saiyang kapahamakan, asin guminawi siya nin bakong maimbod ki Jehova na saiyang Diyos kan siya maglaog sa templo ni Jehova tanganing magtutong nin insenso sa ibabaw kan altar para sa insenso.+ 17 Tulos siyang sinundan ni Azarias na saserdote asin kan 80 iba pang makukusog an buot na saserdote ni Jehova. 18 Kinumprontar ninda si Hading Uzias asin tinaraman siya: “Uzias, dai ka puwedeng magtutong nin insenso para ki Jehova!+ Mga saserdote sana an dapat na magtutong nin insenso, ta sinda an mga gikan ni Aaron,+ sinda na mga pinabanal. Lumuwas ka sa santuwaryo, ta guminawi ka nin bakong maimbod, asin mayo ka man nin aakuon na kamurawayan hali sa Diyos na Jehova sa ginibo mong ini.”

19 Pero naanggot na marhay si Uzias+ mantang kapot an insensaryo para magtutong nin insenso; asin mantang angguton siya sa mga saserdote, bigla siyang nagkaigwa nin leproso+ sa saiyang angog sa atubangan kan mga saserdote, sa may kataid kan altar para sa insenso, sa laog kan harong ni Jehova. 20 Kan maghiling sa saiya si Azarias na panginot na saserdote asin an gabos na saserdote, nahiling nindang nagkaigwa siya nin leproso sa saiyang angog! Kaya dali-dali ninda siyang ilinuwas duman, asin siya man mismo nagluwas tulos, huli ta pinadusahan siya ni Jehova.

21 Nagdanay na may leproso si Hading Uzias sagkod sa aldaw na siya magadan, asin padagos siyang nag-istar sa sarong suway na harong bilang saro na may leproso,+ huling dai na siya tinugutan na magduman sa harong ni Jehova. Asin an saiyang aki na si Jotam an namahala sa harong* kan hadi asin nagserbing hukom sa banwaan.+

22 Asin an iba pang nangyari sa buhay ni Uzias, puon sa kapinunan sagkod sa katapusan, isinurat ni propeta Isaias+ na aki ni Amoz. 23 Dangan nagadan* si Uzias, asin ilinubong ninda siya sa kaibanan kan saiyang mga apuon, pero sa sarong daga na lubungan na pagsadiri kan mga hadi, huling an sabi ninda: “May leproso siya.” Asin si Jotam+ na saiyang aki an nagsalida sa saiya bilang hadi.