Esdras

8 Iyo ini an mga pamayo kan saindang mga angkan asin an rekord nin mga ginikanan kan mga nag-iriba sa sakuya paghali ko sa Babilonya sa panahon kan paghadi ni Hading Artajerjes:+ 2 sa mga aki ni Finehas,+ si Gersom; sa mga aki ni Itamar,+ si Daniel; sa mga aki ni David, si Hatus; 3 sa mga aki ni Secanias, na hali sa mga aki ni Paros, si Zacarias, asin kaiba niya an 150 lalaki na yaon sa rekord; 4 sa mga aki ni Pahat-moab,+ si Elieho-enai na aki ni Zerahias, asin kaiba niya an 200 na lalaki; 5 sa mga aki ni Zatu,+ si Secanias na aki ni Jahaziel, asin kaiba niya an 300 na lalaki; 6 sa mga aki ni Adin,+ si Ebed na aki ni Jonathan, asin kaiba niya an 50 lalaki; 7 sa mga aki ni Elam,+ si Jesaias na aki ni Atalia, asin kaiba niya an 70 lalaki; 8 sa mga aki ni Sefatias,+ si Zebadias na aki ni Miguel, asin kaiba niya an 80 lalaki; 9 sa mga aki ni Joab, si Obadias na aki ni Jehiel, asin kaiba niya an 218 lalaki; 10 sa mga aki ni Bani, si Selomit na aki ni Josifias, asin kaiba niya an 160 lalaki; 11 sa mga aki ni Bebai,+ si Zacarias na aki ni Bebai, asin kaiba niya an 28 lalaki; 12 sa mga aki ni Azgad,+ si Johanan na aki ni Hakatan, asin kaiba niya an 110 na lalaki; 13 sa mga aki ni Adonikam,+ an mga nahuri, si Elifelet, Jeiel, saka Semaias, asin kaiba ninda an 60 lalaki; 14 asin sa mga aki ni Bigvai,+ si Utai saka si Zabbud, asin kaiba ninda an 70 lalaki.

15 Pigtiripon ko sinda sa may salog na pasiring sa Ahava,+ asin nagkampo kami duman nin tulong aldaw. Pero kan riparuhon ko an banwaan asin an mga saserdote, mayo akong nahiling ni sarong Levita* duman. 16 Kaya ipinaapod ko si Eliezer, Ariel, Semaias, Elnatan, Jarib, Elnatan, Natan, Zacarias, saka si Mesulam, na mga nanginginot, asin si Joiarib saka si Elnatan, na mga paratukdo. 17 Tapos sinugo ko sinda na magduman ki Iddo na lider kan lugar na inaapod na Casifia. Sinabi ko sa sainda na sabihan si Iddo asin an mga tugang niyang nasa Casifia na mga lingkod sa templo* na magpadara sa samo nin mga maglilingkod para sa harong kan samuyang Diyos. 18 Huling tinatabangan kami* kan samuyang Diyos, nagpadara sinda nin sarong madunong na lalaki hali sa mga aki ni Mahli+ na makuapo ni Levi na aki ni Israel, na an pangaran Serebias,+ kaiba an saiyang mga aki saka mga tugang, 18 lalaki gabos. 19 Ipinadara man ninda si Hasabias, asin kaiba niya si Jesaias na hali sa mga Merarita,+ kaiba an mga tugang kaini asin an mga aki ninda, 20 lalaki gabos. 20 Asin igwa man nin 220 mga lingkod sa templo,* na an mga pangaran nakalista gabos. Inasignaran kaidto ni David asin kan mga pamayo* an mga lingkod sa templo na magtabang sa mga Levita.

21 Dangan, sinabi ko sa mga kaibanan ko na mag-ayuno kami duman sa may salog nin Ahava, tanganing magpakumbaba sa atubangan kan samuyang Diyos, tanganing hagadon sa saiya na giyahan kami sa samuyang pagbaklay saka protektaran kami pati an samuyang mga aki saka an gabos ming pagsadiri. 22 Nasupog akong maghagad sa hadi nin mga suldados asin mga parakabayo na maprotektar sa samo laban sa mga kaiwal mantang kami nagbabaklay, huling nasabi mi na sa hadi: “Tinatabangan kan samuyang Diyos an* gabos na naghahanap sa saiya,+ pero ipinapahiling niya sa gabos na nagbabaya sa saiya an saiyang kusog asin an saiyang kaanggutan.”+ 23 Kaya nag-ayuno kami asin nakiulay sa samuyang Diyos manungod diyan, asin dinangog niya an samuyang pakimahirak.+

24 Nagpili ako nin 12 hali sa mga nanginginot sa mga saserdote; sinda iyo si Serebias saka si Hasabias,+ kaiba an sampulo sa saindang mga tugang. 25 Dangan tinimbang ko sa atubangan ninda an plata saka an bulawan asin an mga kagamitan, an mga irinegalo para sa harong kan samuyang Diyos na itinao kan hadi saka kan saiyang mga parakonseho asin kan saiyang mga halangkaw na opisyal* saka kan gabos na Israelita na yaon kaidto duman.+ 26 Pagkatimbang ko, itinao ko an mga iyan sa sainda: 650 talentong* pirak, 100 na kagamitan na gibo sa plata na an timbang 2 talento, 100 na talentong bulawan, 27 20 saradit na bulawan na mangko na an kantidad 1,000 daric,* asin 2 kagamitan na gibo sa marahay na klaseng tanso, na nagkikintab an kapulahan asin kasinghalaga nin bulawan.

28 Tapos sinabi ko sa sainda: “Banal kamo sa paghiling ni Jehova,+ asin an mga kagamitan banal, asin an plata saka an bulawan mga gikan-sa-buot na dulot ki Jehova na Diyos kan saindong mga apuon. 29 Ingatan nindong marhay an mga iyan sagkod na matimbang nindo iyan sa atubangan kan mga nanginginot sa mga saserdote saka mga Levita asin sa atubangan kan mga pamayo* kan mga angkan nin Israel sa Jerusalem,+ sa laog kan mga kuwarto* sa harong ni Jehova.” 30 Asin kinua kan mga saserdote saka kan mga Levita an plata asin an bulawan asin an mga kagamitan na tinimbang sa atubangan ninda, tanganing darahon an mga iyan sa Jerusalem sa harong kan samuyang Diyos.

31 Pagkatapos kan gabos na iyan, kan ika-12 aldaw kan inot na bulan,+ naghali na kami sa may salog nin Ahava+ asin nagpasiring sa Jerusalem, asin padagos kaming tinabangan* kan samuyang Diyos, asin ilinigtas niya kami sa kamot kan mga kaiwal saka sa mga nananambang sa agihan. 32 Kaya nakaabot kami sa Jerusalem,+ dangan luminihis an tulong aldaw. 33 Kan ikaapat na aldaw, tinimbang mi sa harong kan samuyang Diyos an plata saka an bulawan asin an mga kagamitan.+ Dangan inentrega mi an mga iyan ki Meremot+ na aki ni Uria na saserdote. Kaiba niya si Eleazar, na aki ni Finehas, asin an mga Levitang si Jozabad+ na aki ni Jesua pati si Noadias na aki ni Binui.+ 34 Binilang asin tinimbang an gabos, dangan irinekord an gabos na timbang. 35 An mga nagbaralik hali sa pagkabihag sa ibang nasyon nagdulot nin mga atang na pigtututong para sa Diyos kan Israel, 12 torong baka+ para sa bilog na Israel, 96 na lalaking karnero,+ 77 lalaking kordero, asin 12 lalaking kanding+ bilang dulot para sa kasalan; an gabos na ini iinatang bilang dulot na pigtututong para ki Jehova.+

36 Dangan, itinao mi an mga pagbuot kan hadi+ sa saiyang mga satrapa* saka sa mga gobernador kan rehiyon na Ibong kan Salog,*+ asin sinuportaran ninda an banwaan asin an harong kan tunay na Diyos.+