Juan

6 Pagkatapos kaini, naglayag si Jesus pasiring sa ibong na tampi kan Dagat nin Galilea, o Tiberias. 2 Asin dakul na tawo an padagos na nagsusurunod sa saiya, huli ta nahihiling ninda an milagrosong mga tanda na ginigibo niya sa pagpaumay nin mga may hilang. 3 Kaya nagtukad si Jesus sa bukid asin nagtukaw duman kaiba an saiyang mga disipulo. 4 Harani na kaidto an Paskuwa, an kapiyestahan kan mga Judio. 5 Kan mangalag-kalag si Jesus asin mahiling niya an dakul na tawo na pasiring sa saiya, sinabi niya ki Felipe: “Sain kita mabakal nin tinapay na kakakanon kan mga tawong ini?” 6 Alagad, sinabi niya ini tanganing purbaran siya, huling aram man niya kun ano an gigibuhon niya. 7 Nagsimbag si Felipe sa saiya: “An 200 na denariong* kantidad nin tinapay dai magkakaigo tanganing makakakan an kada saro sa sainda nin maski tigdirikit.” 8 An saro sa mga disipulo niya, si Andres, na tugang ni Simon Pedro, nagsabi sa saiya: 9 “May aking lalaki digdi na igwang limang tinapay na sebada asin duwang sadit na sira. Pero paano ini magkakahusto sa arog kaini kadakul na tawo?”

10 Sinabi ni Jesus: “Patukawa an mga tawo.” Dahil maduot sa lugar na idto, nagturukaw duman an mga tawo, na kabilang diyan an mga 5,000 na lalaki. 11 Kinua ni Jesus an mga tinapay, asin pagkatapos magpasalamat sa Diyos, ipinanao niya iyan sa mga nakatukaw duman; arog man kaiyan an ginibo niya sa sadit na mga sira, asin nagkarakan sinda sagkod na magkabarasog. 12 Alagad kan barasog na sinda, sinabi niya sa mga disipulo niya: “Tipuna nindo an mga tada-tada, tanganing dai nin masayang.” 13 Kaya tinipon ninda an mga iyan asin nakapano sinda nin 12 basket nin tada-tada na dai naubos kan mga nagkarakan nin tinapay na hali sa limang tinapay na sebada.

14 Kan mahiling kan mga tawo an tanda na ginibo niya, nagsabi sinda: “Iyo na talaga ini an Propeta na ihinulang madatong sa kinaban.” 15 Asin huling aram ni Jesus na marani na sinda tanganing piriton siyang magin hadi ninda, naghali siya giraray asin solong nagpasiring sa bukid.

16 Kan pabanggi na, nagbaraba an mga disipulo pasiring sa dagat, 17 asin naglunad sinda sa sakayan* saka naglayag sa dagat paibong sa Capernaum. Madiklom na asin dai pa nagduduman sa sainda si Jesus. 18 Nagigin maalon na man an dagat huli ta may makusog na duros na naghuhuyop. 19 Alagad, kan makaabante na sinda nin mga lima o anom na kilometro,* nahiling ninda si Jesus na naglalakaw sa ibabaw kan dagat saka parani sa sakayan, asin nagkatarakot sinda. 20 Pero sinabi niya sa sainda: “Ako ini; dai kamo matakot!” 21 Kaya gusto na nindang palunadon siya sa sakayan, asin dai nahaloy nakaabot an sakayan sa lugar na dudumanan ninda.

22 Kan sunod na aldaw, narealisar kan mga tawong nawalat sa ibong na tampi kan dagat na an nagsosolong sadit na sakayan na nasa baybayon mayo na duman, asin na dai kaiba si Jesus kan mga disipulo niya kan magharali an mga ini lunad kan sakayan na idto. 23 Alagad, may mga sakayan hali sa Tiberias na nag-arabot harani sa lugar kun sain nagkarakan sinda kan tinapay pagkatapos na makapagpasalamat sa Diyos an Kagurangnan. 24 Kan dai nahiling duman kan mga tawo si Jesus pati an mga disipulo niya, nagrulunad sinda sa mga sakayan na ini asin nagduman sa Capernaum tanganing hanapon si Jesus.

25 Kan manumpungan ninda siya sa ibong na tampi kan dagat, sinabi ninda sa saiya: “Rabbi, kasuarin ka nag-abot digdi?” 26 Sinimbag sinda ni Jesus: “Ini nanggad an sinisigurado ko sa saindo, hinahanap nindo ako, bakong dahil nakahiling kamo nin mga tanda, kundi dahil nagkarakan kamo kan tinapay asin nagkabarasog. 27 Magpagal kamo, bakong para sa kakanon na nararaot, kundi para sa kakanon na dai nararaot na nagtatao nin buhay na daing katapusan, asin an kakanon na iyan itatao sa saindo kan Aki nin tawo; huli ta sa saiya ilinaag kan Ama, kan Diyos mismo, an tatak kan Saiyang pag-uyon.”

28 Sa siring sinabi ninda sa saiya: “Ano an dapat niyamong gibuhon tanganing mautob mi an mga gibong inuuyunan nin Diyos?” 29 Bilang simbag sinabi ni Jesus sa sainda: “Ini an gibong inuuyunan nin Diyos, na magtubod kamo sa saro na isinugo niya.” 30 Dangan sinabi ninda sa saiya: “Ano an gigibuhon mo bilang tanda, tanganing mahiling mi iyan asin magtubod kami sa saimo? Anong gibo an gigibuhon mo? 31 An samuyang mga apuon nagkakan kan manna sa kaawagan, siring kan nasusurat: ‘Tinawan niya sinda nin tinapay hali sa langit tanganing kakanon.’” 32 Dangan sinabi ni Jesus sa sainda: “Sinisigurado ko nanggad sa saindo, si Moises dai nagtao sa saindo kan tinapay hali sa langit, alagad an sakuyang Ama nagtatao sa saindo kan tunay na tinapay hali sa langit. 33 Huli ta an tinapay nin Diyos iyo an saro na nagbaba hali sa langit asin nagtatao nin buhay sa kinaban.” 34 Kaya sinabi ninda sa saiya: “Kagurangnan, tawan mo kami pirmi kan tinapay na ini.”

35 Sinabi ni Jesus sa sainda: “Ako an tinapay nin buhay. An siisay man na minadulok sa sako dai na nanggad magugutom, asin an siisay man na minatubod sa sako dai na nanggad nuarin man mapapaha. 36 Pero arog kan sabi ko sa saindo, nahihiling na ngani nindo ako alagad ta dai kamo nagtutubod. 37 An gabos na itinatao kan Ama sa sako madulok sa sako, asin dai ko nuarin man papahalion an saro na minadulok sa sako; 38 huli ta nagbaba ako hali sa langit tanganing gibuhon, bako an sadiri kong kabutan, kundi an kabutan niya na nagsugo sa sako. 39 Ini an kabutan kan nagsugo sa sako, na mayo akong maiwara sa gabos na itinao niya sa sako, kundi na buhayon ko liwat sinda sa huring aldaw. 40 Huli ta ini an kabutan kan sakuyang Ama, na an gabos na nakakamidbid sa Aki asin nagtutubod sa saiya magkaigwa nin buhay na daing katapusan, asin bubuhayon ko liwat siya sa huring aldaw.”

41 Dangan an mga Judio nagpuon na maggurumod-gumod huli ta sinabi niya: “Ako an tinapay na nagbaba hali sa langit.” 42 Asin nagpuon sindang magsarabi: “Bakong iyo ini si Jesus na aki ni Jose? Midbid ta an saiyang ama asin ina. Ano ta pigsasabi niya ngunyan, ‘Nagbaba ako hali sa langit’?” 43 Bilang simbag sinabi ni Jesus sa sainda: “Magpundo kamo sa paggurumod-gumod. 44 Mayo nin tawong makakadulok sa sako apuwera sana kun irani siya kan Ama na nagsugo sa sako, asin bubuhayon ko siya liwat sa huring aldaw. 45 Nasusurat sa Mga Propeta: ‘Sinda gabos tutukduan ni Jehova.’* An lambang saro na nagdadangog sa Ama asin nakakanuod minadulok sa sako. 46 Dai buot sabihon na igwang tawong nakahiling sa Ama; an nakahiling lang sa Ama iyo idtong saro na naggikan sa Diyos. 47 Sinisigurado ko nanggad sa saindo, an siisay man na minatubod igwa nin buhay na daing katapusan.

48 “Ako an tinapay nin buhay. 49 An saindong mga apuon nagkakan kan manna sa kaawagan alagad ta nagkagaradan sinda. 50 Pero an siisay man na magkakan kan tinapay na ini na nagbaba hali sa langit dai magagadan. 51 Ako an tinapay na buhay na nagbaba hali sa langit. Kun an siisay man magkakan kan tinapay na ini siya mabubuhay sagkod lamang; asin an totoo, an tinapay na itatao ko iyo an sakuyang laman para sa buhay kan katawuhan.”*

52 Dangan nagpuon na magdiriskusyunan an mga Judio, na nagsasabi: “Paano magigibong itao kan tawong ini an saiyang laman tanganing kakanon ta?” 53 Kaya sinabi ni Jesus sa sainda: “Sinisigurado ko nanggad sa saindo, sagkod na dai kamo magkakan kan laman kan Aki nin tawo asin mag-inom kan saiyang dugo, dai kamo magkakamit nin buhay.* 54 An siisay man na magkakan kan sakuyang laman saka mag-inom kan sakuyang dugo igwa nin buhay na daing katapusan, asin bubuhayon ko siya liwat sa huring aldaw; 55 huli ta an sakuyang laman tunay na kakanon asin an sakuyang dugo tunay na inumon. 56 An siisay man na magkakan kan sakuyang laman saka mag-inom kan sakuyang dugo nagdadanay na kasaro ko, asin ako nagdadanay na kasaro niya. 57 Kun paanong isinugo ako kan buhay na Ama asin na nabubuhay ako dahil sa Ama, siring man an saro na magkakan kan laman ko mabubuhay dahil sa sako. 58 Iyo ini an tinapay na nagbaba hali sa langit. Bako iyan arog kaidto kan an saindong mga apuon nagkakan alagad ta nagkagaradan. An siisay man na magkakan kan tinapay na ini mabubuhay sagkod lamang.” 59 Sinabi niya an mga bagay na ini miyentras na nagtutukdo siya sa sarong sinagoga* sa Capernaum.

60 Kan madangog ninda ini, dakul sa mga disipulo niya an nagsabi: “Makagurugirabo an mga tataramon na ini; siisay an matagal sa pagparadangog kaiyan?” 61 Alagad huling narisa ni Jesus na naggugurumod-gumod an saiyang mga disipulo manungod digdi, sinabi niya sa sainda: “Nauuyam* kamo sa sinabi ko? 62 Paano palan kun mahiling nindo an Aki nin tawo na nagsasakat sa dati niyang kinamumugtakan? 63 An espiritu iyo an nagtatao nin buhay; an laman dai lamang makakatabang. An mga itinataram ko sa saindo espirituwal asin nagtatao nin buhay. 64 Alagad may nagkapira sa saindo na dai nagtutubod.” Aram na kaya ni Jesus puon sa kapinunan kun sairisay an dai nagtutubod asin kun siisay an matraydor sa saiya. 65 Sinabi pa niya: “Ini an dahilan kun taano ta sinabi ko sa saindo, mayo nin makakadulok sa sako apuwera sana kun itugot iyan kan Ama.”

66 Huli kaini, dakul sa saiyang mga disipulo an nagbaralik sa mga bagay na binayaan na ninda asin habo nang magsunod sa saiya. 67 Kaya sinabi ni Jesus sa Dose: “Kamo, gusto man nindong maghali?” 68 Nagsimbag si Simon Pedro sa saiya: “Kagurangnan, kiisay pa man kami maduman? Yaon sa saimo an mga tataramon nin buhay na daing katapusan. 69 Nagturubod kami asin naaraman mi na ika an Banal na Lingkod nin Diyos.” 70 Sinimbag sinda ni Jesus: “Ako an nagpili sa saindong dose, bako? Pero igwa diyan sa saindo nin sarong parapakaraot.”* 71 Sa katunayan, an pinapanungdan niya iyo si Judas na aki ni Simon Iscariote, huli ta an sarong ini matraydor sa saiya, maski ngani kabilang siya sa Dose.