Esdras

5 Dangan an mga propetang si Hageo+ asin si Zacarias+ na makuapo ni Iddo+ nagpropesiya sa mga Judio na nasa Juda saka sa Jerusalem, sa ngaran kan Diyos nin Israel na naggigiya sa sainda. 2 Iyan an panahon na si Zerubabel+ na aki ni Sealtiel saka si Jesua+ na aki ni Jehozadak nagpadagos sa pagtugdok liwat kan harong nin Diyos+ sa Jerusalem; asin kaibanan ninda an mga propeta nin Diyos saka sinusuportaran sinda kan mga ini.+ 3 Kan panahon na iyan, si Tatenai na gobernador kan rehiyon na Ibong kan Salog* saka si Setar-bozenai asin an mga kairiba ninda nagduman sa sainda asin naghapot: “Siisay an nagpaluwas nin pagbuot na itugdok nindo an harong na ini asin tapuson an estrukturang ini?”* 4 Tapos hinapot ninda sinda: “Sairisay an mga nagtatrabaho sa edipisyong ini?” 5 Pero binabantayan nin Diyos an* kamagurangan kan mga Judio,+ asin dai sinda pinapundo ni Tatenai saka kan iba pa sagkod na dai pa nakakapadara nin sumbong ki Dario asin mayo pang nareresibing opisyal na dokumento may koneksiyon digdi.

6 Uni an kopya kan surat na ipinadara ki Hading Dario ni Tatenai na gobernador kan rehiyon na Ibong kan Salog asin ni Setar-bozenai saka kan saiyang mga kairiba, an mga sekondaryong gobernador kan rehiyon na Ibong kan Salog; 7 nagpadara sinda nin sumbong sa hadi, asin ini an isinurat ninda:

“Para ki Hading Dario:

“Mapasaimo an katuninungan! 8 Dapat na maaraman kan hadi na nagduman kami sa probinsiya* nin Juda sa harong kan makapangyarihan na Diyos, asin itinutugdok iyan ngunyan gamit an darakulang gapo, asin ilinalaag na an mga kahoy* sa mga pader kaiyan. Maigot an mga tawo sa pagtrabaho asin dakul na an nahahaman ninda. 9 Tapos hinapot mi an kamagurangan ninda: ‘Siisay an nagpaluwas nin pagbuot na itugdok nindo an harong na ini asin tapuson an estrukturang ini?’*+ 10 Hinagad mi man an mga pangaran ninda, tanganing maisurat mi asin maipaaram sa saimo an mga pangaran kan mga nanginginot sa pagtrabaho.

11 “Ini an simbag ninda sa samo: ‘Mga lingkod kami kan Diyos kan kalangitan asin kan daga, asin itinutugdok mi liwat an harong na itinugdok kan sarong makapangyarihan na hadi nin Israel dakul na taon na an nakaagi.+ 12 Pero, huling pinaanggot* kan samuyang mga ama an Diyos kan kalangitan,+ itinao niya sinda sa kamot ni Hading Nabucodonosor+ kan Babilonya, an Caldeo, na iyo an guminaba kan harong na ini+ asin puwersahan na nagdara sa banwaan pasiring sa Babilonya.+ 13 Alagad, kan inot na taon kan paghadi ni Hading Ciro kan Babilonya, nagpaluwas siya nin pagbuot na itugdok liwat an harong na ini nin Diyos.+ 14 Apuwera kaiyan, ilinuwas ni Hading Ciro sa templo kan Babilonya an bulawan asin platang mga lalagan kan harong nin Diyos na kinua kaidto ni Nabucodonosor sa templo sa Jerusalem asin dinara sa templo kan Babilonya.+ Itinao iyan ki Sesbazar,*+ na itinalagang gobernador ni Ciro.+ 15 Sinabi saiya ni Ciro: “Daraha an mga lalagan na ini. Magduman ka sa templo na nasa Jerusalem asin ilaag mo iyan duman, asin itugdok mo liwat an harong nin Diyos sa dating kinamumugtakan kaiyan.”+ 16 Tapos nag-abot si Sesbazar, asin ilinatag niya an mga pundasyon kan harong nin Diyos+ sa Jerusalem; asin puon kaidto sagkod ngunyan pigtatrabaho na ini, pero dai pa iyan natatapos.’+

17 “Kaya kun marahay sa paghiling kan hadi, magsugo tabi siya nin masiyasat sa kaban nin yaman kan hadi diyan sa Babilonya, tanganing maaraman kun talagang nagpaluwas nin pagbuot si Hading Ciro na itugdok liwat an harong nin Diyos sa Jerusalem;+ asin ipadara lugod sa samo kan hadi an saiyang desisyon manungod sa bagay na ini.”