Inot na Samuel

4 Asin an tataramon ni Samuel nakaabot sa bilog na Israel.

Dangan nagluwas an Israel tanganing makipaglaban sa mga Filisteo; nagkampo sinda harani sa Ebenezer, mantang an mga Filisteo nakakampo sa Afek. 2 Puminormada na an mga Filisteo para makipaglaban sa Israel, pero nagrabe sa labanan an Israel asin nadaog sinda kan mga Filisteo. Mga 4,000 na Israelita an nagadan kan mga ini sa mismong lugar kan ralaban. 3 Kan magbaralik na sa kampo an mga suldados na Israelita, an kamagurangan nin Israel nagsarabi: “Taano ta pinabayaan kita ni Jehova na madaog* ngunyan na aldaw kan mga Filisteo?+ Kuanon niyato sa Shilo an kaban kan tipan ni Jehova,+ tanganing kaibanan niyato iyan asin iligtas kita sa kamot kan satong mga kalaban.” 4 Kaya nagsugo an banwaan nin mga lalaki pasiring sa Shilo, asin kinua kan mga ini hali duman an kaban kan tipan ni Jehova na pamayo nin mga hukbo, an Saro na nakatukaw sa saiyang trono na nasa ibabaw* kan mga kerubin.+ An duwang aki ni Eli na si Hofni asin Finehas+ yaon man duman kaibanan kan kaban kan tipan kan tunay na Diyos.

5 Pagkaabot-abot kan kaban kan tipan ni Jehova sa kampo, nagkururahaw nin makusog an mga Israelita, mala ta nagyugo-yugo an daga. 6 Kan madangog kan mga Filisteo an kururahaw, nagsarabi sinda: “Taano ta nagkukururahaw nin makusugon sa kampo kan mga Hebreo?” Kan huri, naisihan ninda na nag-abot palan sa kampo an Kaban ni Jehova. 7 Nagkatarakot an mga Filisteo, mala ta nagsasarabi sinda: “Yaon na an Diyos sa kampo!”+ Kaya nagsarabi sinda: “Hirak man sa sato, ta dai pang nangyaring arog kaini kaidto! 8 Hirak man sa sato! Siisay an maligtas sa sato sa kamot kan makapangyarihan na Diyos na ini? Ini an Diyos na huminampak sa Ehipto paagi sa gabos na klase nin panggagadan sa kaawagan.+ 9 Kamong mga Filisteo, kusugi an buot nindo, magpakalalaki kamo, tanganing dai kamo maglingkod sa mga Hebreo kun paanong naglingkod sinda sa saindo.+ Magpakalalaki kamo, lumaban kamo!” 10 Kaya nakipaglaban an mga Filisteo asin nadaog an Israel,+ mala ta gabos sinda nagdurulag papuli sa kanya-kanya nindang tolda. Kadakul kan nagkagaradan; 30,000 na suldados an nagadan sa Israel. 11 Naagaw man an Kaban nin Diyos, asin nagadan an duwang aki ni Eli na si Hofni asin Finehas.+

12 Kan mismong aldaw na iyan, sarong Benjaminita an nagdalagan hali sa ralaban asin nag-abot sa Shilo. Gisi an saiyang bado saka may alpog sa saiyang payo.+ 13 Kan mag-abot an lalaki, nag-aabang si Eli mantang nakatukaw sa tukawan sa gilid nin dalan, huling nahahadit siyang marhay sa Kaban kan tunay na Diyos.+ Naglaog an lalaki sa siyudad tanganing ibareta an nangyari, asin nagtarangis an mga tawo sa siyudad. 14 Kan madangog ni Eli na nagtatarangis an mga tawo, naghapot siya: “Taano ta nagkakariribok an mga tawo?” Dali-daling dinumanan kan lalaki si Eli asin ibinareta an nangyari. 15 (Si Eli 98 anyos na, asin nakaturuhok na lang nin diretso an saiyang mga mata saka dai na siya makamaan.)+ 16 Dangan sinabi kan lalaki ki Eli: “Ako tabi idtong hali sa lugar kan ralaban! Kakadulag ko pa sana ngunyan.” Kaya naghapot si Eli: “Anong nangyari, aki ko?” 17 Nagsimbag an lalaki: “Nagdurulag an mga Israelita sa mga Filisteo, saka grabe su nangyaring pagkadaog ninda;+ tapos an duwa mong aki na si Hofni asin Finehas nagadan man,+ saka naagaw an Kaban kan tunay na Diyos.”+

18 Kan masambit kan lalaki an Kaban kan tunay na Diyos, natuwal si Eli sa tukawan niya sa gilid kan trangkahan. Nabari an saiyang liog asin nagadan, huli ta gurang na siya saka magabat. Nagin hukom siya sa Israel sa laog nin 40 taon. 19 Bados an manugang ni Eli, an agom ni Finehas, asin madali nang mangaki. Kan mabaretaan niyang naagaw an Kaban kan tunay na Diyos asin nagadan an panugangan niya saka an saiyang agom, napahukro siya tapos biglang nagbatyag* asin nangaki. 20 Kan naghihingagdan na siya, sinabihan siya kan mga babaying nakatindog sa kataid niya: “Dai ka matakot, ta nangaki ka nin lalaki.” Dai siya nagsimbag asin dai niya iyan pig-intindi.* 21 Alagad pinangaranan niya an umboy nin Icabod,*+ asin nagsabi: “Nawara an kamurawayan sa Israel asin dinara sa pagkabihag.”*+ An pinanunungdan niya iyo an pagkaagaw kan Kaban kan tunay na Diyos asin an nangyari sa saiyang panugangan saka sa saiyang agom.+ 22 Sinabi niya: “Nawara an kamurawayan sa Israel asin dinara sa pagkabihag,* huli ta naagaw an Kaban kan tunay na Diyos.”+