Ezekiel

39 “Asin ika, aki nin tawo, magpropesiya ka laban ki Gog,+ asin sabihan mo siya, ‘Ini an sinabi kan Soberanong Kagurangnan na Jehova: “Mahiro ako laban saimo, Gog, na panginot na pamayo* kan Mesec saka Tubal.+ 2 Papabirikon taka asin gigiyahan, asin papatukadon taka hali sa pinakahararayong parte kan norte+ saka dadarahon sa mga bukid kan Israel. 3 Rarapason ko an busog sa wala mong kamot asin an mga pana sa tuo mong kamot para mabutasan mo an mga iyan. 4 Mabagsak ka sa mga bukid kan Israel,+ ika asin an gabos mong hukbo saka an mga banwaan na maiba sa saimo. Ipapakakan taka sa gabos na klase nin gamgam na nananaklot saka sa mababangis na hayop sa kalangtadan.”’+

5 “‘Mabagsak ka sa kalangtadan,+ huli ta ako mismo an nagsabi kaiyan,’ an sabi kan Soberanong Kagurangnan na Jehova.

6 “‘Asin mapaabot ako nin kalayo laban sa Magog asin sa mga nag-iistar nin tiwasay sa mga isla,+ asin mamimidbid nanggad ninda na ako si Jehova. 7 Ipapamidbid ko an banal kong pangaran sa sakuyang banwaan na Israel, asin dai ko na tutugutan na malapastangan pa an sakuyang banal na pangaran; asin mamimidbid nanggad kan mga nasyon na ako si Jehova,+ an Banal na Diyos* sa Israel.’+

8 “‘Iyo, nagdadangadang na ini, asin mangyayari ini,’ an sabi kan Soberanong Kagurangnan na Jehova. ‘Ini an aldaw na sinasabi ko. 9 An mga nakaistar sa mga siyudad kan Israel maruluwas asin mapalaad nin kalayo gamit an mga armas—an mga pansagang* saka mga kalasag, an mga busog saka mga pana, an mga pambadol na panggiyera* saka mga garod.* Asin gagamiton ninda an mga iyan na panggatong+ sa laog nin pitong taon. 10 Dai ninda kakaipuhanon na mangua nin kahoy sa kalangtadan o nin panggatong sa mga kadlagan dahil an mga armas an gagamiton nindang panggatong.’

“‘Sasamsaman ninda an mga nanamsam saka nanghabon sa sainda,’ an sabi kan Soberanong Kagurangnan na Jehova.

11 “‘Sa aldaw na iyan, tatawan ko si Gog+ nin lubungan duman sa Israel, sa kababan na inaagihan kan mga nagbabaklay sa sirangan kan dagat, asin mauulangan kaiyan an agihan kan mga nagbabaklay. Diyan ninda ilulubong si Gog saka an gabos niyang tawuhan, asin aapudon ninda iyan na Kababan nin Hamon-Gog.*+ 12 Aabuton nin pitong bulan an banwaan* nin Israel sa paglubong sa sainda tanganing magin malinig an daga.+ 13 An gabos na tawo sa daga matabang sa paglubong sa sainda, asin magigin bantog sinda dahil kaiyan sa aldaw na pamurawayon ko na an sakong sadiri,’+ an sabi kan Soberanong Kagurangnan na Jehova.

14 “‘May aasignaran na mga lalaki na padagos na maglibot sa kadagaan asin maglubong kan mga bangkay na nagkatarada sa ibabaw kan daga, tanganing magin malinig iyan. Pitong bulan sindang padagos na mahanap. 15 Pag an mga naglilibot sa kadagaan makahiling nin tulang nin tawo, mabugtak sinda nin senyal sa may gilid kaiyan. Dangan an mga nakaasignar na maglubong ilulubong iyan sa Kababan nin Hamon-Gog.+ 16 Asin magkakaigwa man duman nin sarong siyudad na an pangaran Hamona.* Asin lilinigon ninda an daga.’+

17 “Kun manungod saimo, aki nin tawo, ini an sinabi kan Soberanong Kagurangnan na Jehova: ‘Sabihon mo sa lambang klase nin gamgam saka sa gabos na mababangis na hayop sa kalangtadan, “Magtiripon kamo asin magdigdi. Magtiripon kamo sa palibot kan atang ko na pig-aandam ko para sa saindo, sarong dakulang atang sa mga bukid kan Israel.+ Makakan kamo nin laman asin mainom nin dugo.+ 18 Kakakanon nindo an laman kan mga makukusog asin iinumon an dugo kan mga pamayo kan daga—an mga lalaking karnero, mga kordero, mga kanding, asin mga torong baka—an gabos na pinatabang hayop kan Basan. 19 Mapagutid kamo sa taba, saka iinumon nindo an dugo kan atang na pig-andam ko para sa saindo sagkod sa maburat kamo.”’

20 “‘Sa lamesa ko, mababasog kamo nin mga kabayo saka mga parakarwahe, nin mga makukusog saka nin gabos na klase nin parapakilaban,’+ an sabi kan Soberanong Kagurangnan na Jehova.

21 “‘Ipapahiling ko an kamurawayan ko sa tahaw kan mga nasyon, asin mahihiling kan gabos na nasyon an paghukom na isinagibo ko saka an kapangyarihan* na ginamit ko sa tahaw ninda.+ 22 Puon sa aldaw na iyan, mamimidbid nanggad kan banwaan nin Israel na ako si Jehova na saindang Diyos. 23 Asin maaaraman nanggad kan mga nasyon na an banwaan nin Israel puwersahan na dinara sa ibang nasyon dahil sa sadiri nindang pagkakasala, huling dai sinda nagin maimbod sa sako.+ Kaya itinago ko an lalawgon ko sa sainda+ asin itinao ko sinda sa mga kaiwal ninda,+ asin gabos sinda buminagsak paagi sa espada. 24 Trinatar ko sinda sigun sa saindang kaatian saka sa saindang mga paglapas, asin itinago ko an lalawgon ko sa sainda.’

25 “Kaya ini an sinabi kan Soberanong Kagurangnan na Jehova: ‘Ibabalik ko sa daga ninda an mga nabihag sa Jacob+ asin kakahirakan ko an bilog na banwaan nin Israel;+ asin maigot kong idedepensa an* sakuyang banal na pangaran.+ 26 Pakatapos na mapasupog sinda dahil sa pagigin bakong maimbod sa sako,+ maistar sinda nin tiwasay sa saindang daga, asin mayo nin siisay man na matakot sa sainda.+ 27 Pag ibinalik ko na sinda hali sa mga banwaan asin tiniripon hali sa kadagaan kan saindang mga kaiwal,+ papabanalon ko man sa tahaw ninda an sadiri ko sa atubangan kan dakul na nasyon.’+

28 “‘Mamimidbid nanggad ninda na ako si Jehova na saindang Diyos pag ipinadara ko sindang bihag* sa mga nasyon dangan tiripunon ko sinda asin ibalik sa daga ninda, na dai nin siisay man na iwinawalat.+ 29 Dai ko na itatago sa sainda an lalawgon ko,+ huli ta ibububo ko sa banwaan nin Israel an sakong espiritu,’+ an sabi kan Soberanong Kagurangnan na Jehova.”