An Inot na Surat ni Juan

2 Mga namumutan* kong aki, sinusuratan ko kamo kan mga bagay na ini tanganing dai kamo makagibo nin kasalan. Alagad ta kun makagibo man nin kasalan an siisay man, igwa kita nin paratabang* na kaibanan kan Ama, si Jesu-Cristo,+ na sarong matanos.+ 2 Asin siya sarong pampagian nin buot na atang+ para* sa satong mga kasalan,+ pero bako lang para sa satong mga kasalan kundi para man sa bilog na kinaban.+ 3 Asin sa paaging ini napapatunayan ta sa satong sadiri na namidbid na niyato siya—kun padagos tang inuutob an saiyang mga tugon. 4 An saro na nagsasabi, “Namidbid ko na siya,” pero dai man nag-uutob kan saiyang mga tugon sarong putikon, asin an katotoohan mayo sa tawong ini. 5 Alagad kun an saro nag-uutob kan saiyang tataramon, nahihiling sa tawong iyan an lubos na pagkamuot sa Diyos.+ Sa arog ta man kaiyan na paagi maaaraman na kita kasaro niya.+ 6 An siisay man na nagsasabi na siya nagdadanay na kasaro niya, siya may obligasyon na padagos na maglakaw arog kan paglakaw kan sarong idto.+

7 Mga namumutan, sinusuratan ko kamo, bako nin sarong bagong tugon, kundi nin sarong haloy nang tugon na yaon na sa saindo puon pa sa kapinunan.+ An haloy nang tugon na ini iyo an tataramon na nadangog nindo. 8 Dawa arog kaiyan, sinusuratan ko kamo nin bagong tugon, na totoo sa kamugtakan niya saka sa kamugtakan nindo, huli ta an kadikluman pawara na asin an tunay na ilaw nagliliwanag na.+

9 An saro na nagsasabing siya nasa liwanag pero nauungis+ sa saiyang tugang yaon pa man giraray sa kadikluman.+ 10 An saro na namumuot sa saiyang tugang nagdadanay sa liwanag,+ asin mayo nin ano man na makakapasingkog sa saiya.* 11 Pero an saro na nauungis sa saiyang tugang nasa kadikluman asin naglalakaw sa kadikluman,+ asin dai niya aram kun sain siya paduman,+ huling binuta kan kadikluman an saiyang mga mata.

12 Sinusuratan ko kamo, mga namumutan* na aki, huling pinatawad na kamo sa saindong mga kasalan alang-alang sa saiyang pangaran.+ 13 Sinusuratan ko kamo, mga ama, huling namidbid nindo siya, an saro na nag-eeksister magpuon pa sa kapinunan. Sinusuratan ko kamo, mga hoben na lalaki, huling dinaog nindo an saro na maraot.+ Sinusuratan ko kamo, mga aki, huling namidbid nindo an Ama.+ 14 Sinusuratan ko kamo, mga ama, huling namidbid nindo siya, an saro na nag-eeksister magpuon pa sa kapinunan. Sinusuratan ko kamo, mga hoben na lalaki, huling kamo mga makusog+ asin an tataramon nin Diyos nagdadanay sa saindo+ saka dinaog nindo an saro na maraot.+

15 Dai kamo mamuot sa kinaban o sa mga bagay na yaon sa kinaban.+ Kun an siisay man namumuot sa kinaban, mayo siya nin pagkamuot sa Ama;+ 16 huli ta an gabos na yaon sa kinaban—an kamawutan kan laman+ asin an kamawutan kan mga mata+ saka an pagpasikat* nin saro kan mga bagay na igwa siya—bakong gikan sa Ama, kundi gikan sa kinaban. 17 Siring man, an kinaban mapapara pati na an kamawutan kaiyan,+ alagad an saro na naggigibo kan kabutan nin Diyos magdadanay sagkod lamang.+

18 Mga aki, iyo na ini an huring oras, asin arog kan nadangog nindo, maabot an anticristo,+ pero maski ngunyan dakul nang anticristo an nagralataw,+ na dahil diyan aram tang iyo na ini an huring oras. 19 Nagruluwas sinda hali sa sato, pero bako sindang kabilang sa sato;*+ ta kun kabilang sinda sa sato, nagdanay kuta sindang kaiba ta. Alagad nagruluwas sinda tanganing mahayag na bakong gabos kabilang sa sato.+ 20 Asin linahidan* kamo kan Banal na Diyos,*+ asin kamo gabos igwa nin kaaraman. 21 Sinusuratan ko kamo, bakong dahil dai nindo aram an katotoohan,+ kundi dahil aram nindo iyan, asin dahil mayong kaputikan na naggigikan sa katotoohan.+

22 Siisay an putikon? Bako daw na iyo idtong dai minimidbid na si Jesus iyo an Cristo?+ Ini an anticristo,+ an saro na dai minimidbid an Ama asin an Aki. 23 An gabos na dai minimidbid an Aki mayo kan pag-uyon kan Ama.+ Pero an siisay man na minimidbid an Aki+ igwa kan pag-uyon kan Ama.+ 24 Kun manungod sa saindo, dapat na magdanay sa saindo idtong nadangog nindo sa kapinunan.+ Kun idtong nadangog nindo sa kapinunan nagdadanay sa saindo, magdadanay man kamo na kasaro kan Aki asin kasaro kan Ama. 25 Apuwera kaiyan, ini an ipinanuga niya mismo sa sato—an buhay na daing katapusan.+

26 Sinusuratan ko kamo kan mga bagay na ini manungod sa mga naghihinguwang ilagalag kamo. 27 Asin kun manungod sa saindo, an paglahid na inako nindo hali sa saiya+ nagdadanay sa saindo, asin dai nindo kaipuhan an siisay man para tukduan kamo; kundi an ginibo niyang paglahid iyo an nagtutukdo sa saindo kan gabos na bagay,+ asin totoo iyan saka bakong kaputikan. Arog kan itinukdo kaiyan sa saindo, magdanay kamo na kasaro niya.+ 28 Kaya ngunyan, mga namumutan* na aki, magdanay kamo na kasaro niya, tanganing pag siya ihinayag na, libre kitang makapagtaram+ asin dai kita rumayo sa saiya dahil sa kasusupgan sa panahon kan saiyang presensiya. 29 Kun aram nindo na siya matanos, aram man nindo na an lambang saro na nagsasagibo nin katanusan iminundag gikan sa saiya.+