Ezekiel

6 Nag-abot giraray sa sako an tataramon ni Jehova, na sinasabi: 2 “Aki nin tawo, mag-atubang ka sa mga bukid kan Israel asin magpropesiya ka laban sa sainda. 3 Sabihon mo, ‘O mga bukid kan Israel, danguga an mensahe kan Soberanong Kagurangnan na Jehova: Ini an sinabi kan Soberanong Kagurangnan na Jehova sa mga bukid, sa mga bulod, sa mga sapa, saka sa mga kababan: “Uya! Madara ako nin espada laban sa saindo, asin lalaglagon ko an saindong mga halangkaw na lugar. 4 Rarauton an saindong mga altar saka an saindong mga pigsusuluan nin insenso,+ asin an mga ginaradan sa saindo iaapon ko sa atubangan kan saindong mga makababalding idolo.*+ 5 Iaapon ko an mga bangkay kan banwaan nin Israel sa atubangan kan saindang mga makababalding idolo, asin iwawarak ko an mga tulang nindo sa palibot kan saindong mga altar.+ 6 Sa gabos na lugar na pig-iistaran nindo, an mga siyudad lalaglagon+ asin an mga halangkaw na lugar rarauton asin magigin tiwangwang.+ Rarauton asin paparasaon an saindong mga altar, mawawara an saindong mga makababalding idolo, pupurutulon an saindong pigsusuluan nin mga insenso, asin mapapara an saindong mga gibo. 7 Asin an mga ginaradan mabaragsak sa tahaw nindo,+ asin mamimidbid nanggad nindo na ako si Jehova.+

8 “‘“Pero papabayaan kong may matada, huling an iba sa saindo makakadulag sa espada sa mga nasyon pag iwinararak kamo sa kadagaan.+ 9 Asin an mga makakadulag magigirumduman ako sa mga nasyon kun sain sinda dinarang bihag.+ Maiisip ninda na nakulgan an buot ko dahil sa saindang bakong maimbod* na puso na ruminayo sa sako+ saka dahil sa saindang mga mata na may grabeng pagmawot* sa saindang mga makababalding idolo.+ Ikakasupog ninda asin ikakabaldi an gabos na maraot saka makababalding bagay na ginibo ninda.+ 10 Mamimidbid nanggad ninda na ako si Jehova asin maaaraman nanggad ninda na an pagpatanid ko manungod sa pagpaabot kan kapahamakan na ini sa sainda bakong basang sana.”’+

11 “Ini an sinabi kan Soberanong Kagurangnan na Jehova: ‘Magpalakpak ka saka magparagpadag, asin mag-agrangay ka dahil sa gabos na maraot saka makababalding bagay na ginibo kan banwaan* nin Israel, huli ta magagadan sinda paagi sa espada, sa tiggutom, asin sa damat.+ 12 An nasa harayo magagadan paagi sa damat, an nasa harani magagadan paagi sa espada, asin an siisay man na makakadulag diyan saka matatada magagadan paagi sa tiggutom; asin biyo kong iluluwas an sakuyang grabeng kaanggutan sa sainda.+ 13 Asin mamimidbid nanggad nindo na ako si Jehova,+ pag an mga ginadan sa sainda nakabulagta na kaiba kan saindang mga makababalding idolo, sa palibot kan saindang mga altar,+ sa itaas kan lambang halangkaw na bulod, sa ibabaw kan gabos na kabukidan, sa sirong kan lambang marambong na kahoy, asin sa sirong kan mga sanga kan mga darakulang kahoy kun sain sinda nag-atang nin mga mahamot na dulot* para paugmahon an gabos nindang makababalding idolo.+ 14 Uunaton ko an sakuyang kamot laban sa sainda asin gigibuhon kong tiwangwang an kadagaan, asin an gabos na pig-iistaran ninda magigin mas tiwangwang pa kisa sa kaawagan na harani sa Dibla. Asin mamimidbid nanggad ninda na ako si Jehova.’”