Ikaduwang Cronica

33 An edad ni Manases+ kan siya magin hadi 12 anyos, asin namahala siya sa Jerusalem sa laog nin 55 taon.+

2 Ginibo niya kun ano an maraot sa paghiling ni Jehova; inarog niya an makababalding mga gibo-gibo kan mga nasyon na pinalayas ni Jehova sa atubangan kan banwaan nin Israel.+ 3 Itinugdok niya giraray an mga halangkaw na lugar na ginaba kan saiyang ama na si Hezekias,+ naggibo siya nin mga altar para sa mga Baal saka nagpatindog nin mga sagradong poste,* asin nagduko siya sa bilog na hukbo sa kalangitan* asin naglingkod sa mga ini.+ 4 Naggibo man siya nin mga altar sa harong ni Jehova,+ na manungod diyan sinabi ni Jehova: “Sa Jerusalem magdadanay an sakong pangaran sagkod lamang.”+ 5 Asin sa laog kan duwang patyo kan harong ni Jehova,+ naggibo siya nin mga altar para sa bilog na hukbo sa kalangitan.* 6 Asin sinulo niya an sadiri niyang mga aki bilang atang*+ duman sa Kababan kan Aki ni Hinom;+ nagsagibo siya nin mahika,+ panghuhula, saka pangkukulam, asin nagtalaga nin mga espiritista saka mga parahula.+ Dakulon an ginibo niyang maraot sa paghiling ni Jehova tanganing paangguton siya.

7 An inukit na imahen na saiyang ginibo ibinugtak niya sa laog kan harong kan tunay na Diyos+ na manungod diyan sinabi nin Diyos ki David saka sa aki kaining si Solomon: “Sa harong na ini asin sa Jerusalem, na pinili ko sa gabos na tribo nin Israel, permanente kong ibubugtak an sakong pangaran.+ 8 Asin dai ko na nuarin man hahalion giraray an mga bitis kan Israel sa daga na itinao ko sa saindang mga apuon, basta maingat nindang susunudon an gabos na ipinagbuot ko sa sainda, an bilog na Katugunan, an mga regulasyon saka an mga ipinapautob na desisyon* na itinao ko paagi ki Moises.” 9 Padagos na ilinagalag ni Manases an Juda asin an mga nag-iistar sa Jerusalem, na huli kaiyan ginibo ninda an mas maraot pa kisa sa ginibo kan mga nasyon na pinuho ni Jehova sa atubangan kan mga Israelita.+

10 Padagos na nakipag-ulay si Jehova ki Manases asin sa saiyang banwaan, pero dai sinda nagtaong atensiyon.+ 11 Kaya pinasalakay ni Jehova laban sa sainda an mga namamayo nin hukbo kan hadi kan Asiria, asin nadakop ninda si Manases gamit an mga kawit* asin kinadenahan siya nin duwang kadenang tanso asin dinara siya sa Babilonya. 12 Kan nasasakitan na siyang marhay, nakimahirak siya ki Jehova na saiyang Diyos* asin padagos siyang nagpakumbabang marhay sa atubangan kan Diyos kan saiyang mga apuon. 13 Padagos siyang namibi sa Saiya, asin napahiro Siya kan pakimahirak niya asin dinangog an saiyang pakiulay, asin ibinalik Niya siya sa pagigin hadi sa Jerusalem.+ Dangan namidbid ni Manases na si Jehova an tunay na Diyos.+

14 Pagkatapos kaini, nagtugdok siya para sa Siyudad ni David+ nin pader sa luwas, sa sulnupan kan Gihon+ sa may kababan.* Ipinadagos pa niya an pader asin pinaagi niya ini sa gilid kan Ofel+ sagkod na makaabot sa Trangkahan nin Sira,+ asin linangkawan niya ining marhay. Nagtalaga man siya nin mga namamayo nin hukbo sa gabos na may matibay na depensang siyudad sa Juda. 15 Dangan hinarali niya an mga diyos kan ibang mga nasyon saka an imahen na idolo na nasa harong ni Jehova+ asin an gabos na altar na ginibo niya sa bukid kan harong ni Jehova+ asin sa Jerusalem, tapos ipinaapon niya an mga iyan sa luwas kan siyudad. 16 Inandam man niya an altar ni Jehova+ asin pinunan niyang magdulot diyan nin mga atang sa pakikikabtang+ saka mga atang nin pasasalamat,+ dangan sinabi niya sa Juda na paglingkudan si Jehova na Diyos kan Israel. 17 Alagad, dawa ngani ki Jehova sana na saindang Diyos nag-aatang an banwaan, sa mga halangkaw na lugar pa man giraray ninda iyan ginigibo.

18 Kun manungod sa iba pang nangyari sa buhay ni Manases, an pamibi niya sa saiyang Diyos, asin an mga sinabi sa saiya kan mga bisyonaryo na nakipag-ulay sa saiya sa ngaran ni Jehova na Diyos kan Israel, nakasurat iyan sa kasaysayan kan mga hadi kan Israel. 19 Siring man, an pamibi niya+ saka kun paano sinimbag an saiyang pakimahirak, an gabos niyang kasalan saka pagigin bakong maimbod,+ an mga lugar kun sain siya nagtugdok nin mga halangkaw na lugar saka nagpatindog nin mga sagradong poste*+ asin nagbugtak nin mga inukit na imahen kaidtong bago siya nagpakumbaba, nakasurat iyan sa mga isinurat* kan saiyang mga bisyonaryo. 20 Dangan nagadan* si Manases, asin ilinubong ninda siya sa saiyang harong; asin si Amon na saiyang aki an nagsalida sa saiya bilang hadi.+

21 An edad ni Amon+ kan siya magin hadi 22 anyos, asin namahala siya sa Jerusalem sa laog nin duwang taon.+ 22 Asin padagos niyang ginibo kun ano an maraot sa paghiling ni Jehova, arog kan ginibo ni Manases na saiyang ama;+ asin nag-atang si Amon sa gabos na inukit na imahen na ginibo kan saiyang amang si Manases,+ asin padagos siyang naglingkod sa mga iyan. 23 Pero dai siya nagpakumbaba sa atubangan ni Jehova+ arog kan ginibong pagpakumbaba ni Manases na saiyang ama;+ imbes, pigparadagdagan pa ni Amon an saiyang pagkakasala. 24 Pag-abot nin panahon, nagkurumplutan laban sa saiya+ an saiyang mga lingkod asin ginadan siya sa saiya mismong harong. 25 Pero ginaradan kan mga namamanwaan* an gabos na nakipagkumplutan laban ki Hading Amon,+ asin ginibo ninda bilang kasalidang hadi an saiyang aki na si Josias.+