Jeremias

36 Kan ikaapat na taon kan hadi kan Juda na si Jehoiakim+ na aki ni Josias, uminabot an tataramon na ini ki Jeremias hali ki Jehova, na an sabi: 2 “Kumua ka nin sarong rolyo* asin isurat mo diyan an gabos na sinabi ko sa saimo laban sa Israel asin Juda+ asin sa gabos na nasyon,+ puon kan inot na aldaw na makipag-ulay ako sa saimo kan panahon ni Josias sagkod sa aldaw na ini.+ 3 Tibaad pag madangog kan mga kabilang sa banwaan* nin Juda an gabos na kapahamakan na napagdesisyunan ko nang ipaabot sa sainda, talikdan ninda an maraot nindang mga dalan, tanganing patawadon ko sinda sa saindang pagkakasala asin kasalan.”+

4 Dangan inapod ni Jeremias si Baruc+ na aki ni Nerias, asin idinikta ni Jeremias an gabos na tataramon na sinabi ni Jehova sa saiya, asin isinurat iyan ni Baruc sa rolyo.*+ 5 Pagkatapos, ipinagbuot ni Jeremias ki Baruc: “Dai ako makalaog sa harong ni Jehova ta pinagbawalan ako. 6 Kaya ika an maglaog asin basahon mo nin makusog sa rolyo an idinikta kong mga tataramon ni Jehova na isinurat mo. Basahon mo iyan nin makusog sa atubangan kan banwaan sa harong ni Jehova sa aldaw nin pag-ayuno; sa siring, mababasa mo iyan sa gabos na taga Juda na maarabot hali sa mga siyudad ninda. 7 Tibaad makaabot ki Jehova an pakimahirak ninda, asin talikdan kan lambang saro sa sainda an maraot niyang mga dalan, huling dakula an kaanggutan asin pagkaungis na ipinahayag ni Jehova laban sa banwaan na ini.”

8 Kaya ginibo ni Baruc na aki ni Nerias an gabos na ipinagbuot sa saiya ni Jeremias na propeta; binasa niya nin makusog sa rolyo* an mga tataramon ni Jehova duman sa harong ni Jehova.+

9 Kan ikasiyam na bulan kan ikalimang taon kan hadi kan Juda na si Jehoiakim+ na aki ni Josias, nagdeklarar nin pag-ayuno sa atubangan ni Jehova an bilog na banwaan na yaon sa Jerusalem asin an bilog na banwaan na nag-arabot sa Jerusalem hali sa mga siyudad kan Juda.+ 10 Dangan binasa ni Baruc nin makusog sa rolyo* an mga tataramon ni Jeremias duman sa harong ni Jehova, sa kuwarto* ni Gemarias+ na aki ni Safan+ na parakopya,* sa itaas na patyo, sa may entrada kan bagong trangkahan kan harong ni Jehova,+ sa atubangan kan bilog na banwaan.

11 Kan madangog ni Micaias na aki ni Gemarias na aki ni Safan an gabos na tataramon ni Jehova na nasa rolyo,* 12 nagbaba siya pasiring sa harong* kan hadi, sa kuwarto kan sekretaryo. Nakatukaw duman an gabos na halangkaw na opisyal:* si Elisama+ na sekretaryo, si Delaias na aki ni Semaias, si Elnatan+ na aki ni Acbor,+ si Gemarias na aki ni Safan, si Zedekias na aki ni Hananias, asin an gabos na iba pang halangkaw na opisyal.* 13 Sinabi ni Micaias sa sainda an gabos na tataramon na nadangog niya kan basahon ni Baruc an rolyo* sa atubangan kan banwaan.

14 Dangan isinugo kan gabos na halangkaw na opisyal* si Jehudi na aki ni Netanias na aki ni Selemias na aki ni Cusi na dumanan si Baruc asin sabihon sa saiya: “Magdigdi ka asin daraha an rolyo na binasa mo sa atubangan kan banwaan.” Dinara ni Baruc na aki ni Nerias an rolyo asin nagpasiring sa sainda. 15 Sinabi ninda sa saiya: “Tukaw ka tabi, asin basahon mo iyan sa samo nin makusog.” Kaya binasa iyan ni Baruc sa sainda.

16 Kan madangog ninda an gabos na tataramon, napahiling sinda sa kada saro huli sa grabeng takot, asin sinabi ninda ki Baruc: “Dapat mi nanggad na sabihon sa hadi an gabos na tataramon na ini.” 17 Asin hinapot ninda si Baruc: “Sabiha tabi samo kun paano mo naisurat an gabos na tataramon na ini. Idinikta niya ini saimo?” 18 Nagsimbag sa sainda si Baruc: “Idinikta niya sa sako an gabos na tataramon na ini, asin isinurat ko an mga iyan sa rolyong* ini paagi sa tinta.” 19 Sinabi kan mga halangkaw na opisyal* ki Baruc: “Dali, magtago kamo ni Jeremias, asin dai nindo pagsabihon maski kiisay kun hain kamo.”+

20 Dangan ilinaag ninda an rolyo sa kuwarto ni Elisama na sekretaryo, asin nagpasiring sinda sa hadi, sa may patyo, asin sinabi ninda sa hadi an gabos na nadangog ninda.

21 Kaya isinugo kan hadi si Jehudi+ na kuanon an rolyo, asin dinara niya iyan hali sa kuwarto ni Elisama na sekretaryo. Binasa iyan ni Jehudi sa atubangan kan hadi asin kan gabos na halangkaw na opisyal* na nakatindog kataid kan hadi. 22 Ikasiyam na bulan* kaidto asin nakatukaw an hadi sa laog kan harong para sa tiglipot, sa atubangan kan bagahan na may naglalaad na kalayo. 23 Kada matapos basahon ni Jehudi an tulo o apat na kolum kan mga nakasurat, tinatabas kan hadi an porsiyon na iyan kan rolyo gamit an kutsilyo kan sekretaryo asin iniitsa iyan sa bagahan na may naglalaad na kalayo, sagkod na maubos na maiitsa sa kalayo an bilog na rolyo. 24 Asin dai sinda nakamati nin pagkatakot; dai ginisi kan hadi asin kan gabos niyang lingkod, na nakadangog kan gabos na tataramon na ini, an saindang bado. 25 Dawa nakiulay sa hadi si Elnatan,+ Delaias,+ asin Gemarias+ na dai pagsuluon an rolyo, dai siya nagdangog sa sainda. 26 Isinugo pa ngani kan hadi si Jerameel na aki* kan hadi, si Seraias na aki ni Azriel, asin si Selemias na aki ni Abdeel na dakupon si Baruc na sekretaryo asin si Jeremias na propeta, pero itinago sinda ni Jehova.+

27 Asin uminabot giraray ki Jeremias an tataramon ni Jehova pagkatapos na suluon kan hadi an rolyo na sinuratan ni Baruc kan mga tataramon na idinikta sa saiya ni Jeremias,+ na an sabi: 28 “Kumua ka nin saro pang rolyo, asin isurat mo diyan an gabos na tataramon na yaon sa inot na rolyo, na sinulo ni Hading Jehoiakim kan Juda.+ 29 Asin sabihon mo laban ki Hading Jehoiakim kan Juda, ‘Ini an sabi ni Jehova: “Sinulo mo su rolyo asin sinabi mo, ‘Taano ta isinurat mo diyan: “Siguradong maabot an hadi kan Babilonya asin lalaglagon an dagang ini asin mayong itatadang tawo saka hayop digdi”?’+ 30 Kaya ini an sabi ni Jehova laban ki Hading Jehoiakim kan Juda, ‘Mayo nin siisay man sa mga gikan niya an matukaw sa trono ni David,+ asin an saiyang bangkay babayaan na nakabantad sa init kun aldaw asin sa lipot kun banggi.+ 31 Papanimbagon ko siya asin an mga gikan* niya asin an mga lingkod niya sa pagkakasala ninda, asin ipapaabot ko sa sainda asin sa mga nag-iistar sa Jerusalem saka sa mga taga Juda an gabos na kapahamakan na sinabi ko laban sa sainda+ pero dai ninda dinangog.’”’”+

32 Dangan nagkua si Jeremias nin saro pang rolyo asin itinao iyan ki Baruc na sekretaryo na aki ni Nerias,+ asin mantang idinidikta ni Jeremias, isinurat niya diyan an gabos na tataramon na yaon sa rolyong* sinulo ni Hading Jehoiakim kan Juda.+ Asin dakul pang tataramon na kapareho kan sa inot na isinurat an idinagdag.