Ezekiel

1 Kan ika-30 taon, kan ikalimang aldaw kan ikaapat na bulan, mantang yaon ako sa may salog nin Kebar+ kaibanan kan banwaan na puwersahan na kinua sa sadiring nasyon,*+ nabuksan an kalangitan asin nagpuon akong makahiling nin mga bisyon hali sa Diyos.* 2 Kan ikalimang aldaw kan bulan—kan ikalimang taon puon kan puwersahan na kuanon si Hading Jehoiakin+— 3 uminabot an tataramon ni Jehova ki Ezekiel* na aki ni Buzi na saserdote mantang nasa may salog siya nin Kebar sa daga kan mga Caldeo.+ Nag-abot sa saiya duman an kapangyarihan* ni Jehova.+

4 May nahiling akong makusugon na duros+ hali sa norte, asin igwang dakulaon na panganuron saka nagsisilyab na kalayo*+ na napapalibutan nin maliwanagon na liwanag, asin sa tahaw kan kalayo igwa nin garo elektrum.*+ 5 Sa tahaw kaiyan igwa nin garo apat na buhay na linalang,+ asin an itsura kan kada saro kaagid nin tawo. 6 An kada saro may apat na lalawgon* saka apat na pakpak.+ 7 Tanos an saindang mga bitis, saka an mga rapan-dapan kan saindang mga bitis kapareho kan sa ugbon na baka, asin nagkikinang an mga iyan arog nin pinakintab na tanso.+ 8 Igwa sindang mga kamot nin tawo sa irarom kan saindang mga pakpak sa apat na tagiliran ninda, asin sindang apat igwa nin mga lalawgon saka mga pakpak. 9 Nagdudutaan* an saindang mga pakpak. Dai sinda minabirik pag nag-aabante sinda; an kada saro sa sainda diretso lang an direksiyon.+

10 Arog kaini an itsura kan mga lalawgon ninda: An kada saro sa apat may lalawgon nin tawo, may lalawgon nin leon+ sa tuo, may lalawgon nin torong baka+ sa wala, asin an kada saro sa apat may lalawgon nin agila.+ 11 Arog kaiyan an mga lalawgon ninda. An saindang mga pakpak nakabuka paitaas. An kada saro igwa nin duwang pakpak na nagdudutaan asin nin duwang pakpak na nagtatahob sa saindang hawak.*+

12 An kada saro sa sainda diretso lang an direksiyon, asin minaduman sinda sain man sinda giyahan kan espiritu.+ Dai sinda minabirik pag nag-aabante sinda. 13 Asin an mga buhay na linalang garo naglalaad na mga baga, asin igwang garo mga karaba na may maliwanagon na kalayo na nagpapabalik-balik sa pag-ultanan kan mga buhay na linalang, asin may kikilat na nagsisilyab hali sa kalayo.+ 14 Asin pag an mga buhay na linalang minahali asin minabalik, garo sinda mga kikilat.

15 Mantang pinagmamasdan ko an mga buhay na linalang, nakahiling ako nin sarong ruweda sa daga sa kataid kan kada saro sa mga buhay na linalang na may apat na lalawgon.+ 16 An mga ruweda garo nagliliwanag arog nin krisolito, asin parareho an itsura kan apat. An itsura saka an pagkagibo kan mga iyan garo sarong ruweda na nasa saro pang ruweda.* 17 Pag naghihiro an mga iyan, kaya kan mga iyan na magpasiring sa arin man sa apat na direksiyon na dai minabirik. 18 Halangkawon na marhay an mga ruweda kaya makangangalas nanggad an mga iyan, asin an mga rim kan apat pano nin mga mata sa palibot.+ 19 Kada minahiro an mga buhay na linalang, minasabay sa sainda an mga ruweda, asin pag an mga buhay na linalang minapaitaas hali sa daga, minapaitaas man an mga ruweda.+ 20 Minaduman sinda kun sain sinda giyahan kan espiritu, sain man magduman an espiritu. Minapaitaas an mga ruweda kasabay ninda, huli ta an espiritu na naghihiro sa mga buhay na linalang* yaon man sa mga ruweda. 21 Pag minahiro sinda, minahiro an mga ini; asin pag minapundo sinda, minapundo an mga ini; asin pag minapaitaas sinda hali sa daga, minapaitaas an mga ruweda kasabay ninda, huli ta an espiritu na naghihiro sa mga buhay na linalang yaon man sa mga ruweda.

22 Sa may itaas kan mga payo kan mga buhay na linalang igwa nin garo mahiwas na salóg na nagkikintab arog nin makangangalas na yelo, na nakalatag sa may ibabaw kan saindang mga payo.+ 23 Sa sirong kan mahiwas na salóg, an saindang mga pakpak nakaunat paitaas* asin nagdudutaan. An kada saro may duwang pakpak na ipinantatahob sa sarong parte kan saindang hawak asin duwa pang pakpak na ipinantatahob sa ibong na parte. 24 Kan madangog ko an tanog kan mga pakpak ninda, garo iyan tanog nin nagraragasang tubig, arog kan boses kan Makakamhan sa Gabos.+ Pag minahiro sinda, garo iyan tanog nin sarong hukbo. Pag minapundo sinda, ibinababa ninda an saindang mga pakpak.

25 May boses na hali sa ibabaw kan mahiwas na salóg na nasa may itaas kan mga payo ninda. (Pag minapundo sinda, ibinababa ninda an saindang mga pakpak.) 26 Sa ibabaw kan mahiwas na salóg na nasa may itaas kan mga payo ninda igwa nin garo gapong sapiro,+ asin garo iyan sarong trono.+ Asin sa trono na nasa ibabaw may nakatukaw na an itsura garo tawo.+ 27 May nahiling akong nagliliwanag na garo elektrum+ na kaagid nin kalayo na naglalaad puon sa garo habayan* niya paitaas; asin puon sa habayan niya paibaba, may nahiling akong garo kalayo.+ May maliwanagon na liwanag sa palibot niya 28 na arog nin bulalangaw*+ sa panganuron sa sarong mauran na aldaw. Arog kaiyan an itsura kan nakapalibot na maliwanagon na liwanag. Kapareho iyan kan kamurawayan ni Jehova.+ Kan mahiling ko iyan, suminubsob ako asin nadangog ko an boses kan saro na nagtataram.