Ezekiel

11 Asin iinitaas ako nin sarong espiritu tapos dinara ako sa sirangan na trangkahan kan harong ni Jehova, an trangkahan na nakaatubang sa sirangan.+ Sa may entrada kan trangkahan, may nahiling akong 25 lalaki, asin kaiba sa sainda si Jaazanias na aki ni Azur saka si Pelatias na aki ni Benaias, na mga pamayo* kan banwaan.+ 2 Dangan sinabi Niya sa sako: “Aki nin tawo, ini an mga lalaki na nagpapakana nin maraot saka nagtatao nin maraot na sadol sa* siyudad na ini. 3 Sinasabi ninda, ‘Bakong panahon ini para magtugdok nin mga harong?+ An siyudad* iyo an lutuan,*+ asin kita an karne.’

4 “Kaya magpropesiya ka laban sa sainda. Magpropesiya ka, aki nin tawo.”+

5 Dangan an espiritu ni Jehova nag-abot sa sako,+ asin sinabi niya sako: “Sabihon mo, ‘Ini an sinabi ni Jehova: “Tama an sinabi nindo, O banwaan* nin Israel, asin aram ko an iniisip nindo.* 6 Kamo an dahilan kan pagkagadan nin dakul na tawo sa siyudad na ini, asin pinano nindo nin gadan an mga tinampo kaini.”’”+ 7 “Kaya ini an sinabi kan Soberanong Kagurangnan na Jehova: ‘An mga bangkay na iwinarak nindo sa siyudad na ini iyo an karne, asin an siyudad iyo an lutuan.+ Pero iluluwas kamo diyan.’”

8 “‘Natatakot kamo sa espada,+ pero madara ako nin espada laban sa saindo,’ an sabi kan Soberanong Kagurangnan na Jehova. 9 ‘Iluluwas ko kamo sa saiya asin itatao sa kamot kan mga dayuhan, asin huhukuman ko kamo.+ 10 Magagadan kamo paagi sa espada.+ Huhukuman ko kamo sa may linderos* kan Israel,+ asin mamimidbid nanggad nindo na ako si Jehova.+ 11 An siyudad dai magigin lutuan para sa saindo, asin bako kamo an magigin karne sa laog kaiyan; huhukuman ko kamo sa may linderos kan Israel, 12 asin mamimidbid nanggad nindo na ako si Jehova. Huli ta dai nindo sinunod an mga regulasyon ko asin dai nindo inutob an sakuyang mga ipinapautob na desisyon,+ imbes nagsunod kamo sa mga ipinapautob na desisyon kan mga nasyon na nakapalibot sa saindo.’”+

13 Pagkapropesiya ko, nagadan si Pelatias na aki ni Benaias, dangan suminubsob ako asin kuminurahaw nin makusog: “O Soberanong Kagurangnan na Jehova! Pupuhuon mo daw an mga natatada sa Israel?”+

14 Nag-abot giraray sako an tataramon ni Jehova, na sinasabi: 15 “Aki nin tawo, an mga tugang mo, an saimong mga tugang na may deretsong magtubos, kaiba kan bilog na banwaan nin Israel, sinabihan kan mga nakaistar sa Jerusalem, ‘Rumayo kamo ki Jehova. Samuya an kadagaan; itinao ini sa samo bilang pagsadiri mi.’ 16 Kaya sabihon mo, ‘Ini an sinabi kan Soberanong Kagurangnan na Jehova: “Dawa dinara ko sinda sa hararayong mga nasyon asin iwinarak sa mga kadagaan,+ sa halipot na panahon magigin santuwaryo ako para sa sainda sa mga kadagaan na napadumanan ninda.”’+

17 “Kaya sabihon mo, ‘Ini an sinabi kan Soberanong Kagurangnan na Jehova: “Titipunon ko man kamo hali sa mga banwaan asin hali sa mga kadagaan kun sain kamo nagkawararak, asin itatao ko saindo an daga nin Israel.+ 18 Asin mabalik sinda duman asin hahalion an gabos kaiyan na makababalding bagay saka makababalding mga gibo-gibo.+ 19 Asin tatawan ko sinda nin nagkakasararong puso,*+ asin lalagan ko sinda nin bagong espiritu;+ tapos hahalion ko an pusong gapo sa saindang hawak,+ asin tatawan ko sinda nin pusong laman,*+ 20 tanganing masunod ninda an sakuyang mga reglamento saka mautob an sakuyang mga ipinapautob na desisyon asin magibong kuyugon an mga iyan. Dangan sinda magigin sakuyang banwaan, asin ako magigin Diyos ninda.”’

21 “‘“Pero idtong mga tawo na an puso padagos na nagsusunod sa saindang makababalding mga bagay asin sa saindang makababalding mga gibo-gibo, ipapasapar ko sa sainda an mga konsekwensiya kan saindang mga gibo,” an sabi kan Soberanong Kagurangnan na Jehova.’”

22 Dangan itinaas kan mga kerubin an mga pakpak ninda, asin nasa harani ninda an mga ruweda,+ asin an kamurawayan kan Diyos nin Israel nasa ibabaw ninda.+ 23 Asin an kamurawayan ni Jehova+ nag-itaas hali sa siyudad asin nagpundo sa ibabaw kan bukid na nasa sirangan kan siyudad.+ 24 Dangan iinitaas ako nin sarong espiritu—sa bisyon paagi sa espiritu nin Diyos—asin dinara ako sa banwaan na puwersahan na dinara* sa Caldea. Tapos nawara an bisyon na nahiling ko. 25 Asin an gabos na bagay na ipinahiling sa sako ni Jehova sinabi ko sa banwaan na idinistiyero.