Ezekiel

37 Nag-abot sa sako an kapangyarihan* ni Jehova, asin paagi sa saiyang espiritu kinua ako ni Jehova asin dinara sa tahaw kan kapatagan sa kababan,+ asin pano idto nin mga tulang. 2 Pinaagi niya ako sa mga iyan, asin nahiling kong dakulon na marhay nin tulang sa kapatagan sa kababan, asin alang na marhay an mga iyan.+ 3 Hinapot niya ako: “Aki nin tawo, puwede pa daw na mabuhay an mga tulang na ini?” Nagsimbag ako: “Soberanong Kagurangnan na Jehova, ika an nakakaaram.”+ 4 Kaya sinabi niya sako: “Magpropesiya ka manungod sa mga tulang na ini, asin sabihon mo sa sainda, ‘Kamong mga alang na tulang, dangugon nindo an mensahe ni Jehova:

5 “‘Ini an sinabi kan Soberanong Kagurangnan na Jehova sa mga tulang na ini: “Lalagan ko kamo nin hinangos, asin mabubuhay kamo.+ 6 Lalagan ko kamo nin mga litid saka laman, asin papatuson ko kamo nin kublit tapos lalagan nin hinangos, asin mabubuhay kamo; asin mamimidbid nanggad nindo na ako si Jehova.”’”

7 Dangan nagpropesiya ako arog kan ipinagbuot sa sako. Kan magpropesiya na ako, may nadangog akong tanog nin pagkarantong, asin an mga tulang nagpuon na magsurugpunan, tulang sa tulang. 8 Tapos nahiling ko na nagkakaigwa sinda nin mga litid saka laman, asin napatos sinda nin kublit. Pero mayo pa man giraray sindang hinangos.

9 Dangan sinabi niya sako: “Magpropesiya ka sa duros. Magpropesiya ka, aki nin tawo, asin sabihon mo sa duros, ‘Ini an sinabi kan Soberanong Kagurangnan na Jehova: “Hali sa apat na duros dumigdi ka, O duros,* asin maghuyop ka sa mga tawong ini na ginaradan, tanganing magkaburuhay sinda.”’”

10 Kaya nagpropesiya ako arog kan ipinagbuot niya sa sako, asin nagkaigwa sinda nin hinangos,* asin nabuhay sinda tapos nagtirindog,+ sarong dakulaon na hukbo.

11 Dangan sinabi niya sako: “Aki nin tawo, an mga tulang na ini iyo an bilog na banwaan* nin Israel.+ Sinasabi ninda, ‘Alang an mga tulang ta, asin nawara an satong paglaom.+ Biyo kitang napara.’ 12 Kaya magpropesiya ka asin sabihon mo sa sainda, ‘Ini an sinabi kan Soberanong Kagurangnan na Jehova: “Bubukasan ko an mga lubungan nindo+ asin ibabangon ko kamo, banwaan ko, hali sa saindong mga lubungan, tapos dadarahon ko kamo sa daga nin Israel.+ 13 Asin mamimidbid nanggad nindo na ako si Jehova pag binukasan ko na an saindong mga lubungan asin pag ibinangon ko na kamo paluwas sa saindong mga lubungan, O banwaan ko.”’+ 14 ‘Ilalaag ko sa saindo an espiritu ko asin mabubuhay kamo,+ tapos papaistaron ko kamo sa daga nindo; asin maaaraman nanggad nindo na ako mismo, si Jehova, an nagsabi kaiyan asin ginibo ko iyan,’ an sabi ni Jehova.”

15 Nag-abot giraray sako an tataramon ni Jehova, na sinasabi: 16 “Asin ika, aki nin tawo, magkua ka nin sarong pidaso nin kahoy tapos magsurat ka diyan, ‘Para ki Juda saka sa banwaan nin Israel na kaibanan niya.’+ Dangan magkua ka nin saro pang pidaso nin kahoy tapos magsurat ka diyan, ‘Para ki Jose, an pidaso nin kahoy ni Efraim, saka sa bilog na banwaan nin Israel na kaibanan niya.’+ 17 Dangan pagtaidon mo an mga iyan para magin sarong pidaso nin kahoy sa saimong kamot.+ 18 Pag sinabihan ka kan mga kahimanwa mo,* ‘Dai mo sasabihon samo kun ano an buot sabihon kan mga ini?’ 19 sabihon mo sa sainda, ‘Ini an sinabi kan Soberanong Kagurangnan na Jehova: “Kukuanon ko an pidaso nin kahoy ni Jose, na nasa kamot ni Efraim, saka kan mga tribo kan Israel na kaibanan niya, asin idudukot ko sinda sa pidaso nin kahoy ni Juda; asin gigibuhon ko sindang sarong pidaso nin kahoy,+ asin magigin saro na sana sinda sa kamot ko.”’ 20 An mga pidaso nin kahoy na sinuratan mo dapat na nasa kamot mo para mahiling ninda.

21 “Dangan sabihon mo sa sainda, ‘Ini an sinabi kan Soberanong Kagurangnan na Jehova: “Kukuanon ko an mga Israelita sa mga nasyon na napadumanan ninda, asin titiripunon ko sinda hali sa gabos na direksiyon tapos dadarahon sa saindang daga.+ 22 Gigibuhon ko sindang sarong nasyon sa kadagaan,+ sa mga bukid kan Israel, asin sarong hadi an mamamahala sa sainda gabos,+ asin dai na sinda magigin duwang nasyon; asin dai na man sinda mababanga sa duwang kahadian.+ 23 Dai na ninda raramugan an saindang sadiri paagi kan saindang mga makababalding idolo* saka kan saindang mga makababalding gibo-gibo saka kan gabos nindang paglapas.+ Ililigtas ko sinda hali sa gabos nindang pagkabakong maimbod na dahilan kan pagkakasala ninda, asin lilinigon ko sinda. Asin sinda magigin sakuyang banwaan, asin ako magigin Diyos ninda.+

24 “‘“An lingkod kong si David an magigin hadi ninda,+ asin saro lang an magigin pastor ninda gabos.+ Susunudon ninda an mga ipinapautob kong desisyon* saka maingat nindang gigibuhon an mga reglamento ko.+ 25 Maistar sinda sa daga na itinao ko sa sakuyang lingkod, ki Jacob, na pig-istaran kan mga apuon nindo,+ asin maistar sinda diyan sagkod lamang,+ sinda saka an saindang mga aki* asin an mga aki kan saindang mga aki;+ asin an lingkod kong si David an magigin pamayo* ninda sagkod lamang.+

26 “‘“Asin makikipagtipan ako sa sainda nin tipan nin katuninungan;+ magigi iyan sarong daing sagkod na tipan. Ibubugtak ko sinda sa saindang daga asin papadakulon,+ asin ilalaag ko sa sainda an sakong santuwaryo sagkod lamang. 27 An tolda* ko mamumugtak sa sainda,* asin ako magigin Diyos ninda, asin sinda magigin sakuyang banwaan.+ 28 Asin maaaraman nanggad kan mga nasyon na ako, si Jehova, an nagpapabanal sa Israel pag an santuwaryo ko yaon na sa tahaw ninda sagkod lamang.”’”+