Bilang

3 Ini an mga gikan* ni Aaron saka Moises kan panahon na kaulayon ni Jehova si Moises sa Bukid nin Sinai.+ 2 Ini an mga pangaran kan mga aki ni Aaron: si Nadab na saiyang panganay, tapos si Abihu,+ si Eleazar,+ asin si Itamar.+ 3 Iyan an mga pangaran kan mga aki ni Aaron, an linahidan* na mga saserdote na itinalaga* para maglingkod bilang mga saserdote.+ 4 Alagad, nagadan si Nadab saka si Abihu sa atubangan ni Jehova kan magdulot sinda ki Jehova+ sa kaawagan nin Sinai nin kalayo na dai itinutugot kan katugunan, asin dai sinda nagkaigwa nin aki. Pero nagdanay na saserdote si Eleazar+ saka si Itamar+ kaiba kan saindang amang si Aaron.

5 Dangan suminabi si Jehova ki Moises: 6 “Paranihon mo an tribo ni Levi,+ dangan iatubang mo sinda ki Aaron na saserdote, asin maglilingkod sinda+ sa saiya. 7 Uutubon ninda an saindang mga paninimbagan sa saiya asin sa bilog na katiripunan paagi sa paglilingkod sa tabernakulo, sa tolda nin pakipagtagbuan. 8 Aasikasuhon ninda an gabos na kagamitan+ kan tolda nin pakipagtagbuan asin uutubon an saindang mga paninimbagan sa mga Israelita paagi sa pagsagibo kan mga paglilingkod sa tabernakulo.+ 9 Itao mo an mga Levita ki Aaron asin sa saiyang mga aki. Sinda an mga itinao, na itinao sa saiya hali sa mga Israelita.+ 10 Nombrahan mo si Aaron saka an saiyang mga aki, asin dapat nindang utubon an saindang mga paninimbagan bilang mga saserdote,+ asin an siisay man na magrani sa santuwaryo na bako man awtorisado* dapat na gadanon.”+

11 Nagsabi pa si Jehova ki Moises: 12 “Kun manungod sa sako, uya! kinukua ko an mga Levita sa mga Israelita bilang kasalida kan gabos na panganay* kan mga Israelita,+ asin magigin sakuya an mga Levita. 13 Huli ta sakuya an lambang panganay.+ Kan aldaw na gadanon ko an lambang panganay sa Ehipto,+ pinabanal ko para sa sakuyang sadiri an lambang panganay sa Israel, tawo man o hayop.+ Mapapasakuya sinda. Ako si Jehova.”

14 Sinabi pa ni Jehova ki Moises sa kaawagan nin Sinai:+ 15 “Irehistro mo an mga aki ni Levi sigun sa saindang mga angkan asin sigun sa saindang mga pamilya. Irehistro mo an lambang lalaki na sarong bulan pataas an edad.”+ 16 Kaya irinehistro sinda ni Moises, arog kan ipinagbuot sa saiya ni Jehova. 17 Ini an mga pangaran kan mga aki ni Levi: Gerson, Kohat, asin Merari.+

18 Ini an mga pangaran kan mga aki ni Gerson, na diyan man hali an mga pangaran kan saindang mga pamilya: Libni saka Simei.+

19 An mga aki ni Kohat iyo si Amram, Izar, Hebron, asin Uziel,+ na sainda man hali an mga pangaran kan saindang mga pamilya.

20 An mga aki ni Merari iyo si Mahli+ saka si Musi,+ na sainda man hali an mga pangaran kan saindang mga pamilya.

Iyan an mga pamilya kan mga Levita sigun sa saindang mga angkan.

21 Ki Gerson naggikan an pamilya kan mga Libnita+ asin an pamilya kan mga Simeita. Sinda an mga pamilya kan mga Gersonita. 22 An gabos na lalaki sa sainda na irinehistro na sarong bulan pataas an edad may bilang na 7,500.+ 23 An kampo kan mga pamilya kan mga Gersonita nasa likod kan tabernakulo+ sa parteng sulnupan. 24 An pamayo kan angkan kan mga Gersonita iyo si Eliasaf na aki ni Lael. 25 An paninimbagan kan mga aki ni Gerson+ sa tolda nin pakipagtagbuan iyo an pag-asikaso sa tabernakulo saka sa mga pantahob kaiyan+ asin an pag-asikaso sa panglipod*+ sa entrada kan tolda nin pakipagtagbuan, 26 sa mga kurtina+ kan patyo, sa lipod*+ sa entrada kan patyo na nasa palibot kan tabernakulo saka kan altar, sa mga pising pantolda, asin sa gabos na trabaho na konektado sa mga iyan.

27 Ki Kohat naggikan an pamilya kan mga Amramita, an pamilya kan mga Izarita, an pamilya kan mga Hebronita, asin an pamilya kan mga Uzielita. Sinda an mga pamilya kan mga Kohatita.+ 28 An gabos na lalaki na an edad sarong bulan pataas may bilang na 8,600; paninimbagan ninda an pag-asikaso sa banal na lugar.+ 29 An mga pamilya kan mga aki ni Kohat nagkampo sa parteng timog kan tabernakulo.+ 30 An pamayo kan angkan kan mga pamilya kan mga Kohatita iyo si Elizafan na aki ni Uziel.+ 31 An paninimbagan ninda iyo an pag-asikaso sa Kaban,+ sa lamesa,+ sa kandelero,+ sa mga altar,+ sa mga kagamitan+ na ginagamit sa paglilingkod sa banal na lugar, sa kurtina,*+ asin sa gabos na trabaho na konektado sa mga iyan.+

32 An pinakapamayo kan mga Levita iyo si Eleazar+ na aki ni Aaron na saserdote, na iyo an namamahala sa mga namamayo sa pag-asikaso sa banal na lugar.

33 Ki Merari naggikan an pamilya kan mga Mahlita asin an pamilya kan mga Musita. Sinda an mga pamilya ni Merari.+ 34 An gabos na lalaking irinehistro na an edad sarong bulan pataas may bilang na 6,200.+ 35 An pamayo kan angkan kan mga pamilya ni Merari iyo si Zuriel na aki ni Abihail. An kampo ninda nasa parteng norte kan tabernakulo.+ 36 An paninimbagan kan mga aki ni Merari iyo an pag-asikaso sa mga hamba+ kan tabernakulo, sa mga pambalagbag kaiyan,+ sa mga harigi diyan,+ sa mga patungtungan kaiyan na may sulbungan, sa gabos na kagamitan para diyan,+ saka sa gabos na trabaho na konektado sa mga iyan.+ 37 Sinda man an maasikaso sa mga harigi sa palibot kan patyo asin sa mga patungtungan kaiyan na may sulbungan,+ sa mga taldok na pantolda kaiyan, asin sa mga pising pantolda kaiyan.

38 An nagkakampo sa atubangan kan tabernakulo sa parteng sirangan, sa atubangan kan tolda nin pakipagtagbuan, iyo si Moises saka si Aaron asin an mga aki niya. Sinda an may paninimbagan sa pag-asikaso kan santuwaryo bilang saindang obligasyon imbes na an mga Israelita. An siisay man na magrani sa santuwaryo na bako man awtorisado* dapat na gadanon.+

39 An gabos na lalaking Levita na an edad sarong bulan pataas, na irinehistro ni Moises saka ni Aaron sigun sa saindang mga pamilya suno sa pagbuot ni Jehova, may bilang na 22,000.

40 Dangan sinabi ni Jehova ki Moises: “Irehistro mo an gabos na panganay na lalaki kan mga Israelita na an edad sarong bulan pataas,+ bilangon mo sinda, asin ilista mo an saindang mga pangaran. 41 Kuanon mo para sa sako an mga Levita bilang kasalida kan gabos na panganay kan mga Israelita,+ asin kuanon mo an mga ataman na hayop kan mga Levita bilang kasalida kan gabos na inot na ugbon kan mga ataman na hayop kan mga Israelita.+ Ako si Jehova.” 42 Kaya irinehistro ni Moises an gabos na panganay sa mga Israelita, arog kan ipinagbuot sa saiya ni Jehova. 43 An gabos na panganay na lalaki na nairehistro an pangaran na an edad sarong bulan pataas may bilang na 22,273.

44 Suminabi pa si Jehova ki Moises: 45 “Kuanon mo an mga Levita bilang kasalida kan gabos na panganay sa mga Israelita, asin kuanon mo an mga ataman na hayop kan mga Levita bilang kasalida kan saindang mga ataman na hayop, asin mapapasakuya an mga Levita. Ako si Jehova. 46 Bilang halagang pantubos+ para sa 273 na panganay kan mga Israelita na sobra sa bilang kan mga Levita,+ 47 magkua ka nin limang siklo* para sa kada saro,+ uyon sa siklo kan banal na lugar.* An sarong siklo 20 gerah.*+ 48 Itao mo an kuwarta ki Aaron asin sa mga aki niya bilang halagang pantubos duman sa mga sobra sa bilang ninda.” 49 Kaya tinipon ni Moises an halagang pambalukat para matubos idtong mga sobra sa bilang kan mga Levita. 50 Kinua niya an kuwartang pambalukat para sa mga panganay kan mga Israelita, 1,365 siklo, uyon sa siklo kan banal na lugar. 51 Dangan itinao ni Moises ki Aaron saka sa mga aki kaini an halagang pantubos kauyon kan sinabi* ni Jehova, arog kan ipinagbuot ni Jehova ki Moises.