Inot na Samuel

10 Dangan kinua ni Samuel an lalagan nin lana asin ibinubo an lana sa payo ni Saul.+ Hinadukan niya siya asin sinabi: “Linahidan ka ni Jehova na magin lider+ kan saiyang banwaan.”*+ 2 Paghali mo ngunyan digdi sako, may mahihiling kang duwang lalaki harani sa lulubngan ni Raquel+ sa Zelza sa teritoryo kan Benjamin, asin sasabihon ninda sa saimo, ‘Nakua na an mga asnong pighahanap mo, pero bako nang sa mga asno nahahadit an saimong ama+ kundi sa saimo na siya nahahadit. Sinasabi niya: “Ano an gigibuhon ko ngunyan? Dai pa nagpupuli an aki ko.”’ 3 Hali duman, magdiretso ka sagkod na makaabot ka sa dakulang kahoy sa Tabor. Makakasabatan mo duman an tulong lalaking patukad sa Bethel+ tanganing magsamba sa tunay na Diyos. An saro sa sainda may darang tulong ugbon na kanding, an saro may darang tulong tinapay, asin an saro may darang dakulang dulay nin arak. 4 Kukumustahon ka ninda saka itatao saimo an duwang tinapay; dapat mong akuon an mga tinapay. 5 Pagkatapos, makakaabot ka sa bulod kan tunay na Diyos kun sain may garison an mga Filisteo. Pagkaabot mo sa siyudad, may makakasabatan kang sarong grupo nin mga propeta na pababa hali sa halangkaw na lugar, asin sa inutan ninda may mga nagtutugtog nin instrumentong de-kuwerdas, tamburin, plawta, saka arpa mantang nagpopropesiya sinda. 6 Tatawan ka nin kapangyarihan kan espiritu ni Jehova,+ asin magpopropesiya ka kaiba ninda saka magigin kang siring sa ibang tawo.+ 7 Pag nangyari an mga tandang ini, gibuhon mo kun ano man an kayang gibuhon kan saimong kamot, huling kaibanan mo an tunay na Diyos. 8 Dangan, mainot ka nang bumaba pasiring sa Gilgal,+ asin masunod ako saimo duman tanganing magdulot nin mga atang na pigtututong saka mga atang sa pakikikabtang. Dapat kang maghalat nin pitong aldaw sagkod na mag-abot ako. Tapos, sasabihon ko saimo an dapat mong gibuhon.”

9 Pagkatalikod ni Saul ki Samuel para maghali, pinunan nin Diyos na baguhon an puso ni Saul na magin siring kan sa ibang tawo, asin an gabos na tandang ini nagkatotoo kan aldaw man sanang iyan. 10 Kaya hali duman, nagpasiring sinda sa bulod, asin sarong grupo nin mga propeta an nagsabat sa saiya. Tulos-tulos na nag-ako siya nin kapangyarihan hali sa espiritu nin Diyos,+ asin nagpuon siyang magpropesiya+ kaiba ninda. 11 Kan mahiling siya kan gabos na nakakabisto sa saiya na nagpopropesiya siya kaiba kan mga propeta, nagsarabi sinda sa kada saro: “Anong nangyari sa aki ni Kis? Propeta na man si Saul?” 12 Dangan sarong lalaki duman an nagsabi: “Pero siisay an saindang ama?” Huli kaini, nagin nang kasabihan* an: “Propeta na man si Saul?”+

13 Pagkatapos niyang magpropesiya, nagpasiring siya sa halangkaw na lugar. 14 Pagkatapos, an tugang kan ama ni Saul naghapot sa saiya asin sa saiyang suruguon: “Sain kamo nagduman?” Kaya sinabi niya: “Hinanap mi su mga asno,+ pero dai mi nahiling. Kaya nagduman kami ki Samuel.” 15 Naghapot an tiyuon ni Saul: “Ano an sinabi ni Samuel saimo? Sabiha tabi sako.” 16 Nagsimbag si Saul sa saiyang tiyo: “Sinabi niya samo na nakua na an mga asno.” Pero dai isinabi ni Saul an sinabi ni Samuel sa saiya na magigin hadi siya.

17 Dangan tinipon ni Samuel an banwaan sa atubangan ni Jehova sa Mizpa+ 18 asin sinabi niya sa mga Israelita: “Ini an sabi ni Jehova na Diyos kan Israel: ‘Ako an nagdara sa Israel paluwas sa Ehipto asin nagligtas sa saindo sa kamot kan Ehipto+ asin sa kamot kan gabos na kahadian na nang-aapi sa saindo. 19 Alagad ngunyan, isinikwal nindo an saindong Diyos+ na iyo an saindong Paraligtas sa gabos na maraot na nangyayari sa saindo saka sa mga kasakitan nindo, asin sinabi pa nindo: “Dai, dapat kang magnombra para sa samo nin sarong hadi.” Kaya ngunyan, umatubang kamo ki Jehova sigun sa saindong mga tribo asin sigun sa saindong mga manangribo.’”*

20 Kaya pinarani ni Samuel an gabos na tribo nin Israel,+ asin an tribo ni Benjamin an napili.+ 21 Dangan pinarani niya an tribo ni Benjamin sigun sa mga pamilya kaini, asin an pamilya nin mga Matrita an napili. Sa kahuri-hurihi, si Saul na aki ni Kis an napili.+ Pero kan hinahanap ninda siya, dai na ninda siya mahiling. 22 Kaya naghapot sinda ki Jehova:+ “Yaon na tabi digdi an lalaki?” Nagsimbag si Jehova: “Uto siya, nagtatago sa mga bagahe.” 23 Kaya nagdaralagan sinda asin kinua siya duman. Kan magtindog siya sa tahaw kan mga tawo, mas halangkaw siya kisa sa gabos na iba pa niyang kahimanwa; sagkod sana sinda sa abaga niya.+ 24 Sinabi ni Samuel sa bilog na banwaan: “Nahihiling nindo an sarong ini na pinili ni Jehova,+ na mayo nin siisay man an kapareho niya sa bilog na banwaan?” Asin nagkururahaw an bilog na banwaan: “Mabuhay an hadi!”

25 Sinabi ni Samuel sa banwaan an mga deretso kan mga hadi na obligado nindang itao sa mga ini+ asin isinurat iyan sa sarong libro saka sinaray ini sa atubangan ni Jehova. Dangan pinapuli na ni Samuel an bilog na banwaan sa kanya-kanya nindang harong. 26 Nagpuli na man si Saul sa saiyang harong sa Gibeah. Inibanan siya kan mga parapakilaban na an mga puso pinahiro ni Jehova. 27 Alagad may mga daing serbing lalaki na nagsarabi: “Paano man kita maililigtas kan sarong ini?”+ Kaya hinamak ninda siya, asin dai sinda nagregalo sa saiya nin ano man.+ Pero dai na lang siya naggirong.*