Bilang

11 Dangan nagparareklamo an banwaan sa atubangan ni Jehova. Kan madangog iyan ni Jehova, naanggot siyang marhay, asin may kalayo hali ki Jehova na nag-arab-adab laban sa sainda asin tinumtom kaiyan an nagkapira sa mga nasa luwas kan kampo. 2 Kan makimahirak an banwaan ki Moises, nagngayo-ngayo* siya ki Jehova,+ dangan napundo an kalayo. 3 Kaya inapod an lugar na iyan na Tabera,* huling may kalayo hali ki Jehova na nag-arab-adab laban sa sainda.+

4 An mga dayuhan*+ na kaibanan ninda nagpahiling nin makasadiring mga pagmawot,+ asin an mga Israelita man naghiribi giraray asin nagsarabi: “Siisay an mapakakan samo nin karne?+ 5 Nagigirumduman mi an mga sira na libre ming nakakakan kaidto sa Ehipto, saka an mga pipino, an mga pakwan, an mga kutsay, an mga sibulyas, saka an mga bawang!+ 6 Pero ngunyan nangruruluya na kami.* Dai kaming ibang nahihiling kundi an mannang ini.”+

7 An manna+ garo pisog nin kulantro,+ asin garo iyan pulot na bedelio. 8 Minasuruway-suway an banwaan asin pinupurot ninda iyan dangan ginigiling sa mga gilingan o dinudukdok sa lubang.* Tapos papakalagakagaan ninda iyan sa mga lutuan o gigibuhon iyan na bilog na mga tinapay,+ asin an namit kaiyan garo mahamis na tinapay na may lana. 9 Pag buminaba an ambon* sa kampo pag banggi, kasabay man kaiyan na minababa an manna.+

10 Nadangog ni Moises an paghibi kan gabos na pamilya, kan lambang tawo sa may laugan kan saiyang tolda. Dangan naanggot na marhay si Jehova,+ asin pati si Moises ikinaanggot iyan. 11 Tapos sinabi ni Moises ki Jehova: “Taano ta pinapasakitan mo an saimong lingkod? Anong ginibo ko para dai mo ako mauyunan, mala ta itinao mo sa sako an problema kan gabos na tawong ini?+ 12 Ako daw an nangidam kan gabos na tawong ini? Ako daw an nangaki sa sainda para sabihan mo ako, ‘Kargahon mo sinda sa saimong daghan, siring sa sarong paraaling* na may kargang nagsususong aki,’ pasiring sa daga na isinumpa mong itatao sa saindang mga apuon?+ 13 Sain ako makua nin karne na itatao sa gabos na tawong ini? Sige nindang hibi sa atubangan ko, na sinasabi, ‘Pakakanon mo kami nin karne!’ 14 Dai ko kayang darahon an responsabilidad para sa gabos na tawong ini kun ako sana; magabaton iyan para sa sako.+ 15 Kun arog man sana kaini an gigibuhon mo sa sako, gadanon mo na tabi ako ngunyan.+ Kun nauuyunan mo ako, dai mo pagtugutan na mag-agi pa ako nin grabeng kasakitan.”

16 Nagsimbag si Jehova ki Moises: “Magpili ka nin 70 lalaki sa kamagurangan kan Israel, idtong mga aram mong may kakayahan na kamagurangan asin opisyal kan banwaan,+ asin darahon mo sinda sa tolda nin pakipagtagbuan, asin patindugon mo sinda duman kaiba mo. 17 Mababa ako+ asin makikipag-ulay sa saimo duman,+ asin kukuanon ko an ibang espiritu+ na yaon sa saimo asin ilalaag ko iyan sa sainda, asin tatabangan ka nindang asikasuhon an problema kan banwaan tanganing bako lang ika an magpasan kan responsabilidad na iyan.+ 18 Sabihan mo an banwaan, ‘Pabanalon nindo an saindong sadiri para sa aga,+ ta siguradong makakan kamo nin karne, dahil nadangog ni Jehova an paghibi nindo+ asin an pagsabi: “Siisay an mapakakan samo nin karne? Mas marahay pa an kamugtakan mi duman sa Ehipto.”+ Papakakanon nanggad kamo ni Jehova nin karne.+ 19 Makakan kamo, bako lang sa laog nin sarong aldaw o 2 aldaw o 5 aldaw o 10 aldaw o 20 aldaw, 20 kundi sa laog nin sarong bulan, sagkod na magruluwas iyan sa saindong dungo asin magi iyan makarima-rima para sa saindo,+ huli ta isinikwal nindo si Jehova, na nasa tahaw nindo, asin nagparahiribi kamo sa saiyang atubangan, na sinasabi: “Ano ta nagluwas pa kami sa Ehipto?”’”+

21 Dangan sinabi ni Moises: “Igwa nin 600,000 na lalaki*+ sa banwaan na kaibanan ko, tapos sinasabi mo, ‘Tatawan ko sinda nin karne, asin makakan sinda kaiyan sa laog nin sarong bulan’! 22 Kun bubunuon daw an gabos na karnero saka mga baka, magkakaigo daw iyan sa sainda? O kun dadakupon daw an gabos na sira sa dagat, magkakaigo daw iyan sa sainda?”

23 Dangan sinabi ni Jehova ki Moises: “Haliputon daw an kamot ni Jehova?+ Mahihiling mo ngunyan kun baga mangyayari o dai an mga sinabi ko.”

24 Kaya nagluwas si Moises asin sinabi sa banwaan an mga sinabi ni Jehova. Asin nagpili siya nin 70 lalaki sa kamagurangan kan banwaan asin pinatindog niya sinda sa palibot kan tolda.+ 25 Dangan buminaba si Jehova sa sarong panganuron+ asin nakipag-ulay sa saiya+ asin kinua an ibang espiritu+ na yaon sa saiya asin linagan kaiyan an kada saro sa 70 kamagurangan. Kan yaon na sa sainda an espiritu, nagpuon sindang gumawi na siring sa mga propeta,*+ pero dai na ninda iyan nagibo giraray.

26 An duwa sa mga lalaking pinili yaon pa sa kampo. Sinda iyo si Eldad asin Medad. Asin napasainda man an espiritu huling kabilang an mga pangaran ninda sa mga nakalista, pero dai sinda nagduman sa tolda. Kaya nagpuon sindang gumawi na siring sa mga propeta duman sa kampo. 27 Asin sarong hoben na lalaki an duminalagan pasiring ki Moises asin nagbareta sa saiya: “Si Eldad asin Medad yaon duman sa kampo; naggagawi sindang siring sa mga propeta!” 28 Dangan an aki ni Nun na si Josue,+ an lingkod ni Moises puon pa sa pagkahoben kaini, nagsabi: “Kagurangnan kong Moises, pugulan mo sinda!”+ 29 Pero sinabihan siya ni Moises: “Nauuri ka dahil iniisip mo an magigin epekto kaiyan sa sako? Dai ka mauri, ta gusto ko ngani kuta na propeta an bilog na banwaan ni Jehova asin lagan sinda ni Jehova kan saiyang espiritu!” 30 Pagkatapos, buminalik si Moises sa kampo kaiba an kamagurangan kan Israel.

31 Dangan may duros hali ki Jehova na nagpuon na maghuyop asin ipinadpad kaiyan an mga pugo hali sa may dagat pasiring sa palibot kan kampo,+ na mga sarong aldaw na baklayon an nalakupan sa palibot kan kampo, asin mga duwang maniko* an langkaw kaiyan sa daga. 32 Kaya maghapon asin magdamlag kan aldaw na iyan asin pati kan suminunod pang aldaw, nangurua sinda nin mga pugo. Gabos sinda nakakua nin dai mababa sa sampulong homer,* asin pigpararalatag ninda iyan sa palibot kan kampo. 33 Alagad mantang kagat-kagat pa ninda an karne, bago pa ninda iyan masapa, naanggot na marhay si Jehova sa banwaan, asin ginadan ni Jehova an dakul sa sainda.+

34 Kaya inapod ninda an lugar na iyan na Kibrot-hataava,*+ huling diyan ninda piglubong an mga nagpahiling nin makasadiring pagmawot.+ 35 Dangan naghali an banwaan sa Kibrot-hataava tapos nagpasiring sa Hazerot, asin nagdanay sinda sa Hazerot.+