Ikaduwang Cronica

30 Nagpadara nin mensahe si Hezekias sa bilog na Israel+ asin Juda, asin naggibo pa ngani siya nin mga surat para sa Efraim asin Manases,+ na magpasiring sinda sa harong ni Jehova sa Jerusalem tanganing iselebrar an Paskuwa para ki Jehova na Diyos kan Israel.+ 2 Alagad, nagdesisyon an hadi asin an saiyang mga pamayo* saka an bilog na katiripunan* sa Jerusalem na sa ikaduwang bulan iselebrar an Paskuwa,+ 3 huling dai ninda naiselebrar iyan sa regular na petsa kaiyan;+ diit sana kayang saserdote an nagpabanal kan saindang sadiri+ saka dai man nagtiripon sa Jerusalem an banwaan. 4 Nagustuhan kan hadi asin kan bilog na katiripunan an areglong ini. 5 Kaya nagdesisyon sindang ipaisi sa bilog na Israel, puon sa Beer-sheba sagkod sa Dan,+ na dapat magduruman sa Jerusalem an banwaan asin iselebrar an Paskuwa para ki Jehova na Diyos kan Israel, huling dai pa ninda naiseselebrar iyan bilang sarong grupo sigun sa kun ano an nasusurat.+

6 Dangan arog kan ipinagbuot kan hadi, nagpasiring sa bilog na Israel asin Juda an mga mensahero* dara an mga surat hali sa hadi asin sa saiyang mga pamayo,* na nagsasabi: “Banwaan nin Israel, magbalik kamo ki Jehova na Diyos ni Abraham, ni Isaac, asin ni Israel, tanganing magbalik siya sa nagkatarada na mga nakadulag sa kamot kan mga hadi kan Asiria.+ 7 Dai kamo magin arog kan mga apuon nindo asin kan mga tugang nindo na mga dai nagin maimbod ki Jehova na Diyos kan saindang mga apuon, kaya ginibo niya sindang sarong bagay na nagin dahilan na an mga tawo tarakigan, arog kan nahihiling nindo.+ 8 Dai kamo magin matagas an payo arog kan mga apuon nindo.+ Magpasakop kamo ki Jehova asin magpasiring kamo sa saiyang santuwaryo+ na pinabanal niya sagkod lamang asin maglingkod kamo ki Jehova na saindong Diyos, tanganing mawara an grabeng kaanggutan niya sa saindo.+ 9 Huli ta kun magbalik kamo ki Jehova, an mga tugang nindo saka mga aki nindo kakahirakan kan mga nambihag sa sainda+ asin tutugutan sindang bumalik sa dagang ini,+ huling si Jehova na saindong Diyos mapagmalasakit* saka mahihirakon,+ asin dai niya itatalikod sa saindo an saiyang lalawgon kun kamo mabalik sa saiya.”+

10 Kaya dinumanan kan mga mensahero* an lambang siyudad sa bilog na daga nin Efraim asin Manases,+ sagkod pa ngani sa Zebulon, pero pigngingirisihan sinda saka pigtutuya-tuya kan mga tawo.+ 11 Alagad, may nagkapirang indibidwal hali sa Aser, Manases, asin Zebulon na nagpakumbaba asin nagpasiring sa Jerusalem.+ 12 An kamot kan tunay na Diyos yaon man sa Juda tanganing magkasararo sinda na* utubon an ipinagbuot kan hadi asin kan mga pamayo* uyon sa sinabi ni Jehova.

13 Kan ikaduwang bulan,+ dakulon na tawo an nagtiripon sa Jerusalem tanganing iselebrar an Kapiyestahan nin Tinapay na Daing Lebadura;+ dakulaon nanggad na katiripunan idto. 14 Hinarali ninda an mga altar na nasa Jerusalem,+ tapos hinarali ninda an gabos na altar para sa insenso+ asin inarapon an mga iyan sa Kababan nin Kidron. 15 Dangan kan ika-14 aldaw kan ikaduwang bulan, binuno ninda an pang-atang sa Paskuwa. Nasupog an mga saserdote asin an mga Levita, kaya pinabanal ninda an saindang sadiri asin nagdara sa harong ni Jehova nin mga dulot na pigtututong. 16 Nagduruman sinda sa dati nindang kanya-kanyang puwesto, sigun sa Katugunan ni Moises na lalaking lingkod kan tunay na Diyos; dangan iwinirik kan mga saserdote an dugo+ na itinao sa sainda kan mga Levita. 17 Dakul sa katiripunan an dai nakapagpabanal kan saindang sadiri, kaya an mga Levita an nag-asikaso kan pagbuno kan mga pang-atang sa Paskuwa para sa gabos na bakong malinig+ tanganing pabanalon sinda para ki Jehova. 18 Dakulon an dai nakapagpabanal kan saindang sadiri, lalo na idtong hali sa Efraim, Manases,+ Isacar, asin Zebulon, pero nagkakan pa man giraray sinda kan pamanggihan kan Paskuwa, na bakong uyon sa kun ano an nasusurat. Alagad namibi si Hezekias para sa sainda, na an sabi: “Patawadon lugod ni Jehova, Siya na marahay,+ an 19 lambang saro na nag-andam kan saiyang puso tanganing hanapon an tunay na Diyos+ na si Jehova, an Diyos kan saiyang mga apuon, dawa dai pa siya nadalisay sigun sa pamantayan nin kabanalan.”+ 20 Asin dinangog ni Jehova si Hezekias asin pinatawad* an banwaan.

21 Kaya maugmang marhay na isinelebrar kan mga Israelita na yaon sa Jerusalem+ an Kapiyestahan nin Tinapay na Daing Lebadura+ sa laog nin pitong aldaw; asin an mga Levita saka mga saserdote inuumaw si Jehova aroaldaw, na makusog na pinapatanog an saindang mga instrumento para ki Jehova.+ 22 Dugang pa, kinaulay ni Hezekias an gabos na Levita na may pakamansay na naglingkod ki Jehova asin pinakusog an buot* ninda. Asin sa bilog na kapiyestahan, sa laog nin pitong aldaw,+ nagkarakan sinda, nagdulot nin mga atang sa pakikikabtang,+ asin nagpasalamat ki Jehova na Diyos kan saindang mga apuon.

23 Dangan nagdesisyon an bilog na katiripunan na iselebrar iyan nin pito pang aldaw, kaya maugma nindang isinelebrar iyan nin pito pang aldaw.+ 24 Asin si Hading Hezekias kan Juda nagkontribwir nin 1,000 torong baka saka 7,000 na karnero para sa katiripunan, asin an mga pamayo* nagkontribwir man nin 1,000 torong baka saka 10,000 na karnero para sa katiripunan;+ asin dakulon na saserdote an nagpapabanal kan saindang sadiri.+ 25 Asin padagos na nag-urugma an bilog na katiripunan nin Juda, an mga saserdote, an mga Levita, an bilog na katiripunan hali sa Israel,+ asin an dayuhan na mga residente+ hali sa daga nin Israel saka an mga dayuhan na residente sa Juda. 26 Asin nagkaigwa nin dakulang kaugmahan sa Jerusalem, huling puon kan panahon ni Solomon na aki ni David na hadi kan Israel, mayo pa nin nangyaring arog kaini sa Jerusalem.+ 27 Sa katapos-tapusi, nagtirindog an mga Levitang saserdote asin binendisyunan an banwaan;+ asin dinangog nin Diyos an saindang boses, asin an pamibi ninda nakaabot sa saiyang banal na irukan, an kalangitan.