Ezekiel

7 Nag-abot giraray sako an tataramon ni Jehova, na sinasabi: 2 “Aki nin tawo, ini an sinabi kan Soberanong Kagurangnan na Jehova sa daga nin Israel: ‘An katapusan! Nag-abot na an katapusan sa apat na kanto kan kadagaan. 3 Nag-abot na sa saimo ngunyan an katapusan, asin iluluwas ko an sakuyang kaanggutan sa saimo, asin huhukuman taka sigun sa saimong mga dalan asin papanimbagon sa gabos na makababaldi mong gibo. 4 Dai mahihirak saimo an sakuyang mata; dai man ako magmamakulog sa saimo,+ huli ta ipapaabot ko sa saimo an mga resulta kan saimong sadiring mga dalan, asin sasaparon mo an mga konsekwensiya kan makababaldi mong mga gibo.+ Asin mamimidbid nanggad nindo na ako si Jehova.’+

5 “Ini an sinabi kan Soberanong Kagurangnan na Jehova: ‘Uya! Sarong kapahamakan, sarong pambihirang kapahamakan, an nagdadangadang.+ 6 Nagdadangadang an katapusan; maabot an katapusan; mabangon* iyan laban saimo. Hilinga! Nagdadangadang na iyan. 7 Nag-abot na an oras mo,* ika na nakaistar sa kadagaan. Nagdadangadang na an panahon, harani na an aldaw.+ Kariribukan asin bakong kurahaw nin kagaya-gayahan an madadangog sa kabukidan.

8 “‘Dikiton na sanang panahon iuula ko na saimo an sakuyang kabangisan,+ asin biyo kong iluluwas an sakuyang kaanggutan sa saimo,+ asin huhukuman taka sigun sa saimong mga dalan asin papanimbagon sa gabos na makababaldi mong gibo. 9 Dai mahihirak an sakuyang mata; dai man ako magmamakulog.+ Ipapaabot ko sa saimo an mga resulta kan saimong mga dalan, asin sasaparon mo an mga konsekwensiya kan sadiri mong makababalding mga gibo. Asin maaaraman nanggad nindo na ako, si Jehova, an nagpapadusa sa saindo.+

10 “‘Hilinga, an aldaw! Hilinga, iyan nagdadangadang!+ Nag-abot na an oras mo;* an pamakol namurak na asin an kapangahasan nagsupang na. 11 An kadahasan nagin pamakol na pampadusa sa karatan.+ Mayong makakaligtas sa sainda. Daing matatadang kayamanan, tawo, o kabantugan. 12 Maabot an panahon, maabot an aldaw. Dai mag-ugma an nagbakal, asin dai magmundo an nagpabakal, huli ta grabe an kaanggutan sa sainda gabos.*+ 13 Huli ta an nagpabakal dai na makakabalik sa ipinabakal niya, dawa pa makaligtas siya, huli ta an bisyon laban sa sainda gabos. Mayong mabalik, asin dahil sa saiyang* pagkakasala, dai nin makakaligtas na buhay.

14 “‘Pinatanog ninda an trumpeta,+ asin handa na an gabos, pero mayo nin nagpapasiring sa ralaban, huli ta grabe an kaanggutan ko sa sainda gabos.+ 15 Nasa luwas an espada,+ asin nasa laog an damat saka tiggutom. An siisay man na nasa luwas kan siyudad magagadan paagi sa espada, asin uubuson kan tiggutom saka damat an mga nasa laog kan siyudad.+ 16 An mga matatadang buhay sa sainda na makakadulag mapasiring sa kabukidan, asin arog nin mga salampati sa mga kababan, an kada saro maagrangay dahil sa saiyang pagkakasala.+ 17 Malaylay an mga kamot ninda gabos, asin maturo nin tubig an mga tuhod* ninda gabos.+ 18 Nagsulot sinda nin telang sako,+ asin grabe an pagtakig ninda.* Mapapasupog an gabos, asin makakalbo an gabos na payo.*+

19 “‘Iaapon ninda sa mga tinampo an saindang plata,* asin magigin makababaldi sa sainda an bulawan ninda. Dai sinda maililigtas kan saindang plata saka bulawan sa aldaw kan grabeng kaanggutan ni Jehova.+ Dai sinda* mababasog, asin dai man kaiyan malalaugan an saindang tulak, huli ta nagin singkugan iyan* na nagin dahilan kan saindang pagkakasala. 20 Ipinag-oorgulyo ninda an gayon kan saindang mga alahas, asin ginamit ninda an mga iyan* sa paggibo kan saindang mga makababalding imahen, kan saindang mga makababalding idolo.+ Iyan an dahilan kaya gigibuhon ko iyan na makababalding bagay para sa sainda. 21 Itatao ko iyan* sa mga dayuhan saka sa mga maraot na tawo sa daga bilang samsam, asin lalapastanganon ninda iyan.

22 “‘Itatalikod ko sa sainda an sakuyang lalawgon,+ asin lalapastanganon ninda an sakuyang tagong lugar,* asin malaog diyan an mga parahabon* asin lalapastanganon iyan.+

23 “‘Gibuhon mo an kadena,*+ huli ta pano an kadagaan nin dugo kan mga sinentensiyahan sa bakong makatanusan na paagi+ asin pano nin kadahasan an siyudad.+ 24 Dadarahon ko sa sainda an pinakamaraot sa mga nasyon,+ asin sasadirihon kan mga ini an saindang mga harong,+ asin tatapuson ko an kapalangkawan kan mga makusog, asin malalapastangan an saindang mga santuwaryo.+ 25 Pag nag-abot an saindang grabeng pagsakit, mahanap sinda nin katuninungan, pero dai ninda iyan masusumpungan.+ 26 Sunod-sunod na maabot an kapahamakan, asin magigin sunod-sunod man an mga bareta, asin an mga tawo mahagad nin bisyon sa sarong propeta,+ pero an katugunan* mawawara sa saserdote asin an sadol* mawawara sa kamagurangan.+ 27 Magmumundo an hadi,+ asin mawawaran nin paglaom an pamayo, asin makurubog-kubog sa takot an mga kamot kan mga tawo sa kadagaan. Gigibuhon ko sa sainda an maninigo sa saindang mga dalan, asin huhusgaran ko sinda kun paanong naghusgar sinda. Asin mamimidbid nanggad ninda na ako si Jehova.’”+