Ezekiel

22 Asin nag-abot giraray sako an tataramon ni Jehova, na sinasabi: 2 “Asin ika, aki nin tawo, handa ka nang ipahayag an paghukom sa* siyudad na may pagkakasala sa dugo+ asin ipaaram sa saiya an gabos niyang makababalding bagay?+ 3 Sabihon mo, ‘Ini an sinabi kan Soberanong Kagurangnan na Jehova: “O siyudad na nanggagadan*+ sa saiya mismong laog, na an aldaw madali nang mag-abot,+ na naggigibo nin mga makababalding idolo* para ramugan an saiyang sadiri,+ 4 nagkasala ka dahil sa paggadan mo,*+ asin nagi kang maati dahil sa saimong mga makababalding idolo.+ Pinarikas mo an katapusan kan saimong mga aldaw, asin nag-abot na an katapusan kan saimong mga taon. Iyan an dahilan kaya papangyarihon kong tuya-tuyaon ka kan mga nasyon asin ulog-ulugon kan gabos na kadagaan.+ 5 Tutuya-tuyaon ka kan mga harani saka harayong mga kadagaan,+ ika na bakong malinig an pangaran asin pano nin kariribukan. 6 Hilinga! An lambang pamayo kan Israel na nasa laog mo ginagamit an saiyang awtoridad para manggadan.*+ 7 Sa laog mo, dai ninda iginagalang an saindang ama saka ina.+ Dinadaya ninda an dayuhan na residente, asin pigmamaltrato ninda an aki na mayo nang ama* saka an babaying balo.”’”+

8 “‘Minemenos mo an sakuyang mga banal na lugar, asin binabasang-basang mo an sakuyang mga sabbath.+ 9 Nasa laog mo an mga parapakaraot na gustong manggadan.*+ Sa laog mo, nagkakakan sinda nin mga atang sa kabukidan asin naggigibo nin malaswang paggawi.+ 10 Sa laog mo, linalapastangan ninda an higdaan kan saindang ama,*+ asin dinudurugan ninda an sarong babayi na maati dahil may regla.+ 11 Sa laog mo, an sarong lalaki naggigibo nin makababalding bagay sa agom kan saiyang kapwa,+ rinaramugan man kan saro an sadiri niyang manugang na babayi paagi sa malaswang paggawi,+ asin an saro pa dinudurugan an saiyang tugang na babayi, an aking babayi kan saiya mismong ama.+ 12 Sa laog mo, nag-aako sinda nin suhol para manggadan.*+ Nagpapautang ka na may interes+ o para makadilensiya,* asin kinikikilan mo an saimong mga kapwa.+ Iyo, biyo mo akong liningawan,’ an sabi kan Soberanong Kagurangnan na Jehova.

13 “‘Hilinga! Nagpapalakpak ako sa pagkabaldi sa mga materyal na pakinabang na nakua mo sa madayang paagi asin sa mga paggadan mo.* 14 Dai daw mawawara an saimong kusog nin buot* asin magdadanay daw na makusog an saimong mga kamot sa mga aldaw na maghiro na ako laban sa saimo?+ Ako mismo, si Jehova, an nagsabi kaiyan, asin mahiro ako. 15 Iwawararak taka sa mga nasyon asin pagsusuruway-suwayon sa mga kadagaan,+ asin tatapuson ko an saimong kaatian.+ 16 Asin mapapasupog ka sa atubangan kan mga nasyon, asin mamimidbid mo nanggad na ako si Jehova.’”+

17 Asin nag-abot giraray sako an tataramon ni Jehova, na sinasabi: 18 “Aki nin tawo, para sa sako, an banwaan* nin Israel nagin siring sa daing halagang ati nin tinutunaw na metal. Gabos sinda tanso, lata, lansang, asin timga na nasa hurno. Nagi sindang ati na hali sa tinutunaw na plata.+

19 “Kaya ini an sinabi kan Soberanong Kagurangnan na Jehova: ‘Dahil gabos kamo nagin siring sa daing halagang ati nin tinutunaw na metal,+ titiripunon ko kamo sa laog kan Jerusalem. 20 Kun paanong tinitipon an plata, tanso, lansang, timga, asin lata sa laog nin hurno para bugahan nin kalayo tanganing magkaturunaw, arog ko kamo kaiyan titiripunon sa sakuyang kaanggutan asin kabangisan, asin bubugahan ko kamo nin kalayo asin tuturunawon.+ 21 Titiripunon ko kamo asin bubugahan kan kalayo kan sakuyang kabangisan,+ asin magkakaturunaw kamo sa laog niya.+ 22 Kun paanong natutunaw an plata sa hurno, arog kamo kaiyan matutunaw sa laog niya; asin maaaraman nanggad nindo na ako mismo, si Jehova, an nag-ula sa saindo kan sakuyang kaanggutan.’”

23 Asin nag-abot giraray sako an tataramon ni Jehova, na sinasabi: 24 “Aki nin tawo, sabihon mo saiya, ‘Saro kang daga na dai malilinigan o mauuranan sa aldaw nin kaanggutan. 25 An saiyang mga propeta nagkukurumplutan sa laog niya,+ arog nin nag-uungal na leon na nanggugutay-gutay nin biktima.+ Nansisiba sinda nin mga tawo.* Nang-aagaw sinda nin kayamanan asin mahahalagang mga bagay. Dakul an nagin balo sa laog niya dahil sa sainda. 26 Binalga kan saiyang mga saserdote an katugunan ko,+ asin pigpaparalapastangan ninda an sakuyang mga banal na lugar.+ Daing pagkakalain sa sainda an banal saka an bakong banal,+ asin dai ninda naipapaaram kun ano an maati saka kun ano an malinig,+ asin habo nindang utubon an sakuyang mga sabbath, asin linapastangan ako sa tahaw ninda. 27 An saiyang mga pamayo* sa tahaw niya garo mga lobo na nanggugutay-gutay nin biktima; nagpapabulos sinda nin dugo asin nanggagadan nin mga tawo* para makakua nin materyal na pakinabang.+ 28 Pero pinapalitadahan nin kulor puti kan saiyang mga propeta an mga gibo-gibo ninda. Bakong totoong mga bisyon an nahihiling ninda asin kaputikan an mga ihinuhula ninda,+ asin nagsasabi sinda: “Ini an sinabi kan Soberanong Kagurangnan na Jehova,” ata nang mayo man sinabi si Jehova. 29 Nandaya asin nanghabon an mga tawo sa kadagaan,+ pigmaltrato ninda an mga tikapo saka mga pobre, asin dinaya ninda an dayuhan na residente asin dai tinawan nin hustisya.’

30 “‘Naghahanap ako nin sarong lalaki sa sainda na mahirahay kan pader na gapo o matindog sa atubangan ko sa raot na parte kan pader alang-alang sa mga tawo kan kadagaan, tanganing dai iyan malaglag,+ pero dai akong nakua. 31 Kaya iuula ko sa sainda an sakuyang kaanggutan asin pupuhuon sinda paagi sa kalayo kan sakuyang kabangisan. Ipapasapar ko sa sainda an mga konsekwensiya kan saindang mga gibo,’ an sabi kan Soberanong Kagurangnan na Jehova.”