Ezekiel

12 Nag-abot giraray sa sako an tataramon ni Jehova, na sinasabi: 2 “Aki nin tawo, nakaistar ka sa sarong rebelyosong banwaan. May mga mata sinda para makahiling, pero dai sinda naghihiling, asin mga talinga para makadangog, pero dai sinda nagdadangog,+ huli ta rebelyosong banwaan sinda.+ 3 Pero ika, aki nin tawo, mag-andam ka nin bagahe para sa pagkadistiyero.* Dangan, pag aldaw mantang nakahiling sinda, maglakaw ka na garo ka ididistiyero. Mantang nakahiling sinda, maghali ka sa saimong harong asin magpasiring sa ibang lugar na garo ka ididistiyero. ’Baad lamang magtao sindang atensiyon, dawa ngani rebelyoso sindang banwaan. 4 Pag aldaw, mantang nakahiling sinda, iluwas mo an saimong bagahe para sa pagkadistiyero, asin pag banggi, mantang nakahiling sinda, maghali ka na garo ididistiyero.+

5 “Mantang nakahiling sinda, maglabot ka sa lanob, asin magluwas ka diyan dara an saimong mga gamit.+ 6 Mantang nakahiling sinda, pasanon mo an saimong mga gamit asin darahon mo iyan pag nagdiklom na. Tahuban mo an saimong lalawgon tanganing dai mo mahiling an daga, huli ta gigibuhon takang sarong tanda para sa banwaan* nin Israel.”+

7 Ginibo ko an ipinagbuot sa sako. Kan aldaw, dinara ko an sakuyang bagahe na garo bagahe para sa pagkadistiyero, asin kan banggi, naglabot ako sa lanob gamit an kamot ko. Asin kan magdiklom na, kinua ko an sakuyang mga gamit asin pinasan iyan mantang nakahiling sinda.

8 Kan pagkaaga, nag-abot giraray sako an tataramon ni Jehova, na sinasabi: 9 “Aki nin tawo, bakong an banwaan nin Israel, an rebelyosong banwaan, naghapot sa saimo, ‘Anong ginigibo mo?’ 10 Sabihon mo sa sainda, ‘Ini an sinabi kan Soberanong Kagurangnan na Jehova: “Para sa pamayo kan Jerusalem asin sa bilog na banwaan nin Israel na nasa siyudad an mensaheng ini.”’+

11 “Sabihon mo, ‘Saro akong tanda para sa saindo.+ Kun ano an ginibo ko, iyan man an gigibuhon sa sainda. Madidistiyero sinda asin magigin bihag.+ 12 Papasanon kan saindang pamayo an saiyang mga gamit asin mahali pag nagdiklom na. Malabot siya sa pader asin maluwas diyan dara an saiyang mga gamit.+ Tatahuban niya an saiyang lalawgon tanganing dai niya mahiling an daga.’ 13 Iitsahan ko siya kan sakuyang hikot, asin madadakop siya kan sakuyang hikot na pandakop nin hayop.+ Dangan dadarahon ko siya sa Babilonya, sa daga kan mga Caldeo, pero dai niya iyan mahihiling; asin duman siya magagadan.+ 14 Asin an gabos na nakapalibot sa saiya, an mga nagtatabang sa saiya saka an saiyang mga suldados, iwawarak ko sa gabos na direksiyon;+ asin mahugkot ako nin espada na malapag sa sainda.+ 15 Asin mamimidbid nanggad ninda na ako si Jehova pag sinuruway-suway ko sinda sa mga nasyon asin iwinararak sa mga kadagaan. 16 Pero papabayaan kong an dikit sa sainda makaligtas sa espada, sa tiggutom, asin sa damat, tanganing masabi ninda sa mga nasyon na mapapadumanan ninda an gabos nindang makababalding gibo-gibo; asin mamimidbid nanggad ninda na ako si Jehova.”

17 Asin nag-abot giraray sa sako an tataramon ni Jehova, na sinasabi: 18 “Aki nin tawo, kakanon mo an tinapay mo na nagtatakig, asin inumon mo an tubig mo na nahahadit saka napupurisaw.+ 19 Sabihon mo sa mga tawo sa kadagaan na iyan, ‘Ini an sinabi kan Soberanong Kagurangnan na Jehova sa mga nakaistar sa Jerusalem sa daga nin Israel: “An saindang tinapay kakakanon ninda na napupurisaw asin an saindang tubig iinumon ninda na natatakot, huli ta an saindang daga biyong magigin tiwangwang+ dahil sa kadahasan kan gabos na nakaistar diyan.+ 20 An pig-iistaran na mga siyudad magkakagaraba, asin an kadagaan magigin tiwangwang;+ asin mamimidbid nanggad nindo na ako si Jehova.”’”+

21 Asin nag-abot giraray sa sako an tataramon ni Jehova, na sinasabi: 22 “Aki nin tawo, ano ining kasabihan nindong ini sa Israel, ‘Naglilihis an mga aldaw, asin dai man nangyayari an lambang bisyon’?+ 23 Kaya sabihon mo sa sainda, ‘Ini an sinabi kan Soberanong Kagurangnan na Jehova: “Papapunduhon ko an kasabihan na ini, asin dai na ninda iyan gagamiton bilang kasabihan sa Israel.”’ Pero sabihon mo sa sainda, ‘Harani na an mga aldaw,+ asin mangyayari an lambang bisyon.’ 24 Huli ta dai na magkakaigwa nin ano man na bakong totoong bisyon o pambubuladas na hula* sa banwaan nin Israel.+ 25 ‘“Huli ta ako, si Jehova, an mataram. An ano man na sabihon ko mangyayari na mayo na nin pag-atraso.+ Sa panahon nindo,+ O rebelyosong banwaan, sasabihon ko an mensahe asin gigibuhon iyan,” an sabi kan Soberanong Kagurangnan na Jehova.’”

26 Nag-abot giraray sa sako an tataramon ni Jehova, na sinasabi: 27 “Aki nin tawo, ini an sinasabi kan banwaan* nin Israel, ‘An bisyon na nahihiling niya haloy pa bago mangyari, asin nagpopropesiya siya manungod sa maabot na panahon na harayo pa.’+ 28 Kaya sabihon mo sa sainda, ‘Ini an sinabi kan Soberanong Kagurangnan na Jehova: “‘Mayong maaatraso sa gabos na sinabi ko; mangyayari an ano man na sabihon ko,’ an sabi kan Soberanong Kagurangnan na Jehova.”’”