Bilang

6 Sinabi pa ni Jehova ki Moises: 2 “Kaulayon mo an mga Israelita asin sabihon mo sa sainda, ‘Kun an sarong lalaki o an sarong babayi maggibo nin sarong espesyal na promesa na mamumuhay siya bilang sarong Nazareo*+ para ki Jehova, 3 dapat siyang maglikay sa arak o sa iba pang inumon na de-alkohol. Dai siya dapat mag-inom nin sukà na hali sa arak o nin sukà na hali sa ano man na inumon na de-alkohol.+ Dai siya dapat mag-inom nin ano man na inumon na hali sa ubas, ni magkakan man nin ubas, iyan man bagong guno o pinaalang. 4 Sa gabos na panahon kan saiyang pagigin Nazareo dai siya dapat magkakan nin ano man na hali sa puon nin ubas, maski hilaw na ubas o ubak kaiyan.

5 “‘Dai dapat putulan an saiyang buhok* sa bilog na panahon na iprinomesa niyang magigin Nazareo siya.+ Dapat siyang magdanay na banal paagi sa pagpahalaba kan saiyang buhok sagkod sa aldaw na matapos an saiyang pagigin isinuway para ki Jehova. 6 Dai siya dapat magrani sa gadan na tawo* sa bilog na panahon na nagdadanay siyang nakasuway para ki Jehova. 7 Maski pa kun an nagadan iyo an saiyang ama o an saiyang ina o an saiyang tugang na lalaki o an saiyang tugang na babayi, dai niya puwedeng ramugan an saiyang sadiri,+ huling an tanda kan saiyang pagigin Nazareo para sa saiyang Diyos yaon sa payo niya.

8 “‘Banal siya ki Jehova sa gabos na panahon kan saiyang pagigin Nazareo. 9 Pero kun may biglang magadan sa kataid niya+ asin maramugan niya an buhok na nagsisimbolo sa pagigi niyang nakasuway para sa Diyos,* dapat niyang ahiton an buhok sa saiyang payo+ sa aldaw na kukumpirmaron siyang malinig. Dapat niyang ahiton iyan sa ikapitong aldaw. 10 Asin sa ikawalong aldaw, dapat siyang magdara nin duwang agbaan o duwang ugbon na salampati sa saserdote sa may entrada kan tolda nin pakipagtagbuan. 11 Iaatang kan saserdote an saro bilang dulot para sa kasalan asin an saro man bilang dulot na pigtututong asin gigibuhon niya an pagbayad sa kasalan kan Nazareo, ta nagkasala siya+ dahil sa gadan na tawo.* Dangan papabanalon niya an saiyang payo sa aldaw na iyan. 12 Isusuway niya giraray an saiyang sadiri para ki Jehova; pupunan niya giraray an panahon kan saiyang pagigin Nazareo. Asin madara siya nin sarong ugbon na lalaking karnero na masarong taon pa sana an edad bilang dulot para sa pagkakasala. Alagad, dai bibilangon an nakaaging panahon huling pigramugan niya an saiyang pagigin Nazareo.

13 “‘Ini an katugunan manungod sa Nazareo: Pag natapos na niya an panahon kan saiyang pagigin Nazareo,+ dadarahon siya sa may entrada kan tolda nin pakipagtagbuan. 14 Iaatang niya diyan an saiyang dulot para ki Jehova: sarong ugbon na lalaking karnero na daing depekto na masarong taon pa sana an edad bilang dulot na pigtututong,+ sarong babaying kordero na daing depekto na masarong taon pa sana an edad bilang dulot para sa kasalan,+ sarong lalaking karnero na daing depekto bilang atang sa pakikikabtang,+ 15 sarong basket nin mga tinapay na korteng pulseras na daing lebadura na gibo sa pinong harina na sinalakan nin lana saka mga mahimpis na tinapay na daing lebadura na linahidan nin lana, asin an dulot na tipasi+ saka mga dulot na inumon na idinudulot kaiba kan mga iyan.+ 16 Dadarahon iyan kan saserdote sa atubangan ni Jehova asin idudulot niya an saiyang dulot para sa kasalan asin an saiyang dulot na pigtututong. 17 Idudulot niya ki Jehova an lalaking karnero bilang atang sa pakikikabtang kaiba kan basket nin mga tinapay na daing lebadura, asin idudulot man kan saserdote an dulot na tipasi+ asin an dulot na inumon na idinudulot kaiba kan mga iyan.

18 “‘Dangan aahiton kan Nazareo an saiyang buhok sa payo*+ sa may entrada kan tolda nin pakipagtagbuan, asin kukuanon niya iyan, an buhok na naglaba sa panahon kan saiyang pagigin Nazareo, tapos ibubugtak niya iyan sa kalayo na nasa irarom kan atang sa pakikikabtang. 19 Asin kukuanon kan saserdote an sarong pinakalakagaan+ na abaga kan lalaking karnero, asin makua man siya nin sarong tinapay na korteng pulseras na daing lebadura hali sa basket saka sarong mahimpis na tinapay na daing lebadura. Ibubugtak niya an mga iyan sa mga palad kan Nazareo pagkatapos kaining ahiton an tanda kan saiyang pagigin Nazareo. 20 Asin ituturutabyon iyan kan saserdote bilang dulot na pigtuturutabyon sa atubangan ni Jehova.+ Itatao iyan sa saserdote bilang saiyang kahirasan, kaiba an daghan na dulot na pigtuturutabyon asin an paa na itinao bilang kontribusyon.+ Pagkatapos kaiyan, an saro na dating Nazareo puwede nang mag-inom nin arak.

21 “‘Ini an katugunan manungod sa Nazareo+ na nagpromesa: Kun nagpromesa siya na matao siya nin dulot para ki Jehova na labi pa sa kahagadan para sa saiyang pagigin Nazareo asin may kakayahan siyang itao iyan, dapat niyang utubon an saiyang promesa bilang pagpapahalaga sa katugunan manungod sa saiyang pagigin Nazareo.’”

22 Dangan sinabi ni Jehova ki Moises: 23 “Sabihan mo si Aaron saka an mga aki niya, ‘Arog kaini nindo bebendisyunan+ an banwaan nin Israel. Sabihon nindo sa sainda:

24 “Bendisyunan ka man lugod+ asin ingatan ni Jehova.

25 Pasirangon man lugod ni Jehova sa saimo an lalawgon* niya,+ asin pahilingan ka lugod niya nin kabuutan.

26 Pahilingan ka man lugod nin kabuutan ni Jehova* asin tawan ka nin katuninungan.”’+

27 Asin sambiton ninda an sakuyang pangaran sa banwaan nin Israel,+ tanganing mabendisyunan ko sinda.”+