Ikaduwang Cronica

36 Dangan kinua kan banwaan si Jehoahaz na aki ni Josias+ asin ginibo siyang hadi sa Jerusalem bilang kasalida kan saiyang ama.+ 2 An edad ni Jehoahaz kan siya magin hadi 23 anyos, asin tulong bulan siyang namahala sa Jerusalem. 3 Alagad, hinali siya kan hadi kan Ehipto sa puwesto niya sa Jerusalem asin pinamulta an nasyon nin 100 na talentong* pirak asin sarong talentong bulawan.+ 4 Dugang pa, ginibo kan hadi kan Ehipto na magin hadi kan Juda asin Jerusalem si Eliakim na tugang ni Jehoahaz asin rinibayan nin Jehoiakim an saiyang pangaran. Pero an tugang niyang si Jehoahaz, kinua ni Neco+ asin dinara ini sa Ehipto.+

5 An edad ni Jehoiakim+ kan siya magin hadi 25 anyos, asin namahala siya sa Jerusalem sa laog nin 11 taon. Padagos niyang ginibo kun ano an maraot sa paghiling ni Jehova na saiyang Diyos.+ 6 Sinalakay siya ni Hading Nabucodonosor+ kan Babilonya tanganing kadenahan siya nin duwang kadenang tanso para madara siya sa Babilonya.+ 7 Asin kinua ni Nabucodonosor an nagkapira sa mga kagamitan na nasa harong ni Jehova asin ilinaag niya an mga ini sa palasyo niya sa Babilonya.+ 8 Kun manungod sa iba pang nangyari sa buhay ni Jehoiakim, an makababalding mga bagay na ginibo niya asin an mga maraot na bagay manungod sa saiya, nakasurat iyan sa Libro kan mga Hadi kan Israel asin kan Juda; asin si Jehoiakin na saiyang aki an nagsalida sa saiya bilang hadi.+

9 An edad ni Jehoiakin+ kan siya magin hadi 18 anyos, asin tulong bulan may sampulong aldaw siyang namahala sa Jerusalem; asin padagos niyang ginibo kun ano an maraot sa paghiling ni Jehova.+ 10 Sa kapinunan kan taon,* nagsugo si Hading Nabucodonosor tanganing darahon sa Babilonya si Jehoiakin,+ kaiba an mahahalagang mga kagamitan na nasa harong ni Jehova.+ Asin ginibo niyang hadi kan Juda asin Jerusalem si Zedekias na tugang kan ama ni Jehoiakin.+

11 An edad ni Zedekias+ kan siya magin hadi 21 anyos, asin namahala siya sa Jerusalem sa laog nin 11 taon.+ 12 Padagos niyang ginibo kun ano an maraot sa paghiling ni Jehova na saiyang Diyos. Dai siya nagpakumbaba sa atubangan kan propetang si Jeremias,+ na nagtaram suno sa pagbuot ni Jehova. 13 Nagrebelde man siya ki Hading Nabucodonosor,+ na nagpasumpa sa saiya sa ngaran nin Diyos; asin nagdanay na matagas an saiyang payo* saka an saiyang puso asin habo niyang magdulok ki Jehova na Diyos kan Israel. 14 Grabe an pagkabakong maimbod kan gabos na pamayo kan mga saserdote pati kan banwaan. Ginigibo ninda an gabos na makababalding bagay na ginigibo kan mga nasyon, asin rinamugan ninda an harong ni Jehova+ na pinabanal niya sa Jerusalem.

15 Padagos sindang pinatanidan ni Jehova na Diyos kan saindang mga apuon paagi kan saiyang mga mensahero, pauruutro niya sindang pinatanidan, huling nahirak siya sa saiyang banwaan asin sa saiyang irukan. 16 Alagad pigparatuya-tuya lang ninda an mga mensahero kan tunay na Diyos,+ asin hinamak ninda an mga tataramon niya+ saka inulog-ulog an saiyang mga propeta,+ sagkod na maanggot na marhay si Jehova sa banwaan niya,+ sagkod na dai na sinda kayang paumayan.

17 Kaya pinasalakay niya laban sa sainda an hadi kan mga Caldeo,+ na guminadan kan mga hoben nindang lalaki sa saindang santuwaryo+ paagi sa espada;+ dai siya nahirak sa hoben na lalaki o sa daraga, sa gurang man o maluya na.+ Gabos itinao nin Diyos sa kamot niya.+ 18 Gabos na kagamitan sa harong kan tunay na Diyos, dakula asin sadit, siring man an mga kayamanan sa harong ni Jehova saka an mga kayamanan kan hadi patin kan saiyang mga pamayo,* gabos dinara niya sa Babilonya.+ 19 Sinulo niya an harong kan tunay na Diyos,+ rinumpag an pader kan Jerusalem,+ sinulo an gabos na may matibay na depensang tore kaiyan, asin linaglag an gabos na bagay na may halaga.+ 20 Binihag niya asin dinara sa Babilonya an mga dai nagadan sa espada,+ asin nagin mga lingkod niya sinda+ saka kan saiyang mga aki sagkod na magpuon na mamahala an kahadian* nin Persia,+ 21 tanganing mautob an tataramon ni Jehova na sinabi ni Jeremias,+ sagkod na mabayadan kan kadagaan an mga sabbath kaini.+ Sa gabos na panahon na tiwangwang iyan, nasunod kaiyan an sabbath, tanganing mautob an 70 taon.+

22 Kan inot na taon ni Hading Ciro+ kan Persia, tanganing mautob an tataramon ni Jehova na sinabi ni Jeremias,+ pinahiro ni Jehova si* Hading Ciro kan Persia na gumibo nin sarong paisi* sa bilog niyang kahadian, na ipinasurat man niya.+ Iyan nagsasabi: 23 “Ini an sabi ni Hading Ciro kan Persia, ‘Itinao sa sako ni Jehova na Diyos kan kalangitan an gabos na kahadian sa daga,+ asin sinugo niya ako na itugdok siya nin harong sa Jerusalem, na nasa Juda.+ An siisay man sa saindo na kabilang sa banwaan niya, giyahan lugod siya ni Jehova na saiyang Diyos, asin magduman siya.’”+