Ikaduwang Cronica

28 An edad ni Ahaz+ kan siya magin hadi 20 anyos, asin namahala siya sa Jerusalem sa laog nin 16 na taon. Dai niya ginibo kun ano an tama sa paghiling ni Jehova, bakong arog kan ginibo ni David na saiyang apuon.+ 2 Imbes, inarog niya an mga ginibo kan mga hadi kan Israel,+ asin naggibo pa ngani siya nin mga metal na estatuwa*+ kan mga Baal. 3 Apuwera kaini, nagdulot siya nin atang na aso sa Kababan kan Aki ni Hinom* asin sinulo niya an saiyang mga aki bilang atang;+ inarog niya an makababalding mga gibo-gibo kan mga nasyon+ na pinalayas ni Jehova sa atubangan kan mga Israelita. 4 Pirmi man siyang nag-aatang asin nagdudulot nin atang na aso sa mga halangkaw na lugar,+ sa ibabaw kan mga bulod, asin sa sirong kan lambang marambong na kahoy.+

5 Huli kaini, itinao siya ni Jehova na saiyang Diyos sa kamot kan hadi kan Siria,+ kaya nadaog ninda siya asin dakulon an dinara nindang bihag pasiring sa Damasco.+ Itinao man siya sa kamot kan hadi kan Israel, na kadakul kan ginaradan sa saiya asin sa mga kahimanwa niya. 6 Mala ta sa saro sanang aldaw, ginadan ni Peka+ na aki ni Remalias an 120,000 sa Juda, gabos maiisog na lalaki, huling binayaan ninda si Jehova na Diyos kan saindang mga apuon.+ 7 Asin ginadan ni Zicri, sarong parapakilaban na Efraimita, si Maaseias na aki kan hadi saka si Azrikam na namamahala sa palasyo,* asin si Elkana na ikaduwa sa hadi. 8 Apuwera diyan, binihag kan mga Israelita an 200,000 sa saindang mga tugang—mga babayi, mga aking lalaki, asin mga aking babayi; dakulon man sindang sinamsam, asin dinara ninda sa Samaria an sinamsam ninda.+

9 Alagad igwa kaidto duman nin sarong propeta si Jehova na an pangaran Oded. Nagluwas siya asin inatubang an hukbo na padangadang sa Samaria asin sinabi niya sa sainda: “Magdangog kamo! Naanggot sa Juda si Jehova na Diyos kan saindong mga apuon kun kaya itinao niya sinda sa saindong kamot,+ tapos ginaradan nindo sinda nin may kabangisan na nakaabot sagkod sa kalangitan. 10 Asin ngunyan, plano nindong gibuhon na mga suruguon nindong lalaki saka mga suruguon nindong babayi an mga taga Juda asin Jerusalem.+ Bakong may kasalan man kamo ki Jehova na saindong Diyos? 11 Magdangog kamo sako ngunyan asin ibalik nindo an mga binihag nindo hali sa saindong mga tugang, ta grabe an kaanggutan ni Jehova sa saindo.”

12 Huli kaini, an nagkapira sa mga pamayo kan mga Efraimita na si Azarias na aki ni Jehohanan, Berekias na aki ni Mesilemot, Jehizkias na aki ni Salum, asin Amasa na aki ni Hadlai, kinumprontar an mga nag-arabot hali sa pakikipaglaban, 13 asin sinabi ninda sa sainda: “Dai nindo pagdarahon digdi an mga bihag, ta magkakasala kita ki Jehova. Makakadagdag lang sa satong mga kasalan asin sa satong pagkakasala an pinaplano nindong gibuhon. Kadakul na kan pagkakasala ta asin angguton na siya sa Israel.” 14 Kaya itinao kan mga armadong suldados sa mga pamayo* asin sa bilog na katiripunan* an mga bihag saka an mga samsam.+ 15 Dangan rinanihan kan mga inasignaran na lalaki an mga bihag asin kinurua sinda, tapos tinawan ninda nin mga bado hali sa samsam an gabos na huba. Kaya binaduan ninda sinda asin tinawan nin sandalyas, kakanon saka inumon, asin lana para sa saindang kublit. Pinasakay man ninda sa mga asno an mga maluya asin dinara sinda gabos pasiring sa mga tugang kan mga ini sa Jerico, an siyudad nin mga puon nin palma. Pagkatapos, nagbalik na sinda sa Samaria.

16 Kan panahon na iyan, naghagad nin tabang si Hading Ahaz sa mga hadi kan Asiria.+ 17 Asin nag-arabot giraray an mga Edomita asin sinalakay an Juda tapos nagdara nin mga bihag. 18 Sinalakay man kan mga Filisteo+ an mga siyudad kan Sefela+ asin an Negeb sa teritoryo kan Juda asin sinakop an Bet-semes,+ an Aijalon,+ an Gederot, an Soco saka an nakapalibot na mga banwa diyan,* an Timnah+ saka an nakapalibot na mga banwa diyan, asin an Gimzo saka an nakapalibot na mga banwa diyan; asin nag-istar sinda duman. 19 Ibinaba* ni Jehova an Juda huli ki Hading Ahaz kan Israel; pinabayaan kaya kaini an Juda na magin daing pakundangan, na nagresulta sa grabeng kawaran nin kaimbudan ki Jehova.

20 Pag-abot nin panahon, sinalakay siya ni Hading Tilgat-pilneser+ kan Asiria asin pinasakitan+ siya imbes na tabangan. 21 Huling bago kaini, kinurua ni Ahaz an laog kan harong ni Jehova asin kan harong* kan hadi+ saka kan mga harong kan mga halangkaw na opisyal* asin tinawan niya nin regalo an hadi kan Asiria; pero dai iyan nakatabang sa saiya. 22 Asin sa panahon na nasa kasakitan siya, lalo pang dai nagin maimbod ki Jehova si Hading Ahaz. 23 Nag-atang siya sa mga diyos kan Damasco+ na duminaog sa saiya,+ asin nagsabi siya: “An mga hadi kan Siria tinatabangan kan saindang mga diyos, kaya maatang ako sa mga ini tanganing tabangan man ako.”+ Alagad an mga ini an nagin dahilan kan pagbagsak niya asin kan bilog na Israel. 24 Tinipon man ni Ahaz an mga kagamitan na nasa harong kan tunay na Diyos; dangan piniridaso niya an mga kagamitan na nasa harong kan tunay na Diyos,+ isinara an mga pinto kan harong ni Jehova,+ asin naggibo siya para sa sadiri niya nin mga altar sa kada kanto kan Jerusalem. 25 Asin naggibo siya nin mga halangkaw na lugar sa gabos na siyudad kan Juda tanganing magdulot nin atang na aso sa ibang mga diyos,+ asin pinaanggot niya si Jehova na Diyos kan saiyang mga apuon.

26 Kun manungod sa iba pang nangyari sa saiyang buhay, an gabos niyang ginibo puon sa kapinunan sagkod sa katapusan, nakasurat iyan sa Libro kan mga Hadi kan Juda asin kan Israel.+ 27 Dangan nagadan* si Ahaz, asin ilinubong ninda siya sa siyudad, sa Jerusalem, pero dai ninda siya dinara sa lubungan kan mga hadi kan Israel.+ Asin si Hezekias na saiyang aki an nagsalida sa saiya bilang hadi.