Esdras

3 Pag-abot kan ikapitong bulan,+ kan an mga Israelita* yaon na sa saindang mga siyudad, nagtiripon sinda sa Jerusalem na nagkakasararo. 2 Nagpuon sa pagtrabaho si Jesua+ na aki ni Jehozadak asin an kapwa niya mga saserdote saka si Zerubabel+ na aki ni Sealtiel+ asin an mga tugang niya. Ginibo ninda an altar kan Diyos nin Israel tanganing makapagdulot sinda nin mga atang na pigtututong sa ibabaw kaiyan, arog kan nakasurat sa Katugunan ni Moises,+ an lingkod kan tunay na Diyos.

3 Kaya ginibo ninda an altar sa dating kinamumugtakan kaiyan, maski natatakot sinda sa mga tawo kan mga nasyon na nakapalibot sa sainda,+ asin pinunan ninda an pagdulot ki Jehova nin mga atang na pigtututong sa ibabaw kaiyan, an pang-aga asin an pambangging mga atang na pigtututong.+ 4 Dangan isinelebrar ninda an Kapiyestahan nin mga Payag-payag* sigun sa kun ano an nasusurat,+ asin aroaldaw sindang nagdulot nin mga atang na pigtututong na an bilang kauyon kan kahagadan sa kada aldaw.+ 5 Pagkatapos, apuwera sa dulot na pigtututong na regular na idinudulot,+ inaatang na man ninda an mga dulot para sa mga bagong bulan+ asin idtong para sa gabos na pinabanal na mga panahon nin kapiyestahan+ ni Jehova, saka idtong mga hali sa gabos na gustong magtao nin gikan-sa-buot na dulot+ para ki Jehova. 6 Puon sa inot na aldaw kan ikapitong bulan,+ nagdulot na sinda nin mga atang na pigtututong para ki Jehova, dawa ngani dai pa nailalatag an pundasyon kan templo ni Jehova.

7 Tinawan ninda nin kuwarta an mga paratabas nin gapo+ saka an mga panday,+ asin nagtao man sinda nin kakanon saka inumon asin lana sa mga taga Sidon asin sa mga taga Tiro huling dinarahan sinda kan mga ini nin mga tablon na sedro na pigbiyahe sa dagat hali sa Lebanon pasiring sa Jope,+ kauyon kan awtorisasyon na itinao sa sainda ni Hading Ciro kan Persia.+

8 Kan ikaduwang bulan kan ikaduwang taon puon kan mag-abot sinda sa harong kan tunay na Diyos sa Jerusalem, nagpuon sa gibuhon na pagtugdok si Zerubabel na aki ni Sealtiel, si Jesua na aki ni Jehozadak saka an iba pa nindang mga tugang, an mga saserdote saka an mga Levita, asin an gabos na iba pang nagbalik sa Jerusalem hali sa pagkabihag;+ itinalaga ninda an mga Levita na 20 anyos pataas na iyo an mamahala sa pagtrabaho kan harong ni Jehova. 9 Kaya si Jesua, an mga aki niya saka an saiyang mga tugang, asin si Kadmiel saka an mga aki kaini, na mga aki ni Juda, nagtarabangan sa pamamahala sa mga nagtatrabaho sa harong kan tunay na Diyos, kaiba an mga aki ni Henadad,+ an saindang mga aki asin an saindang mga tugang, na mga Levita.

10 Kan mailatag na kan mga paratugdok an pundasyon kan templo ni Jehova,+ an mga saserdote na nakasulot kan saindang opisyal na bado asin may mga trumpeta,+ saka an mga Levita, na mga aki ni Asaf, na may mga simbal, nagtirindog tanganing umawon si Jehova kauyon kan ipinagbuot ni Hading David kan Israel.+ 11 Asin nagsurusirimbagan sinda sa pagkanta+ nin mga pag-umaw asin pasasalamat ki Jehova, “huling marahay siya; nagdadanay sagkod lamang an maimbod na pagkamuot niya sa Israel.”+ Tapos an gabos na tawo nagkururahaw nin makusog sa pag-umaw ki Jehova huling nailatag na an pundasyon kan harong ni Jehova. 12 Dakul na mga saserdote, mga Levita, asin mga pamayo kan mga angkan—an mga gurang na lalaki na nakahiling pa kan dating harong+—an naghiribi nin makusog kan mahiling nindang ilinalatag na an pundasyon kan harong na ini, mantang an dakul na iba pa nagkururahaw nin todo huli sa kaugmahan.+ 13 Kaya sa pagdangog kan mga tawo, dai ninda maaraman kun arin idtong mga kurahaw nin kaugmahan asin kun arin idtong mga hibi, dahil makusugon an kurahaw kan mga tawo, mala ta dangog-dangog iyan sagkod sa harayo.