Bilang

16 Dangan nag-iribanan si Kora+ na aki ni Izar,+ na aki ni Kohat,+ na aki ni Levi,+ asin si Datan saka si Abiram na mga aki ni Eliab,+ asin si On na aki ni Peleth, na mga gikan ni Ruben.+ 2 Nagkasararo sinda laban ki Moises kaiba an 250 lalaking Israelita, na mga pamayo kan katiripunan, mga pinili sa katiripunan* asin mga prominenteng lalaki. 3 Kaya nagtiripon sinda laban+ ki Moises saka ki Aaron asin sinabi ninda sa sainda: “Sobra na kamo! Banal an bilog na katiripunan,+ gabos sinda, asin yaon sa tahaw ninda si Jehova.+ Kaya, ano ta ilinalangkaw nindo an saindong sadiri sa kongregasyon ni Jehova?”

4 Kan madangog iyan ni Moises, suminubsob siya sa daga. 5 Dangan sinabi niya ki Kora asin sa gabos na suportador kaini: “Sa agang aga, ipapahiling ni Jehova kun siisay an sa saiya+ asin kun siisay an banal saka kun siisay an dapat na dumulok sa saiya,+ asin an siisay man na pilion niya+ iyo an madulok sa saiya. 6 Gibuhon nindo ini: Magkua kamo nin mga bugtakan nin baga,+ ika Kora saka an gabos na suportador mo,+ 7 asin sa aga, bugtakan nindo iyan nin baga asin maglaag kamo diyan nin insenso sa atubangan ni Jehova, asin an saro na pipilion ni Jehova,+ siya an saro na banal. Grabe na an ginigibo nindo, kamong mga aki ni Levi!”+

8 Tapos sinabi ni Moises ki Kora: “Magdangog tabi kamo mga aki ni Levi. 9 Kulang pa daw sa saindo na an Diyos nin Israel isinuway kamo sa katiripunan nin Israel+ asin tinugutan kamong makadulok sa saiya tanganing gibuhon an paglilingkod sa tabernakulo ni Jehova asin tanganing umatubang sa katiripunan para maglingkod sa sainda,+ 10 asin na irinani niya kamo sa saiya kaiba kan gabos nindong tugang, an mga aki ni Levi? Ano, pati an pagkasaserdote gusto pa nindong mapasaindo?+ 11 Sa dahilan na iyan, ika saka an gabos mong suportador, nagkatiripon kamo laban ki Jehova. Kun manungod ki Aaron, siisay siya para pagparagurumod-gumudan nindo?”+

12 Paghaloy-haloy, ipinaapod ni Moises si Datan saka si Abiram+ na mga aki ni Eliab, pero nagsabi sinda: “Dai kami madiyan! 13 Kulang pa daw na ilinuwas mo kami sa sarong daga na nagbubulos nin gatas saka tangguli tangani sanang magadan sa kaawagan?+ Ngunyan gusto mo pang maghadi-hadian* sa samo? 14 Mala, dai mo man baga kami nadara sa sarong daga na nagbubulos nin gatas saka tangguli+ o napamanahan nin uma asin ubasan. Ano, huhulwaton mo an mga mata kan mga tawong idto? Dai kami madiyan!”

15 Kaya naanggot na marhay si Moises asin nagsabi ki Jehova: “Dai mo pag-akuon an saindang dulot na tipasi. Mayo akong kinua sa sainda maski sarong asno, asin dai akong ginibuhan nin maraot dawa saro sa sainda.”+

16 Tapos sinabi ni Moises ki Kora: “Mag-atubang ka sa aga ki Jehova kaiba an gabos mong suportador, ika asin sinda saka si Aaron. 17 Darahon kan kada saro an saiyang bugtakan nin baga asin lagan iyan nin insenso, asin iaatubang kan kada saro an saiyang bugtakan nin baga sa atubangan ni Jehova, 250 bugtakan nin baga, pati an sa saimo saka ki Aaron, an kanya-kanya nindong bugtakan nin baga.” 18 Kaya dinara kan kada saro sa sainda an saiyang bugtakan nin baga, asin binugtakan ninda iyan nin baga asin insenso tapos nagtindog sinda sa may entrada kan tolda nin pakipagtagbuan kaiba si Moises saka si Aaron. 19 Kan magkatiripon na ni Kora an saiyang mga suportador+ laban sa saindang duwa sa may entrada kan tolda nin pakipagtagbuan, nahiling kan bilog na katiripunan an kamurawayan ni Jehova.+

20 Asin sinabi ni Jehova ki Moises saka ki Aaron: 21 “Sumuway kamo sa grupong ini, tanganing mapuho ko tulos sinda.”+ 22 Huli kaini, suminubsob sinda sa daga asin nagsabi: “O Diyos, an Diyos na nagtao nin buhay sa gabos na tawo,*+ dahil daw sa kasalan nin sarong tawo maaanggot ka na sa bilog na katiripunan?”+

23 Dangan sinabi ni Jehova ki Moises: 24 “Kaulayon mo an katiripunan asin sabihan mo sinda, ‘Rumayo kamo sa palibot kan mga tolda ni Kora, Datan, asin Abiram!’”+

25 Tapos nagduman si Moises ki Datan saka ki Abiram, asin an kamagurangan+ kan Israel uminiba sa saiya. 26 Sinabihan niya an katiripunan: “Rumayo tabi kamo sa mga tolda kan mga maraot na lalaking ini asin dai kamo magduta* sa ano man na sadiri ninda, tanganing dai kamo mapara huli sa kasalan ninda.” 27 Nagrayo tulos sinda sa palibot kan mga tolda ni Kora, Datan, asin Abiram, dangan nagluwas si Datan saka si Abiram, asin nagtindog sinda sa may laugan kan saindang mga tolda, kaiba kan saindang mga agom, mga aki, asin mga saradit pang aki.

28 Dangan nagsabi si Moises: “Sa paaging ini maaaraman nindo na sinugo ako ni Jehova para gibuhon an gabos na bagay na ini, na bako ko ining sadiring kabutan:* 29 Kun an mga tawong ini magkagaradan paagi sa natural na kawsa nin kagadanan asin kun an padusa sa sainda kapareho kan sa gabos na tawo, kun siring, dai ako sinugo ni Jehova.+ 30 Pero kun may gibuhon si Jehova sa sainda na pambihira asin bumuka an daga* tapos halunon sinda pati an gabos nindang sadiri asin mahulog sindang buhay sa Lubungan,* maaaraman nanggad nindo na dai iginalang kan mga tawong ini si Jehova.”

31 Insigida pagkasabi niya kaiyan, guminatak an daga na natitindugan ninda.+ 32 Asin buminuka an daga* tapos hinalon sinda kaiba an saindang mga pamilya asin an gabos na kuminampi ki Kora+ pati an gabos nindang pagsadiri. 33 Kaya nahulog sinda nin buhay sa Lubungan,* pati an gabos na kuminampi sa sainda, asin tinambunan sinda kan daga, kaya napara sinda sa katiripunan.*+ 34 An gabos na Israelita na nasa palibot ninda nagdurulag asin nagkururahaw huli sa takot, na nagsasarabi: “’Baad halunon man kita kan daga!” 35 Tapos may luminuwas na kalayo na hali ki Jehova+ asin tinumtom kaiyan an 250 lalaki na nagdudulot nin insenso.+

36 Sinabi ni Jehova ki Moises: 37 “Sabihan mo si Eleazar na aki ni Aaron na saserdote na kuruanon sa kalayo an mga bugtakan nin baga,+ huling mga banal idto. Sabihan mo man siya na iwararak sa huruharayo an mga baga. 38 An mga bugtakan nin baga kan mga nagkagaradan huli sa saindang pagkakasala dapat na gibuhon na maninipis na metal para ikalupkop sa altar,+ huling ginamit ninda an mga iyan sa pagdulot sa atubangan ni Jehova, asin nagin banal an mga iyan. Dapat iyan na magserbing tanda para sa mga Israelita.”+ 39 Kaya kinurua ni Eleazar na saserdote an mga tansong bugtakan nin baga na ginamit kan mga nagkasurulo, asin pigpurulpog iyan para magin pangkalupkop sa altar, 40 arog kan sinabi sa saiya ni Jehova paagi ki Moises. Pagirumdom iyan sa mga Israelita na mayo dapat nin ibang tawo* na bakong gikan ki Aaron an magrani para magsulo nin insenso sa atubangan ni Jehova,+ asin tanganing mayo nin mag-arog ki Kora saka sa saiyang mga suportador.+

41 Kan suminunod mismong aldaw, an bilog na katiripunan kan mga Israelita naggurumod-gumod laban ki Moises saka ki Aaron,+ na sinasabi: “Kamong duwa, ginaradan nindo an mga kabilang sa banwaan ni Jehova.” 42 Kan magtiripon laban ki Moises saka ki Aaron an katiripunan, asin kan maghiling sinda gabos sa tolda nin pakipagtagbuan, uya! natahuban iyan kan panganuron, asin nahiling ninda an kamurawayan ni Jehova.+

43 Nagduman si Moises saka si Aaron sa atubangan kan tolda nin pakipagtagbuan,+ 44 asin sinabi ni Jehova ki Moises: 45 “Rumayo kamo sa katiripunan na ini, tanganing mapuho ko tulos sinda.”+ Huli kaini, suminubsob sinda sa daga.+ 46 Dangan sinabi ni Moises ki Aaron: “Kuana an bugtakan nin baga tapos bugtakan mo iyan nin baga na hali sa altar+ saka lagan mo iyan nin insenso asin magduman ka tulos sa katiripunan asin gumibo ka nin pagbayad para sa saindang kasalan,+ ta grabe an kaanggutan ni Jehova. Nagpuon na an damat!” 47 Kaya dali-daling kinua iyan ni Aaron, arog kan sinabi ni Moises, asin duminalagan siya pasiring sa katiripunan,* asin uya! nagpuon na an damat sa banwaan. Kaya naglaag siya nin insenso sa bugtakan nin baga asin nagpuon na gumibo nin pagbayad para sa kasalan kan banwaan. 48 Nagdanay siyang nakatindog sa tahaw kan mga gadan asin kan mga buhay, asin kan huri napundo an damat. 49 An mga nagkagaradan sa damat uminabot nin 14,700, apuwera pa sa mga nagkagaradan dahil ki Kora. 50 Kan napundo na an damat, buminalik si Aaron ki Moises sa may entrada kan tolda nin pakipagtagbuan.