Salmo

145 Papamurawayon taka, O sakuyang Diyos na Hadi,+

Uumawon ko an saimong pangaran sagkod nuarin pa man.+

 2 Bilog na aldaw takang uumawon;+

Uumawon ko an saimong pangaran sagkod nuarin pa man.+

 3 Si Jehova nangungurog asin maninigo nanggad na umawon;+

An saiyang kadakulaan dai kayang siyasaton.*+

 4 Uumawon kan gabos na henerasyon an saimong mga gibo;

Isasaysay ninda an makapangyarihan mong mga ginibo.+

 5 Mataram sinda manungod sa mamuraway na kagayunan kan saimong kamahalan+

Asin huhurop-hurupon ko an makangangalas mong mga ginibo.

 6 Mataram sinda manungod sa kahanga-hanga mong mga ginibo,*

Asin ipapahayag ko an kamurawayan mo.

 7 Mabulak-bugak an mga pag-umaw ninda mantang ginigirumdom an saimong abundang karahayan,+

Asin maugma sindang makururahaw huli sa saimong katanusan.+

 8 Si Jehova mapagmalasakit* asin mahihirakon,+

Dai tulos naaanggot asin dakula an maimbod na pagkamuot.+

 9 Si Jehova marahay sa gabos,+

Asin an saiyang pagkahirak hiling-hiling sa gabos na ginigibo niya.

10 Papamurawayon ka kan gabos mong gibo, O Jehova,+

Asin uumawon ka kan mga maimbod sa saimo.+

11 Ibabalangibog ninda an kamurawayan kan saimong pagkahadi+

Asin mataram manungod sa saimong kakusugan,+

ל [Lamed]

12 Tanganing ipaisi sa mga tawo an makapangyarihan mong mga ginibo+

Asin an mamuraway na kagayunan kan pagkahadi mo.+

13 An saimong pagkahadi sarong daing sagkod na pagkahadi,

Asin an saimong pamamahala nagdadanay sa gabos na henerasyon.+

14 Inaalalayan ni Jehova an gabos na natutumba+

Asin itinitindog an gabos na nakaduko.+

15 An gabos na mata nakahiling sa saimo na naglalaom;

Tinatawan mo sinda kan saindang kakanon sa tamang panahon.+

16 Ibinubuka mo an saimong kamot

Asin pinapaniguan mo an mawot kan lambang bagay na may buhay.+

17 Matanos si Jehova sa gabos na dalan niya+

Asin maimbod sa gabos na ginigibo niya.+

18 Harani si Jehova sa gabos na nag-aapod sa saiya,+

Sa gabos na sinserong* nag-aapod sa saiya.+

19 Pinapaniguan niya an mawot kan mga may pagkatakot sa saiya;+

Dinadangog niya an paghagad ninda nin tabang, asin iliniligtas niya sinda.+

20 Binabantayan ni Jehova an gabos na namumuot sa saiya,+

Pero an gabos na maraot pupuhuon niya.+

21 Ipapahayag kan sakuyang nguso an pag-umaw ki Jehova;+

Lugod na umawon kan lambang bagay na may buhay* an saiyang banal na pangaran sagkod nuarin pa man.+