Bilang

22 Dangan naghali an mga Israelita asin nagkampo sa disyertong kapatagan kan Moab sa kampi kan Jordan na kahampang kan Jerico.+ 2 Nabaretaan ni Balak+ na aki ni Zipor an gabos na ginibo kan Israel sa mga Amorita, 3 asin natakot na marhay an Moab sa banwaan, huling dakulon sinda; talagang grabe an pagkapurisaw kan Moab huli sa mga Israelita.+ 4 Kaya nagsabi an Moab sa kamagurangan kan Midian:+ “Uubuson kan mga tawong* ini an gabos na yaon sa satong kapalibutan, arog nin sarong torong baka na minaubos kan duot* sa langtad.”

Kan panahon na iyan, si Balak na aki ni Zipor an hadi kan Moab. 5 Nagsugo siya nin mga mensahero ki Balaam na aki ni Beor na nasa Petor,+ na harani sa Salog* sa lugar na saiyang namundagan. Ipinaapod niya siya, na sinasabi: “Uya! May sarong banwaan na luminuwas sa Ehipto. Nalalakupan na ninda an ibabaw* kan daga,+ asin nag-iistar sinda ngunyan sa atubangan kan sakuyang teritoryo. 6 Magdigdi ka tabi asin sumpaon mo an banwaan na ini alang-alang sa sako,+ huli ta mas makusog sinda sa sako. Tibaad lamang madaog ko sinda asin mapalayas ko sinda sa daga, huling aram na aram ko na an siisay man na bendisyunan mo talagang binebendisyunan asin an siisay man na isumpa mo talagang isinusumpa.”

7 Kaya nagduman ki Balaam an kamagurangan kan Moab asin an kamagurangan kan Midian dara an pambayad para sa pagsumpa*+ asin sinabi sa saiya an mensahe ni Balak. 8 Sinabihan sinda ni Balaam: “Magpalihis kamo digdi nin banggi, asin sasabihon ko saindo an ano man na sabihon sako ni Jehova.” Kaya nakidagos ki Balaam an mga pamayo* kan Moab.

9 Dangan nagpahiling an Diyos ki Balaam asin nagsabi:+ “Siisay ining mga lalaking kaibanan mo?” 10 Nagsimbag si Balaam sa tunay na Diyos: “Nagpadara sa sako nin mensahe si Balak na aki ni Zipor, an hadi kan Moab, na sinasabi, 11 ‘Uya! Nakakalakop na sa ibabaw* kan daga an banwaan na luminuwas sa Ehipto. Magdigdi ka asin sumpaon mo sinda alang-alang sa sako.+ Tibaad lamang makaya kong labanan sinda asin mapalayas.’” 12 Pero sinabi kan Diyos ki Balaam: “Dai ka mag-iba sa sainda. Dai mo pagsumpaon an banwaan, huli ta binendisyunan sinda.”+

13 Pagkaaga, buminangon si Balaam asin sinabi sa mga pamayo* ni Balak: “Magpuli na kamo sa daga nindo, ta dai nagtugot si Jehova na mag-iba ako sa saindo.” 14 Kaya nagpuli an mga pamayo* kan Moab asin buminalik ki Balak asin nagsabi: “Habo ni Balaam na mag-iba sa samo.”

15 Alagad, nagsugo giraray si Balak nin mga pamayo,* mas dakul asin mas prominente kisa kan sa nainot na grupo. 16 Nagduman sinda ki Balaam asin nagsabi sa saiya: “Ini an sinabi ni Balak na aki ni Zipor, ‘Dai mo tabi pagtugutan na may ano man na makaulang sa saimo sa pagdigdi sa sako, 17 huling tatawan taka nin dakulaon na onra* asin gigibuhon ko an ano man na sabihon mo sa sako. Kaya magdigdi ka tabi, asin sumpaon mo an banwaan na ini alang-alang sa sako.’” 18 Pero nagsimbag si Balaam sa mga lingkod ni Balak: “Dawa pa itao sako ni Balak an sadiri niyang harong na pano nin plata asin bulawan, dai ko magigibo an ano man na bagay, sadit man o dakula, kun dai man iyan ipinagbuot ni Jehova na sakuyang Diyos.+ 19 Pero magpalihis man tabi kamo digdi nin banggi, ta ’baad may iba pang sabihon sa sako si Jehova.”+

20 Dangan kan pagkabanggi, nagpahiling an Diyos ki Balaam asin nagsabi sa saiya: “Kun nagdigdi an mga lalaking ini para ipaapod ka, mag-iba ka sa sainda. Pero an mga sasabihon ko sana sa saimo an puwede mong sabihon.”+ 21 Kaya buminangon si Balaam kan pagkaaga asin inandam an saiyang asno* tapos uminiba sa mga pamayo* kan Moab.+

22 Alagad naanggot na marhay sa saiya an Diyos huling nag-iba siya sa sainda, asin nagtindog an anghel ni Jehova sa tinampo tanganing ulangon siya. Nakasakay kaidto si Balaam sa saiyang asno, asin kaibanan niya an duwa niyang suruguon. 23 Asin kan mahiling kan asno an anghel ni Jehova na nakatindog sa tinampo na may kapot na espada, pinurbaran kaiyan na magsiko parayo sa tinampo asin magpasiring sa langtad. Pero pigparapakol ni Balaam an asno para bumalik iyan sa tinampo. 24 Dangan nagtindog an anghel ni Jehova sa sarong hayakpit na agihan na nasa tahaw nin duwang ubasan, na igwa nin kudal na gapo sa mag-ibong na gilid. 25 Kan mahiling kan asno an anghel ni Jehova, nagparasûsô ini sa kudal kaya naipit an bitis ni Balaam sa kudal. Dahil diyan, pigparapakol giraray ni Balaam an asno.

26 Nag-uruinutan an anghel ni Jehova asin nagtindog sa sarong hayakpit na lugar na dai nin masisikuan sa tuo o sa wala. 27 Kan mahiling kan asno an anghel ni Jehova, luminuko iyan mantang nakasakay diyan si Balaam. Grabe an kaanggutan ni Balaam kaya pigparapakol niya kan saiyang baston an asno. 28 Kan huri, pinangyari ni Jehova na makataram an asno,*+ asin nagsabi iyan ki Balaam: “Anong ginibo ko saimo para pagparapakulon mo ako nin tulong beses?”+ 29 Nagsimbag si Balaam sa asno: “Pigloloko mo kaya ako. Kun igwa lang akong kapot na espada, ginadan taka na!” 30 Dangan nagsabi an asno ki Balaam: “Bakong ako an saimong asno, an pigsasakayan mo sa bilog mong buhay sagkod ngunyan? Nagibo ko na lamang daw ini saimo?” Nagsimbag siya: “Dai!” 31 Dangan binuksan ni Jehova an mga mata ni Balaam,+ asin nahiling niya an anghel ni Jehova na nakatindog sa tinampo na may kapot na espada. Tulos-tulos siyang duminuko asin luminaob.

32 Tapos sinabihan siya kan anghel ni Jehova: “Ano ta tulong beses mong pigparapakol an saimong asno? Uya! Ako mismo an nagdigdi para ulangon ka, dahil pagsuway sa kabutan ko an ginigibo mo.+ 33 Nahiling ako kan asno asin tulong beses niyang pinurbaran na maglikay sa sako.+ Pa’no na sana kun dai siya naglikay sa sako? Nagadan taka na kuta asin pinabayaan na mabuhay an asno.” 34 Sinabi ni Balaam sa anghel ni Jehova: “Nagkasala ako, dai ko kaya aram na nakatindog ka sa tinampo para sabaton ako. Ngunyan kun maraot sa paghiling mo an pagduman ko, mabalik na ako.” 35 Alagad sinabi kan anghel ni Jehova ki Balaam: “Mag-iba ka sa mga lalaki, pero an mga sasabihon ko sana sa saimo an puwede mong sabihon.” Kaya nagpadagos si Balaam sa pagbaklay kaiba kan mga pamayo* ni Balak.

36 Kan mabaretaan ni Balak na nag-abot na si Balaam, tulos-tulos niyang sinabat ini sa siyudad kan Moab, na yaon sa pangpang kan Arnon na nasa may linderos kan teritoryo kan Moab. 37 Nagsabi si Balak ki Balaam: “Bakong ipinaapod taka? Ano ta dai ka nagdigdi sako? Anong paghuna mo, dai taka kayang tawan nin dakulaon na onra?”+ 38 Nagsimbag si Balaam ki Balak: “Buweno, uni na ako ngunyan saimo. Pero makakapagtaram daw ako nin maski ano? An puwede ko sanang sabihon iyo an mga sasabihon sa sako nin Diyos.”+

39 Kaya nag-iba si Balaam ki Balak, asin nagduman sinda sa Kiriat-huzot. 40 Nag-atang si Balak nin mga baka saka mga karnero asin itinao niya an iba kaiyan ki Balaam asin sa mga pamayo* na kaiba kaini. 41 Pagkaaga, iiniba ni Balak si Balaam patukad sa Bamot-baal; hali diyan natatanaw niya an bilog na banwaan.+